9. дутийаупаккхат̣асиккха̄падам̣

532. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена ан̃н̃атаро пурисо ан̃н̃атарам̣ пурисам̣ етадавоча – ‘‘аййам̣ упанандам̣ чӣварена аччха̄десса̄мӣ’’ти. сопи евама̄ха – ‘‘ахампи аййам̣ упанандам̣ чӣварена аччха̄десса̄мӣ’’ти. ассоси кхо ан̃н̃атаро пин̣д̣ача̄рико бхиккху тесам̣ пуриса̄нам̣ имам̣ катха̄салла̄пам̣. атха кхо со бхиккху йена̄йасма̄ упанандо сакйапутто тенупасан̇ками; упасан̇камитва̄ а̄йасмантам̣ упанандам̣ сакйапуттам̣ етадавоча – ‘‘маха̄пун̃н̃оси твам̣, а̄вусо упананда. амукасмим̣ ока̄се ан̃н̃атаро пурисо ан̃н̃атарам̣ пурисам̣ етадавоча – ‘аййам̣ упанандам̣ чӣварена аччха̄десса̄мӣ’ти. сопи евама̄ха – ‘ахампи аййам̣ упанандам̣ чӣварена аччха̄десса̄мӣ’’’ти. ‘‘аттха̄вусо, мам̣ те упат̣т̣ха̄ка̄’’ти.

атха кхо а̄йасма̄ упанандо сакйапутто йена те пуриса̄ тенупасан̇ками; упасан̇камитва̄ те пурисе етадавоча – ‘‘саччам̣ кира мам̣ тумхе, а̄вусо, чӣварехи аччха̄детука̄ма̄ттха̄’’ти? ‘‘апи наййа, евам̣ хоти – ‘аййам̣ упанандам̣ чӣварехи аччха̄десса̄ма̄’’’ти. ‘‘саче кхо мам̣ тумхе, а̄вусо, чӣварехи аччха̄детука̄ма̄ттха, еварӯпена чӣварена аччха̄детха, кйа̄хам̣ техи аччханнопи карисса̄ми, йа̄на̄хам̣ на парибхун̃джисса̄мӣ’’ти. атха кхо те пуриса̄ уджджха̄йанти кхиййанти випа̄ченти – ‘‘махиччха̄ име саман̣а̄ сакйапуттийа̄ асантут̣т̣ха̄. найиме сукара̄ чӣварехи аччха̄детум̣. катхан̃хи на̄ма аййо упанандо амхехи пуббе аппава̄рито упасан̇камитва̄ чӣваре викаппам̣ а̄паджджиссатӣ’’ти!

ассосум̣ кхо бхиккхӯ тесам̣ пуриса̄нам̣ уджджха̄йанта̄нам̣ кхиййанта̄нам̣ випа̄чента̄нам̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма а̄йасма̄ упанандо сакйапутто пуббе аппава̄рито гахапатике упасан̇камитва̄ чӣваре викаппам̣ а̄паджджиссатӣ’’ти! атха кхо те бхиккхӯ а̄йасмантам̣ упанандам̣ сакйапуттам̣ анекапарийа̄йена вигарахитва̄ бхагавато етаматтхам̣ а̄рочесум̣…пе… ‘‘саччам̣ кира твам̣, упананда, пуббе аппава̄рито гахапатике упасан̇камитва̄ чӣваре викаппам̣ а̄паджджасӣ’’ти? ‘‘саччам̣, бхагава̄’’ти. ‘‘н̃а̄така̄ те, упананда, ан̃н̃а̄така̄’’ти? ‘‘ан̃н̃а̄така̄, бхагава̄’’ти. ‘‘ан̃н̃а̄тако, могхапуриса, ан̃н̃а̄така̄нам̣ на джа̄на̄ти патирӯпам̣ ва̄ аппатирӯпам̣ ва̄ сантам̣ ва̄ асантам̣ ва̄. таттха на̄ма твам̣, могхапуриса, пуббе аппава̄рито ан̃н̃а̄таке гахапатике упасан̇камитва̄ чӣваре викаппам̣ а̄паджджиссаси! нетам̣, могхапуриса, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

533. ‘‘бхиккхум̣ панева уддисса убхиннам̣ ан̃н̃а̄така̄нам̣ гахапатӣнам̣ ва̄ гахапата̄нӣнам̣ ва̄ паччекачӣварачета̄панна̄ни упаккхат̣а̄ни хонти – ‘имехи майам̣ паччекачӣварачета̄паннехи паччекачӣвара̄ни чета̄петва̄ иттханна̄мам̣ бхиккхум̣ чӣварехи аччха̄десса̄ма̄’ти; татра че со бхиккху пуббе аппава̄рито упасан̇камитва̄ чӣваре викаппам̣ а̄паджджеййа – ‘са̄дху вата мам̣ а̄йасманто имехи паччекачӣварачета̄паннехи еварӯпам̣ ва̄ еварӯпам̣ ва̄ чӣварам̣ чета̄петва̄ аччха̄детха, убхова санта̄ екена̄’ти, калйа̄н̣акамйатам̣ упа̄да̄йа, ниссаггийам̣ па̄читтийа’’нти.

