9. рӯпийасам̣воха̄расиккха̄падам̣

587. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена чхаббаггийа̄ бхиккхӯ на̄наппака̄ракам̣ рӯпийасам̣воха̄рам̣ сама̄паджджанти. манусса̄ уджджха̄йанти кхиййанти випа̄ченти – ‘‘катхан̃хи на̄ма саман̣а̄ сакйапуттийа̄ на̄наппака̄ракам̣ рӯпийасам̣воха̄рам̣ сама̄паджджиссанти, сеййатха̄пи гихӣ ка̄мабхогино’’ти! ассосум̣ кхо бхиккхӯ тесам̣ манусса̄нам̣ уджджха̄йанта̄нам̣ кхиййанта̄нам̣ випа̄чента̄нам̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ на̄наппака̄ракам̣ рӯпийасам̣воха̄рам̣ сама̄паджджиссантӣ’’ти! атха кхо те бхиккхӯ чхаббаггийе бхиккхӯ анекапарийа̄йена вигарахитва̄ бхагавато етаматтхам̣ а̄рочесум̣…пе… ‘‘саччам̣ кира тумхе, бхиккхаве, на̄наппака̄ракам̣ рӯпийасам̣воха̄рам̣ сама̄паджджатха̄’’ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма тумхе, могхапуриса̄, на̄наппака̄ракам̣ рӯпийасам̣воха̄рам̣ сама̄паджджиссатха! нетам̣, могхапуриса̄, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

588. ‘‘йо пана бхиккху на̄наппака̄ракам̣ рӯпийасам̣воха̄рам̣ сама̄паджджеййа, ниссаггийам̣ па̄читтийа’’нти.

589. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

на̄наппака̄ракам̣ на̄ма катампи акатампи ката̄катампи. катам̣ на̄ма сӣсӯпагам̣ гӣвӯпагам̣ хаттхӯпагам̣ па̄дӯпагам̣ кат̣ӯпагам̣. акатам̣ на̄ма гханакатам̣ вуччати. ката̄катам̣ на̄ма тадубхайам̣.

рӯпийам̣ на̄ма саттхуван̣н̣о каха̄пан̣о, лохама̄сако, да̄рума̄сако, джатума̄сако йе воха̄рам̣ гаччханти.

