4. ниссаггийакан̣д̣ам̣

1. чӣваравагго

1. пат̣хамакатхинасиккха̄падам̣

име кхо пана̄йасманто тим̣са ниссаггийа̄ па̄читтийа̄

дхамма̄ уддесам̣ а̄гаччханти.

459. тене самайена буддхо бхагава̄ веса̄лийам̣ вихарати готамаке четийе. тена кхо пана самайена бхагавата̄ бхиккхӯнам̣ тичӣварам̣ анун̃н̃а̄там̣ хоти. чхаббаггийа̄ бхиккхӯ – ‘‘бхагавата̄ тичӣварам̣ анун̃н̃а̄та’’нти ан̃н̃енева тичӣварена га̄мам̣ пависанти, ан̃н̃ена тичӣварена а̄ра̄ме аччханти, ан̃н̃ена тичӣварена наха̄нам̣ отаранти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ атирекачӣварам̣ дха̄рессантӣ’’ти! атха кхо те бхиккхӯ чхаббаггийе бхиккхӯ анекапарийа̄йена вигарахитва̄ бхагавато етаматтхам̣ а̄рочесум̣…пе… ‘‘саччам̣ кира тумхе, бхиккхаве, атирекачӣварам̣ дха̄ретха̄’’ти? ‘‘саччам̣ бхагава̄’’ти. вигарахи буддхо бхагава̄…пе… катхан̃хи на̄ма тумхе, могхапуриса̄, атирекачӣварам̣ дха̄рессатха! нетам̣, могхапуриса̄, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

460. ‘‘йо пана бхиккху атирекачӣварам̣ дха̄реййа, ниссаггийам̣ па̄читтийа’’нти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

461. [маха̄ва. 347] тена кхо пана самайена а̄йасмато а̄нандасса атирекачӣварам̣ уппаннам̣ хоти. а̄йасма̄ ча а̄нандо там̣ чӣварам̣ а̄йасмато са̄рипуттасса да̄тука̄мо хоти. а̄йасма̄ ча са̄рипутто са̄кете вихарати. атха кхо а̄йасмато а̄нандасса етадахоси – ‘‘бхагавата̄ сиккха̄падам̣ пан̃н̃аттам̣ – ‘на атирекачӣварам̣ дха̄ретабба’нти. идан̃ча ме атирекачӣварам̣ уппаннам̣. ахан̃чимам̣ чӣварам̣ а̄йасмато са̄рипуттасса да̄тука̄мо. а̄йасма̄ ча са̄рипутто са̄кете вихарати. катхам̣ ну кхо майа̄ пат̣ипаджджитабба’’нти? атха кхо а̄йасма̄ а̄нандо бхагавато етаматтхам̣ а̄рочеси. ‘‘кӣвачирам̣ пана̄нанда, са̄рипутто а̄гаччхиссатӣ’’ти? ‘‘навамам̣ ва̄, бхагава̄, дивасам̣ дасамам̣ ва̄’’ти. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, даса̄хапарамам̣ атирекачӣварам̣ дха̄ретум̣. еван̃ча пана, бхиккхаве, имам̣ сиккха̄падам̣ уддисеййа̄тха –

462. ‘‘нит̣т̣хитачӣварасмим̣ бхиккхуна̄ уббхатасмим̣ катхине даса̄хапарамам̣ атирекачӣварам̣ дха̄ретаббам̣. там̣ атикка̄майато ниссаггийам̣ па̄читтийа’’нти.

463. нит̣т̣хитачӣварасминти бхиккхуно чӣварам̣ катам̣ ва̄ хоти нат̣т̣хам̣ ва̄ винат̣т̣хам̣ ва̄ дад̣д̣хам̣ ва̄ чӣвара̄са̄ ва̄ упаччхинна̄.

уббхатасмим̣ катхинети ат̣т̣ханнам̣ ма̄тика̄нам̣ ан̃н̃атара̄йа ма̄тика̄йа уббхатам̣ хоти, сан̇гхена ва̄ антара̄ уббхатам̣ хоти.

даса̄хапараманти даса̄хапарамата̄ дха̄ретаббам̣.

атирекачӣварам̣ на̄ма анадхит̣т̣хитам̣ авикаппитам̣.

чӣварам̣ на̄ма чханнам̣ чӣвара̄нам̣ ан̃н̃атарам̣ чӣварам̣, викаппанупагам̣ паччхимам̣.

там̣ атикка̄майато ниссаггийам̣ хотӣ [хотӣти идам̣ падам̣ саббапоттхакесу аттхи, сиккха̄паде пана наттхи, евамупарипи] ти ека̄дасе арун̣уггамане ниссаггийам̣ хоти. ниссаджджитаббам̣ сан̇гхасса ва̄ ган̣асса ва̄ пуггаласса ва̄. еван̃ча пана, бхиккхаве, ниссаджджитаббам̣. тена бхиккхуна̄ сан̇гхам̣ упасан̇камитва̄ екам̣сам̣ уттара̄сан̇гам̣ каритва̄ вуд̣д̣ха̄нам̣ бхиккхӯнам̣ па̄де вандитва̄ уккут̣икам̣ нисӣдитва̄ ан̃джалим̣ паггахетва̄ евамасса вачанӣйо – ‘‘идам̣ ме, бханте, чӣварам̣ даса̄ха̄тиккантам̣ ниссаггийам̣, има̄хам̣ сан̇гхасса ниссаджджа̄мӣ’’ти. ниссаджджитва̄ а̄патти десетабба̄. бйаттена бхиккхуна̄ пат̣ибалена а̄патти пат̣иггахетабба̄. ниссат̣т̣хачӣварам̣ да̄таббам̣.

464. ‘‘сун̣а̄ту ме, бханте, сан̇гхо. идам̣ чӣварам̣ иттханна̄масса бхиккхуно ниссаггийам̣ сан̇гхасса ниссат̣т̣хам̣. йади сан̇гхасса паттакаллам̣, сан̇гхо имам̣ чӣварам̣ иттханна̄масса бхиккхуно дадеййа̄’’ти.

465. тена бхиккхуна̄ самбахуле бхиккхӯ упасан̇камитва̄ екам̣сам̣ уттара̄сан̇гам̣ каритва̄ вуд̣д̣ха̄нам̣ бхиккхӯнам̣ па̄де вандитва̄ уккут̣икам̣ нисӣдитва̄ ан̃джалим̣ паггахетва̄ евамассу вачанӣйа̄ – ‘‘идам̣ ме, бханте, чӣварам̣ даса̄ха̄тиккантам̣ ниссаггийам̣. има̄хам̣ а̄йасманта̄нам̣ ниссаджджа̄мӣ’’ти. ниссаджджитва̄ а̄патти десетабба̄. бйаттена бхиккхуна̄ пат̣ибалена а̄патти пат̣иггахетабба̄. ниссат̣т̣хачӣварам̣ да̄таббам̣.

466. ‘‘сун̣анту ме а̄йасманта̄. идам̣ чӣварам̣ иттханна̄масса бхиккхуно ниссаггийам̣ а̄йасманта̄нам̣ ниссат̣т̣хам̣. йада̄йасманта̄нам̣ паттакаллам̣, а̄йасманта̄ имам̣ чӣварам̣ иттханна̄масса бхиккхуно дадеййу’’нти.

467. тена бхиккхуна̄ екам̣ бхиккхум̣ упасан̇камитва̄ екам̣сам̣ уттара̄сан̇гам̣ каритва̄ уккут̣икам̣ нисӣдитва̄ ан̃джалим̣ паггахетва̄ евамасса вачанӣйо – ‘‘идам̣ ме, а̄вусо, чӣварам̣ даса̄ха̄тиккантам̣ ниссаггийам̣. има̄хам̣ а̄йасмато ниссаджджа̄мӣ’’ти. ниссаджджитва̄ а̄патти десетабба̄. тена бхиккхуна̄ а̄патти пат̣иггахетабба̄. ниссат̣т̣хачӣварам̣ да̄таббам̣ – ‘‘имам̣ чӣварам̣ а̄йасмато даммӣ’’ти.

468. даса̄ха̄тикканте атиккантасан̃н̃ӣ, ниссаггийам̣ па̄читтийам̣. даса̄ха̄тикканте вематико, ниссаггийам̣ па̄читтийам̣. даса̄ха̄тикканте анатиккантасан̃н̃ӣ, ниссаггийам̣ па̄читтийам̣. анадхит̣т̣хите адхит̣т̣хитасан̃н̃ӣ, ниссаггийам̣ па̄читтийам̣. авикаппите викаппитасан̃н̃ӣ, ниссаггийам̣ па̄читтийам̣. ависсаджджите виссаджджитасан̃н̃ӣ, ниссаггийам̣ па̄читтийам̣. анат̣т̣хе нат̣т̣хасан̃н̃ӣ, ниссаггийам̣ па̄читтийам̣. авинат̣т̣хе винат̣т̣хасан̃н̃ӣ, ниссаггийам̣ па̄читтийам̣. адад̣д̣хе дад̣д̣хасан̃н̃ӣ, ниссаггийам̣ па̄читтийам̣. авилутте вилуттасан̃н̃ӣ, ниссаггийам̣ па̄читтийам̣.

ниссаггийам̣ чӣварам̣ аниссаджджитва̄ парибхун̃джати, а̄патти дуккат̣асса. даса̄ха̄натикканте атиккантасан̃н̃ӣ, а̄патти дуккат̣асса. даса̄ха̄натикканте вематико, а̄патти дуккат̣асса. даса̄ха̄натикканте анатиккантасан̃н̃ӣ, ана̄патти.

469. ана̄патти антодаса̄хам̣ адхит̣т̣хети, викаппети, виссаджджети, нассати, винассати, д̣айхати, аччхиндитва̄ ган̣ханти, висса̄сам̣ ган̣ханти, умматтакасса, а̄дикаммикасса̄ти.

470. тена кхо пана самайена чхаббаггийа̄ бхиккхӯ ниссат̣т̣хачӣварам̣ на денти. бхагавато етаматтхам̣ а̄рочесум̣. ‘‘на, бхиккхаве, ниссат̣т̣хачӣварам̣ на да̄таббам̣. йо на дадеййа, а̄патти дуккат̣асса̄’’ти.

