3. татийапа̄ра̄джикам̣

162. [идам̣ ваттху сам̣. ни. 5.985] тена самайена буддхо бхагава̄ веса̄лийам̣ вихарати маха̄ване кӯт̣а̄га̄раса̄ла̄йам̣. тена кхо пана самайена бхагава̄ бхиккхӯнам̣ анекапарийа̄йена асубхакатхам̣ катхети, асубха̄йа ван̣н̣ам̣ бха̄сати, асубхабха̄вана̄йа ван̣н̣ам̣ бха̄сати, а̄дисса а̄дисса асубхасама̄паттийа̄ ван̣н̣ам̣ бха̄сати. атха кхо бхагава̄ бхиккхӯ а̄мантеси – ‘‘иччха̄махам̣, бхиккхаве, аддхама̄сам̣ пат̣исаллӣйитум̣. намхи кеначи упасан̇камитаббо, ан̃н̃атра екена пин̣д̣апа̄танӣха̄ракена̄’’ти. ‘‘евам̣, бханте’’ти, кхо те бхиккхӯ бхагавато пат̣иссун̣итва̄ на̄ссудха кочи бхагавантам̣ упасан̇камати, ан̃н̃атра екена пин̣д̣апа̄танӣха̄ракена. бхиккхӯ – ‘‘бхагава̄ кхо анекапарийа̄йена асубхакатхам̣ катхети, асубха̄йа ван̣н̣ам̣ бха̄сати, асубхабха̄вана̄йа ван̣н̣ам̣ бха̄сати, а̄дисса а̄дисса асубхасама̄паттийа̄ ван̣н̣ам̣ бха̄сатӣ’’ти (те) [( ) (?) евамупарипи ӣдисесу т̣ха̄несу] анека̄ка̄равока̄рам̣ асубхабха̄вана̄нуйогамануйутта̄ вихаранти. те сакена ка̄йена ат̣т̣ӣйанти хара̄йанти джигуччханти. сеййатха̄пи на̄ма иттхӣ ва̄ пурисо ва̄ дахаро йува̄ ман̣д̣анакаджа̄тико сӣсам̣нха̄то ахикун̣апена ва̄ куккуракун̣апена ва̄ мануссакун̣апена ва̄ кан̣т̣хе а̄саттена ат̣т̣ӣйеййа хара̄йеййа джигуччхеййа, евамева те бхиккхӯ сакена ка̄йена ат̣т̣ӣйанта̄ хара̄йанта̄ джигуччханта̄ аттана̄пи атта̄нам̣ джӣвита̄ воропенти, ан̃н̃аман̃н̃ампи джӣвита̄ воропенти, мигалан̣д̣икампи саман̣акуттакам̣ упасан̇камитва̄ евам̣ ваданти – ‘‘са̄дху но, а̄вусо, джӣвита̄ воропехи. идам̣ те паттачӣварам̣ бхависсатӣ’’ти. атха кхо мигалан̣д̣ико саман̣акуттако паттачӣварехи бхат̣о самбахуле бхиккхӯ джӣвита̄ воропетва̄ лохитакам̣ [лохитагатам̣ (ка.)] асим̣ а̄да̄йа йена ваггамуда̄ надӣ тенупасан̇ками.

163. атха кхо мигалан̣д̣икасса саман̣акуттакасса лохитакам̣ там̣ асим̣ дховантасса ахудева куккуччам̣ аху виппат̣иса̄ро – ‘‘ала̄бха̄ вата ме, на вата ме ла̄бха̄; дулладдхам̣ вата ме, на вата ме суладдхам̣. бахум̣ вата майа̄ апун̃н̃ам̣ пасутам̣, йохам̣ бхиккхӯ сӣлаванте калйа̄н̣адхамме джӣвита̄ воропеси’’нти. атха кхо ан̃н̃атара̄ ма̄рака̄йика̄ девата̄ абхиджджама̄не удаке а̄гантва̄ мигалан̣д̣икам̣ саман̣акуттакам̣ етадавоча – ‘‘са̄дху са̄дху саппуриса, ла̄бха̄ те саппуриса, суладдхам̣ те саппуриса. бахум̣ тайа̄ саппуриса пун̃н̃ам̣ пасутам̣, йам̣ твам̣ атин̣н̣е та̄ресӣ’’ти. атха кхо мигалан̣д̣ико саман̣акуттако – ‘‘ла̄бха̄ кира ме, суладдхам̣ кира ме, бахум̣ кира майа̄ пун̃н̃ам̣ пасутам̣, атин̣н̣о кира̄хам̣ та̄ремӣ’’ти тин̣хам̣ асим̣ а̄да̄йа виха̄рена виха̄рам̣ паривен̣ена паривен̣ам̣ упасан̇камитва̄ евам̣ вадети – ‘‘ко атин̣н̣о, кам̣ та̄ремӣ’’ти? таттха йе те бхиккхӯ авӣтара̄га̄ тесам̣ тасмим̣ самайе хотийева бхайам̣ хоти чхамбхитаттам̣ хоти ломахам̣со. йе пана те бхиккхӯ вӣтара̄га̄ тесам̣ тасмим̣ самайе на хоти бхайам̣ на хоти чхамбхитаттам̣ на хоти ломахам̣со. атха кхо мигалан̣д̣ико саман̣акуттако екампи бхиккхум̣ ека̄хена джӣвита̄ воропеси, двепи бхиккхӯ ека̄хена джӣвита̄ воропеси, тайопи бхиккхӯ ека̄хена джӣвита̄ воропеси, чатта̄ропи бхиккхӯ ека̄хена джӣвита̄ воропеси, пан̃чапи бхиккхӯ ека̄хена джӣвита̄ воропеси, дасапи бхиккхӯ ека̄хена джӣвита̄ воропеси, вӣсампи бхиккхӯ ека̄хена джӣвита̄ воропеси, тим̣сампи бхиккхӯ ека̄хена джӣвита̄ воропеси, чатта̄лӣсампи бхиккхӯ ека̄хена джӣвита̄ воропеси, пан̃н̃а̄сампи бхиккхӯ ека̄хена джӣвита̄ воропеси, сат̣т̣химпи бхиккхӯ ека̄хена джӣвита̄ воропеси.

164. атха кхо бхагава̄ тасса аддхама̄сасса аччайена пат̣исалла̄на̄ вут̣т̣хито а̄йасмантам̣ а̄нандам̣ а̄мантеси – ‘‘ким̣ ну кхо, а̄нанда, танубхӯто вийа бхиккхусан̇гхо’’ти? ‘‘татха̄ хи пана, бханте, бхагава̄ бхиккхӯнам̣ анекапарийа̄йена асубхакатхам̣ катхети, асубха̄йа ван̣н̣ам̣ бха̄сати, асубхабха̄вана̄йа ван̣н̣ам̣ бха̄сати, а̄дисса а̄дисса асубхасама̄паттийа̄ ван̣н̣ам̣ бха̄сати. те ча, бханте, бхиккхӯ – ‘бхагава̄ кхо анекапарийа̄йена асубхакатхам̣ катхети, асубха̄йа ван̣н̣ам̣ бха̄сати, асубхабха̄вана̄йа ван̣н̣ам̣ бха̄сати, а̄дисса а̄дисса асубхасама̄паттийа̄ ван̣н̣ам̣ бха̄сатӣ’ти, те анека̄ка̄равока̄рам̣ асубхабха̄вана̄нуйогамануйутта̄ вихаранти. те сакена ка̄йена ат̣т̣ӣйанти хара̄йанти джигуччханти. сеййатха̄пи на̄ма иттхӣ ва̄ пурисо ва̄ дахаро йува̄ ман̣д̣анакаджа̄тико сӣсам̣нха̄то ахикун̣апена ва̄ куккуракун̣апена ва̄ мануссакун̣апена ва̄ кан̣т̣хе а̄саттена ат̣т̣ӣйеййа хара̄йеййа джигуччхеййа, евамева те бхиккхӯ сакена ка̄йена ат̣т̣ӣйанта̄ хара̄йанта̄ джигуччханта̄ аттана̄пи атта̄нам̣ джӣвита̄ воропенти, ан̃н̃аман̃н̃ампи джӣвита̄ воропенти, мигалан̣д̣икампи саман̣акуттакам̣ упасан̇камитва̄ евам̣ ваданти – ‘са̄дху но, а̄вусо, джӣвита̄ воропехи. идам̣ те паттачӣварам̣ бхависсатӣ’ти. атха кхо, бханте, мигалан̣д̣ико саман̣акуттако паттачӣварехи бхат̣о екампи бхиккхум̣ ека̄хена джӣвита̄ воропеси…пе… сат̣т̣химпи бхиккхӯ ека̄хена джӣвита̄ воропеси. са̄дху, бханте, бхагава̄ ан̃н̃ам̣ парийа̄йам̣ а̄чиккхату йатха̄йам̣ бхиккхусан̇гхо ан̃н̃а̄йа сан̣т̣хахеййа̄’’ти. ‘‘тенаха̄нанда, йа̄ватика̄ бхиккхӯ веса̄лим̣ упанисса̄йа вихаранти те саббе упат̣т̣ха̄наса̄ла̄йам̣ саннипа̄техӣ’’ти. ‘‘евам̣, бханте’’ти, кхо а̄йасма̄ а̄нандо бхагавато пат̣иссун̣итва̄ йа̄ватика̄ бхиккхӯ веса̄лим̣ упанисса̄йа вихаранти те саббе упат̣т̣ха̄наса̄ла̄йам̣ саннипа̄тетва̄ йена бхагава̄ тенупасан̇ками; упасан̇камитва̄ бхагавантам̣ етадавоча – ‘‘саннипатито, бханте бхиккхусан̇гхо; йасса да̄ни, бханте, бхагава̄ ка̄лам̣ ман̃н̃атӣ’’ти.

