винӣтаваттху

223. тена кхо пана самайена ан̃н̃атаро бхиккху адхима̄нена ан̃н̃ам̣ бйа̄ка̄си. тасса куккуччам̣ ахоси – ‘‘бхагавата̄ сиккха̄падам̣ пан̃н̃аттам̣. каччи ну кхо ахам̣ па̄ра̄джикам̣ а̄паттим̣ а̄панно’’ти? бхагавато етаматтхам̣ а̄рочеси. ‘‘ана̄патти, бхиккху, адхима̄нена̄’’ти.

тена кхо пана самайена ан̃н̃атаро бхиккху пан̣идха̄йа аран̃н̃е вихарати – ‘‘евам̣ мам̣ джано самбха̄вессатӣ’’ти. там̣ джано самбха̄веси. тасса куккуччам̣ ахоси…пе… ‘‘ана̄патти, бхиккху, па̄ра̄джикасса. на ча, бхиккхаве, пан̣идха̄йа аран̃н̃е ваттхаббам̣. йо васеййа, а̄патти дуккат̣асса̄’’ти.

тена кхо пана самайена ан̃н̃атаро бхиккху пан̣идха̄йа пин̣д̣а̄йа чарати – ‘‘евам̣ мам̣ джано самбха̄вессатӣ’’ти. там̣ джано самбха̄веси. тасса куккуччам̣ ахоси…пе… ‘‘ана̄патти, бхиккху, па̄ра̄джикасса. на ча, бхиккхаве, пан̣идха̄йа пин̣д̣а̄йа чаритаббам̣. йо чареййа, а̄патти дуккат̣асса̄’’ти.

тена кхо пана самайена ан̃н̃атаро бхиккху ан̃н̃атарам̣ бхиккхум̣ етадавоча – ‘‘йе, а̄вусо, амха̄кам̣ упаджджха̄йасса саддхивиха̄рика̄ саббева араханто’’ти. тасса куккуччам̣ ахоси…пе… ‘‘ким̣читто твам̣, бхиккхӯ’’ти? ‘‘уллапана̄дхиппа̄йо ахам̣, бхагава̄’’ти. ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху ан̃н̃атарам̣ бхиккхум̣ етадавоча – ‘‘йе, а̄вусо, амха̄кам̣ упаджджха̄йасса антева̄сика̄ саббева махиддхика̄ маха̄нубха̄ва̄’’ти. тасса куккуччам̣ ахоси…пе… ‘‘ким̣читто твам̣, бхиккхӯ’’ти? ‘‘уллапана̄дхиппа̄йо ахам̣, бхагава̄’’ти. ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху пан̣идха̄йа чан̇камати… пан̣идха̄йа тит̣т̣хати… пан̣идха̄йа нисӣдати… пан̣идха̄йа сеййам̣ каппети – ‘‘евам̣ мам̣ джано самбха̄вессатӣ’’ти. там̣ джано самбха̄веси. тасса куккуччам̣ ахоси…пе… ‘‘ана̄патти, бхиккху, па̄ра̄джикасса. на ча, бхиккхаве, пан̣идха̄йа сеййа̄ каппетабба̄. йо каппеййа, а̄патти дуккат̣асса̄’’ти.

тена кхо пана самайена ан̃н̃атаро бхиккху ан̃н̃атарасса бхиккхуно уттаримануссадхаммам̣ уллапати. сопи евама̄ха – ‘‘майхампи, а̄вусо, сам̣йоджана̄ пахӣна̄’’ти. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно па̄ра̄джика’’нти.

224. тена кхо пана самайена ан̃н̃атаро бхиккху рахогато уттаримануссадхаммам̣ уллапати. парачиттавидӯ бхиккху там̣ бхиккхум̣ апаса̄деси – ‘‘ма̄, а̄вусо, еварӯпам̣ абхан̣и. наттхесо туйха’’нти. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти дуккат̣асса̄’’ти.

тена кхо пана самайена ан̃н̃атаро бхиккху рахогато уттаримануссадхаммам̣ уллапати. девата̄ там̣ бхиккхум̣ апаса̄деси – ‘‘ма̄, бханте, еварӯпам̣ абхан̣и. наттхесо туйха’’нти. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти дуккат̣асса̄’’ти.