катхинасиккха̄падам̣ нит̣т̣хитам̣ пат̣хамам̣.

2. удоситасиккха̄падам̣

471. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена бхиккхӯ бхиккхӯнам̣ хаттхе чӣварам̣ никкхипитва̄ сантаруттарена джанападача̄рикам̣ паккаманти. та̄ни чӣвара̄ни чирам̣ никкхитта̄ни кан̣н̣акита̄ни хонти. та̄ни бхиккхӯ ота̄пенти. аддаса̄ кхо а̄йасма̄ а̄нандо сена̄санача̄рикам̣ а̄хин̣д̣анто те бхиккхӯ та̄ни чӣвара̄ни ота̄пенте. дисва̄на йена те бхиккхӯ тенупасан̇ками; упасан̇камитва̄ те бхиккхӯ етадавоча – ‘‘кассима̄ни, а̄вусо, чӣвара̄ни кан̣н̣акита̄нӣ’’ти? атха кхо те бхиккхӯ а̄йасмато а̄нандасса етаматтхам̣ а̄рочесум̣. а̄йасма̄ а̄нандо уджджха̄йати кхиййати випа̄чети – ‘‘катхан̃хи на̄ма бхиккхӯ бхиккхӯнам̣ хаттхе чӣварам̣ никкхипитва̄ сантаруттарена джанападача̄рикам̣ паккамиссантӣ’’ти! атха кхо а̄йасма̄ а̄нандо те бхиккхӯ анекапарийа̄йена вигарахитва̄ бхагавато етаматтхам̣ а̄рочеси…пе… ‘‘саччам̣ кира, бхиккхаве, бхиккхӯ бхиккхӯнам̣ хаттхе чӣварам̣ никкхипитва̄ сантаруттарена джанападача̄рикам̣ паккамантӣ’’ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма те, бхиккхаве, могхапуриса̄ бхиккхӯнам̣ хаттхе чӣварам̣ никкхипитва̄ сантаруттарена джанападача̄рикам̣ паккамиссанти! нетам̣, бхиккхаве, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

472. ‘‘нит̣т̣хитачӣварасмим̣ бхиккхуна̄ уббхатасмим̣ катхине екараттампи че бхиккху тичӣварена виппавасеййа, ниссаггийам̣ па̄читтийа’’нти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

473. тена кхо пана самайена ан̃н̃атаро бхиккху косамбийам̣ гила̄но хоти. н̃а̄така̄ тасса бхиккхуно сантике дӯтам̣ па̄хесум̣ – ‘‘а̄гаччхату бхаданто, майам̣, упат̣т̣хахисса̄ма̄’’ти. бхиккхӯпи евама̄хам̣су – ‘‘гаччха̄вусо, н̃а̄така̄ там̣ упат̣т̣хахиссантӣ’’ти. со евама̄ха – ‘‘бхагавата̄вусо, сиккха̄падам̣ пан̃н̃аттам̣ – ‘на тичӣварена виппаваситабба’нти. ахан̃чамхи гила̄но. на саккоми тичӣварам̣ а̄да̄йа паккамитум̣. на̄хам̣ гамисса̄мӣ’’ти. бхагавато етаматтхам̣ а̄рочесум̣. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, гила̄насса бхиккхуно тичӣварена авиппава̄сасаммутим̣ да̄тум̣. еван̃ча пана, бхиккхаве, да̄табба̄. тена гила̄нена бхиккхуна̄ сан̇гхам̣ упасан̇камитва̄ екам̣сам̣ уттара̄сан̇гам̣ каритва̄ вуд̣д̣ха̄нам̣ бхиккхӯнам̣ па̄де вандитва̄ уккут̣икам̣ нисӣдитва̄ ан̃джалим̣ паггахетва̄ евамасса вачанӣйо – ‘ахам̣, бханте, гила̄но. на саккоми тичӣварам̣ а̄да̄йа паккамитум̣. сохам̣, бханте, сан̇гхам̣ тичӣварена авиппава̄сасаммутим̣ йа̄ча̄мӣ’ти. дутийампи йа̄читабба̄. татийампи йа̄читабба̄. бйаттена бхиккхуна̄ пат̣ибалена сан̇гхо н̃а̄петаббо –

474. ‘‘сун̣а̄ту ме, бханте, сан̇гхо. айам̣ иттханна̄мо бхиккху гила̄но. на саккоти тичӣварам̣ а̄да̄йа паккамитум̣. со сан̇гхам̣ тичӣварена авиппава̄сасаммутим̣ йа̄чати. йади сан̇гхасса паттакаллам̣, сан̇гхо иттханна̄масса бхиккхуно тичӣварена авиппава̄сасаммутим̣ дадеййа. еса̄ н̃атти.

‘‘сун̣а̄ту ме, бханте, сан̇гхо. айам̣ иттханна̄мо бхиккху гила̄но. на саккоти тичӣварам̣ а̄да̄йа паккамитум̣. со сан̇гхам̣ тичӣварена авиппава̄сасаммутим̣ йа̄чати. сан̇гхо иттханна̄масса бхиккхуно тичӣварена авиппава̄сасаммутим̣ дети. йасса̄йасмато кхамати иттханна̄масса бхиккхуно тичӣварена авиппава̄сасаммутийа̄ да̄нам̣, со тун̣хасса; йасса наккхамати, со бха̄сеййа.

‘‘динна̄ сан̇гхена иттханна̄масса бхиккхуно тичӣварена авиппава̄сасаммути. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

еван̃ча пана, бхиккхаве, имам̣ сиккха̄падам̣ уддисеййа̄тха –

475. ‘‘нит̣т̣хитачӣварасмим̣ бхиккхуна̄ уббхатасмим̣ катхине екараттампи че бхиккху тичӣварена виппавасеййа, ан̃н̃атра бхиккхусаммутийа̄, ниссаггийам̣ па̄читтийа’’нти.

476. ‘‘нит̣т̣хитачӣварасминти бхиккхуно чӣварам̣ катам̣ ва̄ хоти нат̣т̣хам̣ ва̄ винат̣т̣хам̣ ва̄ дад̣д̣хам̣ ва̄ чӣвара̄са̄ ва̄ упаччхинна̄.

уббхатасмим̣ катхинети ат̣т̣ханнам̣ ма̄тика̄нам̣ ан̃н̃атара̄йа ма̄тика̄йа уббхатам̣ хоти, сан̇гхена ва̄ антара̄ уббхатам̣ хоти.

екараттампи че бхиккху тичӣварена виппавасеййа̄ти сан̇гха̄т̣ийа̄ ва̄ уттара̄сан̇гена ва̄ антарава̄сакена ва̄.

ан̃н̃атра бхиккхусаммутийа̄ти т̣хапетва̄ бхиккхусаммутим̣.

ниссаггийам̣ хотӣти саха арун̣уггамана̄ [арун̣уггаманена (сӣ. сйа̄.)] ниссаггийам̣ хоти. ниссаджджитаббам̣ сан̇гхасса ва̄ ган̣асса ва̄ пуггаласса ва̄. еван̃ча пана, бхиккхаве, ниссаджджитаббам̣…пе… идам̣ ме, бханте, чӣварам̣ раттивиппавуттхам̣ [раттим̣ виппавуттхам̣ (сӣ.)] ан̃н̃атра бхиккхусаммутийа̄ ниссаггийам̣, има̄хам̣ сан̇гхасса ниссаджджа̄мӣти…пе… дадеййа̄ти…пе… дадеййунти…пе… а̄йасмато даммӣти.

477. га̄мо екӯпача̄ро на̄нӯпача̄ро. нивесанам̣ екӯпача̄рам̣ на̄нӯпача̄рам̣. удосито екӯпача̄ро на̄нӯпача̄ро. ат̣т̣о екӯпача̄ро на̄нӯпача̄ро. ма̄л̣о екӯпача̄ро на̄нӯпача̄ро. па̄са̄до екӯпача̄ро на̄нӯпача̄ро. хаммийам̣ екӯпача̄рам̣ на̄нӯпача̄рам̣. на̄ва̄ екӯпача̄ра̄ на̄нӯпача̄ра̄. саттхо екӯпача̄ро на̄нӯпача̄ро. кхеттам̣ екӯпача̄рам̣ на̄нӯпача̄рам̣. дхан̃н̃акаран̣ам̣ екӯпача̄рам̣ на̄нӯпача̄рам̣. а̄ра̄мо екӯпача̄ро на̄нӯпача̄ро. виха̄ро екӯпача̄ро на̄нӯпача̄ро. руккхамӯлам̣ екӯпача̄рам̣ на̄нӯпача̄рам̣. аджджхока̄со екӯпача̄ро на̄нӯпача̄ро.

478. га̄мо екӯпача̄ро на̄ма екакуласса га̄мо хоти париккхитто ча. антога̄ме чӣварам̣ никкхипитва̄ антога̄ме ваттхаббам̣. апариккхитто хоти, йасмим̣ гхаре чӣварам̣ никкхиттам̣ хоти тасмим̣ гхаре ваттхаббам̣, хаттхапа̄са̄ ва̄ на виджахитаббам̣.

479. на̄на̄куласса га̄мо хоти париккхитто ча. йасмим̣ гхаре чӣварам̣ никкхиттам̣ хоти тасмим̣ гхаре ваттхаббам̣ сабха̄йе ва̄ два̄рамӯле ва̄, хаттхапа̄са̄ ва̄ на виджахитаббам̣. сабха̄йам̣ гаччхантена хаттхапа̄се чӣварам̣ никкхипитва̄ сабха̄йе ва̄ ваттхаббам̣ два̄рамӯле ва̄, хаттхапа̄са̄ ва̄ на виджахитаббам̣. сабха̄йе чӣварам̣ никкхипитва̄ сабха̄йе ва̄ ваттхаббам̣ два̄рамӯле ва̄, хаттхапа̄са̄ ва̄ на виджахитаббам̣. апариккхитто хоти, йасмим̣ гхаре чӣварам̣ никкхиттам̣ хоти тасмим̣ гхаре ваттхаббам̣, хаттхапа̄са̄ ва̄ на виджахитаббам̣.