165. атха кхо бхагава̄ йена упат̣т̣ха̄наса̄ла̄ тенупасан̇ками; упасан̇камитва̄ пан̃н̃атте а̄сане нисӣди. нисаджджа кхо бхагава̄ бхиккхӯ а̄мантеси – ‘‘айампи кхо, бхиккхаве, а̄на̄па̄нассатисама̄дхи бха̄вито бахулӣкато санто чева пан̣ӣто ча асечанако ча сукхо ча виха̄ро уппаннуппанне ча па̄паке акусале дхамме т̣ха̄насо антарадха̄пети вӯпасамети. сеййатха̄пи, бхиккхаве, гимха̄нам̣ паччхиме ма̄се ухатам̣ [ӯхатам̣ (ка.)] раджоджаллам̣ таменам̣ маха̄ ака̄ламегхо т̣ха̄насо антарадха̄пети вӯпасамети, евамева кхо, бхиккхаве, а̄на̄па̄нассатисама̄дхи бха̄вито бахулӣкато санто чева пан̣ӣто ча асечанако ча сукхо ча виха̄ро уппаннуппанне ча па̄паке акусале дхамме т̣ха̄насо антарадха̄пети вӯпасамети. катхам̣ бха̄вито ча, бхиккхаве, а̄на̄па̄нассатисама̄дхи катхам̣ бахулӣкато санто чева пан̣ӣто ча асечанако ча сукхо ча виха̄ро уппаннуппанне ча па̄паке акусале дхамме т̣ха̄насо антарадха̄пети вӯпасамети? идха, бхиккхаве, бхиккху аран̃н̃агато ва̄ руккхамӯлагато ва̄ сун̃н̃а̄га̄рагато ва̄ нисӣдати паллан̇кам̣ а̄бхуджитва̄ уджум̣ ка̄йам̣ пан̣идха̄йа паримукхам̣ сатим̣ упат̣т̣хапетва̄. со сатова ассасати сато пассасати. дӣгхам̣ ва̄ ассасанто дӣгхам̣ ассаса̄мӣти паджа̄на̄ти, дӣгхам̣ ва̄ пассасанто дӣгхам̣ пассаса̄мӣти паджа̄на̄ти. рассам̣ ва̄ ассасанто рассам̣ ассаса̄мӣти паджа̄на̄ти, рассам̣ ва̄ пассасанто рассам̣ пассаса̄мӣти паджа̄на̄ти. саббака̄йаппат̣исам̣ведӣ ассасисса̄мӣти сиккхати. саббака̄йаппат̣исам̣ведӣ пассасисса̄мӣти сиккхати. пассамбхайам̣ ка̄йасан̇кха̄рам̣ ассасисса̄мӣти сиккхати. пассамбхайам̣ ка̄йасан̇кха̄рам̣ пассасисса̄мӣти сиккхати. пӣтиппат̣исам̣ведӣ ассасисса̄мӣти сиккхати. пӣтиппат̣исам̣ведӣ пассасисса̄мӣти сиккхати. сукхаппат̣исам̣ведӣ ассасисса̄мӣти сиккхати. сукхаппат̣исам̣ведӣ пассасисса̄мӣти сиккхати. читтасан̇кха̄раппат̣исам̣ведӣ ассасисса̄мӣти сиккхати. читтасан̇кха̄раппат̣исам̣ведӣ пассасисса̄мӣти сиккхати. пассамбхайам̣ читтасан̇кха̄рам̣ ассасисса̄мӣти сиккхати. пассамбхайам̣ читтасан̇кха̄рам̣ пассасисса̄мӣти сиккхати. читтаппат̣исам̣ведӣ ассасисса̄мӣти сиккхати. читтаппат̣исам̣ведӣ пассасисса̄мӣти сиккхати. абхиппамодайам̣ читтам̣…пе… сама̄дахам̣ читтам̣…пе… вимочайам̣ читтам̣…пе… аничча̄нупассӣ…пе… вира̄га̄нупассӣ…пе… ниродха̄нупассӣ…пе… пат̣иниссагга̄нупассӣ ассасисса̄мӣти сиккхати. пат̣иниссагга̄нупассӣ пассасисса̄мӣти сиккхати. евам̣ бха̄вито кхо, бхиккхаве, а̄на̄па̄нассатисама̄дхи евам̣ бахулӣкато санто чева пан̣ӣто ча асечанако ча сукхо ча виха̄ро уппаннуппанне ча па̄паке акусале дхамме т̣ха̄насо антарадха̄пети вӯпасаметӣ’’ти.

166. атха кхо бхагава̄ етасмим̣ нида̄не етасмим̣ пакаран̣е бхиккхусан̇гхам̣ саннипа̄та̄петва̄ бхиккхӯ пат̣ипуччхи – ‘‘саччам̣ кира, бхиккхаве, бхиккхӯ аттана̄пи атта̄нам̣ джӣвита̄ воропенти, ан̃н̃аман̃н̃ампи джӣвита̄ воропенти мигалан̣д̣икампи саман̣акуттакам̣ упасан̇камитва̄ евам̣ ваданти – ‘са̄дху но, а̄вусо, джӣвита̄ воропехи, идам̣ те паттачӣварам̣ бхависсатӣ’’’ти? ‘‘саччам̣, бхагава̄’’ти. вигарахи буддхо бхагава̄ – ‘‘анануччхавикам̣, бхиккхаве, тесам̣ бхиккхӯнам̣ анануломикам̣ аппат̣ирӯпам̣ асса̄ман̣акам̣ акаппийам̣ акаран̣ӣйам̣. катхан̃хи на̄ма те, бхиккхаве, бхиккхӯ аттана̄пи атта̄нам̣ джӣвита̄ воропессанти, ан̃н̃аман̃н̃ампи джӣвита̄ воропессанти, мигалан̣д̣икампи саман̣акуттакам̣ упасан̇камитва̄ евам̣ ваккханти – ‘са̄дху но, а̄вусо, джӣвита̄ воропехи, идам̣ те паттачӣварам̣ бхависсатӣ’ти. нетам̣, бхиккхаве, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

167. ‘‘йо пана бхиккху сан̃чичча мануссавиггахам̣ джӣвита̄ воропеййа саттхаха̄ракам̣ ва̄сса парийесеййа, айампи па̄ра̄джико хоти асам̣ва̄со’’ти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

168. тена кхо пана самайена ан̃н̃атаро упа̄сако гила̄но хоти. тасса паджа̄пати абхирӯпа̄ хоти дассанӣйа̄ па̄са̄дика̄. чхаббаггийа̄ бхиккхӯ тасса̄ иттхийа̄ пат̣ибаддхачитта̄ хонти. атха кхо чхаббаггийа̄нам̣ бхиккхӯнам̣ етадахоси – ‘‘саче кхо со, а̄вусо, упа̄сако джӣвиссати на майам̣ там̣ иттхим̣ лабхисса̄ма. ханда майам̣, а̄вусо, тасса упа̄сакасса маран̣аван̣н̣ам̣ сам̣ван̣н̣ема̄’’ти. атха кхо чхаббаггийа̄ бхиккхӯ йена со упа̄сако тенупасан̇камим̣су; упасан̇камитва̄ там̣ упа̄сакам̣ етадавочум̣ – ‘‘твам̣ кхоси, упа̄сака, катакалйа̄н̣о катакусало катабхӣрутта̄н̣о акатапа̄по акаталуддо акатакиббисо. катам̣ тайа̄ калйа̄н̣ам̣, акатам̣ тайа̄ па̄пам̣. ким̣ туйхимина̄ па̄пакена дуджджӣвитена! матам̣ те джӣвита̄ сеййо. ито твам̣ ка̄лан̇като ка̄йасса бхеда̄ парам̣ маран̣а̄ сугатим̣ саггам̣ локам̣ упападжджиссаси. таттха диббехи пан̃чахи ка̄магун̣ехи самаппито саман̇гӣбхӯто парича̄рессасӣ’’ти.

169. атха кхо со упа̄сако – ‘‘саччам̣ кхо аййа̄ а̄хам̣су. ахан̃хи катакалйа̄н̣о катакусало катабхӣрутта̄н̣о акатапа̄по акаталуддо акатакиббисо. катам̣ майа̄ калйа̄н̣ам̣, акатам̣ майа̄ па̄пам̣. ким̣ майхимина̄ па̄пакена дуджджӣвитена! матам̣ ме джӣвита̄ сеййо. ито ахам̣ ка̄лан̇като ка̄йасса бхеда̄ парам̣ маран̣а̄ сугатим̣ саггам̣ локам̣ упападжджисса̄ми. таттха диббехи пан̃чахи ка̄магун̣ехи самаппито саман̇гӣбхӯто парича̄ресса̄мӣ’’ти, со асаппа̄йа̄ни чева бходжана̄ни бхун̃джи асаппа̄йа̄ни ча кха̄данӣйа̄ни кха̄ди асаппа̄йа̄ни ча са̄йанӣйа̄ни са̄йи асаппа̄йа̄ни ча па̄на̄ни пиви. тасса асаппа̄йа̄ни чева бходжана̄ни бхун̃джато асаппа̄йа̄ни ча кха̄данӣйа̄ни кха̄дато асаппа̄йа̄ни ча са̄йанӣйа̄ни са̄йато асаппа̄йа̄ни ча па̄на̄ни пивато кхаро а̄ба̄дхо уппаджджи. со тенева а̄ба̄дхена ка̄ламака̄си. тасса паджа̄пати уджджха̄йати кхиййати випа̄чети – ‘‘аладжджино име саман̣а̄ сакйапуттийа̄ дуссӣла̄ муса̄ва̄дино. име хи на̄ма дхаммача̄рино самача̄рино брахмача̄рино саччава̄дино сӣлаванто калйа̄н̣адхамма̄ пат̣иджа̄ниссанти! наттхи имесам̣ са̄ман̃н̃ам̣ наттхи имесам̣ брахман̃н̃ам̣, нат̣т̣хам̣ имесам̣ са̄ман̃н̃ам̣ нат̣т̣хам̣ имесам̣ брахман̃н̃ам̣, куто имесам̣ са̄ман̃н̃ам̣ куто имесам̣ брахман̃н̃ам̣, апагата̄ име са̄ман̃н̃а̄ апагата̄ име брахман̃н̃а̄. име ме са̄микасса маран̣аван̣н̣ам̣ сам̣ван̣н̣есум̣. имехи ме са̄мико ма̄рито’’ти. ан̃н̃епи манусса̄ уджджха̄йанти кхиййанти випа̄ченти – ‘‘аладжджино име саман̣а̄ сакйапуттийа̄ дуссӣла̄ муса̄ва̄дино. име хи на̄ма дхаммача̄рино самача̄рино брахмача̄рино саччава̄дино сӣлаванто калйа̄н̣адхамма̄ пат̣иджа̄ниссанти! наттхи имесам̣ са̄ман̃н̃ам̣ наттхи имесам̣ брахман̃н̃ам̣, нат̣т̣хам̣ имесам̣ са̄ман̃н̃ам̣ нат̣т̣хам̣ имесам̣ брахман̃н̃ам̣, куто имесам̣ са̄ман̃н̃ам̣ куто имесам̣ брахман̃н̃ам̣, апагата̄ име са̄ман̃н̃а̄ апагата̄ име брахман̃н̃а̄. име упа̄сакасса маран̣аван̣н̣ам̣ сам̣ван̣н̣есум̣. имехи упа̄сако ма̄рито’’ти. ассосум̣ кхо бхиккхӯ тесам̣ манусса̄нам̣ уджджха̄йанта̄нам̣ кхиййанта̄нам̣ випа̄чента̄нам̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ упа̄сакасса маран̣аван̣н̣ам̣ сам̣ван̣н̣иссантӣ’’ти!

