१०. पञ्ञत्तानुयोगो

६१. रूपधातुया रूपी पुग्गलोति? आमन्ता. कामधातुया कामी पुग्गलोति? न हेवं वत्तब्बे…पे….

६२. रूपधातुया रूपिनो सत्ताति? आमन्ता. कामधातुया कामिनो सत्ताति? न हेवं वत्तब्बे…पे….

६३. अरूपधातुया अरूपी पुग्गलोति? आमन्ता. कामधातुया कामी पुग्गलोति? न हेवं वत्तब्बे…पे….

६४. अरूपधातुया अरूपिनो सत्ताति? आमन्ता. कामधातुया कामिनो सत्ताति? न हेवं वत्तब्बे…पे….

६५. रूपधातुया रूपी पुग्गलो अरूपधातुया अरूपी पुग्गलो, अत्थि च कोचि रूपधातुया चुतो अरूपधातुं उपपज्जतीति? आमन्ता. रूपी पुग्गलो उपच्छिन्नो, अरूपी पुग्गलो जातोति? न हेवं वत्तब्बे…पे….

६६. रूपधातुया रूपिनो सत्ता अरूपधातुया अरूपिनो सत्ता, अत्थि च कोचि रूपधातुया चुतो अरूपधातुं उपपज्जतीति? आमन्ता. रूपी सत्तो उपच्छिन्नो, अरूपी सत्तो जातोति? न हेवं वत्तब्बे…पे….

६७. कायोति वा सरीरन्ति वा, सरीरन्ति वा कायोति वा, कायं अप्पियं करित्वा एसेसे एकट्ठे समे समभागे तज्जातेति? आमन्ता. पुग्गलोति वा जीवोति वा, जीवोति वा पुग्गलोति वा, पुग्गलं अप्पियं करित्वा एसेसे एकट्ठे समे समभागे तज्जातेति? आमन्ता. अञ्ञो कायो, अञ्ञो पुग्गलोति? आमन्ता. अञ्ञं जीवं, अञ्ञं सरीरन्ति? न हेवं वत्तब्बे.

आजानाहि निग्गहं. हञ्चि कायोति वा सरीरन्ति वा, सरीरन्ति वा कायोति वा, कायं अप्पियं करित्वा एसेसे एकट्ठे समे समभागे तज्जाते, पुग्गलोति वा जीवोति वा, जीवोति वा पुग्गलोति वा, पुग्गलं अप्पियं करित्वा एसेसे एकट्ठे समे समभागे तज्जाते, अञ्ञो कायो अञ्ञो पुग्गलो; तेन वत रे वत्तब्बे – ‘‘अञ्ञं जीवं अञ्ञं सरीर’’न्ति. यं तत्थ वदेसि – ‘‘वत्तब्बे खो – ‘कायोति वा सरीरन्ति वा, सरीरन्ति वा कायोति वा, कायं अप्पियं करित्वा एसेसे एकट्ठे समे समभागे तज्जाते, पुग्गलोति वा जीवोति वा, जीवोति वा पुग्गलोति वा, पुग्गलं अप्पियं करित्वा एसेसे एकट्ठे समे समभागे तज्जाते, अञ्ञो कायो अञ्ञो पुग्गलो,’ नो च वत्तब्बे – ‘अञ्ञं जीवं अञ्ञं सरीर’’’न्ति मिच्छा.

नो चे पन वत्तब्बे – ‘‘अञ्ञं जीवं अञ्ञं सरीर’’न्ति, नो च वत रे वत्तब्बे – ‘‘कायोति वा सरीरन्ति वा, सरीरन्ति वा कायोति वा, कायं अप्पियं करित्वा एसेसे एकट्ठे समे समभागे तज्जाते, पुग्गलोति वा जीवोति वा, जीवोति वा पुग्गलोति वा, पुग्गलं अप्पियं करित्वा एसेसे एकट्ठे समे समभागे तज्जाते, अञ्ञो कायो अञ्ञो पुग्गलो’’ति. यं तत्थ वदेसि – ‘‘वत्तब्बे खो – ‘कायोति वा सरीरन्ति वा, सरीरन्ति वा कायोति वा, कायं अप्पियं करित्वा एसेसे एकट्ठे समे समभागे तज्जाते, पुग्गलोति वा जीवोति वा, जीवोति वा पुग्गलोति वा, पुग्गलं अप्पियं करित्वा एसेसे एकट्ठे समे समभागे तज्जाते, अञ्ञो कायो अञ्ञो पुग्गलो’, नो च वत्तब्बे – ‘अञ्ञं जीवं अञ्ञं सरीर’’’न्ति मिच्छा…पे….

६८. कायोति वा सरीरन्ति वा, सरीरन्ति वा कायोति वा, कायं अप्पियं करित्वा एसेसे एकट्ठे समे समभागे तज्जातेति? आमन्ता. वुत्तं भगवता – ‘‘अत्थि पुग्गलो अत्तहिताय पटिपन्नो’’ति? आमन्ता. अञ्ञो कायो अञ्ञो पुग्गलोति? न हेवं वत्तब्बे.

आजानाहि पटिकम्मं. हञ्चि कायोति वा सरीरन्ति वा, सरीरन्ति वा कायोति वा, कायं अप्पियं करित्वा एसेसे एकट्ठे समे समभागे तज्जाते, वुत्तं भगवता – ‘‘अत्थि पुग्गलो अत्तहिताय पटिपन्नो,’’ तेन वत रे वत्तब्बे – ‘‘अञ्ञो कायो अञ्ञो पुग्गलो’’ति. यं तत्थ वदेसि – ‘‘वत्तब्बे खो – ‘कायोति वा सरीरन्ति वा, सरीरन्ति वा कायोति वा, कायं अप्पियं करित्वा एसेसे एकट्ठे समे समभागे तज्जाते, वुत्तं भगवता – अत्थि पुग्गलो अत्तहिताय पटिपन्नो,’ नो च वत्तब्बे – ‘अञ्ञो कायो अञ्ञो पुग्गलो’’’ति मिच्छा.

नो चे पन वत्तब्बे – ‘‘अञ्ञो कायो अञ्ञो पुग्गलो’’ति, नो च वत रे वत्तब्बे – ‘‘कायोति वा सरीरन्ति वा, सरीरन्ति वा कायोति वा, कायं अप्पियं करित्वा एसेसे एकट्ठे समे समभागे तज्जाते, वुत्तं भगवता – ‘अत्थि पुग्गलो अत्तहिताय पटिपन्नो’’’ति. यं तत्थ वदेसि – ‘‘वत्तब्बे खो – ‘कायोति वा सरीरन्ति वा, सरीरन्ति वा कायोति वा, कायं अप्पियं करित्वा एसेसे एकट्ठे समे समभागे तज्जाते, वुत्तं भगवता – अत्थि पुग्गलो अत्तहिताय पटिपन्नो,’ नो च वत्तब्बे – ‘अञ्ञो कायो अञ्ञो पुग्गलो’’’ति मिच्छा. (संखित्तं)

पञ्ञत्तानुयोगो.