2. ӯнапан̃чабандханасиккха̄падам̣

609. тена самайена буддхо бхагава̄ саккесу вихарати капилаваттхусмим̣ нигродха̄ра̄ме. тена кхо пана самайена ан̃н̃атарена кумбхака̄рена бхиккхӯ пава̄рита̄ хонти – ‘‘йесам̣ аййа̄нам̣ паттена аттхо ахам̣ паттена̄’’ти. тена кхо пана самайена бхиккхӯ на маттам̣ джа̄нитва̄ бахӯ патте вин̃н̃а̄пенти. йесам̣ кхуддака̄ патта̄ те маханте патте вин̃н̃а̄пенти. йесам̣ маханта̄ патта̄ те кхуддаке патте вин̃н̃а̄пенти. атха кхо со кумбхака̄ро бхиккхӯнам̣ бахӯ патте каронто на саккоти ан̃н̃ам̣ викка̄йикам̣ бхан̣д̣ам̣ ка̄тум̣, аттана̄пи на йа̄пети, путтада̄ра̄писса киламанти. манусса̄ уджджха̄йанти кхиййанти випа̄ченти – ‘‘катхан̃хи на̄ма саман̣а̄ сакйапуттийа̄ на маттам̣ джа̄нитва̄ бахӯ патте вин̃н̃а̄пессанти! айам̣ имесам̣ бахӯ патте каронто на саккоти ан̃н̃ам̣ викка̄йикам̣ бхан̣д̣ам̣ ка̄тум̣, аттана̄пи на йа̄пети, путтада̄ра̄писса киламантӣ’’ти.

ассосум̣ кхо бхиккхӯ тесам̣ манусса̄нам̣ уджджха̄йанта̄нам̣ кхиййанта̄нам̣ випа̄чента̄нам̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма бхиккхӯ на маттам̣ джа̄нитва̄ бахӯ патте вин̃н̃а̄пессантӣ’’ти! атха кхо те бхиккхӯ те анекапарийа̄йена вигарахитва̄ бхагавато етаматтхам̣ а̄рочесум̣…пе… саччам̣ кира, бхиккхаве, бхиккхӯ на маттам̣ джа̄нитва̄ бахӯ патте вин̃н̃а̄пентӣти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма те, бхиккхаве, могхапуриса̄ на маттам̣ джа̄нитва̄ бахӯ патте вин̃н̃а̄пессанти! нетам̣, бхиккхаве, аппасанна̄нам̣ ва̄ паса̄да̄йа…пе… вигарахитва̄ дхаммим̣ катхам̣ катва̄ бхиккхӯ а̄мантеси – ‘‘на, бхиккхаве, патто вин̃н̃а̄петаббо. йо вин̃н̃а̄пеййа, а̄патти дуккат̣асса̄’’ти.

610. тена кхо пана самайена ан̃н̃атарасса бхиккхуно патто бхинно хоти. атха кхо со бхиккху – ‘‘бхагавата̄ пат̣иккхиттам̣ паттам̣ вин̃н̃а̄пету’’нти куккучча̄йанто на вин̃н̃а̄пети. хаттхесу пин̣д̣а̄йа чарати. манусса̄ уджджха̄йанти кхиййанти випа̄ченти – ‘‘катхан̃хи на̄ма саман̣а̄ сакйапуттийа̄ хаттхесу пин̣д̣а̄йа чариссанти, сеййатха̄пи титтхийа̄’’ти! ассосум̣ кхо бхиккхӯ тесам̣ манусса̄нам̣ уджджха̄йанта̄нам̣ кхиййанта̄нам̣ випа̄чента̄нам̣. атха кхо те бхиккхӯ бхагавато етаматтхам̣ а̄рочесум̣. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, нат̣т̣хапаттасса ва̄ бхиннапаттасса ва̄ паттам̣ вин̃н̃а̄пету’’нти.