170. атха кхо те бхиккхӯ чхаббаггийе бхиккхӯ анекапарийа̄йена вигарахитва̄ бхагавато етаматтхам̣ а̄рочесум̣…пе… ‘‘саччам̣ кира тумхе, бхиккхаве, упа̄сакасса маран̣аван̣н̣ам̣ сам̣ван̣н̣етха̄’’ти? ‘‘саччам̣, бхагава̄’’ти. вигарахи буддхо бхагава̄ – ‘‘анануччхавикам̣, могхапуриса̄, анануломикам̣ аппат̣ирӯпам̣ асса̄ман̣акам̣ акаппийам̣ акаран̣ӣйам̣. катхан̃хи на̄ма тумхе, могхапуриса̄, упа̄сакасса маран̣аван̣н̣ам̣ сам̣ван̣н̣иссатха! нетам̣, могхапуриса̄, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

171. ‘‘йо пана бхиккху сан̃чичча мануссавиггахам̣ джӣвита̄ воропеййа саттхаха̄ракам̣ ва̄сса парийесеййа маран̣аван̣н̣ам̣ ва̄ сам̣ван̣н̣еййа маран̣а̄йа ва̄ сама̄дапеййа – ‘амбхо пуриса, ким̣ туйхимина̄ па̄пакена дуджджӣвитена, матам̣ те джӣвита̄ сеййо’ти, ити читтамано читтасан̇каппо анекапарийа̄йена маран̣аван̣н̣ам̣ ва̄ сам̣ван̣н̣еййа, маран̣а̄йа ва̄ сама̄дапеййа, айампи па̄ра̄джико хоти асам̣ва̄со’’ти.

172. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

сан̃чичча̄ти джа̄нанто сан̃джа̄нанто чечча абхивитаритва̄ вӣтиккамо.

мануссавиггахо на̄ма йам̣ ма̄тукуччхисмим̣ пат̣хамам̣ читтам̣ уппаннам̣ пат̣хамам̣ вин̃н̃а̄н̣ам̣ па̄тубхӯтам̣, йа̄ва маран̣ака̄ла̄ еттхантаре есо мануссавиггахо на̄ма.

джӣвита̄ воропеййа̄ти джӣвитиндрийам̣ упаччхиндати упародхети сантатим̣ викопети.

саттхаха̄ракам̣ ва̄сса парийесеййа̄ти асим̣ ва̄ саттим̣ ва̄ бхен̣д̣им̣ ва̄ [бхендим̣ ва̄ (ка.)] лагул̣ам̣ ва̄ [сӯлам̣ва̄ лагул̣ам̣ва̄ (сйа̄.)] па̄са̄н̣ам̣ ва̄ саттхам̣ ва̄ висам̣ ва̄ раджджум̣ ва̄.

маран̣аван̣н̣ам̣ ва̄ сам̣ван̣н̣еййа̄ти джӣвите а̄дӣнавам̣ дассети, маран̣е ван̣н̣ам̣ бхан̣ати.

маран̣а̄йа ва̄ сама̄дапеййа̄ти саттхам̣ ва̄ а̄хара, висам̣ ва̄ кха̄да, раджджуйа̄ ва̄ уббандхитва̄ ка̄лан̇карохӣти.

амбхо пуриса̄ти а̄лапана̄дхивачанаметам̣.

ким̣ туйхимина̄ па̄пакена дуджджӣвитена̄ти па̄пакам̣ на̄ма джӣвитам̣ ад̣д̣ха̄нам̣ джӣвитам̣ упа̄да̄йа далидда̄нам̣ джӣвитам̣ па̄пакам̣ ла̄макам̣, садхана̄нам̣ джӣвитам̣ упа̄да̄йа адхана̄нам̣ джӣвитам̣ па̄пакам̣, дева̄нам̣ джӣвитам̣ упа̄да̄йа манусса̄нам̣ джӣвитам̣ па̄пакам̣.

дуджджӣвитам̣ на̄ма хаттхаччхиннасса па̄даччхиннасса хаттхапа̄даччхиннасса кан̣н̣аччхиннасса на̄саччхиннасса кан̣н̣ана̄саччхиннасса, имина̄ ча па̄пакена имина̄ ча дуджджӣвитена матам̣ те джӣвита̄ сеййоти.

ити читтаманоти йам̣ читтам̣ там̣ мано, йам̣ мано там̣ читтам̣.

читтасан̇каппоти маран̣асан̃н̃ӣ маран̣ачетано маран̣а̄дхиппа̄йо.

анекапарийа̄йена̄ти учча̄вачехи а̄ка̄рехи.

маран̣аван̣н̣ам̣ ва̄ сам̣ван̣н̣еййа̄ти джӣвите а̄дӣнавам̣ дассети, маран̣е ван̣н̣ам̣ бхан̣ати – ‘‘ито твам̣ ка̄лан̇като ка̄йасса бхеда̄ парам̣ маран̣а̄ сугатим̣ саггам̣ локам̣ упападжджиссаси, таттха диббехи пан̃чахи ка̄магун̣ехи самаппито саман̇гӣбхӯто парича̄рессасӣ’’ти.

маран̣а̄йа ва̄ сама̄дапеййа̄ти саттхам̣ ва̄ а̄хара, висам̣ ва̄ кха̄да, раджджуйа̄ ва̄ уббандхитва̄ ка̄лан̇карохи, соббхе ва̄ нараке ва̄ папа̄те ва̄ папата̄ти.

айампӣти пуриме упа̄да̄йа вуччати.

па̄ра̄джико хотӣти сеййатха̄пи на̄ма путхусила̄ двидха̄ бхинна̄ [дведха̄ бхинна̄ (сйа̄.)] аппат̣исандхика̄ хоти, евамева бхиккху сан̃чичча мануссавиггахам̣ джӣвита̄ воропетва̄ ассаман̣о хоти асакйапуттийо. тена вуччати – ‘па̄ра̄джико хотӣ’ти.

асам̣ва̄соти сам̣ва̄со на̄ма екакаммам̣ екуддесо самасиккхата̄ – есо сам̣ва̄со на̄ма. со тена саддхим̣ наттхи, тена вуччати асам̣ва̄соти.

173. са̄мам̣, адхит̣т̣ха̄йа, дӯтена, дӯтапарам̣пара̄йа, висаккийена дӯтена, гатапачча̄гатена дӯтена, арахо рахосан̃н̃ӣ, рахо арахосан̃н̃ӣ, арахо арахосан̃н̃ӣ, рахо рахосан̃н̃ӣ ка̄йена сам̣ван̣н̣ети, ва̄ча̄йа сам̣ван̣н̣ети, ка̄йена ва̄ча̄йа сам̣ван̣н̣ети, дӯтена сам̣ван̣н̣ети, лекха̄йа сам̣ван̣н̣ети, опа̄там̣ апассенам̣, упаниккхипанам̣, бхесаджджам̣, рӯпӯпаха̄ро, саддӯпаха̄ро, гандхӯпаха̄ро, расӯпаха̄ро, пхот̣т̣хаббӯпаха̄ро, дхаммӯпаха̄ро, а̄чиккхана̄, ануса̄санӣ, сан̇кетакаммам̣, нимиттакамманти.

174. са̄манти сайам̣ ханати ка̄йена ва̄ ка̄йапат̣ибаддхена ва̄ ниссаггийена ва̄.

адхит̣т̣ха̄йа̄ти адхит̣т̣хахитва̄ а̄н̣а̄пети – ‘‘евам̣ виджджха, евам̣ пахара, евам̣ гха̄техӣ’’ти.

бхиккху бхиккхум̣ а̄н̣а̄пети – ‘‘иттханна̄мам̣ джӣвита̄ воропехӣ’’ти, а̄патти дуккат̣асса. со там̣ ман̃н̃ама̄но там̣ джӣвита̄ воропети, а̄патти убхиннам̣ па̄ра̄джикасса.

