1. паттасиккха̄падам̣

598. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена чхаббаггийа̄ бхиккхӯ бахӯ патте санничайам̣ каронти. манусса̄ виха̄рача̄рикам̣ а̄хин̣д̣анта̄ пасситва̄ уджджха̄йанти кхиййанти випа̄ченти – ‘‘катхан̃хи на̄ма саман̣а̄ сакйапуттийа̄ бахӯ патте санничайам̣ кариссанти, паттава̄н̣иджджам̣ ва̄ саман̣а̄ сакйапуттийа̄ кариссанти а̄маттика̄пан̣ам̣ ва̄ паса̄рессантӣ’’ти! ассосум̣ кхо бхиккхӯ тесам̣ манусса̄нам̣ уджджха̄йанта̄нам̣ кхиййанта̄нам̣ випа̄чента̄нам̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ атирекапаттам̣ дха̄рессантӣ’’ти! атха кхо те бхиккхӯ чхаббаггийе бхиккхӯ анекапарийа̄йена вигарахитва̄ бхагавато етаматтхам̣ а̄рочесум̣…пе… ‘‘саччам̣ кира тумхе, бхиккхаве, атирекапаттам̣ дха̄ретха̄’’ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма тумхе, могхапуриса̄, атирекапаттам̣ дха̄рессатха! нетам̣, могхапуриса̄, аппасанна̄нам̣ ва̄ паса̄да̄йа …пе… еван̃ча пана, бхиккхаве, имам̣ сиккха̄падам̣ уддисеййа̄тха –

599. ‘‘йо пана бхиккху атирекапаттам̣ дха̄реййа, ниссаггийам̣ па̄читтийа’’нти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

600. тена кхо пана самайена а̄йасмато а̄нандасса атирекапатто уппанно хоти. а̄йасма̄ ча а̄нандо там̣ паттам̣ а̄йасмато са̄рипуттасса да̄тука̄мо хоти. а̄йасма̄ ча са̄рипутто са̄кете вихарати. атха кхо а̄йасмато а̄нандасса етадахоси – ‘‘бхагавата̄ сиккха̄падам̣ пан̃н̃аттам̣ – ‘на атирекапатто дха̄ретаббо’ти. айан̃ча ме атирекапатто уппанно. ахан̃чимам̣ паттам̣ а̄йасмато са̄рипуттасса да̄тука̄мо. а̄йасма̄ ча са̄рипутто са̄кете вихарати. катхам̣ ну кхо майа̄ пат̣ипаджджитабба’’нти? бхагавато етаматтхам̣ а̄рочеси. ‘‘кӣвачирам̣ пана̄нанда, са̄рипутто а̄гаччхиссатӣ’’ти? ‘‘навамам̣ ва̄, бхагава̄, дивасам̣ дасамам̣ ва̄’’ти. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, даса̄хапарамам̣ атирекапаттам̣ дха̄ретум̣. еван̃ча пана, бхиккхаве, имам̣ сиккха̄падам̣ уддисеййа̄тха –

601. ‘‘даса̄хапарамам̣ атирекапатто дха̄ретаббо. там̣ атикка̄майато ниссаггийам̣ па̄читтийа’’нти.

602. даса̄хапараманти даса̄хапарамата̄ дха̄ретаббо.

атирекапатто на̄ма анадхит̣т̣хито авикаппито.

патто на̄ма две патта̄ айопатто маттика̄паттоти.

тайо паттасса ван̣н̣а̄ уккат̣т̣хо патто маджджхимо патто омако патто. уккат̣т̣хо на̄ма патто ад̣д̣ха̄л̣хакоданам̣ ган̣ха̄ти чатубха̄гам̣ кха̄данам̣ тадупийам̣ бйан̃джанам̣. маджджхимо на̄ма патто на̄л̣икоданам̣ ган̣ха̄ти чатубха̄гам̣ кха̄данам̣ тадупийам̣ бйан̃джанам̣. омако на̄ма патто паттходанам̣ ган̣ха̄ти чатубха̄гам̣ кха̄данам̣ тадупийам̣ бйан̃джанам̣. тато уккат̣т̣хо апатто, омако апатто.

там̣ атикка̄майато ниссаггийо хотӣти ека̄дасе арун̣уггамане ниссаггийо хоти. ниссаджджитаббо сан̇гхасса ва̄ ган̣асса ва̄ пуггаласса ва̄. еван̃ча пана, бхиккхаве, ниссаджджитаббо. тена бхиккхуна̄ сан̇гхам̣ упасан̇камитва̄ екам̣сам̣ уттара̄сан̇гам̣ каритва̄ вуд̣д̣ха̄нам̣ бхиккхӯнам̣ па̄де вандитва̄ уккут̣икам̣ нисӣдитва̄ ан̃джалим̣ паггахетва̄ евамасса вачанӣйо – ‘‘айам̣ ме, бханте, патто даса̄ха̄тикканто ниссаггийо. има̄хам̣ сан̇гхасса ниссаджджа̄мӣ’’ти. ниссаджджитва̄ а̄патти десетабба̄. бйаттена бхиккхуна̄ пат̣ибалена а̄патти пат̣иггахетабба̄, ниссат̣т̣хапатто да̄таббо.