тена кхо пана самайена ан̃н̃атаро бхиккху ан̃н̃атарам̣ упа̄сакам̣ етадавоча – ‘‘йо, а̄вусо, туйхам̣ виха̄ре васати со бхиккху араха̄’’ти. со ча тасса виха̄ре васати. тасса куккуччам̣ ахоси…пе… ‘‘ким̣читто твам̣, бхиккхӯ’’ти? ‘‘уллапана̄дхиппа̄йо ахам̣, бхагава̄’’ти. ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху ан̃н̃атарам̣ упа̄сакам̣ етадавоча – ‘‘йам̣ твам̣, а̄вусо, упат̣т̣хеси чӣварапин̣д̣апа̄тасена̄санагила̄наппаччайабхесаджджапариккха̄рена со бхиккху араха̄’’ти. со ча там̣ упат̣т̣хети чӣварапин̣д̣апа̄тасена̄санагила̄наппаччайабхесаджджапариккха̄рена. тасса куккуччам̣ ахоси…пе… ‘‘ким̣читто твам̣, бхиккхӯ’’ти? ‘‘уллапана̄дхиппа̄йо ахам̣, бхагава̄’’ти. ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

225. тена кхо пана самайена ан̃н̃атаро бхиккху гила̄но хоти. там̣ бхиккхӯ етадавочум̣ – ‘‘аттха̄йасмато уттаримануссадхаммо’’ти? ‘‘на̄вусо, дуккарам̣ ан̃н̃ам̣ бйа̄ка̄ту’’нти. тасса куккуччам̣ ахоси – ‘‘йе кхо те бхагавато са̄вака̄ те евам̣ вадеййум̣. ахан̃чамхи на бхагавато са̄вако. каччи ну кхо ахам̣ па̄ра̄джикам̣ а̄паттим̣ а̄панно’’ти? бхагавато етаматтхам̣ а̄рочеси. ‘‘ким̣читто твам̣, бхиккхӯ’’ти? ‘‘ануллапана̄дхиппа̄йо ахам̣, бхагава̄’’ти. ‘‘ана̄патти, бхиккху, ануллапана̄дхиппа̄йасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ етадавочум̣ – ‘‘аттха̄йасмато уттаримануссадхаммо’’ти? ‘‘а̄ра̄дханӣйо кхо, а̄вусо, дхаммо а̄раддхавӣрийена̄’’ти. тасса куккуччам̣ ахоси…пе… ‘‘ана̄патти, бхиккху, ануллапана̄дхиппа̄йасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ етадавочум̣ – ‘‘ма̄ кхо, а̄вусо, бха̄йӣ’’ти. на̄хам̣, а̄вусо, маччуно бха̄йа̄мӣ’’ти. тасса куккуччам̣ ахоси…пе… ‘‘ана̄патти, бхиккху, ануллапана̄дхиппа̄йасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ етадавочум̣ – ‘‘ма̄ кхо, а̄вусо, бха̄йӣ’’ти. ‘‘йо нӯна̄вусо, виппат̣иса̄рӣ асса со бха̄йеййа̄’’ти. тасса куккуччам̣ ахоси…пе… ‘‘ана̄патти, бхиккху, ануллапана̄дхиппа̄йасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ етадавочум̣ – ‘‘аттха̄йасмато уттаримануссадхаммо’’ти? ‘‘а̄ра̄дханӣйо кхо, а̄вусо, дхаммо самма̄пайуттена̄’’ти. тасса куккуччам̣ ахоси…пе… ‘‘ана̄патти, бхиккху, ануллапана̄дхиппа̄йасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ етадавочум̣ – ‘‘аттха̄йасмато уттаримануссадхаммо’’ти? ‘‘а̄ра̄дханӣйо кхо, а̄вусо, дхаммо йуттайогена̄’’ти. тасса куккуччам̣ ахоси…пе… ‘‘ана̄патти, бхиккху, ануллапана̄дхиппа̄йасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ етадавочум̣ – ‘‘качча̄вусо, кхаманӣйам̣, каччи йа̄панӣйа’’нти? ‘‘на̄вусо, сакка̄ йена ва̄ тена ва̄ адхива̄сету’’нти. тасса куккуччам̣ ахоси…пе… ‘‘ана̄патти, бхиккху, ануллапана̄дхиппа̄йасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ етадавочум̣ – ‘‘качча̄вусо кхаманӣйам̣, каччи йа̄панӣйа’’нти? ‘‘на̄вусо, сакка̄ путхуджджанена адхива̄сету’’нти. тасса куккуччам̣ ахоси…пе… ‘‘ким̣читто твам̣, бхиккхӯ’’ти? ‘‘уллапана̄дхиппа̄йо ахам̣, бхагава̄’’ти. ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

226. тена кхо пана самайена ан̃н̃атаро бра̄хман̣о бхиккхӯ нимантетва̄ етадавоча – ‘‘а̄йанту, бхонто араханто’’ти. тесам̣ куккуччам̣ ахоси – ‘‘майан̃чамха на араханто [анараханто (сӣ.)]. айан̃ча бра̄хман̣о амхе арахантава̄дена самуда̄чарати. катхам̣ ну кхо амхехи пат̣ипаджджитабба’’нти? бхагавато етаматтхам̣ а̄рочесум̣. ‘‘ана̄патти, бхиккхаве, паса̄дабхан̃н̃е’’ти.