бхиккху бхиккхум̣ а̄н̣а̄пети – ‘‘иттханна̄мам̣ джӣвита̄ воропехӣ’’ти, а̄патти дуккат̣асса. со там̣ ман̃н̃ама̄но ан̃н̃ам̣ джӣвита̄ воропетти, мӯлат̣т̣хасса ана̄патти. вадхакасса а̄патти па̄ра̄джикасса.

бхиккху бхиккхум̣ а̄н̣а̄пети – ‘‘иттханна̄мам̣ джӣвита̄ воропехӣ’’ти, а̄патти дуккат̣асса. со ан̃н̃ам̣ ман̃н̃ама̄но там̣ джӣвита̄ воропети, а̄патти убхиннам̣ па̄ра̄джикасса.

бхиккху бхиккхум̣ а̄н̣а̄пети – ‘‘иттханна̄мам̣ джӣвита̄ воропехӣ’’ти, а̄патти дуккат̣асса. со ан̃н̃ам̣ ман̃н̃ама̄но ан̃н̃ам̣ джӣвита̄ воропети; мӯлат̣т̣хасса ана̄патти, вадхакасса а̄патти па̄ра̄джикасса.

бхиккху бхиккхум̣ а̄н̣а̄пети – ‘‘иттханна̄масса па̄вада – ‘иттханна̄мо иттханна̄масса па̄вадату – иттханна̄мо иттханна̄мам̣ джӣвита̄ воропетӯ’’’ти, а̄патти дуккат̣асса. со итарасса а̄рочети, а̄патти дуккат̣асса. вадхако пат̣игган̣ха̄ти, мӯлат̣т̣хасса а̄патти тхуллаччайасса. со там̣ джӣвита̄ воропети, а̄патти саббесам̣ па̄ра̄джикасса.

бхиккху бхиккхум̣ а̄н̣а̄пети – ‘‘иттханна̄масса па̄вада – ‘иттханна̄мо иттханна̄масса па̄вадату – иттханна̄мо иттханна̄мам̣ джӣвита̄ воропетӯ’’’ти, а̄патти дуккат̣асса. со ан̃н̃ам̣ а̄н̣а̄пети, а̄патти дуккат̣асса. вадхако пат̣игган̣ха̄ти, а̄патти дуккат̣асса. со там̣ джӣвита̄ воропети, мӯлат̣т̣хасса ана̄патти; а̄н̣а̄пакасса ча вадхакасса ча а̄патти па̄ра̄джикасса.

бхиккху бхиккхум̣ а̄н̣а̄пети – ‘‘иттханна̄мам̣ джӣвита̄ воропехӣ’’ти, а̄патти дуккат̣асса. со гантва̄ пуна пачча̄гаччхати – ‘‘на̄хам̣ саккоми там̣ джӣвита̄ воропету’’нти. со пуна а̄н̣а̄пети – ‘‘йада̄ саккоси тада̄ там̣ джӣвита̄ воропехӣ’’ти, а̄патти дуккат̣асса. со там̣ джӣвита̄ воропети, а̄патти убхиннам̣ па̄ра̄джикасса.

бхиккху бхиккхум̣ а̄н̣а̄пети – ‘‘иттханна̄мам̣ джӣвита̄ воропехӣ’’ти, а̄патти дуккат̣асса. со а̄н̣а̄петва̄ виппат̣иса̄рӣ на са̄вети – ‘‘ма̄ гха̄техӣ’’ти. со там̣ джӣвита̄ воропети, а̄патти убхиннам̣ па̄ра̄джикасса.

бхиккху бхиккхум̣ а̄н̣а̄пети – ‘‘иттханна̄мам̣ джӣвита̄ воропехӣ’’ти, а̄патти дуккат̣асса. со а̄н̣а̄петва̄ виппат̣иса̄рӣ са̄вети – ‘‘ма̄ гха̄техӣ’’ти. со – ‘‘а̄н̣атто ахам̣ тайа̄’’ти там̣ джӣвита̄ воропети, мӯлат̣т̣хасса ана̄патти. вадхакасса а̄патти па̄ра̄джикасса.

бхиккху бхиккхум̣ а̄н̣а̄пети – ‘‘иттханна̄мам̣ джӣвита̄ воропехӣ’’ти, а̄патти дуккат̣асса. со а̄н̣а̄петва̄ виппат̣иса̄рӣ са̄вети – ‘‘ма̄ гха̄техӣ’’ти. со са̄дхӯти орамати, убхиннам̣ ана̄патти.

175. арахо рахосан̃н̃ӣ уллапати – ‘‘ахо иттханна̄мо хато асса̄’’ти, а̄патти дуккат̣асса. рахо арахосан̃н̃ӣ уллапати – ‘‘ахо иттханна̄мо хато асса̄’’ти, а̄патти дуккат̣асса. арахо арахосан̃н̃ӣ уллапати – ‘‘ахо иттханна̄мо хато асса̄’’ти, а̄патти дуккат̣асса. рахо рахосан̃н̃ӣ уллапати – ‘‘ахо иттханна̄мо хато асса̄’’ти, а̄патти дуккат̣асса.

ка̄йена сам̣ван̣н̣ети на̄ма ка̄йена вика̄рам̣ кароти – ‘‘йо евам̣ марати со дханам̣ ва̄ лабхати йасам̣ ва̄ лабхати саггам̣ ва̄ гаччхатӣ’’ти, а̄патти дуккат̣асса. та̄йа сам̣ван̣н̣ана̄йа марисса̄мӣти дуккхам̣ веданам̣ уппа̄дети, а̄патти тхуллаччайасса. марати, а̄патти па̄ра̄джикасса.

ва̄ча̄йа сам̣ван̣н̣ети на̄ма ва̄ча̄йа бхан̣ати – ‘‘йо евам̣ марати со дханам̣ ва̄ лабхати йасам̣ ва̄ лабхати саггам̣ ва̄ гаччхатӣ’’ти, а̄патти дуккат̣асса. та̄йа сам̣ван̣н̣ана̄йа марисса̄мӣти дуккхам̣ веданам̣ уппа̄дети, а̄патти тхуллаччайасса. марати, а̄патти па̄ра̄джикасса.

ка̄йена ва̄ча̄йа сам̣ван̣н̣ети на̄ма ка̄йена ча вика̄рам̣ кароти, ва̄ча̄йа ча бхан̣ати – ‘‘йо евам̣ марати со дханам̣ ва̄ лабхати йасам̣ ва̄ лабхати саггам̣ ва̄ гаччхатӣ’’ти, а̄патти дуккат̣асса. та̄йа сам̣ван̣н̣ана̄йа марисса̄мӣти дуккхам̣ веданам̣ уппа̄дети, а̄патти тхуллаччайасса. марати, а̄патти па̄ра̄джикасса.

дӯтена сам̣ван̣н̣ети на̄ма дӯтасса са̄санам̣ а̄рочети – ‘‘йо евам̣ марати со дханам̣ ва̄ лабхати йасам̣ ва̄ лабхати саггам̣ ва̄ гаччхатӣ’’ти, а̄патти дуккат̣асса. дӯтасса са̄санам̣ сутва̄ марисса̄мӣти дуккхам̣ веданам̣ уппа̄дети, а̄патти тхуллаччайасса. марати, а̄патти па̄ра̄джикасса.

176. лекха̄йа сам̣ван̣н̣ети на̄ма лекхам̣ чхиндати – ‘‘йо евам̣ марати со дханам̣ ва̄ лабхати йасам̣ ва̄ лабхати саггам̣ ва̄ гаччхатӣ’’ти, аккхараккхара̄йа а̄патти дуккат̣асса. лекхам̣ пасситва̄ марисса̄мӣти дуккхам̣ веданам̣ уппа̄дети, а̄патти тхуллаччайасса. марати, а̄патти па̄ра̄джикасса.

опа̄там̣ на̄ма мануссам̣ уддисса опа̄там̣ кханати – ‘‘папатитва̄ мариссатӣ’’ти, а̄патти дуккат̣асса. папатите дуккха̄ ведана̄ уппаджджати, а̄патти тхуллаччайасса. марати, а̄патти па̄ра̄джикасса. анодисса опа̄там̣ кханати – ‘‘йо кочи папатитва̄ мариссатӣ’’ти, а̄патти дуккат̣асса. мануссо тасмим̣ папатати, а̄патти дуккат̣асса. папатите дуккха̄ ведана̄ уппаджджати, а̄патти тхуллаччайасса. марати, а̄патти па̄ра̄джикасса. йаккхо ва̄ пето ва̄ тираччха̄нагатамануссавиггахо ва̄ тасмим̣ папатати, а̄патти дуккат̣асса. папатите дуккха̄ ведана̄ уппаджджати, а̄патти дуккат̣асса. марати, а̄патти тхуллаччайасса. тираччха̄нагато тасмим̣ папатати, а̄патти дуккат̣асса. папатите дуккха̄ ведана̄ уппаджджати, а̄патти дуккат̣асса. марати, а̄патти па̄читтийасса.

177. апассенам̣ на̄ма апассене саттхам̣ ва̄ т̣хапети висена ва̄ маккхети дуббалам̣ ва̄ кароти соббхе ва̄ нараке ва̄ папа̄те ва̄ т̣хапети – ‘‘папатитва̄ мариссатӣ’’ти, а̄патти дуккат̣асса. саттхена ва̄ висена ва̄ папатитена ва̄ дуккха̄ ведана̄ уппаджджати, а̄патти тхуллаччайасса. марати, а̄патти па̄ра̄джикасса.

упаниккхипанам̣ на̄ма асим̣ ва̄ саттим̣ ва̄ бхен̣д̣им̣ ва̄ лагул̣ам̣ ва̄ па̄са̄н̣ам̣ ва̄ саттхам̣ ва̄ висам̣ ва̄ раджджум̣ ва̄ упаниккхипати – ‘‘имина̄ мариссатӣ’’ти, а̄патти дуккат̣асса. ‘‘тена марисса̄мӣ’’ти дуккхам̣ веданам̣ уппа̄дети, а̄патти тхуллаччайасса. марати, а̄патти па̄ра̄джикасса.