480. екакуласса нивесанам̣ хоти париккхиттан̃ча, на̄на̄габбха̄ на̄на̄оварака̄. антонивесане чӣварам̣ никкхипитва̄ антонивесане ваттхаббам̣. апариккхиттам̣ хоти, йасмим̣ габбхе чӣварам̣ никкхиттам̣ хоти тасмим̣ габбхе ваттхаббам̣, хаттхапа̄са̄ ва̄ на виджахитаббам̣.

481. на̄на̄куласса нивесанам̣ хоти париккхиттан̃ча, на̄на̄габбха̄ на̄на̄оварака̄. йасмим̣ габбхе чӣварам̣ никкхиттам̣ хоти тасмим̣ габбхе ваттхаббам̣ два̄рамӯле ва̄, хаттхапа̄са̄ ва̄ на виджахитаббам̣. апариккхиттам̣ хоти, йасмим̣ габбхе чӣварам̣ никкхиттам̣ хоти тасмим̣ габбхе ваттхаббам̣, хаттхапа̄са̄ ва̄ на виджахитаббам̣.

482. екакуласса удосито хоти париккхитто ча, на̄на̄габбха̄ на̄на̄оварака̄. антоудосите чӣварам̣ никкхипитва̄ антоудосите ваттхаббам̣. апариккхитто хоти, йасмим̣ габбхе чӣварам̣ никкхиттам̣ хоти тасмим̣ габбхе ваттхаббам̣, хаттхапа̄са̄ ва̄ на виджахитаббам̣.

483. на̄на̄куласса удосито хоти париккхитто ча, на̄на̄габбха̄ на̄на̄оварака̄. йасмим̣ габбхе чӣварам̣ никкхиттам̣ хоти тасмим̣ габбхе ваттхаббам̣ два̄рамӯле ва̄, хаттхапа̄са̄ ва̄ на виджахитаббам̣. апариккхитто хоти, йасмим̣ габбхе чӣварам̣ никкхиттам̣ хоти тасмим̣ габбхе ваттхаббам̣, хаттхапа̄са̄ ва̄ на виджахитаббам̣.

484. екакуласса ат̣т̣о хоти, антоат̣т̣е чӣварам̣ никкхипитва̄ антоат̣т̣е ваттхаббам̣. на̄на̄куласса ат̣т̣о хоти, на̄на̄габбха̄ на̄на̄оварака̄. йасмим̣ габбхе чӣварам̣ никкхиттам̣ хоти тасмим̣ габбхе ваттхаббам̣ два̄рамӯле ва̄, хаттхапа̄са̄ ва̄ на виджахитаббам̣.

485. екакуласса ма̄л̣о хоти, антома̄л̣е чӣварам̣ никкхипитва̄ антома̄л̣е ваттхаббам̣. на̄на̄куласса ма̄л̣о хоти на̄на̄габбха̄ на̄на̄оварака̄, йасмим̣ габбхе чӣварам̣ никкхиттам̣ хоти тасмим̣ габбхе ваттхаббам̣ два̄рамӯле ва̄, хаттхапа̄са̄ ва̄ на виджахитаббам̣.

486. екакуласса па̄са̄до хоти, антопа̄са̄де чӣварам̣ никкхипитва̄ антопа̄са̄де ваттхаббам̣. на̄на̄куласса па̄са̄до хоти, на̄на̄габбха̄ на̄на̄оварака̄. йасмим̣ габбхе чӣварам̣ никкхиттам̣ хоти тасмим̣ габбхе ваттхаббам̣ два̄рамӯле ва̄, хаттхапа̄са̄ ва̄ на виджахитаббам̣.

487. екакуласса хаммийам̣ хоти. антохаммийе чӣварам̣ никкхипитва̄ антохаммийе ваттхаббам̣. на̄на̄куласса хаммийам̣ хоти, на̄на̄габбха̄ на̄на̄оварака̄. йасмим̣ габбхе чӣварам̣ никкхиттам̣ хоти тасмим̣ габбхе ваттхаббам̣ два̄рамӯле ва̄, хаттхапа̄са̄ ва̄ на виджахитаббам̣.

488. екакуласса на̄ва̄ хоти. антона̄ва̄йа чӣварам̣ никкхипитва̄ антона̄ва̄йа ваттхаббам̣. на̄на̄куласса на̄ва̄ хоти на̄на̄габбха̄ на̄на̄оварака̄. йасмим̣ овараке чӣварам̣ никкхиттам̣ хоти тасмим̣ овараке ваттхаббам̣, хаттхапа̄са̄ ва̄ на виджахитаббам̣.

489. екакуласса саттхо хоти. саттхе чӣварам̣ никкхипитва̄ пурато ва̄ паччхато ва̄ саттаббхантара̄ на виджахитабба̄, пассато аббхантарам̣ на виджахитаббам̣. на̄на̄куласса саттхо хоти, саттхе чӣварам̣ никкхипитва̄ хаттхапа̄са̄ на виджахитаббам̣.

490. екакуласса кхеттам̣ хоти париккхиттан̃ча. антокхетте чӣварам̣ никкхипитва̄ антокхетте ваттхаббам̣. апариккхиттам̣ хоти, хаттхапа̄са̄ на виджахитаббам̣. на̄на̄куласса кхеттам̣ хоти париккхиттан̃ча. антокхетте чӣварам̣ никкхипитва̄ два̄рамӯле ва̄ ваттхаббам̣, хаттхапа̄са̄ ва̄ на виджахитаббам̣. апариккхиттам̣ хоти, хаттхапа̄са̄ на виджахитаббам̣.

491. екакуласса дхан̃н̃акаран̣ам̣ хоти париккхиттан̃ча. антодхан̃н̃акаран̣е чӣварам̣ никкхипитва̄ антодхан̃н̃акаран̣е ваттхаббам̣. апариккхиттам̣ хоти, хаттхапа̄са̄ на виджахитаббам̣. на̄на̄куласса дхан̃н̃акаран̣ам̣ хоти париккхиттан̃ча. антодхан̃н̃акаран̣е чӣварам̣ никкхипитва̄ два̄рамӯле ва̄ ваттхаббам̣, хаттхапа̄са̄ ва̄ на виджахитаббам̣. апариккхиттам̣ хоти, хаттхапа̄са̄ на виджахитаббам̣.

492. екакуласса а̄ра̄мо хоти париккхитто ча. антоа̄ра̄ме чӣварам̣ никкхипитва̄ антоа̄ра̄ме ваттхаббам̣. апариккхитто хоти, хаттхапа̄са̄ на виджахитаббам̣. на̄на̄куласса а̄ра̄мо хоти париккхитто ча. антоа̄ра̄ме чӣварам̣ никкхипитва̄ два̄рамӯле ва̄ ваттхаббам̣, хаттхапа̄са̄ ва̄ на виджахитаббам̣. апариккхитто хоти, хаттхапа̄са̄ на виджахитаббам̣.

493. екакуласса виха̄ро хоти париккхитто ча. антовиха̄ре чӣварам̣ никкхипитва̄ антовиха̄ре ваттхаббам̣. апариккхитто хоти, йасмим̣ виха̄ре чӣварам̣ никкхиттам̣ хоти тасмим̣ виха̄ре ваттхаббам̣, хаттхапа̄са̄ ва̄ на виджахитаббам̣. на̄на̄куласса виха̄ро хоти париккхитто ча. йасмим̣ виха̄ре чӣварам̣ никкхиттам̣ хоти тасмим̣ виха̄ре ваттхаббам̣ два̄рамӯле ва̄, хаттхапа̄са̄ ва̄ на виджахитаббам̣. апариккхитто хоти, йасмим̣ виха̄ре чӣварам̣ никкхиттам̣ хоти тасмим̣ виха̄ре ваттхаббам̣, хаттхапа̄са̄ ва̄ на виджахитаббам̣.

494. екакуласса руккхамӯлам̣ хоти, йам̣ маджджханхике ка̄ле саманта̄ чха̄йа̄ пхарати, анточха̄йа̄йа чӣварам̣ никкхипитва̄ анточха̄йа̄йа ваттхаббам̣. на̄на̄куласса руккхамӯлам̣ хоти, хаттхапа̄са̄ на виджахитаббам̣.

аджджхока̄со екӯпача̄ро на̄ма ага̄маке аран̃н̃е саманта̄ саттаббхантара̄ екӯпача̄ро, тато парам̣ на̄нӯпача̄ро.

495. виппавуттхе виппавуттхасан̃н̃ӣ ан̃н̃атра бхиккхусаммутийа̄, ниссаггийам̣ па̄читтийам̣. виппавуттхе вематико, ан̃н̃атра бхиккхусаммутийа̄, ниссаггийам̣ па̄читтийам̣. виппавуттхе авиппавуттхасан̃н̃ӣ, ан̃н̃атра бхиккхусаммутийа̄, ниссаггийам̣ па̄читтийам̣. аппаччуддхат̣е паччуддхат̣асан̃н̃ӣ…пе… ависсаджджите виссаджджитасан̃н̃ӣ… анат̣т̣хе нат̣т̣хасан̃н̃ӣ… авинат̣т̣хе винат̣т̣хасан̃н̃ӣ… адад̣д̣хе дад̣д̣хасан̃н̃ӣ…пе… авилутте вилуттасан̃н̃ӣ, ан̃н̃атра бхиккхусаммутийа̄, ниссаггийам̣ па̄читтийам̣.

ниссаггийам̣ чӣварам̣ аниссаджджитва̄ парибхун̃джати, а̄патти дуккат̣асса. авиппавуттхе виппавуттхасан̃н̃ӣ, а̄патти дуккат̣асса. авиппавуттхе вематико, а̄патти дуккат̣асса. авиппавуттхе авиппавуттхасан̃н̃ӣ, ана̄патти.

496. ана̄патти антоарун̣е паччуддхарати, виссаджджети, нассати, винассати, д̣айхати, аччхиндитва̄ ган̣ханти, висса̄сам̣ ган̣ханти, бхиккхусаммутийа̄, умматтакасса, а̄дикаммикасса̄ти.

удоситасиккха̄падам̣ нит̣т̣хитам̣ дутийам̣.