тена кхо пана самайена ан̃н̃атаро бра̄хман̣о бхиккхӯ нимантетва̄ етадавоча – ‘‘нисӣданту, бхонто араханто’’ти… ‘‘бхун̃джанту, бхонто араханто’’ти… ‘‘таппенту, бхонто араханто’’ти… ‘‘гаччханту, бхонто араханто’’ти. тесам̣ куккуччам̣ ахоси – ‘‘майан̃чамха на араханто. айан̃ча бра̄хман̣о амхе арахантава̄дена самуда̄чарати. катхам̣ ну кхо амхехи пат̣ипаджджитабба’’нти? бхагавато етаматтхам̣ а̄рочесум̣. ‘‘ана̄патти, бхиккхаве, паса̄дабхан̃н̃е’’ти.

тена кхо пана самайена ан̃н̃атаро бхиккху ан̃н̃атарасса бхиккхуно уттаримануссадхаммам̣ уллапати. сопи евама̄ха – ‘‘майхампи, а̄вусо, а̄сава̄ пахӣна̄’’ти. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно па̄ра̄джика’’нти.

тена кхо пана самайена ан̃н̃атаро бхиккху ан̃н̃атарасса бхиккхуно уттаримануссадхаммам̣ уллапати. сопи евама̄ха – ‘‘майхампи, а̄вусо, ете дхамма̄ сам̣виджджантӣ’’ти. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно па̄ра̄джика’’нти.

тена кхо пана самайена ан̃н̃атаро бхиккху ан̃н̃атарасса бхиккхуно уттаримануссадхаммам̣ уллапати. сопи евама̄ха – ‘‘ахампа̄вусо, тесу дхаммесу сандисса̄мӣ’’ти. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно па̄ра̄джика’’нти.

тена кхо пана самайена ан̃н̃атарам̣ бхиккхум̣ н̃а̄така̄ етадавочум̣ – ‘‘ехи, бханте, ага̄рам̣ аджджха̄васа̄’’ти. ‘‘абхаббо кхо, а̄вусо, ма̄дисо ага̄рам̣ аджджха̄васиту’’нти. тасса куккуччам̣ ахоси…пе… ‘‘ана̄патти, бхиккху, ануллапана̄дхиппа̄йасса̄’’ти.

227. тена кхо пана самайена ан̃н̃атарам̣ бхиккхум̣ н̃а̄така̄ етадавочум̣ – ‘‘ехи, бханте, ка̄ме парибхун̃джа̄’’ти. ‘‘а̄ват̣а̄ ме, а̄вусо, ка̄ма̄’’ти. тасса куккуччам̣ ахоси…пе… ‘‘ана̄патти, бхиккху, ануллапана̄дхиппа̄йасса̄’’ти.

тена кхо пана самайена ан̃н̃атарам̣ бхиккхум̣ н̃а̄така̄ етадавочум̣ – ‘‘абхирамаси, бханте’’ти? ‘‘абхирато ахам̣, а̄вусо, парама̄йа абхиратийа̄’’ти. тасса куккуччам̣ ахоси. ‘‘йе кхо те бхагавато са̄вака̄ те евам̣ вадеййум̣! ахан̃чамхи на бхагавато са̄вако. каччи ну кхо ахам̣ па̄ра̄джикам̣ а̄паттим̣ а̄панно’’ти? бхагавато етаматтхам̣ а̄рочеси. ‘‘ким̣читто твам̣, бхиккхӯ’’ти? ‘‘ануллапана̄дхиппа̄йо ахам̣, бхагава̄’’ти. ‘‘ана̄патти, бхиккху, ануллапана̄дхиппа̄йасса̄’’ти.