бхесаджджам̣ на̄ма саппим̣ ва̄ наванӣтам̣ ва̄ телам̣ ва̄ мадхум̣ ва̄ пха̄н̣итам̣ ва̄ дети – ‘‘имам̣ са̄йитва̄ мариссатӣ’’ти, а̄патти дуккат̣асса. там̣ са̄йите дуккха̄ ведана̄ уппаджджати, а̄патти тхуллаччайасса. марати, а̄патти па̄ра̄джикасса.

178. рӯпӯпаха̄ро на̄ма амана̄пикам̣ рӯпам̣ упасам̣харати бхайа̄накам̣ бхеравам̣ – ‘‘имам̣ пасситва̄ уттаситва̄ мариссатӣ’’ти, а̄патти дуккат̣асса. там̣ пасситва̄ уттасати, а̄патти тхуллаччайасса. марати, а̄патти па̄ра̄джикасса. мана̄пикам̣ рӯпам̣ упасам̣харати [упасам̣харати пеманӣйам̣ хадайан̇гамам̣ (сйа̄.)] – ‘‘имам̣ пасситва̄ ала̄бхакена сусситва̄ мариссатӣ’’ти, а̄патти дуккат̣асса. там̣ пасситва̄ ала̄бхакена суссати, а̄патти тхуллаччайасса. марати, а̄патти па̄ра̄джикасса.

саддӯпаха̄ро на̄ма амана̄пикам̣ саддам̣ упасам̣харати бхайа̄накам̣ бхеравам̣ – ‘‘имам̣ сутва̄ уттаситва̄ мариссатӣ’’ти, а̄патти дуккат̣асса. там̣ сутва̄ уттасати, а̄патти тхуллаччайасса. марати, а̄патти па̄ра̄джикасса. мана̄пикам̣ саддам̣ упасам̣харати пеманӣйам̣ хадайан̇гамам̣ – ‘‘имам̣ сутва̄ ала̄бхакена сусситва̄ мариссатӣ’’ти, а̄патти дуккат̣асса. там̣ сутва̄ ала̄бхакена суссати, а̄патти тхуллаччайасса. марати, а̄патти па̄ра̄джикасса.

гандхӯпаха̄ро на̄ма амана̄пикам̣ гандхам̣ упасам̣харати джегуччхам̣ па̄т̣икулйам̣ [пат̣икӯлам̣ (?)] – ‘‘имам̣ гха̄йитва̄ джегуччхата̄ па̄т̣икулйата̄ мариссатӣ’’ти, а̄патти дуккат̣асса. там̣ гха̄йите джегуччхата̄ па̄т̣икулйата̄ дуккха̄ ведана̄ уппаджджати, а̄патти тхуллаччайасса. марати, а̄патти па̄ра̄джикасса. мана̄пикам̣ гандхам̣ упасам̣харати – ‘‘имам̣ гха̄йитва̄ ала̄бхакена сусситва̄ мариссатӣ’’ти, а̄патти дуккат̣асса. там̣ гха̄йитва̄ ала̄бхакена суссати, а̄патти тхуллаччайасса. марати, а̄патти па̄ра̄джикасса.

расӯпаха̄ро на̄ма амана̄пикам̣ расам̣ упасам̣харати джегуччхам̣ па̄т̣икулйам̣ [пат̣икӯлам̣ (?)] – ‘‘имам̣ са̄йитва̄ джегуччхата̄ па̄т̣икулйата̄ мариссатӣ’’ти, а̄патти дуккат̣асса. там̣ са̄йите джегуччхата̄ па̄т̣икулйата̄ дуккха̄ ведана̄ уппаджджати, а̄патти тхуллаччайасса. марати, а̄патти па̄ра̄джикасса. мана̄пикам̣ расам̣ упасам̣харати – ‘‘имам̣ са̄йитва̄ ала̄бхакена сусситва̄ мариссатӣ’’ти, а̄патти дуккат̣асса. там̣ са̄йитва̄ ала̄бхакена суссати, а̄патти тхуллаччайасса. марати, а̄патти па̄ра̄джикасса.

пхот̣т̣хаббӯпаха̄ро на̄ма амана̄пикам̣ пхот̣т̣хаббам̣ упасам̣харати дуккхасампхассам̣ кхарасампхассам̣ – ‘‘имина̄ пхут̣т̣хо мариссатӣ’’ти, а̄патти дуккат̣асса. тена пхут̣т̣хасса дуккха̄ ведана̄ уппаджджати, а̄патти тхуллаччайасса. марати, а̄патти па̄ра̄джикасса. мана̄пикам̣ пхот̣т̣хаббам̣ упасам̣харати сукхасампхассам̣ мудусампхассам̣ – ‘‘имина̄ пхут̣т̣хо ала̄бхакена сусситва̄ мариссатӣ’’ти, а̄патти дуккат̣асса. тена пхут̣т̣хо ала̄бхакена суссати, а̄патти тхуллаччайасса. марати, а̄патти па̄ра̄джикасса.

дхаммӯпаха̄ро на̄ма нерайикасса нирайакатхам̣ катхети – ‘‘имам̣ сутва̄ уттаситва̄ мариссатӣ’’ти, а̄патти дуккат̣асса. там̣ сутва̄ уттасати, а̄патти тхуллаччайасса. марати, а̄патти па̄ра̄джикасса. калйа̄н̣акаммасса саггакатхам̣ катхети – ‘‘имам̣ сутва̄ адхимутто мариссатӣ’’ти, а̄патти дуккат̣асса. там̣ сутва̄ адхимутто марисса̄мӣти дуккхам̣ веданам̣ уппа̄дети, а̄патти тхуллаччайасса. марати, а̄патти па̄ра̄джикасса.

179. а̄чиккхана̄ на̄ма пут̣т̣хо бхан̣ати – ‘‘евам̣ марассу. йо евам̣ марати со дханам̣ ва̄ лабхати йасам̣ ва̄ лабхати саггам̣ ва̄ гаччхатӣ’’ти, а̄патти дуккат̣асса. та̄йа а̄чиккхана̄йа марисса̄мӣти дуккхам̣ веданам̣ уппа̄дети, а̄патти тхуллаччайасса. марати, а̄патти па̄ра̄джикасса.

ануса̄санӣ на̄ма апут̣т̣хо бхан̣ати – ‘‘евам̣ марассу. йо евам̣ марати со дханам̣ ва̄ лабхати йасам̣ ва̄ лабхати саггам̣ ва̄ гаччхатӣ’’ти, а̄патти дуккат̣асса. та̄йа ануса̄санийа̄ марисса̄мӣти дуккхам̣ веданам̣ уппа̄дети, а̄патти тхуллаччайасса. марати, а̄патти па̄ра̄джикасса.

сан̇кетакаммам̣ на̄ма сан̇кетам̣ кароти пуребхаттам̣ ва̄ паччха̄бхаттам̣ ва̄ раттим̣ ва̄ дива̄ ва̄ – ‘‘тена сан̇кетена там̣ джӣвита̄ воропехӣ’’ти, а̄патти дуккат̣асса. тена сан̇кетена там̣ джӣвита̄ воропети, а̄патти убхиннам̣ па̄ра̄джикасса. там̣ сан̇кетам̣ пуре ва̄ паччха̄ ва̄ там̣ джӣвита̄ воропети, мӯлат̣т̣хасса ана̄патти, вадхакасса а̄патти па̄ра̄джикасса.

нимиттакаммам̣ на̄ма нимиттам̣ кароти – ‘‘аккхим̣ ва̄ никхан̣исса̄ми бхамукам̣ ва̄ уккхиписса̄ми сӣсам̣ ва̄ уккхиписса̄ми, тена нимиттена там̣ джӣвита̄ воропехӣ’’ти, а̄патти дуккат̣асса. тена нимиттена там̣ джӣвита̄ воропети, а̄патти убхиннам̣ па̄ра̄джикасса. там̣ нимиттам̣ пуре ва̄ паччха̄ ва̄ там̣ джӣвита̄ воропети, мӯлат̣т̣хасса ана̄патти, вадхакасса а̄патти па̄ра̄джикасса.

ана̄патти асан̃чичча аджа̄нантасса намаран̣а̄дхиппа̄йасса умматтакасса [умматтакасса кхиттачиттасса ведана̄т̣т̣асса (сйа̄.)] а̄дикаммикасса̄ти.

мануссавиггахапа̄ра̄джикамхи пат̣хамабха̄н̣ава̄ро нит̣т̣хито.

винӣтаваттхуудда̄нага̄тха̄

сам̣ван̣н̣ана̄ нисӣданто, мусалодуккхалена ча;

вуд̣д̣хапаббаджита̄бхисанно, аггавӣмам̣сана̄висам̣.

тайо ча ваттхукаммехи, ит̣т̣хака̄хипаре тайо;

ва̄сӣ гопа̄насӣ чева, ат̣т̣акотаран̣ам̣ пати.

седам̣ наттхун̃ча самба̄хо, нха̄панаббхан̃джанена ча;

ут̣т̣ха̄пенто нипа̄тенто, аннапа̄нена ма̄ран̣ам̣.

джа̄рагаббхо сапаттӣ ча, ма̄та̄ путтам̣ убхо вадхи;

убхо на миййаре мадда̄, та̄пам̣ ван̃джха̄ виджа̄йинӣ.

патодам̣ ниггахе йаккхо, ва̄л̣айаккхан̃ча па̄хин̣и;

там̣ ман̃н̃ама̄но пахари, сагган̃ча нирайам̣ бхан̣е.

а̄л̣авийа̄ тайо руккха̄, да̄йехи апаре тайо;

ма̄ киламеси на туйхам̣, таккам̣ совӣракена ча̄ти.

