५५. कत्त

भूतसद्देनेत्थाधिप्पेतत्थमुपदस्सेतुमाह- ‘भूतमतीत’मिच्चादि. अञ्ञथाति यद्यतिक्कन्तवचनो न सियाति अत्थो.

ननुचात्रेतरेतरनिस्सयदोसो पसज्जते, सती हि भूताधिकारेत्तो विधीयते, सति च त्ते भूतसद्दस्स निप्फत्तीति फुटो येवितरेतरनिस्सयदोसोति. नेसदोसो, सङ्केताति ब्यत्तो सद्दत्थसम्बन्धो चिरकालप्पवत्तो, नास्स किञ्चि असाधुत्तं, अतिक्कन्ते चास्स वुत्ति सद्दसत्तिसभावतो वेदितब्बा. क्तवन्ता दयोपि चरहि सद्दसत्तिसभावतो भूतेएव भविस्सन्तीति न वत्तब्बं. भूतसद्दो-यमतिक्कन्तत्थे पसिद्धो क्तवन्तादयोत्वप्पसिद्धा, अतो तेन पसिद्धत्थेनाप्पसिद्धानमन्वाख्यानं करीयतीति. भूतेति चायं पकतिविसेसनं वा सिया ‘भूतत्थे वत्तमाना’ति, पच्चयत्थ विसेसनं वा’भूते कत्तरी’ति, तत्र कस्सिदं विसेसनन्ति आहभूतेति पकतिविसेसन’न्ति. कुतोच्चाह- ‘सम्बन्धस्स चे’त्यादि. अथ पच्चयत्थविसेसने को दोसोच्चाह- ‘पच्चयत्थविसेसने हि’च्चादि. पच्चयत्थस्स कत्तुनो अनभिक्कन्तत्ता अयन्ति पयोगो नोपपज्जतेति भावो. अभिधेय्येति इमिना पयोजनादिं ब्यवच्छिन्दति.