3. татийакатхинасиккха̄падам̣

497. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена ан̃н̃атарасса бхиккхуно ака̄лачӣварам̣ уппаннам̣ хоти. тасса там̣ чӣварам̣ кайирама̄нам̣ наппахоти. атха кхо со бхиккху там̣ чӣварам̣ усса̄петва̄ пунаппунам̣ вимаджджати. аддаса̄ кхо бхагава̄ сена̄санача̄рикам̣ а̄хин̣д̣анто там̣ бхиккхум̣ там̣ чӣварам̣ усса̄петва̄ пунаппунам̣ вимаджджантам̣. дисва̄на йена со бхиккху тенупасан̇ками; упасан̇камитва̄ там̣ бхиккхум̣ етадавоча – ‘‘кисса твам̣, бхиккху, имам̣ чӣварам̣ усса̄петва̄ пунаппунам̣ вимаджджасӣ’’ти? ‘‘идам̣ ме, бханте, ака̄лачӣварам̣ уппаннам̣. кайирама̄нам̣ наппахоти. тена̄хам̣ имам̣ чӣварам̣ усса̄петва̄ пунаппунам̣ вимаджджа̄мӣ’’ти. ‘‘аттхи пана те, бхиккху, чӣварапачча̄са̄’’ти? ‘‘аттхи, бхагава̄’’ти. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄, бхиккхӯ а̄мантеси – ‘‘ануджа̄на̄ми, бхиккхаве, ака̄лачӣварам̣ пат̣иггахетва̄ чӣварапачча̄са̄ никкхипиту’’нти.

498. тена кхо пана самайена бхиккхӯ – ‘‘бхагавата̄ анун̃н̃а̄там̣ ака̄лачӣварам̣ пат̣иггахетва̄ чӣварапачча̄са̄ никкхипиту’’нти ака̄лачӣвара̄ни пат̣иггахетва̄ атирекама̄сам̣ никкхипанти. та̄ни чӣвара̄ни чӣваравам̣се бхан̣д̣ика̄баддха̄ни тит̣т̣ханти. аддаса̄ кхо а̄йасма̄ а̄нандо сена̄санача̄рикам̣ а̄хин̣д̣анто та̄ни чӣвара̄ни чӣваравам̣се бхан̣д̣ика̄баддха̄ни тит̣т̣ханте. дисва̄на бхиккхӯ а̄мантеси – ‘‘кассима̄ни, а̄вусо, чӣвара̄ни чӣваравам̣се бхан̣д̣ика̄баддха̄ни тит̣т̣хантӣ’’ти? ‘‘амха̄кам̣, а̄вусо, ака̄лачӣвара̄ни чӣварапачча̄са̄ никкхитта̄нӣ’’ти. ‘‘кӣвачирам̣ пана̄вусо, има̄ни чӣвара̄ни никкхитта̄нӣ’’ти? ‘‘атирекама̄сам̣, а̄вусо’’ти. а̄йасма̄ а̄нандо уджджха̄йати кхиййати випа̄чети – ‘‘катхан̃хи на̄ма бхиккхӯ ака̄лачӣварам̣ пат̣иггахетва̄ атирекама̄сам̣ никкхиписсантӣ’’ти! атха кхо а̄йасма̄ а̄нандо те бхиккхӯ анекапарийа̄йена вигарахитва̄ бхагавато етаматтхам̣ а̄рочеси…пе… ‘‘саччам̣ кира, бхиккхаве, бхиккхӯ ака̄лачӣварам̣ пат̣иггахетва̄ атирекама̄сам̣ никкхипантӣ’’ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма те, бхиккхаве, могхапуриса̄ ака̄лачӣварам̣ пат̣иггахетва̄ атирекама̄сам̣ никкхиписсанти! нетам̣, бхиккхаве, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

499. ‘‘нит̣т̣хитачӣварасмим̣ бхиккхуна̄ уббхатасмим̣ катхине бхиккхуно панева ака̄лачӣварам̣ уппаджджеййа, а̄кан̇кхама̄нена бхиккхуна̄ пат̣иггахетаббам̣. пат̣иггахетва̄ кхиппамева ка̄ретаббам̣. ночасса па̄рипӯри, ма̄сапарамам̣ тена бхиккхуна̄ там̣ чӣварам̣ никкхипитаббам̣ ӯнасса па̄рипӯрийа̄ сатийа̄ пачча̄са̄йа. тато че уттари [уттарим̣ (сӣ. сйа̄.)] никкхипеййа, сатийа̄пи пачча̄са̄йа, ниссаггийам̣ па̄читтийа’’нти.

500. нит̣т̣хитачӣварасминти бхиккхуно чӣварам̣ катам̣ ва̄ хоти нат̣т̣хам̣ ва̄ винат̣т̣хам̣ ва̄ дад̣д̣хам̣ ва̄ чӣвара̄са̄ ва̄ упаччхинна̄.

ака̄лачӣварам̣ на̄ма анаттхате катхине ека̄дасама̄се уппаннам̣, аттхате катхине саттама̄се уппаннам̣, ка̄лепи а̄дисса диннам̣, етам̣ ака̄лачӣварам̣ на̄ма.

уппаджджеййа̄ти уппаджджеййа сан̇гхато ва̄ ган̣ато ва̄ н̃а̄тито ва̄ миттато ва̄ пам̣сукӯлам̣ ва̄ аттано ва̄ дханена.

а̄кан̇кхама̄нена̄ти иччхама̄нена пат̣иггахетаббам̣.

пат̣иггахетва̄ кхиппамева ка̄ретаббанти даса̄ха̄ ка̄ретаббам̣.

но часса па̄рипӯрӣти кайирама̄нам̣ наппахоти.

ма̄сапарамам̣ тена бхиккхуна̄ там̣ чӣварам̣ никкхипитаббанти ма̄сапарамата̄ никкхипитаббам̣.

ӯнасса па̄рипӯрийа̄ти ӯнасса па̄рипӯраттха̄йа.

сатийа̄ пачча̄са̄йа̄ти пачча̄са̄ хоти сан̇гхато ва̄ ган̣ато ва̄ н̃а̄тито ва̄ миттато ва̄ пам̣сукӯлам̣ ва̄ аттано ва̄ дханена.

тато че уттари никкхипеййа сатийа̄пи пачча̄са̄йа̄ти тадахуппанне мӯлачӣваре пачча̄са̄чӣварам̣ уппаджджати, даса̄ха̄ ка̄ретаббам̣. двӣхуппанне мӯлачӣваре пачча̄са̄чӣварам̣ уппаджджати, даса̄ха̄ ка̄ретаббам̣. тӣхуппанне мӯлачӣваре…пе… чатӯхуппанне… пан̃ча̄хуппанне… чха̄хуппанне… сатта̄хуппанне… ат̣т̣ха̄хуппанне … нава̄хуппанне… даса̄хуппанне мӯлачӣваре пачча̄са̄чӣварам̣ уппаджджати, даса̄ха̄ ка̄ретаббам̣. ека̄дасе уппанне…пе… два̄дасе уппанне… терасе уппанне… чуддасе уппанне… паннарасе уппанне… сол̣асе уппанне… саттарасе уппанне… ат̣т̣ха̄расе уппанне… екӯнавӣсе уппанне… вӣсе уппанне мӯлачӣваре пачча̄са̄чӣварам̣ уппаджджати, даса̄ха̄ ка̄ретаббам̣. екавӣсе уппанне мӯлачӣваре пачча̄са̄чӣварам̣ уппаджджати, нава̄ха̄ ка̄ретаббам̣. два̄вӣсе уппанне…пе… тевӣсе уппанне… чатувӣсе уппанне… пан̃чавӣсе уппанне… чхаббӣсе уппанне… саттавӣсе уппанне… ат̣т̣хавӣсе уппанне… екӯнатим̣се уппанне мӯлачӣваре пачча̄са̄чӣварам̣ уппаджджати, ека̄хам̣ ка̄ретаббам̣… тим̣се уппанне мӯлачӣваре пачча̄са̄чӣварам̣ уппаджджати, тадахева адхит̣т̣ха̄таббам̣ викаппетаббам̣ виссаджджетаббам̣. но че адхит̣т̣хеййа ва̄ викаппеййа ва̄ виссаджджеййа ва̄, екатим̣се арун̣уггамане ниссаггийам̣ хоти. ниссаджджитаббам̣ сан̇гхасса ва̄ ган̣асса ва̄ пуггаласса ва̄. еван̃ча пана, бхиккхаве, ниссаджджитаббам̣…пе… идам̣ ме, бханте, ака̄лачӣварам̣ ма̄са̄тиккантам̣ ниссаггийам̣, има̄хам̣ сан̇гхасса ниссаджджа̄мӣти…пе… дадеййа̄ти…пе… дадеййунти…пе… а̄йасмато даммӣти.

висабха̄ге уппанне мӯлачӣваре пачча̄са̄чӣварам̣ уппаджджати, раттийо ча сеса̄ хонти, на ака̄ма̄ ка̄ретаббам̣.

501. ма̄са̄тикканте атиккантасан̃н̃ӣ, ниссаггийам̣ па̄читтийам̣. ма̄са̄тикканте вематико ниссаггийам̣ па̄читтийам̣. ма̄са̄тикканте анатиккантасан̃н̃ӣ ниссаггийам̣ па̄читтийам̣. анадхит̣т̣хите адхит̣т̣хитасан̃н̃ӣ…пе… авикаппите викаппитасан̃н̃ӣ… ависсаджджите виссаджджитасан̃н̃ӣ… анат̣т̣хе нат̣т̣хасан̃н̃ӣ… авинат̣т̣хе винат̣т̣хасан̃н̃ӣ… адад̣д̣хе дад̣д̣хасан̃н̃ӣ… авилутте вилуттасан̃н̃ӣ, ниссаггийам̣ па̄читтийам̣.

ниссаггийам̣ чӣварам̣ аниссаджджитва̄ парибхун̃джати, а̄патти дуккат̣асса. ма̄са̄натикканте атиккантасан̃н̃ӣ, а̄патти дуккат̣асса. ма̄са̄натикканте вематико, а̄патти дуккат̣асса. ма̄са̄натикканте анатиккантасан̃н̃ӣ, ана̄патти.

