8. упаккхат̣асиккха̄падам̣

527. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена ан̃н̃атаро пурисо паджа̄патим̣ етадавоча – ‘‘аййам̣ упанандам̣ чӣварена аччха̄десса̄мӣ’’ти. ассоси кхо ан̃н̃атаро пин̣д̣ача̄рико бхиккху тасса пурисасса имам̣ ва̄чам̣ бха̄сама̄насса. атха кхо со бхиккху йена̄йасма̄ упанандо сакйапутто тенупасан̇ками; упасан̇камитва̄ а̄йасмантам̣ упанандам̣ сакйапуттам̣ етадавоча – ‘‘маха̄пун̃н̃оси твам̣, а̄вусо упананда, амукасмим̣ ока̄се ан̃н̃атаро пурисо паджа̄патим̣ етадавоча – ‘‘аййам̣ упанандам̣ чӣварена аччха̄десса̄мӣ’’’ти. ‘‘аттха̄вусо, мам̣ со упат̣т̣ха̄ко’’ти. атха кхо а̄йасма̄ упанандо сакйапутто йена со пурисо тенупасан̇ками; упасан̇камитва̄ там̣ пурисам̣ етадавоча – ‘‘саччам̣ кира мам̣ твам̣, а̄вусо, чӣварена аччха̄детука̄мосӣ’’ти? ‘‘апи меййа, евам̣ хоти – ‘аййам̣ упанандам̣ чӣварена аччха̄десса̄мӣ’’’ти. ‘‘саче кхо мам̣ твам̣, а̄вусо, чӣварена аччха̄детука̄моси, еварӯпена чӣварена аччха̄дехи. кйа̄хам̣ тена аччханнопи карисса̄ми йа̄хам̣ на парибхун̃джисса̄мӣ’’ти.

атха кхо со пурисо уджджха̄йати кхиййати випа̄чети – ‘‘махиччха̄ име саман̣а̄ сакйапуттийа̄ асантут̣т̣ха̄. найиме сукара̄ чӣварена аччха̄детум̣. катхан̃хи на̄ма аййо упанандо майа̄ пуббе аппава̄рито мам̣ упасан̇камитва̄ чӣваре викаппам̣ а̄паджджиссатӣ’’ти! ассосум̣ кхо бхиккхӯ тасса пурисасса уджджха̄йантасса кхиййантасса випа̄чентасса. йе те бхиккхӯ аппиччха̄…пе… те уджджха̄ййанти кхиййанти випа̄ченти – ‘‘катхан̃хи на̄ма а̄йасма̄ упанандо сакйапутто пуббе аппава̄рито гахапатикам̣ упасан̇камитва̄ чӣваре викаппам̣ а̄паджджиссатӣ’’ти! атха кхо те бхиккхӯ а̄йасмантам̣ упанандам̣ сакйапуттам̣ анекапарийа̄йена вигарахитва̄ бхагавато етаматтхам̣ а̄рочесум̣ …пе… ‘‘саччам̣ кира твам̣, упананда, пуббе аппава̄рито гахапатикам̣ упасан̇камитва̄ чӣваре викаппам̣ а̄паджджасӣ’’ти? ‘‘саччам̣, бхагава̄’’ти. ‘‘н̃а̄тако те, упананда, ан̃н̃а̄тако’’ти? ‘‘ан̃н̃а̄тако, бхагава̄’’ти. ‘‘ан̃н̃а̄тако, могхапуриса, ан̃н̃а̄такасса на джа̄на̄ти патирӯпам̣ ва̄ аппатирӯпам̣ ва̄ сантам̣ ва̄ асантам̣ ва̄. таттха на̄ма твам̣, могхапуриса, пуббе аппава̄рито ан̃н̃а̄такам̣ гахапатикам̣ упасан̇камитва̄ чӣваре викаппам̣ а̄паджджиссаси! нетам̣, могхапуриса, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

528. ‘‘бхиккхум̣ панева уддисса ан̃н̃а̄такасса гахапатисса ва̄ гахапата̄нийа̄ ва̄ чӣварачета̄паннам̣ [чӣварачета̄панам̣ (сйа̄.)] упаккхат̣ам̣ хоти – ‘имина̄ чӣварачета̄паннена чӣварам̣ чета̄петва̄ иттханна̄мам̣ бхиккхум̣ чӣварена аччха̄десса̄мӣ’ти; татра че со бхиккху пуббе аппава̄рито упасан̇камитва̄ чӣваре викаппам̣ а̄паджджеййа – ‘са̄дху вата мам̣ а̄йасма̄ имина̄ чӣварачета̄паннена еварӯпам̣ ва̄ еварӯпам̣ ва̄ чӣварам̣ чета̄петва̄ аччха̄дехӣ’ти, калйа̄н̣акамйатам̣ упа̄да̄йа, ниссаггийам̣ па̄читтийа’’нти.