тена кхо пана самайена самбахула̄ бхиккхӯ катикам̣ катва̄ ан̃н̃атарасмим̣ а̄ва̄се вассам̣ упагаччхим̣су – ‘‘йо имамха̄ а̄ва̄са̄ пат̣хамам̣ паккамиссати там̣ майам̣ араха̄ти джа̄нисса̄ма̄’’ти. ан̃н̃атаро бхиккху – ‘‘мам̣ араха̄ти джа̄нантӯ’’ти, тамха̄ а̄ва̄са̄ пат̣хамам̣ пакка̄ми. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно па̄ра̄джика’’нти.

228. [има̄ни ваттхуни сам̣. ни. 2.202 а̄гата̄ни] тена самайена буддхо бхагава̄ ра̄джагахе вихарати вел̣уване каландаканива̄пе. тена кхо пана самайена а̄йасма̄ ча лаккхан̣о а̄йасма̄ ча маха̄моггалла̄но гиджджхакӯт̣е паббате вихаранти. атха кхо а̄йасма̄ маха̄моггалла̄но пуббан̣хасамайам̣ нива̄сетва̄ паттачӣварам̣ а̄да̄йа йена̄йасма̄ лаккхан̣о тенупасан̇ками; упасан̇камитва̄ а̄йасмантам̣ лаккхан̣ам̣ етадавоча – ‘‘а̄йа̄ма̄вусо лаккхан̣а, ра̄джагахам̣ пин̣д̣а̄йа пависисса̄ма̄’’ти. ‘‘евама̄вусо’’ти кхо а̄йасма̄ лаккхан̣о а̄йасмато маха̄моггалла̄насса паччассоси. атха кхо а̄йасма̄ маха̄моггалла̄но гиджджхакӯт̣а̄ паббата̄ ороханто ан̃н̃атарасмим̣ падесе ситам̣ па̄тва̄ка̄си. атха кхо а̄йасма̄ лаккхан̣о а̄йасмантам̣ маха̄моггалла̄нам̣ етадавоча – ‘‘ко ну кхо, а̄вусо моггалла̄на, хету ко паччайо ситасса па̄тукамма̄йа̄’’ти? ‘‘ака̄ло кхо, а̄вусо лаккхан̣а, етасса пан̃хасса [пан̃хасса бйа̄каран̣а̄йа (сйа̄.)]. бхагавато мам̣ сантике етам̣ пан̃хам̣ пуччха̄ти. атха кхо а̄йасма̄ ча лаккхан̣о а̄йасма̄ ча маха̄моггалла̄но ра̄джагахе пин̣д̣а̄йа чаритва̄ паччха̄бхаттам̣ пин̣д̣апа̄тапат̣икканта̄ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинно кхо а̄йасма̄ лаккхан̣о а̄йасмантам̣ маха̄моггалла̄нам̣ етадавоча – ‘‘идха̄йасма̄ маха̄моггалла̄но гиджджхакӯт̣а̄ паббата̄ ороханто ан̃н̃атарасмим̣ падесе ситам̣ па̄тва̄ка̄си. ко ну кхо, а̄вусо моггалла̄на, хету ко паччайо ситасса па̄тукамма̄йа̄’’ти? ‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ ат̣т̣хикасан̇кхаликам̣ веха̄сам̣ гаччхантим̣. таменам̣ гиджджха̄пи ка̄ка̄пи кулала̄пи анупатитва̄ анупатитва̄ пха̄сул̣антарика̄хи витуд̣енти [витуденти витаччхенти вира̄дженти (сйа̄.)]. са̄ судам̣ ат̣т̣ассарам̣ кароти. тасса майхам̣, а̄вусо, етадахоси – ‘аччхарийам̣ вата бхо, аббхутам̣ вата бхо, еварӯпопи на̄ма сатто бхависсати! еварӯпопи на̄ма йаккхо бхависсати! еварӯпопи на̄ма аттабха̄ваппат̣ила̄бхо бхависсатӣ’’’ти! бхиккхӯ уджджха̄йанти кхиййанти випа̄ченти – ‘‘уттаримануссадхаммам̣ а̄йасма̄ маха̄моггалла̄но уллапатӣ’’ти. атха кхо бхагава̄ бхиккхӯ а̄мантеси – ‘‘чаккхубхӯта̄ вата, бхиккхаве, са̄вака̄ вихаранти. н̃а̄н̣абхӯта̄ вата, бхиккхаве, са̄вака̄ вихаранти. йатра хи на̄ма са̄вако еварӯпам̣ н̃ассати ва̄ даккхати ва̄ саккхим̣ ва̄ кариссати. пуббева ме со, бхиккхаве, сатто дит̣т̣хо ахоси. апи ча̄хам̣ на бйа̄ка̄сим̣. ахан̃четам̣ бйа̄кареййам̣ паре ча ме на саддахеййум̣. йе ме на саддахеййум̣ тесам̣ там̣ асса дӣгхараттам̣ ахита̄йа дуккха̄йа. есо, бхиккхаве, сатто имасмим̣йева ра̄джагахе гогха̄тако ахоси. со тасса каммасса випа̄кена бахӯни васса̄ни бахӯни вассасата̄ни бахӯни вассасахасса̄ни бахӯни вассасатасахасса̄ни нирайе паччитва̄ тассева каммасса випа̄ка̄васесена еварӯпам̣ аттабха̄ваппат̣ила̄бхам̣ пат̣исам̣ведети. саччам̣, бхиккхаве, моггалла̄но а̄ха. ана̄патти, бхиккхаве, моггалла̄насса̄’’ти.

229. ‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ мам̣сапесим̣ веха̄сам̣ гаччхантим̣. таменам̣ гиджджха̄пи ка̄ка̄пи кулала̄пи анупатитва̄ анупатитва̄ витаччхенти вибхадждженти [витуденти витаччхенти вира̄дженти (сйа̄.)]. са̄ судам̣ ат̣т̣ассарам̣ кароти…пе… есо, бхиккхаве, сатто имасмим̣йева ра̄джагахе гогха̄тако ахоси…пе….

‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ мам̣сапин̣д̣ам̣ веха̄сам̣ гаччхантам̣. таменам̣ гиджджха̄пи ка̄ка̄пи кулала̄пи анупатитва̄ анупатитва̄ витаччхенти вибхадждженти. со судам̣ ат̣т̣ассарам̣ кароти…пе… есо, бхиккхаве, сатто имасмим̣йева ра̄джагахе са̄кун̣ико ахоси…пе….

‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ ниччхавим̣ пурисам̣ веха̄сам̣ гаччхантам̣. таменам̣ гиджджха̄пи ка̄ка̄пи кулала̄пи анупатитва̄ анупатитва̄ витаччхенти вибхадждженти. со судам̣ ат̣т̣ассарам̣ кароти…пе… есо, бхиккхаве, сатто имасмим̣йева ра̄джагахе ораббхико ахоси…пе….

‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ асиломам̣ пурисам̣ веха̄сам̣ гаччхантам̣. тасса те асӣ уппатитва̄ уппатитва̄ тассева ка̄йе нипатанти. со судам̣ ат̣т̣ассарам̣ кароти…пе… есо, бхиккхаве, сатто имасмим̣йева ра̄джагахе сӯкарико ахоси…пе….

‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ саттиломам̣ пурисам̣ веха̄сам̣ гаччхантам̣. тасса та̄ саттийо уппатитва̄ уппатитва̄ тассева ка̄йе нипатанти. со судам̣ ат̣т̣ассарам̣ кароти…пе… есо, бхиккхаве, сатто имасмим̣йева ра̄джагахе ма̄гавико ахоси…пе….

‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ усуломам̣ пурисам̣ веха̄сам̣ гаччхантам̣. тасса те усӯ уппатитва̄ уппатитва̄ тассева ка̄йе нипатанти. со судам̣ ат̣т̣ассарам̣ кароти…пе… есо, бхиккхаве, сатто имасмим̣йева ра̄джагахе ка̄ран̣ико ахоси…пе….

‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ сӯчиломам̣ пурисам̣ веха̄сам̣ гаччхантам̣. тасса та̄ сӯчийо уппатитва̄ уппатитва̄ тассева ка̄йе нипатанти. со судам̣ ат̣т̣ассарам̣ кароти…пе… есо, бхиккхаве, сатто имасмим̣йева ра̄джагахе са̄ратхико ахоси…пе….

‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ сӯчиломам̣ пурисам̣ веха̄сам̣ гаччхантам̣. тасса та̄ сӯчийо сӣсе пависитва̄ мукхато никкхаманти; мукхе пависитва̄ урато никкхаманти; уре пависитва̄ ударато никкхаманти; ударе пависитва̄ ӯрӯхи никкхаманти; ӯрӯсу пависитва̄ джан̇гха̄хи никкхаманти; джан̇гха̄су пависитва̄ па̄дехи никкхаманти. со судам̣ ат̣т̣ассарам̣ кароти…пе… есо, бхиккхаве, сатто имасмим̣йева ра̄джагахе сӯчако ахоси…пе….

‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ кумбхан̣д̣ам̣ пурисам̣ веха̄сам̣ гаччхантам̣. со гаччхантопи тева ан̣д̣е кхандхе а̄ропетва̄ гаччхати, нисӣдантопи тесвева ан̣д̣есу нисӣдати. таменам̣ гиджджха̄пи ка̄ка̄пи кулала̄пи анупатитва̄ анупатитва̄ витаччхенти вибхадждженти. со судам̣ ат̣т̣ассарам̣ кароти…пе… есо, бхиккхаве, сатто имасмим̣йева ра̄джагахе га̄макӯт̣о ахоси…пе….

‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ пурисам̣ гӯтхакӯпе сасӣсакам̣ нимуггам̣…пе… есо, бхиккхаве, сатто имасмим̣йева ра̄джагахе па̄рада̄рико ахоси…пе….

‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ пурисам̣ гӯтхакӯпе сасӣсакам̣ нимуггам̣ убхохи хаттхехи гӯтхам̣ кха̄дантам̣…пе… есо, бхиккхаве, сатто имасмим̣йева ра̄джагахе дут̣т̣хабра̄хман̣о ахоси. со кассапасса самма̄самбуддхасса па̄вачане бхиккхусан̇гхам̣ бхаттена нимантетва̄ дон̣ийо [дон̣ийо (итипи)] гӯтхасса пӯра̄петва̄ ка̄лам̣ а̄роча̄петва̄ етадавоча – ‘ато [ито (сйа̄.) ахо (итипи)], бхонто, йа̄вадаттхам̣ бхун̃джанту чева харанту ча̄’’’ти…пе….

230. ‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ ниччхавим̣ иттхим̣ веха̄сам̣ гаччхантим̣. таменам̣ гиджджха̄пи ка̄ка̄пи кулала̄пи анупатитва̄ анупатитва̄ витаччхенти вибхадждженти. са̄ судам̣ ат̣т̣ассарам̣ кароти…пе… еса̄, бхиккхаве, иттхӣ имасмим̣йева ра̄джагахе атича̄ринӣ ахоси…пе….

‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ иттхим̣ дуггандхам̣ ман̇гулим̣ веха̄сам̣ гаччхантим̣. таменам̣ гиджджха̄пи ка̄ка̄пи кулала̄пи анупатитва̄ анупатитва̄ витаччхенти вибхадждженти. са̄ судам̣ ат̣т̣ассарам̣ кароти…пе… еса̄, бхиккхаве, иттхӣ имасмим̣йева ра̄джагахе иккхан̣ика̄ ахоси…пе….

‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ иттхим̣ уппаккам̣ окилиним̣ окириним̣ веха̄сам̣ гаччхантим̣. са̄ судам̣ ат̣т̣ассарам̣ кароти…пе… еса̄, бхиккхаве, иттхӣ ка̄лин̇гасса ран̃н̃о аггамахесӣ ахоси. са̄ исса̄паката̄ сапаттим̣ ан̇га̄ракат̣а̄хена окири…пе….

‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ асӣсакам̣ кабандхам̣ веха̄сам̣ гаччхантам̣. тасса уре аккхӣни чева хонти мукхан̃ча. таменам̣ гиджджха̄пи ка̄ка̄пи кулала̄пи анупатитва̄ анупатитва̄ витаччхенти вибхадждженти. со судам̣ ат̣т̣ассарам̣ кароти…пе… есо, бхиккхаве, сатто имасмим̣йева ра̄джагахе ха̄рико на̄ма чорагха̄тако ахоси…пе….

‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ бхиккхум̣ веха̄сам̣ гаччхантам̣. тасса сан̇гха̄т̣ипи а̄дитта̄ сампаджджалита̄ саджотибхӯта̄, паттопи а̄дитто сампаджджалито саджотибхӯто, ка̄йабандханампи а̄диттам̣ сампаджджалитам̣ саджотибхӯтам̣, ка̄йопи а̄дитто сампаджджалито саджотибхӯто. со судам̣ ат̣т̣ассарам̣ кароти…пе… есо, бхиккхаве, бхиккху кассапасса самма̄самбуддхасса па̄вачане па̄пабхиккху ахоси…пе….

