५. पञ्चमवग्गो

२३५. ‘‘एतदग्गं, भिक्खवे, मम साविकानं भिक्खुनीनं रत्तञ्ञूनं यदिदं महापजापतिगोतमी’’.

२३६. … महापञ्ञानं यदिदं खेमा.

२३७. … इद्धिमन्तीनं यदिदं उप्पलवण्णा.

२३८. … विनयधरानं यदिदं पटाचारा.

२३९. … धम्मकथिकानं यदिदं धम्मदिन्ना.

२४०. … झायीनं यदिदं नन्दा.

२४१. … आरद्धवीरियानं यदिदं सोणा.

२४२. … दिब्बचक्खुकानं यदिदं बकुला [सकुला (सी. स्या. कं. पी.)].

२४३. … खिप्पाभिञ्ञानं यदिदं भद्दा कुण्डलकेसा.

२४४. … पुब्बेनिवासं अनुस्सरन्तीनं यदिदं भद्दा कापिलानी.

२४५. … महाभिञ्ञप्पत्तानं यदिदं भद्दकच्चाना.

२४६. … लूखचीवरधरानं यदिदं किसागोतमी.

२४७. … सद्धाधिमुत्तानं यदिदं सिङ्गालकमाताति [सिगालमाताति (सी. स्या. कं. पी.)].

वग्गो पञ्चमो.