534. бхиккхум̣ панева уддисса̄ти бхиккхуссаттха̄йа, бхиккхум̣ а̄рамман̣ам̣ каритва̄, бхиккхум̣ аччха̄детука̄ма̄.

убхиннанти двиннам̣.

ан̃н̃а̄така̄ на̄ма ма̄тито ва̄ питито ва̄ йа̄ва саттама̄ пита̄махайуга̄ асамбаддха̄.

гахапатӣ на̄ма йе кечи ага̄ра аджджха̄васанти.

гахапата̄нийо на̄ма йа̄ ка̄чи ага̄рам̣ аджджха̄васанти.

чӣварачета̄панна̄ни на̄ма хиран̃н̃а̄ ва̄ суван̣н̣а̄ ва̄ мутта̄ ва̄ ман̣ӣ ва̄ пава̄л̣а̄ ва̄ пхалика̄ ва̄ пат̣ака̄ ва̄ сутта̄ ва̄ каппа̄са̄ ва̄.

имехи паччекачӣварачета̄паннехити паччупат̣т̣хитехи.

чета̄петва̄ти париваттетва̄.

аччха̄десса̄ма̄ти дасса̄ма.

татра че со бхиккхӯти йам̣ бхиккхум̣ уддисса чӣварачета̄панна̄ни упаккхат̣а̄ни хонти со бхиккху.

пуббе аппава̄ритоти пуббе авутто хоти – ‘‘кӣдисена те, бханте, чӣварена аттхо, кӣдисам̣ те чӣварам̣ чета̄пема̄’’ти.

упасан̇камитва̄ти гхарам̣ гантва̄ йаттха каттхачи упасан̇камитва̄.

чӣваре викаппам̣ а̄паджджеййа̄ти а̄йатам̣ ва̄ хоту виттхатам̣ ва̄ аппитам̣ ва̄ сан̣хам̣ ва̄.

имехи паччекачӣварачета̄паннехӣти паччупат̣т̣хитехи.

еварӯпам̣ ва̄ еварӯпам̣ ва̄ти а̄йатам̣ ва̄ виттхатам̣ ва̄ аппитам̣ ва̄ сан̣хам̣ ва̄.

чета̄петва̄ти париваттетва̄.

аччха̄детха̄ти даджджетха.

убхова санта̄ екена̄ти двепи джана̄ екена.

калйа̄н̣акамйатам̣ упа̄да̄йа̄ти са̄дхаттхико махаггхаттхико.

тасса вачанена а̄йатам̣ ва̄ виттхатам̣ ва̄ аппитам̣ ва̄ сан̣хам̣ ва̄ чета̄пенти, пайоге дуккат̣ам̣. пат̣ила̄бхена ниссаггийам̣ хоти. ниссаджджитаббам̣ сан̇гхасса ва̄ ган̣асса ва̄ пуггаласса ва̄. еван̃ча пана, бхиккхаве, ниссаджджитаббам̣…пе… идам̣ ме, бханте, чӣварам̣ пуббе аппава̄рито ан̃н̃а̄таке гахапатике упасан̇камитва̄ чӣваре викаппам̣ а̄паннам̣ ниссаггийам̣. има̄хам̣ сан̇гхасса ниссаджджа̄мӣти…пе… дадеййа̄ти…пе… дадеййунти…пе… а̄йасмато даммӣти.

535. ан̃н̃а̄таке ан̃н̃а̄такасан̃н̃ӣ пуббе аппава̄рито гахапатике упасан̇камитва̄ чӣваре викаппам̣ а̄паджджати, ниссаггийам̣ па̄читтийам̣. ан̃н̃а̄таке вематико пуббе аппава̄рито гахапатике упасан̇камитва̄ чӣваре викаппам̣ а̄паджджати, ниссаггийам̣ па̄читтийам̣. ан̃н̃а̄таке н̃а̄такасан̃н̃ӣ пуббе аппава̄рито гахапатике упасан̇камитва̄ чӣваре викаппам̣ а̄паджджати, ниссаггийам̣ па̄читтийам̣.

н̃а̄таке ан̃н̃а̄такасан̃н̃ӣ, а̄патти дуккат̣асса. н̃а̄таке вематико, а̄патти дуккат̣асса. н̃а̄таке н̃а̄такасан̃н̃ӣ, ана̄патти.

536. ана̄патти – н̃а̄така̄нам̣, пава̄рита̄нам̣, ан̃н̃ассаттха̄йа, аттано дханена, махаггхам̣ чета̄петука̄ма̄нам̣ аппаггхам̣ чета̄пети, умматтакасса, а̄дикаммикасса̄ти.

дутийаупаккхат̣асиккха̄падам̣ нит̣т̣хитам̣ навамам̣.