611. тена кхо пана самайена чхаббаггийа̄ бхиккхӯ – ‘‘бхагавата̄ анун̃н̃а̄там̣ нат̣т̣хапаттасса ва̄ бхиннапаттасса ва̄ паттам̣ вин̃н̃а̄пету’’нти аппаматтакенапи бхиннена аппаматтакенапи кхан̣д̣ена виликхитаматтенапи бахӯ патте вин̃н̃а̄пенти. атха кхо со кумбхака̄ро бхиккхӯнам̣ татхева бахӯ патте каронто на саккоти ан̃н̃ам̣ викка̄йикам̣ бхан̣д̣ам̣ ка̄тум̣, аттана̄пи на йа̄пети, путтада̄ра̄писса киламанти. манусса̄ татхева уджджха̄йанти кхиййанти випа̄ченти – ‘‘катхан̃хи на̄ма саман̣а̄ сакйапуттийа̄ на маттам̣ джа̄нитва̄ бахӯ патте вин̃н̃а̄пессанти! айам̣ имесам̣ бахӯ патте каронто на саккоти ан̃н̃ам̣ викка̄йикам̣ бхан̣д̣ам̣ ка̄тум̣, аттана̄пи на йа̄пети, путтада̄ра̄писса киламантӣ’’ти.

ассосум̣ кхо бхиккхӯ тесам̣ манусса̄нам̣ уджджха̄йанта̄нам̣ кхиййанта̄нам̣ випа̄чента̄нам̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ аппаматтакенапи бхиннена аппаматтакенапи кхан̣д̣ена виликхитаматтенапи бахӯ патте вин̃н̃а̄пессантӣ’’ти! атха кхо те бхиккхӯ чхаббаггийе бхиккхӯ анекапарийа̄йена вигарахитва̄ бхагавато етаматтхам̣ а̄рочесум̣…пе… ‘‘саччам̣ кира тумхе, бхиккхаве, аппаматтакенапи бхиннена аппаматтакенапи кхан̣д̣ена виликхитаматтенапи бахӯ патте вин̃н̃а̄петха̄’’ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма тумхе, могхапуриса̄, аппаматтакенапи бхиннена аппаматтакенапи кхан̣д̣ена виликхитаматтенапи бахӯ патте вин̃н̃а̄пессатха! нетам̣, могхапуриса̄, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

612. ‘‘йо пана бхиккху ӯнапан̃чабандханена паттена ан̃н̃ам̣ навам̣ паттам̣ чета̄пеййа, ниссаггийам̣ па̄читтийам̣. тена бхиккхуна̄ со патто бхиккхупариса̄йа ниссаджджитаббо. йо ча тасса̄ бхиккхупариса̄йа паттапарийанто со тасса бхиккхуно пада̄таббо – ‘айам̣ те, бхиккху, патто йа̄ва бхедана̄йа дха̄ретаббо’ти. айам̣ таттха са̄мӣчӣ’’ти.

613. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

ӯнапан̃чабандхано на̄ма патто абандхано ва̄ екабандхано ва̄ двибандхано ва̄ тибандхано ва̄ чатубандхано ва̄. абандханока̄со на̄ма патто йасса дван̇гула̄ ра̄джи на хоти. бандханока̄со на̄ма патто йасса дван̇гула̄ ра̄джи хоти. наво на̄ма патто вин̃н̃аттим̣ упа̄да̄йа вуччати.

чета̄пеййа̄ти вин̃н̃а̄пети, пайоге дуккат̣ам̣. пат̣ила̄бхена ниссаггийо хоти. сан̇гхамаджджхе ниссаджджитаббо. саббехева адхит̣т̣хитапаттам̣ гахетва̄ саннипатитаббам̣. на ла̄мако патто адхит̣т̣ха̄таббо – ‘‘махаггхам̣ паттам̣ гахесса̄мӣ’’ти. саче ла̄макам̣ паттам̣ адхит̣т̣хети – ‘‘махаггхам̣ паттам̣ гахесса̄мӣ’’ти, а̄патти дуккат̣асса. еван̃ча пана, бхиккхаве, ниссаджджитаббо. тена бхиккхуна̄ сан̇гхам̣ упасан̇камитва̄ екам̣сам̣ уттара̄сан̇гам̣ каритва̄ вуд̣д̣ха̄нам̣ бхиккхӯнам̣ па̄де вандитва̄ уккут̣икам̣ нисӣдитва̄ ан̃джалим̣ паггахетва̄ евамасса вачанӣйо – ‘‘айам̣ ме, бханте, патто ӯнапан̃чабандханена паттена чета̄пито ниссаггийо. има̄хам̣ сан̇гхасса ниссаджджа̄мӣ’’ти. ниссаджджитва̄ а̄патти десетабба̄. бйаттена бхиккхуна̄ пат̣ибалена а̄патти пат̣иггахетабба̄. пан̃чахан̇гехи саманна̄гато бхиккху паттагга̄ха̄пако самманнитаббо – йо на чханда̄гатим̣ гаччхеййа, на доса̄гатим̣ гаччхеййа, на моха̄гатим̣ гаччхеййа, на бхайа̄гатим̣ гаччхеййа, га̄хита̄га̄хитан̃ча джа̄неййа. еван̃ча пана, бхиккхаве, самманнитаббо. пат̣хамам̣ бхиккху йа̄читаббо. йа̄читва̄ бйаттена бхиккхуна̄ пат̣ибалена сан̇гхо н̃а̄петаббо –