603. ‘‘сун̣а̄ту ме, бханте, сан̇гхо. айам̣ патто иттханна̄масса бхиккхуно ниссаггийо сан̇гхасса ниссат̣т̣хо. йади сан̇гхасса паттакаллам̣, сан̇гхо имам̣ паттам̣ иттханна̄масса бхиккхуно дадеййа̄’’ти.

604. тена бхиккхуна̄ самбахуле бхиккхӯ упасан̇камитва̄ екам̣сам̣ уттара̄сан̇гам̣ каритва̄ вуд̣д̣ха̄нам̣ бхиккхӯнам̣ па̄де вандитва̄ уккут̣икам̣ нисӣдитва̄ ан̃джалим̣ паггахетва̄ евамассу вачанӣйа̄ – ‘‘айам̣ ме, бханте, патто даса̄ха̄тикканто ниссаггийо. има̄хам̣ а̄йасманта̄нам̣ ниссаджджа̄мӣ’’ти. ниссаджджитва̄ а̄патти десетабба̄. бйаттена бхиккхуна̄ пат̣ибалена а̄патти пат̣иггахетабба̄, ниссат̣т̣хапатто да̄таббо.

605. ‘‘сун̣анту ме а̄йасманта̄. айам̣ патто иттханна̄масса бхиккхуно ниссаггийо а̄йасманта̄нам̣ ниссат̣т̣хо. йада̄йасманта̄нам̣ паттакаллам̣, а̄йасманта̄ имам̣ паттам̣ иттханна̄масса бхиккхуно дадеййу’’нти.

606. тена бхиккхуна̄ екам̣ бхиккхум̣ упасан̇камитва̄ екам̣сам̣ уттара̄сан̇гам̣ каритва̄ уккут̣икам̣ нисӣдитва̄ ан̃джалим̣ паггахетва̄ евамасса вачанӣйо – ‘‘айам̣ ме, а̄вусо, патто даса̄ха̄тикканто ниссаггийо. има̄хам̣ а̄йасмато ниссаджджа̄мӣ’’ти. ниссаджджитва̄ а̄патти десетабба̄. тена бхиккхуна̄ а̄патти пат̣иггахетабба̄, ниссат̣т̣хапатто да̄таббо – ‘‘имам̣ паттам̣ а̄йасмато даммӣ’’ти.

607. даса̄ха̄тикканте атиккантасан̃н̃ӣ, ниссаггийам̣ па̄читтийам̣. даса̄ха̄тикканте вематико, ниссаггийам̣ па̄читтийам̣. даса̄ха̄тикканте анатиккантасан̃н̃ӣ, ниссаггийам̣ па̄читтийам̣. анадхит̣т̣хите адхит̣т̣хитасан̃н̃ӣ, ниссаггийам̣ па̄читтийам̣. авикаппите викаппитасан̃н̃ӣ, ниссаггийам̣ па̄читтийам̣. ависсаджджите виссаджджитасан̃н̃ӣ, ниссаггийам̣ па̄читтийам̣. анат̣т̣хе нат̣т̣хасан̃н̃ӣ ниссаггийам̣ па̄читтийам̣. авинат̣т̣хе винат̣т̣хасан̃н̃ӣ, ниссаггийам̣ па̄читтийам̣. абхинне бхиннасан̃н̃ӣ, ниссаггийам̣ па̄читтийам̣. авилутте вилуттасан̃н̃ӣ, ниссаггийам̣ па̄читтийам̣.

ниссаггийам̣ паттам̣ аниссаджджитва̄ парибхун̃джати, а̄патти дуккат̣асса. даса̄ха̄натикканте атиккантасан̃н̃ӣ, а̄патти дуккат̣асса. даса̄ха̄натикканте вематико, а̄патти дуккат̣асса. даса̄ха̄натикканте анатиккантасан̃н̃ӣ, ана̄патти.

608. ана̄патти антодаса̄хам̣ адхит̣т̣хети, викаппети, виссаджджети, нассати, винассати, бхиджджати, аччхиндитва̄ ган̣ханти, висса̄сам̣ ган̣ханти, умматтакасса, а̄дикаммикасса̄ти.

тена кхо пана самайена чхаббаггийа̄ бхиккхӯ ниссат̣т̣хапаттам̣ на денти. бхагавато етаматтхам̣ а̄рочесум̣. ‘‘на, бхиккхаве, ниссат̣т̣хапатто на да̄таббо. йо на дадеййа, а̄патти дуккат̣асса̄’’ти.

паттасиккха̄падам̣ нит̣т̣хитам̣ пат̣хамам̣.