сама̄паджджеййа̄ти катена катам̣ чета̄пети, ниссаггийам̣ па̄читтийам̣ [ниссаггийам̣ хоти (сйа̄.)]. катена акатам̣ чета̄пети, ниссаггийам̣ па̄читтийам̣. катена ката̄катам̣ чета̄пети, ниссаггийам̣ па̄читтийам̣. акатена катам̣ чета̄пети, ниссаггийам̣ па̄читтийам̣. акатена акатам̣ чета̄пети, ниссаггийам̣ па̄читтийам̣. акатена ката̄катам̣ чета̄пети, ниссаггийам̣ па̄читтийам̣. ката̄катена катам̣ чета̄пети, ниссаггийам̣ па̄читтийам̣. ката̄катена акатам̣ чета̄пети, ниссаггийам̣ па̄читтийам̣. ката̄катена ката̄катам̣ чета̄пети, ниссаггийам̣ па̄читтийам̣. сан̇гхамаджджхе ниссаджджитаббам̣. еван̃ча пана, бхиккхаве, ниссаджджитаббам̣. тена бхиккхуна̄ сан̇гхам̣ упасан̇камитва̄ екам̣сам̣ уттара̄сан̇гам̣ каритва̄ вуд̣д̣ха̄нам̣ бхиккхӯнам̣ па̄де вандитва̄ уккут̣икам̣ нисӣдитва̄ ан̃джалим̣ паггахетва̄ евамасса вачанӣйо – ‘‘ахам̣, бханте, на̄наппака̄ракам̣ рӯпийасам̣воха̄рам̣ сама̄паджджим̣. идам̣ ме ниссаггийам̣. има̄хам̣ сан̇гхасса ниссаджджа̄мӣ’’ти. ниссаджджитва̄ а̄патти десетабба̄. бйаттена бхиккхуна̄ пат̣ибалена а̄патти пат̣иггахетабба̄. саче таттха а̄гаччхати а̄ра̄мико ва̄ упа̄сако ва̄ со ваттаббо – ‘‘а̄вусо, имам̣ джа̄на̄хӣ’’ти. саче со бхан̣ати – ‘‘имина̄ ким̣ а̄хариййатӯ’’ти, на ваттаббо – ‘‘имам̣ ва̄ имам̣ ва̄ а̄хара̄’’ти. каппийам̣ а̄чиккхитаббам̣ – саппи ва̄ телам̣ ва̄ мадху ва̄ пха̄н̣итам̣ ва̄. саче со тена париваттетва̄ каппийам̣ а̄харати, рӯпийачета̄пакам̣ т̣хапетва̄, саббехева парибхун̃джитаббам̣. еван̃четам̣ лабхетха, иччетам̣ кусалам̣; но че лабхетха, со ваттаббо – ‘‘а̄вусо, имам̣ чхад̣д̣ехӣ’’ти. саче со чхад̣д̣ети, иччетам̣ кусалам̣; но че чхад̣д̣ети, пан̃чахан̇гехи саманна̄гато бхиккху рӯпийачхад̣д̣ако самманнитаббо – йо на чханда̄гатим̣ гаччхеййа, на доса̄гатим̣ гаччхеййа, на моха̄гатим̣ гаччхеййа, на бхайа̄гатим̣ гаччхеййа, чхад̣д̣ита̄чхад̣д̣итан̃ча джа̄неййа. еван̃ча пана, бхиккхаве, самманнитаббо. пат̣хамам̣ бхиккху йа̄читаббо. йа̄читва̄ бйаттена бхиккхуна̄ пат̣ибалена сан̇гхо н̃а̄петаббо –

590. ‘‘сун̣а̄ту ме, бханте, сан̇гхо. йади сан̇гхасса паттакаллам̣, сан̇гхо иттханна̄мам̣ бхиккхум̣ рӯпийачхад̣д̣акам̣ самманнеййа. еса̄ н̃атти.

‘‘сун̣а̄ту ме, бханте, сан̇гхо. сан̇гхо иттханна̄мам̣ бхиккхум̣ рӯпийачхад̣д̣акам̣ самманнати. йасса̄йасмато кхамати иттханна̄масса бхиккхуно рӯпийачхад̣д̣акасса саммути, со тун̣хасса; йасса наккхамати, со бха̄сеййа.

‘‘саммато сан̇гхена иттханна̄мо бхиккху рӯпийачхад̣д̣ако. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

тена самматена бхиккхуна̄ анимиттам̣ катва̄ па̄тетаббам̣. саче нимиттам̣ катва̄ па̄тети, а̄патти дуккат̣асса.

591. рӯпийе рӯпийасан̃н̃ӣ рӯпийам̣ чета̄пети, ниссаггийам̣ па̄читтийам̣. рӯпийе вематико рӯпийам̣ чета̄пети, ниссаггийам̣ па̄читтийам̣. рӯпийе арӯпийасан̃н̃ӣ рӯпийам̣ чета̄пети, ниссаггийам̣ па̄читтийам̣. арӯпийе рӯпийасан̃н̃ӣ рӯпийам̣ чета̄пети, ниссаггийам̣ па̄читтийам̣. арӯпийе вематико рӯпийам̣ чета̄пети, ниссаггийам̣ па̄читтийам̣. арӯпийе арӯпийасан̃н̃ӣ рӯпийам̣ чета̄пети, ниссаггийам̣ па̄читтийам̣.

арӯпийе рӯпийасан̃н̃ӣ, а̄патти дуккат̣асса. арӯпийе вематико, а̄патти дуккат̣асса. арӯпийе арӯпийасан̃н̃ӣ, ана̄патти.

592. ана̄патти умматтакасса, а̄дикаммикасса̄ти.

рӯпийасам̣воха̄расиккха̄падам̣ нит̣т̣хитам̣ навамам̣.