8. рӯпийасиккха̄падам̣

582. тена самайена буддхо бхагава̄ ра̄джагахе вихарати вел̣уване каландаканива̄пе. тена кхо пана самайена а̄йасма̄ упанандо сакйапутто ан̃н̃атарасса куласса кулӯпако хоти ниччабхаттико. йам̣ тасмим̣ куле уппаджджати кха̄данӣйам̣ ва̄ бходжанӣйам̣ ва̄ тато а̄йасмато упанандасса сакйапуттасса пат̣ивисо т̣хапиййати. тена кхо пана самайена са̄йам̣ тасмим̣ куле мам̣сам̣ уппаннам̣ хоти. тато а̄йасмато упанандасса сакйапуттасса пат̣ивисо т̣хапито хоти. тасса куласса да̄рако раттийа̄ паччӯсасамайам̣ паччут̣т̣ха̄йа родати – ‘‘мам̣сам̣ ме детха̄’’ти. атха кхо со пурисо паджа̄патим̣ етадавоча – ‘‘аййасса пат̣ивисам̣ да̄ракасса дехи. ан̃н̃ам̣ чета̄петва̄ аййасса дасса̄ма̄’’ти.

атха кхо а̄йасма̄ упанандо сакйапутто пуббан̣хасамайам̣ нива̄сетва̄ паттачӣварам̣ а̄да̄йа йена там̣ кулам̣ тенупасан̇ками; упасан̇камитва̄ пан̃н̃атте а̄сане нисӣди. атха кхо со пурисо йена̄йасма̄ упанандо сакйапутто тенупасан̇ками; упасан̇камитва̄ а̄йасмантам̣ упанандам̣ сакйапуттам̣ абхива̄детва̄ екамантам̣ нисӣди. екамантам̣ нисинно кхо со пурисо а̄йасмантам̣ упанандам̣ сакйапуттам̣ етадавоча – ‘‘хиййо кхо, бханте, са̄йам̣ мам̣сам̣ уппаннам̣ ахоси. тато аййасса пат̣ивисо т̣хапито. айам̣, бханте, да̄рако раттийа̄ паччӯсасамайам̣ паччут̣т̣ха̄йа родати – ‘мам̣сам̣ ме детха̄’ти. аййасса пат̣ивисо да̄ракасса динно. каха̄пан̣ена, бханте, ким̣ а̄хариййатӯ’’ти? ‘‘париччатто ме, а̄вусо, каха̄пан̣о’’ти? ‘‘а̄ма, бханте, париччатто’’ти. ‘‘тан̃н̃ева ме, а̄вусо, каха̄пан̣ам̣ дехӣ’’ти.

атха кхо со пурисо а̄йасмато упанандасса сакйапуттасса каха̄пан̣ам̣ датва̄ уджджха̄йати кхиййати випа̄чети – ‘‘татхева майам̣ рӯпийам̣ пат̣игган̣ха̄ма евамевиме саман̣а̄ сакйапуттийа̄ рӯпийам̣ пат̣игган̣хантӣ’’ти. ассосум̣ кхо бхиккхӯ тасса пурисасса уджджха̄йантасса кхиййантасса випа̄чентасса. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма а̄йасма̄ упанандо сакйапутто рӯпийам̣ пат̣иггахессатӣ’’ти! атха кхо те бхиккхӯ а̄йасмантам̣ упанандам̣ сакйапуттам̣ анекапарийа̄йена вигарахитва̄ бхагавато етаматтхам̣ а̄рочесум̣…пе… ‘‘саччам̣ кира твам̣, упананда, рӯпийам̣ пат̣иггахесӣ’’ти [пат̣игган̣ха̄сӣти (сйа̄.)]? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма твам̣, могхапуриса, рӯпийам̣ пат̣иггахессаси! нетам̣, могхапуриса, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

583. ‘‘йо пана бхиккху джа̄тарӯпараджатам̣ угган̣хеййа ва̄ угган̣ха̄пеййа ва̄ упаниккхиттам̣ ва̄ са̄дийеййа, ниссаггийам̣ па̄читтийа’’нти.

584. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

джа̄тарӯпам̣ на̄ма саттхуван̣н̣о вуччати.

раджатам̣ на̄ма каха̄пан̣о лохама̄сако да̄рума̄сако джатума̄сако йе воха̄рам̣ гаччханти.

угган̣хеййа̄ти сайам̣ ган̣ха̄ти ниссаггийам̣ па̄читтийам̣ [ниссаггийам̣ хоти (сйа̄.)].

угган̣ха̄пеййа̄ти ан̃н̃ам̣ га̄ха̄пети ниссаггийам̣ па̄читтийам̣ [ниссаггийам̣ хоти (сйа̄.)].

