६. पत्तपिण्डिकङ्गकथावण्णना

२९. अप्पटिकूलं कत्वा भुञ्जितुं वट्टति पटिकूलस्स भुत्तस्स अगण्हनम्पि सियाति अधिप्पायो. पमाणयुत्तमेव गण्हितब्बन्ति ‘‘एकभाजनमेव गण्हामी’’ति बहुं गहेत्वा न छड्डेतब्बं. नानारसतण्हाविनोदनन्ति नानारसभोजने तण्हाय विनोदनं. अत्र अत्र नानाभाजने ठिते नानारसे इच्छा एतस्साति अत्रिच्छो, तस्स भावो अत्रिच्छता, तस्सा अत्रिच्छताय पहानं. आहारे पयोजनमत्तदस्सिताति असम्भिन्ननानारसे गेधं अकत्वा आहारे सत्थारा अनुञ्ञातपयोजनमत्तदस्सिता. विसुं विसुं भाजनेसु ठितानि ब्यञ्जनानि गण्हतो तत्थ तत्थ साभोगताय सिया विक्खित्तभोजिता, न तथा इमस्स एकपत्तगतसञ्ञिनोति वुत्तं ‘‘अविक्खित्तभोजिता’’ति. ओक्खित्तलोचनोति पत्तसञ्ञिताय हेट्ठाखित्तचक्खु. परिभुञ्जेय्याति परिभुञ्जितुं सक्कुणेय्य.

इति पत्तपिण्डिकङ्गकथावण्णना.