6. амӯлакасиккха̄падам̣

459. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена чхаббаггийа̄ бхиккхӯ бхиккхум̣ амӯлакена сан̇гха̄дисесена ануддхам̣сенти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ бхиккхум̣ амӯлакена сан̇гха̄дисесена ануддхам̣сессантӣ’’ти…пе… саччам̣ кира тумхе, бхиккхаве, бхиккхум̣ амӯлакена сан̇гха̄дисесена ануддхам̣сетха̄ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма тумхе, могхапуриса̄, бхиккхум̣ амӯлакена сан̇гха̄дисесена ануддхам̣сессатха! нетам̣, могхапуриса̄, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

460. ‘‘йо пана бхиккху бхиккхум̣ амӯлакена сан̇гха̄дисесена ануддхам̣сеййа, па̄читтийа’’нти.

461. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

бхиккхунти ан̃н̃ам̣ бхиккхум̣.

амӯлакам̣ на̄ма адит̣т̣хам̣ ассутам̣ апарисан̇китам̣.

сан̇гха̄дисесена̄ти терасаннам̣ ан̃н̃атарена.

ануддхам̣сеййа̄ти чодети ва̄ чода̄пети ва̄, а̄патти па̄читтийасса.

462. упасампанне упасампаннасан̃н̃ӣ амӯлакена сан̇гха̄дисесена ануддхам̣сети, а̄патти па̄читтийасса. упасампанне вематико амӯлакена сан̇гха̄дисесена ануддхам̣сети, а̄патти па̄читтийасса. упасампанне анупасампаннасан̃н̃ӣ амӯлакена сан̇гха̄дисесена ануддхам̣сети, а̄патти па̄читтийасса.

а̄ча̄равипаттийа̄ ва̄ дит̣т̣хивипаттийа̄ ва̄ ануддхам̣сети, а̄патти дуккат̣асса. анупасампаннам̣ ануддхам̣сети, а̄патти дуккат̣асса. анупасампанне упасампаннасан̃н̃ӣ, а̄патти дуккат̣асса. анупасампанне вематико, а̄патти дуккат̣асса. анупасампанне анупасампаннасан̃н̃ӣ, а̄патти дуккат̣асса.

463. ана̄патти татха̄сан̃н̃ӣ чодети, ва̄ чода̄пети ва̄, умматтакасса, а̄дикаммикасса̄ти.

амӯлакасиккха̄падам̣ нит̣т̣хитам̣ чхат̣т̣хам̣.