१. पठमवग्गो

१८८. ‘‘एतदग्गं, भिक्खवे, मम सावकानं भिक्खूनं रत्तञ्ञूनं यदिदं अञ्ञासिकोण्डञ्ञो’’ [अञ्ञातकोण्डञ्ञोति (क.), अञ्ञाकोण्डञ्ञो (सी. स्या. कं. पी.)].

१८९. … महापञ्ञानं यदिदं सारिपुत्तो.

१९०. … इद्धिमन्तानं यदिदं महामोग्गल्लानो.

१९१. … धुतवादानं [धुतङ्गधरानं (कत्थचि)] यदिदं महाकस्सपो.

१९२. … दिब्बचक्खुकानं यदिदं अनुरुद्धो.

१९३. … उच्चाकुलिकानं यदिदं भद्दियो काळिगोधायपुत्तो.

१९४. … मञ्जुस्सरानं यदिदं लकुण्डक [लकुण्टक (स्या. कं.)] भद्दियो.

१९५. … सीहनादिकानं यदिदं पिण्डोलभारद्वाजो.

१९६. … धम्मकथिकानं यदिदं पुण्णो मन्ताणिपुत्तो.

१९७. … संखित्तेन भासितस्स वित्थारेन अत्थं विभजन्तानं यदिदं महाकच्चानोति.

वग्गो पठमो.