529. бхиккхум̣ панева уддисса̄ти бхиккхуссаттха̄йа, бхиккхум̣ а̄рамман̣ам̣ каритва̄, бхиккхум̣ аччха̄детука̄мо.

ан̃н̃а̄тако на̄ма ма̄тито ва̄ питито ва̄ йа̄ва саттама̄ пита̄махайуга̄ асамбаддхо.

гахапати на̄ма йо кочи ага̄рам̣ аджджха̄васати.

гахапата̄нӣ на̄ма йа̄ ка̄чи ага̄рам̣ аджджха̄васати.

чӣварачета̄паннам̣ на̄ма хиран̃н̃ам̣ ва̄ суван̣н̣ам̣ ва̄ мутта̄ ва̄ ман̣и ва̄ пава̄л̣о ва̄ пхалико ва̄ пат̣ако ва̄ суттам̣ ва̄ каппа̄со ва̄.

имина̄ чӣварачета̄паннена̄ти паччупат̣т̣хитена.

чета̄петва̄ти париваттетва̄.

аччха̄десса̄мӣти дасса̄ми.

татра че со бхиккхӯти йам̣ бхиккхум̣ уддисса чӣварачета̄паннам̣ упаккхат̣ам̣ хоти со бхиккху.

пуббе аппава̄ритоти пуббе авутто хоти – ‘‘кӣдисена те, бханте, чӣварена аттхо, кӣдисам̣ те чӣварам̣ чета̄пемӣ’’ти?

упасан̇камитва̄ти гхарам̣ гантва̄ йаттха каттхачи упасан̇камитва̄ .

чӣваре викаппам̣ а̄паджджеййа̄ти а̄йатам̣ ва̄ хоту виттхатам̣ ва̄ аппитам̣ ва̄ сан̣хам̣ ва̄.

имина̄ чӣварачета̄паннена̄ти паччупат̣т̣хитена.

еварӯпам̣ ва̄ еварӯпам̣ ва̄ти. а̄йатам̣ ва̄ виттхатам̣ ва̄ аппитам̣ ва̄ сан̣хам̣ ва̄.

чета̄петва̄ти париваттетва̄.

аччха̄дехӣти даджджехи.

калйа̄н̣акамйатам̣ упа̄да̄йа̄ти са̄дхаттхико [са̄дхуттхико (сйа̄.)] махаггхаттхико. тасса вачанена а̄йатам̣ ва̄ виттхатам̣ ва̄ аппитам̣ ва̄ сан̣хам̣ ва̄ чета̄пети, пайоге дуккат̣ам̣. пат̣ила̄бхена ниссаггийам̣ хоти. ниссаджджитаббам̣ сан̇гхасса ва̄ ган̣асса ва̄ пуггаласса ва̄. еван̃ча пана, бхиккхаве, ниссаджджитаббам̣…пе… идам̣ ме, бханте, чӣварам̣ пуббе аппава̄рито ан̃н̃а̄такам̣ гахапатикам̣ упасан̇камитва̄ чӣваре викаппам̣ а̄паннам̣ ниссаггийам̣, има̄хам̣ сан̇гхасса ниссаджджа̄мӣти…пе… дадеййа̄ти…пе… дадеййунти…пе… а̄йасмато даммӣти.

530. ан̃н̃а̄таке ан̃н̃а̄такасан̃н̃ӣ пуббе аппава̄рито гахапатикам̣ упасан̇камитва̄ чӣваре викаппам̣ а̄паджджати, ниссаггийам̣ па̄читтийам̣. ан̃н̃а̄таке вематико пуббе аппава̄рито гахапатикам̣ упасан̇камитва̄ чӣваре викаппам̣ а̄паджджати, ниссаггийам̣ па̄читтийам̣. ан̃н̃а̄таке н̃а̄такасан̃н̃ӣ пуббе аппава̄рито гахапатикам̣ упасан̇камитва̄ чӣваре викаппам̣ а̄паджджати, ниссаггийам̣ па̄читтийам̣.

н̃а̄таке ан̃н̃а̄такасан̃н̃ӣ, а̄патти дуккат̣асса. н̃а̄таке вематико, а̄патти дуккат̣асса. н̃а̄таке н̃а̄такасан̃н̃ӣ, ана̄патти.

531. ана̄патти н̃а̄така̄нам̣, пава̄рита̄нам̣, ан̃н̃ассаттха̄йа, аттано дханена, махаггхам̣ чета̄петука̄масса аппаггхам̣ чета̄пети, умматтакасса, а̄дикаммикасса̄ти.

упаккхат̣асиккха̄падам̣ нит̣т̣хитам̣ ат̣т̣хамам̣.