‘‘идха̄хам̣, а̄вусо, гиджджхакӯт̣а̄ паббата̄ ороханто аддасам̣ бхиккхуним̣… аддасам̣ сиккхама̄нам̣… аддасам̣ са̄ман̣ерам̣… аддасам̣ са̄ман̣ерим̣ веха̄сам̣ гаччхантим̣. тасса̄ сан̇гха̄т̣ипи а̄дитта̄ сампаджджалита̄ саджотибхӯта̄, паттопи а̄дитто сампаджджалито саджотибхӯто, ка̄йабандханампи а̄диттам̣ сампаджджалитам̣ саджотибхӯтам̣, ка̄йопи а̄дитто сампаджджалито саджотибхӯто. са̄ судам̣ ат̣т̣ассарам̣ кароти. тасса майхам̣, а̄вусо, етадахоси – ‘аччхарийам̣ вата бхо, аббхутам̣ вата бхо, еварӯпопи на̄ма сатто бхависсати! еварӯпопи на̄ма йаккхо бхависсати! еварӯпопи на̄ма аттабха̄ваппат̣ила̄бхо бхависсатӣ’’’ти! бхиккхӯ уджджха̄йанти кхиййанти випа̄ченти – ‘‘уттаримануссадхаммам̣ а̄йасма̄ маха̄моггалла̄но уллапатӣ’’ти.

атха кхо бхагава̄ бхиккхӯ а̄мантеси – ‘‘чаккхубхӯта̄ вата, бхиккхаве, са̄вака̄ вихаранти. н̃а̄н̣абхӯта̄ вата, бхиккхаве, са̄вака̄ вихаранти. йатра хи на̄ма са̄вако еварӯпам̣ н̃ассати ва̄ даккхати ва̄ саккхим̣ ва̄ кариссати! пуббева ме са̄, бхиккхаве, са̄ман̣ерӣ дит̣т̣ха̄ ахоси. апи ча̄хам̣ на бйа̄ка̄сим̣. ахан̃четам̣ бйа̄кареййам̣ паре ча ме на саддахеййум̣. йе ме на саддахеййум̣ тесам̣ там̣ асса дӣгхараттам̣ ахита̄йа дуккха̄йа. еса̄, бхиккхаве, са̄ман̣ерӣ кассапасса самма̄самбуддхасса па̄вачане па̄паса̄ман̣ерӣ ахоси. са̄ тасса каммасса випа̄кена бахӯни васса̄ни бахӯни вассасата̄ни бахӯни вассасахасса̄ни бахӯни вассасатасахасса̄ни нирайе паччитва̄ тассева каммасса випа̄ка̄васесена еварӯпам̣ аттабха̄ваппат̣ила̄бхам̣ пат̣исам̣ведети. саччам̣, бхиккхаве, моггалла̄но а̄ха. ана̄патти, бхиккхаве, моггалла̄насса̄’’ти.

231. атха кхо а̄йасма̄ маха̄моггалла̄но бхиккхӯ а̄мантеси – ‘‘йата̄йам̣, а̄вусо, тапода̄ сандати со дахо аччходако сӣтодако са̄тодако сетако суппатиттхо раман̣ӣйо пахӯтамаччхакаччхапо чаккаматта̄ни ча падума̄ни пуппхантӣ’’ти. бхиккхӯ уджджха̄йанти кхиййанти випа̄ченти – ‘‘катхан̃хи на̄ма а̄йасма̄ маха̄моггалла̄но евам̣ ваккхати – ‘йата̄йам̣, а̄вусо, тапода̄ сандати со дахо аччходако сӣтодако са̄тодако сетако суппатиттхо раман̣ӣйо пахӯтамаччхакаччхапо чаккаматта̄ни ча падума̄ни пуппхантӣ’ти. атха ча пана̄йам̣ тапода̄ кутхита̄ сандати. уттаримануссадхаммам̣ а̄йасма̄ маха̄моггалла̄но уллапатӣ’’ти. бхагавато етаматтхам̣ а̄рочесум̣. ‘‘йата̄йам̣, бхиккхаве, тапода̄ сандати со дахо аччходако сӣтодако са̄тодако сетако суппатиттхо раман̣ӣйо пахӯтамаччхакаччхапо чаккаматта̄ни ча падума̄ни пуппханти. апи ча̄йам̣, бхиккхаве, тапода̄ двиннам̣ маха̄нирайа̄нам̣ антарика̄йа а̄гаччхати. тена̄йам̣ тапода̄ кутхита̄ сандати. саччам̣, бхиккхаве, моггалла̄но а̄ха. ана̄патти, бхиккхаве, моггалла̄насса̄’’ти.