614. ‘‘сун̣а̄ту ме, бханте, сан̇гхо. йади сан̇гхасса паттакаллам̣, сан̇гхо иттханна̄мам̣ бхиккхум̣ паттагга̄ха̄пакам̣ самманнеййа. еса̄ н̃атти.

‘‘сун̣а̄ту ме, бханте, сан̇гхо. сан̇гхо иттханна̄мам̣ бхиккхум̣ паттагга̄ха̄пакам̣ самманнати. йасса̄йасмато кхамати иттханна̄масса бхиккхуно паттагга̄ха̄пакасса саммути, со тун̣хасса; йасса наккхамати, со бха̄сеййа.

‘‘саммато сан̇гхена иттханна̄мо бхиккху паттагга̄ха̄пако. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

615. тена самматена бхиккхуна̄ патто га̄хетаббо. тхеро ваттаббо – ‘‘ган̣ха̄ту, бханте, тхеро патта’’нти. саче тхеро ган̣ха̄ти, тхерасса патто дутийасса га̄хетаббо. на ча тасса ануддайата̄йа на гахетаббо. йо на ган̣хеййа, а̄патти дуккат̣асса. апаттакасса на га̄хетаббо. етенева упа̄йена йа̄ва сан̇гханавака̄ га̄хетабба̄. йо ча тасса̄ бхиккхупариса̄йа паттапарийанто, со тасса бхиккхуно пада̄таббо – ‘‘айам̣ те, бхиккху, патто йа̄ва бхедана̄йа дха̄ретаббо’’ти.

тена бхиккхуна̄ со патто на адесе никкхипитаббо, на абхогена бхун̃джитаббо, на виссаджджетаббо – ‘‘катха̄йам̣ патто нассеййа ва̄ винассеййа ва̄ бхиджджеййа ва̄’’ти? саче адесе ва̄ никкхипати абхогена ва̄ бхун̃джати виссаджджети ва̄, а̄патти дуккат̣асса.

айам̣ таттха са̄мӣчӣти айам̣ таттха анудхаммата̄.

616. абандханена паттена абандханам̣ паттам̣ чета̄пети, ниссаггийам̣ па̄читтийам̣. абандханена паттена екабандханам̣ паттам̣ чета̄пети, ниссаггийам̣ па̄читтийам̣. абандханена паттена двибандханам̣ паттам̣ чета̄пети, ниссаггийам̣ па̄читтийам̣. абандханена паттена тибандханам̣ паттам̣ чета̄пети, ниссаггийам̣ па̄читтийам̣. абандханена паттена чатубандханам̣ паттам̣ чета̄пети, ниссаггийам̣ па̄читтийам̣.

екабандханена паттена абандханам̣ паттам̣ чета̄пети, ниссаггийам̣ па̄читтийам̣. екабандханена паттена екабандханам̣ паттам̣ чета̄пети, ниссаггийам̣ па̄читтийам̣. екабандханена паттена двибандханам̣ паттам̣ чета̄пети, ниссаггийам̣ па̄читтийам̣. екабандханена паттена тибандханам̣ паттам̣ чета̄пети, ниссаггийам̣ па̄читтийам̣. екабандханена паттена чатубандханам̣ паттам̣ чета̄пети, ниссаггийам̣ па̄читтийам̣.