502. ана̄патти антома̄се адхит̣т̣хети, викаппети, виссаджджети, нассати, винассати, д̣айхати, аччхиндитва̄ ган̣ханти, висса̄сам̣ ган̣ханти, умматтакасса, а̄дикаммикасса̄ти.

татийакатхинасиккха̄падам̣ нит̣т̣хитам̣.

4. пура̄н̣ачӣварасиккха̄падам̣

503. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена а̄йасмато уда̄йисса пура̄н̣адутийика̄ бхиккхунӣсу паббаджита̄ хоти. са̄ а̄йасмато уда̄йисса сантике абхиккхан̣ам̣ а̄гаччхати. а̄йасма̄пи уда̄йӣ тасса̄ бхиккхунийа̄ сантике абхиккхан̣ам̣ гаччхати. тена кхо пана самайена а̄йасма̄ уда̄йӣ тасса̄ бхиккхунийа̄ сантике бхаттависсаггам̣ кароти. атха кхо а̄йасма̄ уда̄йӣ пуббан̣хасамайам̣ нива̄сетва̄ паттачӣварама̄да̄йа йена са̄ бхиккхунӣ тенупасан̇ками; упасан̇камитва̄ тасса̄ бхиккхунийа̄ пурато ан̇гаджа̄там̣ виваритва̄ а̄сане нисӣди. са̄пи кхо бхиккхунӣ а̄йасмато уда̄йисса пурато ан̇гаджа̄там̣ виваритва̄ а̄сане нисӣди. атха кхо а̄йасма̄ уда̄йӣ са̄ратто тасса̄ бхиккхунийа̄ ан̇гаджа̄там̣ упаниджджха̄йи. тасса асучи муччи. атха кхо а̄йасма̄ уда̄йӣ там̣ бхиккхуним̣ етадавоча – ‘‘гаччха, бхагини, удакам̣ а̄хара, антарава̄сакам̣ дховисса̄мӣ’’ти. ‘‘а̄хараййа, ахамева дховисса̄мӣ’’ти там̣ асучим̣ екадесам̣ мукхена аггахеси екадесам̣ ан̇гаджа̄те паккхипи. са̄ тена габбхам̣ ган̣хи. бхиккхунийо евама̄хам̣су – ‘‘абрахмача̄ринӣ айам̣ бхиккхунӣ, габбхинӣ’’ти. ‘‘на̄хам̣, аййе, абрахмача̄ринӣ’’ти бхиккхунӣнам̣ етаматтхам̣ а̄рочеси. бхиккхунийо уджджха̄йанти кхиййанти випа̄ченти – ‘‘катхан̃хи на̄ма аййо уда̄йӣ бхиккхунийа̄ пура̄н̣ачӣварам̣ дхова̄пессатӣ’’ти! атха кхо та̄ бхиккхунийо бхиккхӯнам̣ етаматтхам̣ а̄рочесум̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма а̄йасма̄ уда̄йӣ бхиккхунийа̄ пура̄н̣ачӣварам̣ дхова̄пессатӣ’’ти! атха кхо те бхиккхӯ а̄йасмантам̣ уда̄йим̣ анекапарийа̄йена вигарахитва̄ бхагавато етаматтхам̣ а̄рочесум̣…пе… ‘‘саччам̣ кира твам̣, уда̄йи, бхиккхунийа̄ пура̄н̣ачӣварам̣ дхова̄песӣ’’ти? ‘‘саччам̣, бхагава̄’’ти. ‘‘н̃а̄тика̄ те, уда̄йи, ан̃н̃а̄тика̄’’ти? ‘‘ан̃н̃а̄тика̄, бхагава̄’’ти. ‘‘ан̃н̃а̄тако, могхапуриса, ан̃н̃а̄тика̄йа на джа̄на̄ти патирӯпам̣ ва̄ аппатирӯпам̣ ва̄ па̄са̄дикам̣ ва̄ апа̄са̄дикам̣ ва̄. таттха на̄ма твам̣, могхапуриса, ан̃н̃а̄тика̄йа бхиккхунийа̄ пура̄н̣ачӣварам̣ дхова̄пессаси! нетам̣, могхапуриса, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

504. ‘‘йо пана бхиккху ан̃н̃а̄тика̄йа бхиккхунийа̄ пура̄н̣ачӣварам̣ дхова̄пеййа ва̄ раджа̄пеййа ва̄ а̄кот̣а̄пеййа ва̄, ниссаггийам̣ па̄читтийа’’нти.

505. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

ан̃н̃а̄тика̄ на̄ма ма̄тито ва̄ питито ва̄ йа̄ва саттама̄ пита̄махайуга̄ асамбаддха̄.

бхиккхунӣ на̄ма убхатосан̇гхе упасампанна̄.

пура̄н̣ачӣварам̣ на̄ма саким̣ ниваттхампи саким̣ па̄рутампи.

дхова̄ти а̄н̣а̄пети, а̄патти дуккат̣асса. дхотам̣ ниссаггийам̣ хоти. раджа̄ти а̄н̣а̄пети, а̄патти дуккат̣асса. раттам̣ ниссаггийам̣ хоти. а̄кот̣ехӣти а̄н̣а̄пети, а̄патти дуккат̣асса. саким̣ па̄н̣иппаха̄рам̣ ва̄ муггараппаха̄рам̣ ва̄ динне ниссаггийам̣ хоти. ниссаджджитаббам̣ сан̇гхасса ва̄ ган̣асса ва̄ пуггаласса ва̄. еван̃ча пана, бхиккхаве, ниссаджджитаббам̣…пе… идам̣ ме, бханте, пура̄н̣ачӣварам̣ ан̃н̃а̄тика̄йа бхиккхунийа̄ дхова̄питам̣ ниссаггийам̣. има̄хам̣ сан̇гхасса ниссаджджа̄мӣти…пе… дадеййа̄ти…пе… дадеййунти…пе… а̄йасмато даммӣти.

506. ан̃н̃а̄тика̄йа ан̃н̃а̄тикасан̃н̃ӣ пура̄н̣ачӣварам̣ дхова̄пети, ниссаггийам̣ па̄читтийам̣. ан̃н̃а̄тика̄йа ан̃н̃а̄тикасан̃н̃ӣ пура̄н̣ачӣварам̣ дхова̄пети раджа̄пети, ниссаггийена а̄патти дуккат̣асса. ан̃н̃а̄тика̄йа ан̃н̃а̄тикасан̃н̃ӣ пура̄н̣ачӣварам̣ дхова̄пети а̄кот̣а̄пети, ниссаггийена а̄патти дуккат̣асса. ан̃н̃а̄тика̄йа ан̃н̃а̄тикасан̃н̃ӣ пура̄н̣ачӣварам̣ дхова̄пети раджа̄пети а̄кот̣а̄пети, ниссаггийена а̄патти двиннам̣ дуккат̣а̄нам̣.

ан̃н̃а̄тика̄йа ан̃н̃а̄тикасан̃н̃ӣ пура̄н̣ачӣварам̣ раджа̄пети, ниссаггийам̣ па̄читтийам̣. ан̃н̃а̄тика̄йа ан̃н̃а̄тикасан̃н̃ӣ пура̄н̣ачӣварам̣ раджа̄пети а̄кот̣а̄пети, ниссаггийена а̄патти дуккат̣асса. ан̃н̃а̄тика̄йа ан̃н̃а̄тикасан̃н̃ӣ пура̄н̣ачӣварам̣ раджа̄пети дхова̄пети, ниссаггийена а̄патти дуккат̣асса. ан̃н̃а̄тика̄йа ан̃н̃а̄тикасан̃н̃ӣ пура̄н̣ачӣварам̣ раджа̄пети а̄кот̣а̄пети дхова̄пети, ниссаггийена а̄патти двиннам̣ дуккат̣а̄нам̣.

ан̃н̃а̄тика̄йа ан̃н̃а̄тикасан̃н̃ӣ пура̄н̣ачӣварам̣ а̄кот̣а̄пети, ниссаггийам̣ па̄читтийам̣. ан̃н̃а̄тика̄йа ан̃н̃а̄тикасан̃н̃ӣ пура̄н̣ачӣварам̣ а̄кот̣а̄пети дхова̄пети, ниссаггийена а̄патти дуккат̣асса. ан̃н̃а̄тика̄йа ан̃н̃а̄тикасан̃н̃ӣ пура̄н̣ачӣварам̣ а̄кот̣а̄пети раджа̄пети, ниссаггийена а̄патти дуккат̣асса. ан̃н̃а̄тика̄йа ан̃н̃а̄тикасан̃н̃ӣ пура̄н̣ачӣварам̣ а̄кот̣а̄пети дхова̄пети раджа̄пети, ниссаггийена а̄патти двиннам̣ дуккат̣а̄нам̣.

ан̃н̃а̄тика̄йа вематико…пе… ан̃н̃а̄тика̄йа н̃а̄тикасан̃н̃ӣ…пе… ан̃н̃асса пура̄н̣ачӣварам̣ дхова̄пети, а̄патти дуккат̣асса. нисӣданапаччаттхаран̣ам̣ дхова̄пети, а̄патти дуккат̣асса. екатоупасампанна̄йа дхова̄пети, а̄патти дуккат̣асса. н̃а̄тика̄йа ан̃н̃а̄тикасан̃н̃ӣ, а̄патти дуккат̣асса. н̃а̄тика̄йа вематико, а̄патти дуккат̣асса. н̃а̄тика̄йа н̃а̄тикасан̃н̃ӣ, ана̄патти.

507. ана̄патти н̃а̄тика̄йа дховантийа̄ ан̃н̃а̄тика̄ дутийа̄ хоти, авутта̄ дховати, апарибхуттам̣ дхова̄пети, чӣварам̣ т̣хапетва̄ ан̃н̃ам̣ париккха̄рам̣ дхова̄пети, сиккхама̄на̄йа, са̄ман̣ерийа̄, умматтакасса, а̄дикаммикасса̄ти.

пура̄н̣ачӣварасиккха̄падам̣ нит̣т̣хитам̣ чатуттхам̣.