винӣтаваттху

180. тена кхо пана самайена ан̃н̃атаро бхиккху гила̄но хоти. тасса бхиккхӯ ка̄рун̃н̃ена маран̣аван̣н̣ам̣ сам̣ван̣н̣есум̣. со бхиккху ка̄ламака̄си. тесам̣ куккуччам̣ ахоси ‘‘бхагавата̄ сиккха̄падам̣ пан̃н̃аттам̣, каччи ну кхо майам̣ па̄ра̄джикам̣ а̄паттим̣ а̄панна̄’’ти? бхагавато етаматтхам̣ а̄рочесум̣. ‘‘а̄паттим̣ тумхе, бхиккхаве, а̄панна̄ па̄ра̄джика’’нти.

тена кхо пана самайена ан̃н̃атаро пин̣д̣ача̄рико бхиккху пӣт̣хаке пилотика̄йа пат̣иччханнам̣ да̄ракам̣ нисӣданто оттхаритва̄ ма̄реси. тасса куккуччам̣ ахоси ‘‘бхагавата̄ сиккха̄падам̣ пан̃н̃аттам̣, каччи ну кхо ахам̣ па̄ра̄джикам̣ а̄паттим̣ а̄панно’’ти? бхагавато етаматтхам̣ а̄рочеси. ‘‘ана̄патти, бхиккху, па̄ра̄джикасса. на ча, бхиккхаве, аппат̣ивеккхитва̄ а̄сане нисӣдитаббам̣; йо нисӣдеййа, а̄патти дуккат̣асса̄’’ти.

тена кхо пана самайена ан̃н̃атаро бхиккху бхаттагге антарагхаре а̄санам̣ пан̃н̃апенто мусале уссите екам̣ мусалам̣ аггахеси. дутийо мусало парипатитва̄ ан̃н̃атарасса да̄ракасса маттхаке аваттха̄си. со ка̄ламака̄си. тасса куккуччам̣ ахоси…пе… ‘‘ким̣читто твам̣, бхиккхӯ’’ти? ‘‘асан̃чичча ахам̣, бхагава̄’’ти. ‘‘ана̄патти, бхиккху, асан̃чичча̄’’ти.

тена кхо пана самайена ан̃н̃атаро бхиккху бхаттагге антарагхаре а̄санам̣ пан̃н̃апенто удуккхалабхан̣д̣икам̣ аккамитва̄ пават̣т̣еси. ан̃н̃атарам̣ да̄ракам̣ оттхаритва̄ ма̄реси. тасса куккуччам̣ ахоси…пе… ‘‘ана̄патти, бхиккху, асан̃чичча̄’’ти.

тена кхо пана самайена пита̄путта̄ бхиккхӯсу паббаджита̄ хонти. ка̄ле а̄рочите путто питарам̣ етадавоча – ‘‘гаччха, бханте, сан̇гхо там̣ патима̄нетӣ’’ти пит̣т̣хийам̣ гахетва̄ пан̣а̄меси. со папатитва̄ ка̄ламака̄си. тасса куккуччам̣ ахоси…пе… ‘‘ким̣читто твам̣, бхиккхӯ’’ти? ‘‘на̄хам̣, бхагава̄, маран̣а̄дхиппа̄йо’’ти. ‘‘ана̄патти, бхиккху, намаран̣а̄дхиппа̄йасса̄’’ти.

тена кхо пана самайена пита̄путта̄ бхиккхӯсу паббаджита̄ хонти. ка̄ле а̄рочите путто питарам̣ етадавоча – ‘‘гаччха, бханте, сан̇гхо там̣ патима̄нетӣ’’ти маран̣а̄дхиппа̄йо пит̣т̣хийам̣ гахетва̄ пан̣а̄меси. со папатитва̄ ка̄ламака̄си. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно па̄ра̄джика’’нти.

тена кхо пана самайена пита̄путта̄ бхиккхӯсу паббаджита̄ хонти. ка̄ле а̄рочите путто питарам̣ етадавоча – ‘‘гаччха, бханте, сан̇гхо там̣ патима̄нетӣ’’ти маран̣а̄дхиппа̄йо пит̣т̣хийам̣ гахетва̄ пан̣а̄меси. со папатитва̄ на ка̄ламака̄си. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

181. тена кхо пана самайена ан̃н̃атарасса бхиккхуно бхун̃джантасса мам̣сам̣ кан̣т̣хе вилаггам̣ хоти. ан̃н̃атаро бхиккху тасса бхиккхуно гӣва̄йам̣ паха̄рам̣ ада̄си. салохитам̣ мам̣сам̣ пати. со бхиккху ка̄ламака̄си. тасса куккуччам̣ ахоси…пе… ‘‘ана̄патти, бхиккху, намаран̣а̄дхиппа̄йасса̄’’ти.

тена кхо пана самайена ан̃н̃атарасса бхиккхуно бхун̃джантасса мам̣сам̣ кан̣т̣хе вилаггам̣ хоти. ан̃н̃атаро бхиккху маран̣а̄дхиппа̄йо тасса бхиккхуно гӣва̄йам̣ паха̄рам̣ ада̄си. салохитам̣ мам̣сам̣ пати. со бхиккху ка̄ламака̄си. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно па̄ра̄джика’’нти.

тена кхо пана самайена ан̃н̃атарасса бхиккхуно бхун̃джантасса мам̣сам̣ кан̣т̣хе вилаггам̣ хоти. ан̃н̃атаро бхиккху маран̣а̄дхиппа̄йо тасса бхиккхуно гӣва̄йам̣ паха̄рам̣ ада̄си. салохитам̣ мам̣сам̣ пати. со бхиккху на ка̄ламака̄си. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро пин̣д̣ача̄рико бхиккху висагатам̣ пин̣д̣апа̄там̣ лабхитва̄ пат̣иккаманам̣ харитва̄ бхиккхӯнам̣ аггака̄рикам̣ ада̄си. те бхиккхӯ ка̄ламакам̣су. тасса куккуччам̣ ахоси…пе… ‘‘ким̣читто твам̣, бхиккхӯ’’ти? ‘‘на̄хам̣, бхагава̄, джа̄на̄мӣ’’ти. ‘‘ана̄патти, бхиккху, аджа̄нантасса̄’’ти.

тена кхо пана самайена ан̃н̃атаро бхиккху вӣмам̣са̄дхиппа̄йо ан̃н̃атарасса бхиккхуно висам̣ ада̄си. со бхиккху ка̄ламака̄си. тасса куккуччам̣ ахоси…пе… ‘‘ким̣читто твам̣, бхиккхӯ’’ти? ‘‘вӣмам̣са̄дхиппа̄йо ахам̣, бхагава̄’’ти. ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

182. тена кхо пана самайена а̄л̣авака̄ [а̄л̣авика̄ (сйа̄.)] бхиккхӯ виха̄раваттхум̣ каронти. ан̃н̃атаро бхиккху хет̣т̣ха̄ хутва̄ силам̣ учча̄реси. упаримена бхиккхуна̄ дуггахита̄ сила̄ хет̣т̣химасса бхиккхуно маттхаке аваттха̄си. со бхиккху ка̄ламака̄си. тасса куккуччам̣ ахоси…пе… ‘‘ана̄патти, бхиккху, асан̃чичча̄’’ти.

тена кхо пана самайена а̄л̣авака̄ бхиккхӯ виха̄раваттхум̣ каронти. ан̃н̃атаро бхиккху хет̣т̣ха̄ хутва̄ силам̣ учча̄реси. упаримо бхиккху маран̣а̄дхиппа̄йо хет̣т̣химасса бхиккхуно маттхаке силам̣ мун̃чи. со бхиккху ка̄ламака̄си…пе… со бхиккху на ка̄ламака̄си. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

тена кхо пана самайена а̄л̣авака̄ бхиккхӯ виха̄расса кут̣т̣ам̣ ут̣т̣ха̄пенти. ан̃н̃атаро бхиккху хет̣т̣ха̄ хутва̄ ит̣т̣хакам̣ учча̄реси. упаримена бхиккхуна̄ дуггахита̄ ит̣т̣хака̄ хет̣т̣химасса бхиккхуно маттхаке аваттха̄си. со бхиккху ка̄ламака̄си. тасса куккуччам̣ ахоси…пе… ‘‘ана̄пати, бхиккху, асан̃чичча̄’’ти.

тена кхо пана самайена а̄л̣авака̄ бхиккхӯ виха̄расса кут̣т̣ам̣ ут̣т̣ха̄пенти. ан̃н̃атаро бхиккху хет̣т̣ха̄ хутва̄ ит̣т̣хакам̣ учча̄реси. упаримо бхиккху маран̣а̄дхиппа̄йо хет̣т̣химасса бхиккхуно маттхаке ит̣т̣хакам̣ мун̃чи. со бхиккху ка̄ламака̄си…пе… со бхиккху на ка̄ламака̄си. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

183. тена кхо пана самайена а̄л̣авака̄ бхиккхӯ навакаммам̣ каронти. ан̃н̃атаро бхиккху хет̣т̣ха̄ хутва̄ ва̄сим̣ учча̄реси. упаримена бхиккхуна̄ дуггахита̄ ва̄сӣ хет̣т̣химасса бхиккхуно маттхаке аваттха̄си. со бхиккху ка̄ламака̄си. тасса куккуччам̣ ахоси…пе… ‘‘ана̄патти, бхиккху, асан̃чичча̄’’ти.

