आसीविसवग्ग

पठमदारुक्खन्धोपमसुत्त

पुच्छा – आसीविसवग्गे आवुसो पोराणकेहि धम्मसंगाहकमहाथेरेहि चतुत्थं संगीतं पठमदारुक्खन्धोपमसुत्तं भगवता कत्थ कं आरब्भ कथञ्च भासितं.

विस्सज्जना – कोसम्बियं भन्ते गङ्गाय नदिया तीरे सम्बहुले भिक्खू आरब्भ ‘‘पस्सथ नो तुम्हे भिक्खवे अम्हं महन्तं दारुक्खन्धं गङ्गाय नदिया सोतेन वुय्हमान’’न्ति एवमादिना भगवता भासिता.

उपचारवचनं

पुच्छा – कथञ्चावुसो तत्थ भगवता ओरिमतीरादीनं उपचारवचनानं अत्थो वित्थारेन विभजित्वा पकासितो.

विस्सज्जना – ओरिमं तीरन्ति खो भिक्खु छन्नेतं अज्झत्तिकानं आयतनानं अधिवचनं. पारिमं तीरन्ति खो भिक्खु छन्नेतं बाहिरानं आयतनानं अधिवचनं. मज्झे संसीदोति खो भिक्खु नन्दिरागस्सेतं अधिवचनं. थले उस्सादोति खो भिक्खु अस्मिमानस्सेतं अधिवचनन्ति एवमादिना भन्ते भगवता तत्थ ओरिमतीरादीनं उपचारवचनानं अत्थो वित्थारेन विभजित्वा पकासितो.

पुच्छा – इमस्मिं खो पन आवुसो सुत्ते भगवता भासिते विसेसतो कस्स कीदिसो अत्थो कथञ्च पटिलद्धो.

विस्सज्जना – इमस्मिं भन्ते सुत्ते भगवता भासिते विसेसतो नन्दस्स गोपालकस्स पब्बज्जा च उपसम्पदा च याव अरहत्ताच विसेसतो अत्थो अधिगतो.

लभेय्याहं भन्ते भगवतो सन्तिके पब्बज्जं, लभेय्यं उपसम्पदं.

तेन हि त्वं नन्द सामिकानं गावो निय्यातेहि.

गमिस्सन्ति भन्ते गावो वच्छगिद्धिनियो.

किंसुकोपमसुत्त

पुच्छा – तत्थेव आवुसो पोराणकेहि धम्मसंगाहकमहाथेरेहि अट्ठमं संगीतं किंसुकोपमसुत्तं भगवता कत्थ कं आरब्भ किस्मिं वत्थुस्मिं कथञ्च भासितं.

विस्सज्जना – सक्केसु भन्ते कपिलवत्थुस्मिं निग्रोधारामे अञ्ञतरं कारकं भिक्खुं आरब्भ भासितं. अञ्ञतरो भन्ते कारको भिक्खु चत्तारो खाणासवे भिक्खू ञाणदस्सनविसुद्धं पुच्छित्वा असन्तुट्ठो तेसं भिक्खूनं पञ्हावेय्याकरणेन येन भगवा तेनुपसङ्कमि. उपसङ्कमित्वा भगवन्तं एतदवोच ‘‘कित्तावता नु खो भन्ते भिक्खुनो दस्सनं सुविसुद्धं होती’’ति. तस्मिं वत्थुस्मिं ‘‘सेय्यथापि भिक्खु पुरिसस्स किंसुको अदिट्ठपुब्बो अस्स, सो येनञ्ञतरो पुरिसो किंसुकस्स दस्सावी तेनुपसङ्कमेय्या’’ति एवमादिना भन्ते भगवता भासितं.

छप्पाणकोपमसुत्त

पुच्छा – तत्थेव आवुसो पोराणकेहि धम्मसंगाहकमहाथेरेहि दसमं संगीतं छप्पाणकोपमसुत्तं भगवता कत्थ कं आरब्भ कथञ्च भासितं.

विस्सज्जना – सक्केसुयेव भन्ते सम्बहुले भिक्खू आरब्भ ‘‘सेय्यथापि, भिक्खवे पुरिसो अरुगत्तो पक्कगत्तो सरवनं पविसेय्या’ति एवमादिना भगवता भासितं.

पुच्छा – कथञ्चावुसो तत्थ भगवता असंवरो वित्थारेन विभजित्वा देसितो.

विस्सज्जना – कथञ्च भिक्खवे असंवरो होति, इध भिक्खवे भिक्खु चक्खुना रूपं दिस्वा पियरूपे रूपे अधिमुच्चति, अप्पियरूपे रूपे ब्यापज्जति, अनुपट्ठितकायस्सति च विहरति परित्तचेतसो. तञ्च चेतोविमुत्तिं पञ्ञाविमुत्तिं यथाभूतं नप्पजानाति, यत्थस्स ते उप्पन्ना पापका अकुसला धम्मा अपरिसेसा निरुज्झन्तीति एवमादिना भन्ते भगवता तत्थ असंवरो वित्थारेन विभजित्वा देसितो.

पुच्छा – कथञ्चावुसो तत्थ भगवता संवरो विभजित्वा वित्थारेन देसितो.

विस्सज्जना – कथञ्च भिक्खवे संवरो होति, इध भिक्खवे भिक्खु चक्खुना रूपं दिस्वा पियरूपे रूपे नाधिमुच्चति, अप्पियरूपे रूपे न ब्यापज्जतीति, एवमादिना भन्ते भगवता तत्थ संवरो विभजित्वा वित्थारेन देसितो.