5. чӣварапат̣иггахан̣асиккха̄падам̣

508. тена самайена буддхо бхагава̄ ра̄джагахе вихарати вел̣уване каландаканива̄пе. тена кхо пана самайена уппалаван̣н̣а̄ бхиккхунӣ са̄ваттхийам̣ вихарати. атха кхо уппалаван̣н̣а̄ бхиккхунӣ пуббан̣хасамайам̣ нива̄сетва̄ паттачӣварама̄да̄йа са̄ваттхим̣ пин̣д̣а̄йа па̄виси. са̄ваттхийам̣ пин̣д̣а̄йа чаритва̄ паччха̄бхаттам̣ пин̣д̣апа̄таппат̣икканта̄ йена андхаванам̣ тенупасан̇ками дива̄виха̄ра̄йа. андхаванам̣ аджджхога̄хетва̄ ан̃н̃атарасмим̣ руккхамӯле дива̄виха̄рам̣ нисӣди. тена кхо пана самайена чора̄ катакамма̄ га̄вим̣ вадхитва̄ мам̣сам̣ гахетва̄ андхаванам̣ пависим̣су. аддаса̄ кхо чорага̄ман̣ико уппалаван̣н̣ам̣ бхиккхуним̣ ан̃н̃атарасмим̣ руккхамӯле дива̄виха̄рам̣ нисиннам̣. дисва̄насса етадахоси – ‘‘саче ме путтабха̄тука̄ пассиссанти вихет̣хиссанти имам̣ бхиккхуни’’нти ан̃н̃ена маггена агама̄си. атха кхо со чорага̄ман̣ико мам̣се пакке варамам̣са̄ни гахетва̄ пан̣н̣апут̣ам̣ [пан̣н̣ена пут̣ам̣ (сйа̄.)] бандхитва̄ уппалаван̣н̣а̄йа бхиккхунийа̄ авидӯре руккхе а̄лаггетва̄ – ‘‘йо пассати саман̣о ва̄ бра̄хман̣о ва̄ диннам̣йева харатӯ’’ти, ватва̄ пакка̄ми. ассоси кхо уппалаван̣н̣а̄ бхиккхунӣ сама̄дхимха̄ вут̣т̣хахитва̄ тасса чорага̄ман̣икасса имам̣ ва̄чам̣ бха̄сама̄насса. атха кхо уппалаван̣н̣а̄ бхиккхунӣ там̣ мам̣сам̣ гахетва̄ упассайам̣ агама̄си. атха кхо уппалаван̣н̣а̄ бхиккхунӣ тасса̄ раттийа̄ аччайена там̣ мам̣сам̣ сампа̄детва̄ уттара̄сан̇гена бхан̣д̣икам̣ бандхитва̄ веха̄сам̣ аббхуггантва̄ вел̣уване паччут̣т̣ха̄си [паччупат̣т̣ха̄си (?)].

тена кхо пана самайена бхагава̄ га̄мам̣ пин̣д̣а̄йа павит̣т̣хо хоти. а̄йасма̄ уда̄йӣ охиййако хоти виха̄рапа̄ло. атха кхо уппалаван̣н̣а̄ бхиккхунӣ йена̄йасма̄ уда̄йӣ тенупасан̇ками; упасан̇камитва̄ а̄йасмантам̣ уда̄йим̣ етадавоча – ‘‘кахам̣, бханте, бхагава̄’’ти? ‘‘павит̣т̣хо, бхагини, бхагава̄ га̄мам̣ пин̣д̣а̄йа̄’’ти. ‘‘имам̣, бханте, мам̣сам̣ бхагавато дехӣ’’ти. ‘‘сантаппито тайа̄, бхагини, бхагава̄ мам̣сена. саче ме твам̣ антарава̄сакам̣ дадеййа̄си, евам̣ ахампи сантаппито бхавеййам̣ антарава̄сакена̄’’ти. ‘‘майам̣ кхо, бханте, ма̄туга̄ма̄ на̄ма киччхала̄бха̄. идан̃ча ме антимам̣ пан̃чамам̣ чӣварам̣. на̄хам̣ дасса̄мӣ’’ти. ‘‘сеййатха̄пи, бхагини, пурисо хаттхим̣ датва̄ каччхе саджджеййа [виссаджджеййа (сйа̄.)] евамева кхо твам̣ бхагини бхагавато мам̣сам̣ датва̄ майи антарава̄саке саджджасӣ’’ти [антарава̄сакам̣ на саджджасӣти (ка.), майхам̣ антарава̄сакам̣ виссаджджехӣти (сйа̄.)]. атха кхо уппалаван̣н̣а̄ бхиккхунӣ а̄йасмата̄ уда̄йина̄ ниппӣл̣ийама̄на̄ антарава̄сакам̣ датва̄ упассайам̣ агама̄си. бхиккхунийо уппалаван̣н̣а̄йа бхиккхунийа̄ паттачӣварам̣ пат̣игган̣хантийо уппалаван̣н̣ам̣ бхиккхуним̣ етадавочум̣ – ‘‘кахам̣ те, аййе, антарава̄сако’’ти? уппалаван̣н̣а̄ бхиккхунӣ бхиккхунӣнам̣ етаматтхам̣ а̄рочеси. бхиккхунийо уджджха̄йанти кхиййанти випа̄ченти – ‘‘катхан̃хи на̄ма аййо уда̄йӣ бхиккхунийа̄ чӣварам̣ пат̣иггахессати киччхала̄бхо ма̄туга̄мо’’ти. атха кхо та̄ бхиккхунийо бхиккхӯнам̣ етаматтхам̣ а̄рочесум̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма а̄йасма̄ уда̄йӣ бхиккхунийа̄ чӣварам̣ пат̣иггахессатӣ’’ти! атха кхо те бхиккхӯ а̄йасмантам̣ уда̄йим̣ анекапарийа̄йена вигарахитва̄ бхагавато етаматтхам̣ а̄рочесум̣…пе… ‘‘саччам̣ кира твам̣, уда̄йи, бхиккхунийа̄ чӣварам̣ пат̣иггахесӣ’’ти? ‘‘саччам̣, бхагава̄’’ти. ‘‘н̃а̄тика̄ те, уда̄йи, ан̃н̃а̄тика̄’’ти? ‘‘ан̃н̃а̄тика̄, бхагава̄’’ти. ‘‘ан̃н̃а̄тако, могхапуриса, ан̃н̃а̄тика̄йа на джа̄на̄ти патирӯпам̣ ва̄ аппатирӯпам̣ ва̄ сантам̣ ва̄ асантам̣ ва̄. таттха на̄ма твам̣, могхапуриса, ан̃н̃а̄тика̄йа бхиккхунийа̄ хаттхато чӣварам̣ пат̣иггахессаси! нетам̣ могхапуриса, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

509. ‘‘йо пана бхиккху ан̃н̃а̄тика̄йа бхиккхунийа̄ хаттхато чӣварам̣ пат̣игган̣хеййа, ниссаггийам̣ па̄читтийа’’нти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

510. тена кхо пана самайена бхиккхӯ куккучча̄йанта̄ бхиккхунӣнам̣ па̄риваттакачӣварам̣ на пат̣игган̣ханти. бхиккхунийо уджджха̄йанти кхиййанти випа̄ченти – ‘‘катхан̃хи на̄ма аййа̄ амха̄кам̣ па̄риваттакачӣварам̣ на пат̣иггахессантӣ’’ти! ассосум̣ кхо бхиккхӯ та̄сам̣ бхиккхунӣнам̣ уджджха̄йантӣнам̣ кхиййантӣнам̣ випа̄чентӣнам̣. атха кхо те бхиккхӯ бхагавато етаматтхам̣ а̄рочесум̣. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, пан̃чаннам̣ па̄риваттакам̣ пат̣иггахетум̣ – бхиккхусса, бхиккхунийа̄, сиккхама̄на̄йа, са̄ман̣ерасса, са̄ман̣ерийа̄. ануджа̄на̄ми, бхиккхаве, имесам̣ пан̃чаннам̣ па̄риваттакам̣ пат̣иггахетум̣. еван̃ча пана, бхиккхаве, имам̣ сиккха̄падам̣ уддисеййа̄тха.

511. ‘‘йо пана бхиккху ан̃н̃а̄тика̄йа бхиккхунийа̄ хаттхато чӣварам̣ пат̣игган̣хеййа, ан̃н̃атра па̄риваттака̄, ниссаггийам̣ па̄читтийа’’нти.

512. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

ан̃н̃а̄тика̄ на̄ма ма̄тито ва̄ питито ва̄ йа̄ва саттама̄ пита̄махайуга̄ асамбаддха̄.

бхиккхунӣ на̄ма убхатосан̇гхе упасампанна̄.

чӣварам̣ на̄ма чханнам̣ чӣвара̄нам̣ ан̃н̃атарам̣ чӣварам̣ викаппанупагам̣ паччхимам̣.

ан̃н̃атра па̄риваттака̄ти т̣хапетва̄ па̄риваттакам̣.

пат̣игган̣ха̄ти, пайоге дуккат̣ам̣. пат̣ила̄бхена ниссаггийам̣ хоти. ниссаджджитаббам̣ сан̇гхасса ва̄ ган̣асса ва̄ пуггаласса ва̄. еван̃ча пана, бхиккхаве, ниссаджджитаббам̣…пе… идам̣ ме, бханте, чӣварам̣ ан̃н̃а̄тика̄йа бхиккхунийа̄ хаттхато пат̣иггахитам̣, ан̃н̃атра па̄риваттака̄, ниссаггийам̣. има̄хам̣ сан̇гхасса ниссаджджа̄мӣти…пе… дадеййа̄ти…пе… дадеййунти…пе… а̄йасмато даммӣти.

513. ан̃н̃а̄тика̄йа ан̃н̃а̄тикасан̃н̃ӣ чӣварам̣ пат̣игган̣ха̄ти, ан̃н̃атра па̄риваттака̄, ниссаггийам̣ па̄читтийам̣. ан̃н̃а̄тика̄йа вематико чӣварам̣ пат̣игган̣ха̄ти, ан̃н̃атра па̄риваттака̄, ниссаггийам̣ па̄читтийам̣. ан̃н̃а̄тика̄йа н̃а̄тикасан̃н̃ӣ чӣварам̣ пат̣игган̣ха̄ти, ан̃н̃атра па̄риваттака̄, ниссаггийам̣ па̄читтийам̣.