тена кхо пана самайена а̄л̣авака̄ бхиккхӯ навакаммам̣ каронти. ан̃н̃атаро бхиккху хет̣т̣ха̄ хутва̄ ва̄сим̣ учча̄реси. упаримо бхиккху маран̣а̄дхиппа̄йо хет̣т̣химасса бхиккхуно маттхаке ва̄сим̣ мун̃чи. со бхиккху ка̄ламака̄си…пе… со бхиккху на ка̄ламака̄си. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

тена кхо пана самайена а̄л̣авака̄ бхиккхӯ навакаммам̣ каронти. ан̃н̃атаро бхиккху хет̣т̣ха̄ хутва̄ гопа̄насим̣ учча̄реси. упаримена бхиккхуна̄ дуггахита̄ гопа̄насӣ хет̣т̣химасса бхиккхуно маттхаке аваттха̄си. со бхиккху ка̄ламака̄си. тасса куккуччам̣ ахоси…пе… ‘‘ана̄патти, бхиккху, асан̃чичча̄’’ти.

тена кхо пана самайена а̄л̣авака̄ бхиккхӯ навакаммам̣ каронти. ан̃н̃атаро бхиккху хет̣т̣ха̄ хутва̄ гопа̄насим̣ учча̄реси. упаримо бхиккху маран̣а̄дхиппа̄йо хет̣т̣химасса бхиккхуно маттхаке гопа̄насим̣ мун̃чи. со бхиккху ка̄ламака̄си…пе… со бхиккху на ка̄ламака̄си. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

тена кхо пана самайена а̄л̣авака̄ бхиккхӯ навакаммам̣ каронта̄ ат̣т̣акам̣ бандханти. ан̃н̃атаро бхиккху ан̃н̃атарам̣ бхиккхум̣ етадавоча – ‘‘а̄вусо, атрат̣т̣хито бандха̄хӣ’’ти. со татрат̣т̣хито бандханто парипатитва̄ ка̄ламака̄си. тасса куккуччам̣ ахоси…пе… ‘‘ким̣читто твам̣, бхиккхӯ’’ти? ‘‘на̄хам̣, бхагава̄, маран̣а̄дхиппа̄йо’’ти. ‘‘ана̄патти, бхиккху, намаран̣а̄дхиппа̄йасса̄’’ти.

тена кхо пана самайена а̄л̣авака̄ бхиккхӯ навакаммам̣ каронта̄ ат̣т̣акам̣ бандханти. ан̃н̃атаро бхиккху маран̣а̄дхиппа̄йо ан̃н̃атарам̣ бхиккхум̣ етадавоча – ‘‘а̄вусо, атрат̣т̣хито бандха̄хӣ’’ти. со татрат̣т̣хито бандханто парипатитва̄ ка̄ламака̄си…пе… парипатитва̄ на ка̄ламака̄си. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху виха̄рам̣ чха̄детва̄ отарати. ан̃н̃атаро бхиккху там̣ бхиккхум̣ етадавоча – ‘‘а̄вусо, ито отара̄хӣ’’ти. со тена отаранто парипатитва̄ ка̄ламака̄си. тасса куккуччам̣ ахоси…пе… ‘‘ана̄патти, бхиккху, намаран̣а̄дхиппа̄йасса̄’’ти.

тена кхо пана самайена ан̃н̃атаро бхиккху виха̄рам̣ чха̄детва̄ отарати. ан̃н̃атаро бхиккху маран̣а̄дхиппа̄йо там̣ бхиккхум̣ етадавоча – ‘‘а̄вусо, ито отара̄хӣ’’ти. со тена отаранто парипатитва̄ ка̄ламака̄си…пе… парипатитва̄ на ка̄ламака̄си. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху анабхиратийа̄ пӣл̣ито гиджджхакӯт̣ам̣ паббатам̣ абхирухитва̄ папа̄те папатанто ан̃н̃атарам̣ вилӣвака̄рам̣ оттхаритва̄ ма̄реси. тасса куккуччам̣ ахоси…пе… ‘‘ана̄патти, бхиккху, па̄ра̄джикасса. на ча, бхиккхаве, атта̄нам̣ па̄тетаббам̣. йо па̄теййа, а̄патти дуккат̣асса̄’’ти.

тена кхо пана самайена чхаббаггийа̄ бхиккхӯ гиджджхакӯт̣ам̣ паббатам̣ абхирухитва̄ дава̄йа силам̣ павиджджхим̣су. са̄ ан̃н̃атарам̣ гопа̄лакам̣ оттхаритва̄ ма̄реси. тесам̣ куккуччам̣ ахоси …пе… ‘‘ана̄патти, бхиккхаве, па̄ра̄джикасса. на ча, бхиккхаве, дава̄йа сила̄ павиджджхитабба̄. йо павиджджхеййа, а̄патти дуккат̣асса̄’’ти.

184. тена кхо пана самайена ан̃н̃атаро бхиккху гила̄но хоти. там̣ бхиккхӯ седесум̣. со бхиккху ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, намаран̣а̄дхиппа̄йасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ маран̣а̄дхиппа̄йа̄ седесум̣. со бхиккху ка̄ламака̄си.…пе… со бхиккху на ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атарасса бхиккхуно сӣса̄бхита̄по хоти. тасса бхиккхӯ наттхум̣ адам̣су. со бхиккху ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, намаран̣а̄дхиппа̄йасса̄’’ти.

тена кхо пана самайена ан̃н̃атарасса бхиккхуно сӣса̄бхита̄по хоти. тасса бхиккхӯ маран̣а̄дхиппа̄йа̄ наттхум̣ адам̣су. со бхиккху ка̄ламака̄си…пе… со бхиккху на ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ самба̄хесум̣. со бхиккху ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, намаран̣а̄дхиппа̄йасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ маран̣а̄дхиппа̄йа̄ самба̄хесум̣. со бхиккху ка̄ламака̄си…пе… со бхиккху на ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккху нха̄песум̣. со бхиккху ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, намаран̣а̄дхиппа̄йасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ маран̣а̄дхиппа̄йа̄ нха̄песум̣. со бхиккху ка̄ламака̄си…пе… со бхиккху на ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ телена аббхан̃джим̣су. со бхиккху ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, намаран̣а̄дхиппа̄йасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ маран̣а̄дхиппа̄йа̄ телена аббхан̃джим̣су. со бхиккху ка̄ламака̄си…пе… со бхиккху на ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, па̄ра̄джикасса; а̄патти тхуллаччайасса̄’’ти.

185. тена кхо пана самайена ан̃н̃атаро бхиккху гила̄но хоти. там̣ бхиккхӯ ут̣т̣ха̄песум̣. со бхиккху ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, намаран̣а̄дхиппа̄йасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ маран̣а̄дхиппа̄йа̄ ут̣т̣ха̄песум̣. со бхиккху ка̄ламака̄си…пе… со бхиккху на ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ нипа̄тесум̣. со бхиккху ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, намаран̣а̄дхиппа̄йасса̄’’ти.

тена кхо пана самайена ан̃н̃атаро бхиккху гила̄но хоти. там̣ бхиккхӯ маран̣а̄дхиппа̄йа̄ нипа̄тесум̣. со бхиккху ка̄ламака̄си…пе… со бхиккху на ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху гила̄но хоти. тасса бхиккхӯ аннам̣ адам̣су. со бхиккху ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, намаран̣а̄дхиппа̄йасса̄’’ти.

тена кхо пана самайена ан̃н̃атаро бхиккху гила̄но хоти. тасса бхиккхӯ маран̣а̄дхиппа̄йа̄ аннам̣ адам̣су. со бхиккху ка̄ламака̄си…пе… со бхиккху на ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху гила̄но хоти. тасса бхиккху па̄нам̣ адам̣су. со бхиккху ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, намаран̣а̄дхиппа̄йасса̄’’ти.

тена кхо пана самайена ан̃н̃атаро бхиккху гила̄но хоти. тасса бхиккхӯ маран̣а̄дхиппа̄йа̄ па̄нам̣ адам̣су. со бхиккху ка̄ламака̄си…пе… со бхиккху на ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, па̄ра̄джикасса; а̄патти тхуллаччайасса̄’’ти.

186. тена кхо пана самайена ан̃н̃атара̄ иттхӣ павуттхапатика̄ джа̄рена габбхинӣ хоти. са̄ кулӯпакам̣ бхиккхум̣ етадавоча – ‘‘ин̇гха̄ййа габбхапа̄танам̣ джа̄на̄хӣ’’ти. ‘‘сут̣т̣ху, бхагинӣ’’ти тасса̄ габбхапа̄танам̣ ада̄си. да̄рако ка̄ламака̄си. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно па̄ра̄джика’’нти.

тена кхо пана самайена ан̃н̃атарасса пурисасса две паджа̄патийо хонти – ека̄ ван̃джха̄, ека̄ виджа̄йинӣ. ван̃джха̄ иттхӣ кулӯпакам̣ бхиккхум̣ етадавоча – ‘‘саче са̄, бханте, виджа̄йиссати саббасса кут̣умбасса иссара̄ бхависсати. ин̇гха̄ййа, тасса̄ габбхапа̄танам̣ джа̄на̄хӣ’’ти.‘‘сут̣т̣ху, бхагинӣ’’ти тасса̄ габбхапа̄танам̣ ада̄си. да̄рако ка̄ламака̄си, ма̄та̄ на ка̄ламака̄си. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно па̄ра̄джика’’нти.