тена кхо пана самайена ра̄джа̄ ма̄гадхо сенийо бимбиса̄ро личчхавӣхи саддхим̣ сан̇га̄менто пабхагго ахоси. атха ра̄джа̄ паччха̄ сенам̣ сан̇кад̣д̣хитва̄ личчхавайо пара̄джеси. сан̇га̄ме ча нанди чарати – ‘‘ран̃н̃а̄ личчхавӣ пабхагга̄’’ти. атха кхо а̄йасма̄ маха̄моггалла̄но бхиккхӯ а̄мантеси – ‘‘ра̄джа̄, а̄вусо, личчхавӣхи пабхагго’’ти. бхиккхӯ уджджха̄йанти кхиййанти випа̄ченти – ‘‘катхан̃хи на̄ма а̄йасма̄ маха̄моггалла̄но евам̣ ваккхати – ‘ра̄джа̄, а̄вусо, личчхавӣхи пабхагго’ти! сан̇га̄ме ча нандим̣ чарати – ‘ран̃н̃а̄ личчхавӣ пабхагга̄’ти! уттаримануссадхаммам̣ а̄йасма̄ маха̄моггалла̄но уллапатӣ’’ти. бхагавато етаматтхам̣ а̄рочесум̣. ‘‘пат̣хамам̣, бхиккхаве, ра̄джа̄ личчхавӣхи пабхагго. атха ра̄джа̄ паччха̄ сенам̣ сан̇кад̣д̣хитва̄ личчхавайо пара̄джеси. саччам̣, бхиккхаве, моггалла̄но а̄ха. ана̄патти, бхиккхаве, моггалла̄насса̄’’ти.

232. атха кхо а̄йасма̄ маха̄моггалла̄но бхиккхӯ а̄мантеси – ‘‘идха̄хам̣, а̄вусо, саппиника̄йа надийа̄ тӣре а̄нен̃джам̣ сама̄дхим̣ сама̄панно на̄га̄нам̣ огайха уттаранта̄нам̣ кон̃чам̣ каронта̄нам̣ саддам̣ ассоси’’нти. бхиккхӯ уджджха̄йанти кхиййанти випа̄ченти – ‘‘катхан̃хи на̄ма а̄йасма̄ маха̄моггалла̄но а̄нен̃джам̣ сама̄дхим̣ сама̄панно саддам̣ соссати! уттаримануссадхаммам̣ а̄йасма̄ маха̄моггалла̄но уллапатӣ’’ти. бхагавато етаматтхам̣ а̄рочесум̣. ‘‘аттхесо, бхиккхаве, сама̄дхи со ча кхо апарисуддхо. саччам̣, бхиккхаве, моггалла̄но а̄ха. ана̄патти, бхиккхаве, моггалла̄насса̄’’ти.

атха кхо а̄йасма̄ собхито бхиккхӯ а̄мантеси – ‘‘ахам̣, а̄вусо, пан̃ча каппасата̄ни ануссара̄мӣ’’ти. бхиккхӯ уджджха̄йанти кхиййанти випа̄ченти – ‘‘катхан̃хи на̄ма а̄йасма̄ собхито евам̣ ваккхати – ‘ахам̣, а̄вусо, пан̃ча каппасата̄ни ануссара̄мӣ’ти! уттаримануссадхаммам̣ а̄йасма̄ собхито уллапатӣ’’ти. бхагавато етаматтхам̣ а̄рочесум̣. ‘‘аттхеса̄, бхиккхаве, собхитасса. са̄ ча кхо ека̄йева джа̄ти. саччам̣, бхиккхаве, собхито а̄ха. ана̄патти, бхиккхаве, собхитасса̄ти.

чатуттхапа̄ра̄джикам̣ саматтам̣.

233. уддит̣т̣ха̄ кхо а̄йасманто чатта̄ро па̄ра̄джика̄ дхамма̄, йесам̣ бхиккху ан̃н̃атарам̣ ва̄ ан̃н̃атарам̣ ва̄ а̄паджджитва̄ на лабхати бхиккхӯхи саддхим̣ сам̣ва̄сам̣, йатха̄ пуре татха̄ паччха̄, па̄ра̄джико хоти асам̣ва̄со. таттха̄йасманте пуччха̄ми – ‘‘каччиттха парисуддха̄’’? дутийампи пуччха̄ми – ‘‘каччиттха парисуддха̄’’? татийампи пуччха̄ми – ‘‘каччиттха парисуддха̄’’? парисуддхеттха̄йасманто, тасма̄ тун̣хӣ, еваметам̣ дха̄райа̄мӣти.

па̄ра̄джикам̣ нит̣т̣хитам̣.

тассудда̄нам̣ –

метхуна̄динна̄да̄нан̃ча, мануссавиггахуттари;

па̄ра̄джика̄ни чатта̄ри, чхеджджаваттхӯ асам̣сайа̄ти.

па̄ра̄джикакан̣д̣ам̣ нит̣т̣хитам̣.