екатоупасампанна̄йа хаттхато чӣварам̣ пат̣игган̣ха̄ти, ан̃н̃атра па̄риваттака̄, а̄патти дуккат̣асса. н̃а̄тика̄йа ан̃н̃а̄тикасан̃н̃ӣ, а̄патти дуккат̣асса. н̃а̄тика̄йа вематико, а̄патти дуккат̣асса. н̃а̄тика̄йа н̃а̄тикасан̃н̃ӣ, ана̄патти.

514. ана̄патти н̃а̄тика̄йа, па̄риваттакам̣ париттена ва̄ випулам̣, випулена ва̄ париттам̣, бхиккху висса̄сам̣ ган̣ха̄ти, та̄вака̄ликам̣ ган̣ха̄ти, чӣварам̣ т̣хапетва̄ ан̃н̃ам̣ париккха̄рам̣ ган̣ха̄ти, сиккхама̄на̄йа, са̄ман̣ерийа̄, умматтакасса, а̄дикаммикасса̄ти.

чӣварапат̣иггахан̣асиккха̄падам̣ нит̣т̣хитам̣ пан̃чамам̣.

6. ан̃н̃а̄такавин̃н̃аттисиккха̄падам̣

515. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена а̄йасма̄ упанандо сакйапутто пат̣т̣о [пат̣т̣хо (сйа̄. ка.)] хоти дхаммим̣ катхам̣ ка̄тум̣. атха кхо ан̃н̃атаро сет̣т̣хипутто йена̄йасма̄ упанандо сакйапутто тенупасан̇ками; упасан̇камитва̄ а̄йасмантам̣ упанандам̣ сакйапуттам̣ абхива̄детва̄ екамантам̣ нисӣди. екамантам̣ нисиннам̣ кхо там̣ сет̣т̣хипуттам̣ а̄йасма̄ упанандо сакйапутто дхаммийа̄ катха̄йа сандассеси сама̄дапеси самуттеджеси сампахам̣сеси. атха кхо со сет̣т̣хипутто а̄йасмата̄ упанандена сакйапуттена дхаммийа̄ катха̄йа сандассито сама̄дапито самуттеджито сампахам̣сито а̄йасмантам̣ упанандам̣ сакйапуттам̣ етадавоча – ‘‘вадеййа̄тха, бханте, йена аттхо. пат̣ибала̄ майам̣ аййасса да̄тум̣ йадидам̣ чӣварапин̣д̣апа̄тасена̄санагила̄наппаччайабхесаджджапариккха̄ра’’нти. ‘‘саче ме твам̣, а̄вусо, да̄тука̄моси, ито екам̣ са̄т̣акам̣ дехӣ’’ти. ‘‘амха̄кам̣ кхо, бханте, кулапутта̄нам̣ кисмим̣ вийа екаса̄т̣акам̣ гантум̣. а̄гамехи, бханте, йа̄ва гхарам̣ гаччха̄ми. гхарам̣ гато ито ва̄ екам̣ са̄т̣акам̣ пахин̣исса̄ми ито ва̄ сундаратара’’нти. дутийампи кхо а̄йасма̄ упанандо сакйапутто там̣ сет̣т̣хипуттам̣ етадавоча ‘‘саче ме твам̣ а̄вусо да̄тука̄моси ито екам̣ са̄т̣акам̣ дехӣ’’ти. амха̄кам̣ кхо бханте кулапутта̄нам̣ кисмим̣ вийа екаса̄т̣акам̣ гантум̣, а̄гамехи бханте йа̄ва гхарам̣ гаччха̄ми, гхарам̣ гато ито ва̄ екам̣ са̄т̣акам̣ пахин̣исса̄ми ито ва̄ сундаратаранти. татийампи кхо а̄йасма̄ упанандо сакйапутто там̣ сет̣т̣хипуттам̣ етадавоча ‘‘саче ме твам̣ а̄вусо да̄тука̄моси, ито екам̣ са̄т̣акам̣ дехӣ’’ти. амха̄кам̣ кхо бханте кулапутта̄нам̣ кисмим̣ вийа екаса̄т̣акам̣ гантум̣, а̄гамехи бханте йа̄ва гхарам̣ гаччха̄ми, гхарам̣ гато ито ва̄ екам̣ са̄т̣акам̣ пахин̣исса̄ми ито ва̄ сундаратаранти. ‘‘ким̣ пана тайа̄, а̄вусо, ада̄тука̄мена пава̄ритена йам̣ твам̣ пава̄ретва̄ на десӣ’’ти.

атха кхо со сет̣т̣хипутто а̄йасмата̄ упанандена сакйапуттена ниппӣл̣ийама̄но екам̣ са̄т̣акам̣ датва̄ агама̄си. манусса̄ там̣ сет̣т̣хипуттам̣ етадавочум̣ – ‘‘кисса твам̣ аййо екаса̄т̣ако а̄гаччхасӣ’’ти? атха кхо со сет̣т̣хипутто тесам̣ манусса̄нам̣ етаматтхам̣ а̄рочеси. манусса̄ уджджха̄йанти кхиййанти випа̄ченти – ‘‘махиччха̄ име саман̣а̄ сакйапуттийа̄ асантут̣т̣ха̄. найимесам̣ сукара̄ дхамманимантана̄пи ка̄тум̣ [найиме сукара̄ дхамманимантана̄йапи ка̄тум̣ (сйа̄.)]. катхан̃хи на̄ма сет̣т̣хипуттена дхамманимантана̄йа кайирама̄на̄йа са̄т̣акам̣ гахессантӣ’’ти! ассосум̣ кхо бхиккхӯ тесам̣ манусса̄нам̣ уджджха̄йанта̄нам̣ кхиййанта̄нам̣ випа̄чента̄нам̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма а̄йасма̄ упанандо сакйапутто сет̣т̣хипуттам̣ чӣварам̣ вин̃н̃а̄пессатӣ’’ти! атха кхо те бхиккхӯ а̄йасмантам̣ упанандам̣ сакйапуттам̣ анекапарийа̄йена вигарахитва̄ бхагавато етаматтхам̣ а̄рочесум̣…пе… ‘‘саччам̣ кира твам̣, упананда, сет̣т̣хипуттам̣ чӣварам̣ вин̃н̃а̄песӣ’’ти? ‘‘саччам̣, бхагава̄’’ти. ‘‘н̃а̄тако те, упананда, ан̃н̃а̄тако’’ти? ‘‘ан̃н̃а̄тако, бхагава̄’’ти. ‘‘ан̃н̃а̄тако, могхапуриса, ан̃н̃а̄такасса на джа̄на̄ти патирӯпам̣ ва̄ аппатирӯпам̣ ва̄ сантам̣ ва̄ асантам̣ ва̄. таттха на̄ма твам̣, могхапуриса, ан̃н̃а̄такам̣ сет̣т̣хипуттам̣ чӣварам̣ вин̃н̃а̄пессаси! нетам̣, могхапуриса, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

516. ‘‘йо пана бхиккху ан̃н̃а̄такам̣ гахапатим̣ ва̄ гахапата̄ним̣ ва̄ чӣварам̣ вин̃н̃а̄пеййа, ниссаггийам̣ па̄читтийа’’нти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

517. тена кхо пана самайена самбахула̄ бхиккхӯ са̄кета̄ са̄ваттхим̣ 2 аддха̄намаггаппат̣ипанна̄ хонти. антара̄магге чора̄ никкхамитва̄ те бхиккхӯ аччхиндим̣су. атха кхо те бхиккхӯ – ‘‘бхагавата̄ пат̣иккхиттам̣ ан̃н̃а̄такам̣ гахапатим̣ ва̄ гахапата̄ним̣ ва̄ чӣварам̣ вин̃н̃а̄пету’’нти, куккучча̄йанта̄ на вин̃н̃а̄песум̣. йатха̄нагга̄ва са̄ваттхим̣ гантва̄ бхиккхӯ абхива̄денти. бхиккхӯ евама̄хам̣су – ‘‘сундара̄ кхо име, а̄вусо, а̄джӣвака̄ йе име бхиккхӯсу абхива̄дентӣ’’ти. те евама̄хам̣су – ‘‘на майам̣, а̄вусо, а̄джӣвака̄, бхиккхӯ майа’’нти. бхиккхӯ а̄йасмантам̣ упа̄лим̣ етадавочум̣ – ‘‘ин̇гха̄вусо упа̄ли, име ануйун̃джа̄хӣ’’ти. атха кхо а̄йасмата̄ упа̄лина̄ ануйун̃джийама̄на̄ те бхиккхӯ етаматтхам̣ а̄рочесум̣. атха кхо а̄йасма̄ упа̄ли те бхиккхӯ ануйун̃джитва̄ бхиккхӯ етадавоча – ‘‘бхиккхӯ име, а̄вусо. детха несам̣ чӣвара̄нӣ’’ти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма бхиккхӯ нагга̄ а̄гаччхиссанти! нану на̄ма тин̣ена ва̄ пан̣н̣ена ва̄ пат̣иччха̄детва̄ а̄гантабба’’нти. атха кхо те бхиккхӯ те анекапарийа̄йена вигарахитва̄ бхагавато етаматтхам̣ а̄рочесум̣. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, аччхинначӣварасса ва̄ нат̣т̣хачӣварасса ва̄ ан̃н̃а̄такам̣ гахапатим̣ ва̄ гахапата̄ним̣ ва̄ чӣварам̣ вин̃н̃а̄петум̣. йам̣ а̄ва̄сам̣ пат̣хамам̣ упагаччхати, саче таттха хоти сан̇гхасса виха̄рачӣварам̣ ва̄ уттараттхаран̣ам̣ ва̄ бхӯматтхаран̣ам̣ ва̄ бхисиччхави ва̄, там̣ гахетва̄ па̄рупитум̣ лабхитва̄ одахисса̄мӣ’’ти. но че хоти сан̇гхасса виха̄рачӣварам̣ ва̄ уттараттхаран̣ам̣ ва̄ бхуматтхаран̣ам̣ ва̄ бхисиччхави ва̄ тин̣ена ва̄ пан̣н̣ена ва̄ пат̣иччха̄детва̄ а̄гантаббам̣; на твева наггена а̄гантаббам̣. йо а̄гаччхеййа, а̄патти дуккат̣асса. еван̃ча пана, бхиккхаве, имам̣ сиккха̄падам̣ уддисеййа̄тха –

518. ‘‘йо пана бхиккху ан̃н̃а̄такам̣ гахапатим̣ ва̄ гахапата̄ним̣ ва̄ чӣварам̣ вин̃н̃а̄пеййа, ан̃н̃атра самайа̄, ниссаггийам̣ па̄читтийам̣. таттха̄йам̣ самайо – аччхинначӣваро ва̄ хоти бхиккху нат̣т̣хачӣваро ва̄. айам̣ таттха самайо’’ти.

519. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

ан̃н̃а̄тако на̄ма ма̄тито ва̄ питито ва̄ йа̄ва саттама̄ пита̄махайуга̄ асамбаддхо.

гахапати на̄ма йо кочи ага̄рам̣ аджджха̄васати.

гахапата̄нӣ на̄ма йа̄ ка̄чи ага̄рам̣ аджджха̄васати.

чӣварам̣ на̄ма чханнам̣ чӣвара̄нам̣ ан̃н̃атарам̣ чӣварам̣ викаппанупагам̣ паччхимам̣.

ан̃н̃атра самайа̄ти т̣хапетва̄ самайам̣.

аччхинначӣваро на̄ма бхиккхусса чӣварам̣ аччхиннам̣ хоти ра̄джӯхи ва̄ чорехи ва̄ дхуттехи ва̄, йехи кехичи ва̄ аччхиннам̣ хоти.

нат̣т̣хачӣваро на̄ма бхиккхусса чӣварам̣ аггина̄ ва̄ дад̣д̣хам̣ хоти, удакена ва̄ вул̣хам̣ хоти, ундӯрехи ва̄ упачика̄хи ва̄ кха̄йитам̣ хоти, парибхогаджин̣н̣ам̣ ва̄ хоти.

ан̃н̃атра самайа̄ вин̃н̃а̄пети, пайоге дуккат̣ам̣. пат̣ила̄бхена ниссаггийам̣ хоти. ниссаджджитаббам̣ сан̇гхасса ва̄ ган̣асса ва̄ пуггаласса ва̄. еван̃ча пана, бхиккхаве, ниссаджджитаббам̣…пе… идам̣ ме, бханте, чӣварам̣ ан̃н̃а̄такам̣ гахапатикам̣, ан̃н̃атра самайа̄ вин̃н̃а̄питам̣, ниссаггийам̣. има̄хам̣ сан̇гхасса ниссаджджа̄мӣти…пе… дадеййа̄ти…пе… дадеййунти…пе… а̄йасмато даммӣти.

520. ан̃н̃а̄таке ан̃н̃а̄такасан̃н̃ӣ, ан̃н̃атра самайа̄, чӣварам̣ вин̃н̃а̄пети, ниссаггийам̣ па̄читтийам̣. ан̃н̃а̄таке вематико, ан̃н̃атра самайа̄, чӣварам̣ вин̃н̃а̄пети, ниссаггийам̣ па̄читтийам̣. ан̃н̃а̄таке н̃а̄такасан̃н̃ӣ, ан̃н̃атра самайа̄, чӣварам̣ вин̃н̃а̄пети, ниссаггийам̣ па̄читтийам̣.

н̃а̄таке ан̃н̃а̄такасан̃н̃ӣ, а̄патти дуккат̣асса. н̃а̄таке вематико, а̄патти дуккат̣асса. н̃а̄таке н̃а̄такасан̃н̃ӣ, ана̄патти.

521. ана̄патти самайе, н̃а̄така̄нам̣, пава̄рита̄нам̣, ан̃н̃ассаттха̄йа, аттано дханена, умматтакасса, а̄дикаммикасса̄ти.

ан̃н̃а̄такавин̃н̃аттисиккха̄падам̣ нит̣т̣хитам̣ чхат̣т̣хам̣.

7. татуттарисиккха̄падам̣

522. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена чхаббаггийа̄ бхиккхӯ аччхинначӣвараке бхиккхӯ упасан̇камитва̄ евам̣ ваданти – ‘‘бхагавата̄, а̄вусо, анун̃н̃а̄там̣ – ‘аччхинначӣварасса ва̄ нат̣т̣хачӣварасса ва̄ ан̃н̃а̄такам̣ гахапатим̣ ва̄ гахапата̄ним̣ ва̄ чӣварам̣ вин̃н̃а̄петум̣’; вин̃н̃а̄петха, а̄вусо, чӣвара’’нти. ‘‘алам̣, а̄вусо, ладдхам̣ амхехи чӣвара’’нти. ‘‘майам̣ а̄йасманта̄нам̣ вин̃н̃а̄пема̄’’ти. ‘‘вин̃н̃а̄петха, а̄вусо’’ти. атха кхо чхаббаггийа̄ бхиккхӯ гахапатике упасан̇камитва̄ етадавочум̣ – ‘‘аччхинначӣварака̄, а̄вусо, бхиккхӯ а̄гата̄. детха несам̣ чӣвара̄нӣ’’ти, бахум̣ чӣварам̣ вин̃н̃а̄песум̣.

тена кхо пана самайена ан̃н̃атаро пурисо сабха̄йам̣ нисинно ан̃н̃атарам̣ пурисам̣ етадавоча – ‘‘аччхинначӣварака̄ аййо бхиккхӯ а̄гата̄. тесам̣ майа̄ чӣварам̣ динна’’нти. сопи евама̄ха – ‘‘майа̄пи динна’’нти. апаропи евама̄ха – ‘‘майа̄пи динна’’нти. те уджджха̄йанти кхиййанти випа̄ченти – ‘‘катхан̃хи на̄ма саман̣а̄ сакйапуттийа̄ на маттам̣ джа̄нитва̄ бахум̣ чӣварам̣ вин̃н̃а̄пессанти, дуссава̄н̣иджджам̣ ва̄ саман̣а̄ сакйапуттийа̄ кариссанти, пагга̄хикаса̄лам̣ [пат̣агга̄хикаса̄лам̣ (?)] ва̄ паса̄рессантӣ’’ти! ассосум̣ кхо бхиккхӯ тесам̣ манусса̄нам̣ уджджха̄йанта̄нам̣ кхиййанта̄нам̣ випа̄чента̄нам̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ на маттам̣ джа̄нитва̄ бахум̣ чӣварам̣ вин̃н̃а̄пессантӣ’’ти! атха кхо те бхиккхӯ чхаббаггийе бхиккхӯ анекапарийа̄йена вигарахитва̄ бхагавато етаматтхам̣ а̄рочесум̣…пе… ‘‘саччам̣ кира тумхе, бхиккхаве, на маттам̣ джа̄нитва̄ бахум̣ чӣварам̣ вин̃н̃а̄петха̄’’ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма тумхе, могхапуриса̄, на маттам̣ джа̄нитва̄ бахум̣ чӣварам̣ вин̃н̃а̄пессатха! нетам̣, могхапуриса̄, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

523. ‘‘тан̃че ан̃н̃а̄тако гахапати ва̄ гахапата̄нӣ ва̄ бахӯхи чӣварехи абхихат̣т̣хум̣ пава̄реййа сантаруттарапарамам̣ тена бхиккхуна̄ тато чӣварам̣ са̄дитаббам̣. тато че уттари са̄дийеййа, ниссаггийам̣ па̄читтийа’’нти.

524. тан̃чети аччхинначӣваракам̣ бхиккхум̣.

ан̃н̃а̄тако на̄ма ма̄тито ва̄ питито ва̄ йа̄ва саттама̄ пита̄махайуга̄ асамбаддхо.

гахапати на̄ма йо кочи ага̄рам̣ аджджха̄васати.

гахапата̄нӣ на̄ма йа̄ ка̄чи ага̄рам̣ аджджха̄васати.

бахӯхи чӣварехӣти бахукехи чӣварехи.

абхихат̣т̣хум̣ пава̄реййа̄ти йа̄ватакам̣ иччхаси та̄ватакам̣ ган̣ха̄хӣти.

сантаруттарапарамам̣ тена бхиккхуна̄ тато чӣварам̣ са̄дитаббанти саче тӣн̣и нат̣т̣ха̄ни хонти две са̄дитабба̄ни, две нат̣т̣ха̄ни екам̣ са̄дитаббам̣, екам̣ нат̣т̣хам̣ на кин̃чи са̄дитаббам̣.

тато че уттари са̄дийеййа̄ти татуттари вин̃н̃а̄пети, пайоге дуккат̣ам̣. пат̣ила̄бхена ниссаггийам̣ хоти. ниссаджджитаббам̣ сан̇гхасса ва̄ ган̣асса ва̄ пуггаласса ва̄. еван̃ча пана, бхиккхаве, ниссаджджитаббам̣…пе… идам̣ ме, бханте, чӣварам̣ ан̃н̃а̄такам̣ гахапатикам̣ упасан̇камитва̄ татуттари вин̃н̃а̄питам̣ ниссаггийам̣. има̄хам̣ сан̇гхасса ниссаджджа̄мӣти…пе… дадеййа̄ти…пе… дадеййунти…пе… а̄йасмато даммӣти.

525. ан̃н̃а̄таке ан̃н̃а̄такасан̃н̃ӣ татуттари чӣварам̣ вин̃н̃а̄пети, ниссаггийам̣ па̄читтийам̣. ан̃н̃а̄таке вематико татуттари чӣварам̣ вин̃н̃а̄пети, ниссаггийам̣ па̄читтийам̣. ан̃н̃а̄таке н̃а̄такасан̃н̃ӣ татуттари чӣварам̣ вин̃н̃а̄пети, ниссаггийам̣ па̄читтийам̣.

526. ана̄патти – ‘‘сесакам̣ а̄харисса̄мӣ’’ти харанто гаччхати, ‘‘сесакам̣ туйхева хотӯ’’ти денти, на аччхиннака̄ран̣а̄ денти, на нат̣т̣хака̄ран̣а̄ денти, н̃а̄така̄нам̣, пава̄рита̄нам̣, аттано дханена, умматтакасса, а̄дикаммикасса̄ти.

татуттарисиккха̄падам̣ нит̣т̣хитам̣ саттамам̣.