६. छट्ठवग्गो

२४८. ‘‘एतदग्गं, भिक्खवे, मम सावकानं उपासकानं पठमं सरणं गच्छन्तानं यदिदं तपुस्सभल्लिका [तपस्सुभल्लिका (सी. पी.)] वाणिजा’’.

२४९. … दायकानं यदिदं सुदत्तो गहपति अनाथपिण्डिको.

२५०. … धम्मकथिकानं यदिदं चित्तो गहपति मच्छिकासण्डिको.

२५१. … चतूहि सङ्गहवत्थूहि परिसं सङ्गण्हन्तानं यदिदं हत्थको आळवको.

२५२. … पणीतदायकानं यदिदं महानामो सक्को.

२५३. … मनापदायकानं यदिदं उग्गो गहपति वेसालिको.

२५४. … सङ्घुपट्ठाकानं यदिदं हत्थिगामको उग्गतो गहपति.

२५५. … अवेच्चप्पसन्नानं यदिदं सूरम्बट्ठो [सूरो अम्बट्ठो (सी. स्या. कं. पी.) सुरेबन्धो (क.)].

२५६. … पुग्गलप्पसन्नानं यदिदं जीवको कोमारभच्चो.

२५७. … विस्सासकानं यदिदं नकुलपिता गहपतीति.

वग्गो छट्ठो.