упаниккхиттам̣ ва̄ са̄дийеййа̄ти идам̣ аййасса хотӯти упаниккхиттам̣ са̄дийати, ниссаггийам̣ хоти. сан̇гхамаджджхе ниссаджджитаббам̣. еван̃ча пана, бхиккхаве, ниссаджджитаббам̣ – тена бхиккхуна̄ сан̇гхам̣ упасан̇камитва̄ екам̣сам̣ уттара̄сан̇гам̣ каритва̄ вуд̣д̣ха̄нам̣ бхиккхӯнам̣ па̄де вандитва̄ уккут̣икам̣ нисӣдитва̄ ан̃джалим̣ паггахетва̄ евамасса вачанӣйо – ‘‘ахам̣, бханте, рӯпийам̣ пат̣иггахесим̣. идам̣ ме ниссаггийам̣. има̄хам̣ сан̇гхасса ниссаджджа̄мӣ’’ти. ниссаджджитва̄ а̄патти десетабба̄. бйаттена бхиккхуна̄ пат̣ибалена а̄патти пат̣иггахетабба̄. саче таттха а̄гаччхати а̄ра̄мико ва̄ упа̄сако ва̄ со ваттаббо – ‘‘а̄вусо, имам̣ джа̄на̄хӣ’’ти. саче со бхан̣ати – ‘‘имина̄ ким̣ а̄хариййатӯ’’ти, на ваттаббо – ‘‘имам̣ ва̄ имам̣ ва̄ а̄хара̄’’ти. каппийам̣ а̄чиккхитаббам̣ – саппи ва̄ телам̣ ва̄ мадху ва̄ пха̄н̣итам̣ ва̄. саче со тена париваттетва̄ каппийам̣ а̄харати рӯпийаппат̣игга̄хакам̣ т̣хапетва̄ саббехева парибхун̃джитаббам̣. еван̃четам̣ лабхетха, иччетам̣ кусалам̣; но че лабхетха, со ваттаббо – ‘‘а̄вусо, имам̣ чхад̣д̣ехӣ’’ти. саче со чхад̣д̣ети, иччетам̣ кусалам̣; но че чхад̣д̣ети, пан̃чахан̇гехи саманна̄гато бхиккху рӯпийачхад̣д̣ако самманнитаббо – йо на чханда̄гатим̣ гаччхеййа, на доса̄гатим̣ гаччхеййа, на моха̄гатим̣ гаччхеййа, на бхайа̄гатим̣ гаччхеййа, чхад̣д̣ита̄чхад̣д̣итан̃ча джа̄неййа. еван̃ча пана, бхиккхаве, самманнитаббо. пат̣хамам̣ бхиккху йа̄читаббо. йа̄читва̄ бйаттена бхиккхуна̄ пат̣ибалена сан̇гхо н̃а̄петаббо –

585. ‘‘сун̣а̄ту ме, бханте, сан̇гхо. йади сан̇гхасса паттакаллам̣, сан̇гхо иттханна̄мам̣ бхиккхум̣ рӯпийачхад̣д̣акам̣ самманнеййа. еса̄ н̃атти.

‘‘сун̣а̄ту ме, бханте, сан̇гхо. сан̇гхо иттханна̄мам̣ бхиккхум̣ рӯпийачхад̣д̣акам̣ самманнати. йасса̄йасмато кхамати иттханна̄масса бхиккхуно рӯпийачхад̣д̣акасса саммути, со тун̣хасса; йасса наккхамати, со бха̄сеййа.

‘‘саммато сан̇гхена иттханна̄мо бхиккху рӯпийачхад̣д̣ако. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

тена самматена бхиккхуна̄ анимиттам̣ катва̄ па̄тетаббам̣. саче нимиттам̣ катва̄ па̄тети, а̄патти дуккат̣асса.

586. рӯпийе рӯпийасан̃н̃ӣ рӯпийам̣ пат̣игган̣ха̄ти, ниссаггийам̣ па̄читтийам̣. рӯпийе вематико рӯпийам̣ пат̣игган̣ха̄ти, ниссаггийам̣ па̄читтийам̣. рӯпийе арӯпийасан̃н̃ӣ рӯпийам̣ пат̣игган̣ха̄ти, ниссаггийам̣ па̄читтийам̣.

арӯпийе рӯпийасан̃н̃ӣ, а̄патти дуккат̣асса. арӯпийе вематико, а̄патти дуккат̣асса. арӯпийе арӯпийасан̃н̃ӣ, ана̄патти.

ана̄патти аджджха̄ра̄ме ва̄ аджджха̄васатхе ва̄ уггахетва̄ ва̄ уггаха̄петва̄ ва̄ никкхипати – йасса бхависсати со хариссатӣти, умматтакасса, а̄дикаммикасса̄ти.

рӯпийасиккха̄падам̣ нит̣т̣хитам̣ ат̣т̣хамам̣.