९३. योसु

टादेसो-तिप्पसज्जतीति कस्मा वुत्तं ननु तदन्तस्स समुदायस्स पत्ते ‘‘छट्ठियन्तस्सा’’ति (१-१७) अन्तस्सेव होति, तथासति नेवातिप्पसङ्गो, तस्मा कस्मातिप्पसज्जतीति वुत्तन्ति, सच्चं, तथापि ‘झिस्सा’ति वत्तुं सक्कुणेय्यत्ते इस्साति वुत्तत्त [वुत्तन्थि] सामत्थियतो तदन्तस्स टादेसो-तिप्पसज्जतीति तथा वुत्तन्ति, ननु ‘झिस्सा’ति वुत्तेपि सोवातिप्पसङ्गो तदवत्थोयेवाति सच्चं, तथापि यदि समुदायस्स टादेसो-भिमतो सिया ‘तथा सति किं झग्गहणेन इस्सत्वेव वदेय्याति नातिप्पसज्जतीति, झग्गहणे नामन्ते इकारस्सेव झसञ्ञत्ताति इदं पन विसेसनत्तेन वत्तु मनिच्छिते युज्जति.