двибандханена паттена абандханам̣ паттам̣ чета̄пети, ниссаггийам̣ па̄читтийам̣. двибандханена паттена екабандханам̣ паттам̣…пе… двибандханам̣ паттам̣… тибандханам̣ паттам̣… чатубандханам̣ паттам̣ чета̄пети, ниссаггийам̣ па̄читтийам̣.

тибандханена паттена абандханам̣ паттам̣…пе… екабандханам̣ паттам̣…пе… двибандханам̣ паттам̣… тибандханам̣ паттам̣… чатубандханам̣ паттам̣ чета̄пети, ниссаггийам̣ па̄читтийам̣.

чатубандханена паттена абандханам̣ паттам̣…пе… екабандханам̣ паттам̣… двибандханам̣ паттам̣… тибандханам̣ паттам̣… чатубандханам̣ паттам̣ чета̄пети, ниссаггийам̣ па̄читтийам̣.

абандханена паттена абандханока̄сам̣ паттам̣ чета̄пети, ниссаггийам̣ па̄читтийам̣. абандханена паттена екабандханока̄сам̣ паттам̣…пе… двибандханока̄сам̣ паттам̣ … тибандханока̄сам̣ паттам̣… чатубандханока̄сам̣ паттам̣ чета̄пети, ниссаггийам̣ па̄читтийам̣.

екабандханена паттена абандханока̄сам̣ паттам̣…пе… екабандханока̄сам̣ паттам̣… двибандханока̄сам̣ паттам̣… тибандханока̄сам̣ паттам̣… чатубандханока̄сам̣ паттам̣ чета̄пети, ниссаггийам̣ па̄читтийам̣.

двибандханена паттена абандханока̄сам̣ паттам̣…пе… чатубандханока̄сам̣ паттам̣ чета̄пети, ниссаггийам̣ па̄читтийам̣.

тибандханена паттена абандханока̄сам̣ паттам̣…пе… чатубандханока̄сам̣ паттам̣ чета̄пети, ниссаггийам̣ па̄читтийам̣.

чатубандханена паттена абандханока̄сам̣ паттам̣…пе… екабандханока̄сам̣ паттам̣… двибандханока̄сам̣ паттам̣… тибандханока̄сам̣ паттам̣… чатубандханока̄сам̣ паттам̣ чета̄пети, ниссаггийам̣ па̄читтийам̣.

абандханока̄сена паттена абандханам̣ паттам̣ чета̄пети, ниссаггийам̣ па̄читтийам̣. абандханока̄сена паттена екабандханам̣ паттам̣…пе… двибандханам̣ паттам̣… тибандханам̣ паттам̣… чатубандханам̣ паттам̣ чета̄пети, ниссаггийам̣ па̄читтийам̣.

чатубандханока̄сена паттена абандханам̣ паттам̣ чета̄пети, ниссаггийам̣ па̄читтийам̣. чатубандханока̄сена паттена екабандханам̣ паттам̣…пе… двибандханам̣ паттам̣… тибандханам̣ паттам̣… чатубандханам̣ паттам̣ чета̄пети, ниссаггийам̣ па̄читтийам̣.

абандханока̄сена паттена абандханока̄сам̣ паттам̣…пе… екабандханока̄сам̣ паттам̣… двибандханока̄сам̣ паттам̣… тибандханока̄сам̣ паттам̣… чатубандханока̄сам̣ паттам̣ чета̄пети, ниссаггийам̣ па̄читтийам̣.

чатубандханока̄сена паттена абандханока̄сам̣ паттам̣…пе… екабандханока̄сам̣ паттам̣… двибандханока̄сам̣ паттам̣… тибандханока̄сам̣ паттам̣… чатубандханока̄сам̣ паттам̣ чета̄пети, ниссаггийам̣ па̄читтийам̣.

617. ана̄патти нат̣т̣хапаттасса, бхиннапаттасса, н̃а̄така̄нам̣ пава̄рита̄нам̣, ан̃н̃ассаттха̄йа, аттано дханена, умматтакасса, а̄дикаммикасса̄ти.

ӯнапан̃чабандханасиккха̄падам̣ нит̣т̣хитам̣ дутийам̣.