тена кхо пана самайена ан̃н̃атарасса пурисасса две паджа̄патийо хонти – ека̄ ван̃джха̄, ека̄ виджа̄йинӣ. ван̃джха̄ иттхӣ кулӯпакам̣ бхиккхум̣ етадавоча – ‘‘саче са̄, бханте, виджа̄йиссати саббасса кут̣умбасса иссара̄ бхависсати. ин̇гха̄ййа, тасса̄ габбхапа̄танам̣ джа̄на̄хӣ’’ти. ‘‘сут̣т̣ху, бхагинӣ’’ти тасса̄ габбхапа̄танам̣ ада̄си. ма̄та̄ ка̄ламака̄си, да̄рако на ка̄ламака̄си. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атарасса пурисасса две паджа̄патийо хонти – ека̄ ван̃джха̄, ека̄ виджа̄йинӣ. ван̃джха̄ иттхӣ кулӯпакам̣ бхиккхум̣ етадавоча – ‘‘саче са̄, бханте, виджа̄йиссати саббасса кут̣умбасса иссара̄ бхависсати. ин̇гха̄ййа, тасса̄ габбхапа̄танам̣ джа̄на̄хӣ’’ти. ‘‘сут̣т̣ху, бхагинӣ’’ти тасса̄ габбхапа̄танам̣ ада̄си. убхо ка̄ламакам̣су…пе… убхо на ка̄ламакам̣су. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

187. тена кхо пана самайена ан̃н̃атара̄ габбхинӣ иттхӣ кулӯпакам̣ бхиккхум̣ етадавоча – ‘‘ин̇гха̄ййа, габбхапа̄танам̣ джа̄на̄хӣ’’ти. ‘‘тена хи, бхагини, маддассӯ’’ти. са̄ мадда̄петва̄ габбхам̣ па̄теси. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно па̄ра̄джика’’нти.

тена кхо пана самайена ан̃н̃атара̄ габбхинӣ иттхӣ кулӯпакам̣ бхиккхум̣ етадавоча – ‘‘ин̇гха̄ййа, габбхапа̄танам̣ джа̄на̄хӣ’’ти. ‘‘тена хи, бхагини, та̄пехӣ’’ти. са̄ та̄петва̄ габбхам̣ па̄теси. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно па̄ра̄джика’’нти.

тена кхо пана самайена ан̃н̃атара̄ ван̃джха̄ иттхӣ кулӯпакам̣ бхиккхум̣ етадавоча – ‘‘ин̇гха̄ййа, бхесаджджам̣ джа̄на̄хи йена̄хам̣ виджа̄йеййа’’нти. ‘‘сут̣т̣ху, бхагинӣ’’ти тасса̄ бхесаджджам̣ ада̄си. са̄ ка̄ламака̄си. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти дуккат̣асса̄’’ти.

тена кхо пана самайена ан̃н̃атара̄ виджа̄йинӣ иттхӣ кулӯпакам̣ бхиккхум̣ етадавоча – ‘‘ин̇гха̄ййа, бхесаджджам̣ джа̄на̄хи йена̄хам̣ на виджа̄йеййа’’нти. ‘‘сут̣т̣ху, бхагинӣ’’ти тасса̄ бхесаджджам̣ ада̄си. са̄ ка̄ламака̄си. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти дуккат̣асса̄’’ти.

тена кхо пана самайена чхаббаггийа̄ бхиккхӯ саттарасаваггийам̣ бхиккхум̣ ан̇гулипатодакена ха̄сесум̣. со бхиккху уттанто анасса̄сако ка̄ламака̄си. тесам̣ куккуччам̣ ахоси…пе… ‘‘ана̄патти, бхиккхаве, па̄ра̄джикасса̄’’ти [па̄ра̄джикасса, а̄патти па̄читтийасса̄ти (сйа̄.)].

тена кхо пана самайена саттарасаваггийа̄ бхиккхӯ чхаббаггийам̣ бхиккхум̣ каммам̣ карисса̄ма̄ти оттхаритва̄ ма̄ресум̣. тесам̣ куккуччам̣ ахоси…пе… ‘‘ана̄патти, бхиккхаве, па̄ра̄джикасса̄’’ти.

тена кхо пана самайена ан̃н̃атаро бхӯтаведжджако бхиккху йаккхам̣ джӣвита̄ воропеси. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху ан̃н̃атарам̣ бхиккхум̣ ва̄л̣айаккхавиха̄рам̣ па̄хеси. там̣ йаккха̄ джӣвита̄ воропесум̣. тасса куккуччам̣ ахоси…пе… ‘‘ана̄патти, бхиккху, намаран̣а̄дхиппа̄йасса̄’’ти.

тена кхо пана самайена ан̃н̃атаро бхиккху маран̣а̄дхиппа̄йо ан̃н̃атарам̣ бхиккхум̣ ва̄л̣айаккхавиха̄рам̣ па̄хеси. там̣ йаккха̄ джӣвита̄ воропесум̣…пе… там̣ йаккха̄ джӣвита̄ на воропесум̣. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху ан̃н̃атарам̣ бхиккхум̣ ва̄л̣аканта̄рам̣ па̄хеси. там̣ ва̄л̣а̄ джӣвита̄ воропесум̣. тасса куккуччам̣ ахоси…пе… ‘‘ана̄патти, бхиккху, намаран̣а̄дхиппа̄йасса̄’’ти.

тена кхо пана самайена ан̃н̃атаро бхиккху маран̣а̄дхиппа̄йо ан̃н̃атарам̣ бхиккхум̣ ва̄л̣аканта̄рам̣ па̄хеси. там̣ ва̄л̣а̄ джӣвита̄ воропесум̣…пе… там̣ ва̄л̣а̄ джӣвита̄ на воропесум̣. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху ан̃н̃атарам̣ бхиккхум̣ чораканта̄рам̣ па̄хеси. там̣ чора̄ джӣвита̄ воропесум̣. тасса куккуччам̣ ахоси…пе… ‘‘ана̄патти, бхиккху, намаран̣а̄дхиппа̄йасса̄’’ти.

тена кхо пана самайена ан̃н̃атаро бхиккху маран̣а̄дхиппа̄йо ан̃н̃атарам̣ бхиккхум̣ чораканта̄рам̣ па̄хеси. там̣ чора̄ джӣвита̄ воропесум̣…пе… там̣ чора̄ джӣвита̄ на воропесум̣. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

188. тена кхо пана самайена ан̃н̃атаро бхиккху там̣ ман̃н̃ама̄но там̣ джӣвита̄ воропеси…пе… там̣ ман̃н̃ама̄но ан̃н̃ам̣ джӣвита̄ воропеси…пе… ан̃н̃ам̣ ман̃н̃ама̄но там̣ джӣвита̄ воропеси…пе… ан̃н̃ам̣ ман̃н̃ама̄но ан̃н̃ам̣ джӣвита̄ воропеси. тасса куккуччам̣ ахоси…пе… ‘‘а̄паттим̣ твам̣, бхиккху, а̄панно па̄ра̄джика’’нти.

тена кхо пана самайена ан̃н̃атаро бхиккху амануссена гахито хоти. ан̃н̃атаро бхиккху тасса бхиккхуно паха̄рам̣ ада̄си. со бхиккху ка̄ламака̄си. тасса куккуччам̣ ахоси…пе… ‘‘ана̄патти, бхиккху, намаран̣а̄дхиппа̄йасса̄’’ти.

тена кхо пана самайена ан̃н̃атаро бхиккху амануссена гахито хоти. ан̃н̃атаро бхиккху маран̣а̄дхиппа̄йо тасса бхиккхуно паха̄рам̣ ада̄си. со бхиккху ка̄ламака̄си…пе… со бхиккху на ка̄ламака̄си. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху калйа̄н̣акаммасса саггакатхам̣ катхеси. со адхимутто ка̄ламака̄си. тасса куккуччам̣ ахоси…пе… ‘‘ана̄патти, бхиккху, намаран̣а̄дхиппа̄йасса̄’’ти.

тена кхо пана самайена ан̃н̃атаро бхиккху маран̣а̄дхиппа̄йо калйа̄н̣акаммасса саггакатхам̣ катхеси. со адхимутто ка̄ламака̄си…пе… со адхимутто на ка̄ламака̄си. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

тена кхо пана самайена ан̃н̃атаро бхиккху нерайикасса нирайакатхам̣ катхеси. со уттаситва̄ ка̄ламака̄си. тасса куккуччам̣ ахоси…пе… ‘‘ана̄патти, бхиккху, намаран̣а̄дхиппа̄йасса̄’’ти.

тена кхо пана самайена ан̃н̃атаро бхиккху маран̣а̄дхиппа̄йо нерайикасса нирайакатхам̣ катхеси. со уттаситва̄ ка̄ламака̄си…пе… со уттаситва̄ на ка̄ламака̄си. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

189. тена кхо пана самайена а̄л̣авака̄ бхиккхӯ навакаммам̣ каронта̄ руккхам̣ чхинданти. ан̃н̃атаро бхиккху ан̃н̃атарам̣ бхиккхум̣ етадавоча – ‘‘а̄вусо, атрат̣т̣хито чхинда̄хӣ’’ти. там̣ татрат̣т̣хитам̣ чхиндантам̣ руккхо оттхаритва̄ ма̄реси. тасса куккуччам̣ ахоси…пе… ‘‘ана̄патти, бхиккху, намаран̣а̄дхиппа̄йасса̄’’ти.

тена кхо пана самайена а̄л̣авака̄ бхиккхӯ навакаммам̣ каронта̄ руккхам̣ чхинданти. ан̃н̃атаро бхиккху маран̣а̄дхиппа̄йо ан̃н̃атарам̣ бхиккхум̣ етадавоча – ‘‘а̄вусо, атрат̣т̣хито чхинда̄хӣ’’ти. там̣ татрат̣т̣хитам̣ чхиндантам̣ руккхо оттхаритва̄ ма̄реси…пе… руккхо оттхаритва̄ на ма̄реси. тасса куккуччам̣ ахоси…пе… ‘‘ана̄патти, бхиккху, па̄ра̄джикасса; а̄патти тхуллаччайасса̄’’ти.

190. тена кхо пана самайена чхаббаггийа̄ бхиккхӯ да̄йам̣ а̄лимпесум̣ [а̄л̣импесум̣ (сйа̄. ка.)]; манусса̄ дад̣д̣ха̄ ка̄ламакам̣су. тесам̣ куккуччам̣ ахоси…пе… ‘‘ана̄патти, бхиккхаве, намаран̣а̄дхиппа̄йасса̄’’ти.