7. сан̃чиччасиккха̄падам̣

464. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена чхаббаггийа̄ бхиккхӯ саттарасаваггийа̄нам̣ бхиккхӯнам̣ сан̃чичча куккуччам̣ упадаханти – ‘‘бхагавата̄, а̄вусо, сиккха̄падам̣ пан̃н̃аттам̣ – ‘на ӯнавӣсативассо пуггало упасампа̄детаббо’ти. тумхе ча ӯнавӣсативасса̄ упасампанна̄. каччи но тумхе анупасампанна̄’’ти? те роданти. бхиккхӯ евама̄хам̣су – ‘‘кисса тумхе, а̄вусо, родатха̄’’ти? ‘‘име, а̄вусо, чхаббаггийа̄ бхиккхӯ амха̄кам̣ сан̃чичча куккуччам̣ упадахантӣ’’ти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ бхиккхӯнам̣ сан̃чичча куккуччам̣ упадахиссантӣ’’ти…пе… саччам̣ кира тумхе, бхиккхаве, бхиккхӯнам̣ сан̃чичча куккуччам̣ упадахатха̄ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма тумхе, могхапуриса̄, бхиккхӯнам̣ сан̃чичча куккуччам̣ упадахиссатха! нетам̣, могхапуриса̄ аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

465. ‘‘йо пана бхиккху бхиккхусса сан̃чичча куккуччам̣ упадахеййа [уппа̄деййа (итипи)] – ‘итисса мухуттампи апха̄су бхависсатӣ’ти етадева паччайам̣ каритва̄ анан̃н̃ам̣, па̄читтийа’’нти.

466. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

бхиккхусса̄ти ан̃н̃асса бхиккхусса.

сан̃чичча̄ти джа̄нанто сан̃джа̄нанто чечча абхивитаритва̄ вӣтиккамо.

куккуччам̣ упадахеййа̄ти ‘‘ӯнавӣсативассо ман̃н̃е твам̣ упасампанно, вика̄ле ман̃н̃е тайа̄ бхуттам̣, маджджам̣ ман̃н̃е тайа̄ пӣтам̣, ма̄туга̄мена саддхим̣ рахо ман̃н̃е тайа̄ нисинна’’нти куккуччам̣ упадахати, а̄патти па̄читтийасса.

етадева паччайам̣ каритва̄, анан̃н̃анти на ан̃н̃о кочи паччайо хоти куккуччам̣ упадахитум̣.

467. упасампанне упасампаннасан̃н̃ӣ сан̃чичча куккуччам̣ упадахати, а̄патти па̄читтийасса. упасампанне вематико сан̃чичча куккуччам̣ упадахати, а̄патти па̄читтийасса. упасампанне анупасампаннасан̃н̃ӣ сан̃чичча куккуччам̣ упадахати, а̄патти па̄читтийасса.

анупасампаннасса сан̃чичча куккуччам̣ упадахати, а̄патти дуккат̣асса. анупасампанне упасампаннасан̃н̃ӣ, а̄патти дуккат̣асса. анупасампанне вематико, а̄патти дуккат̣асса. анупасампанне анупасампаннасан̃н̃ӣ, а̄патти дуккат̣асса.

468. ана̄патти на куккуччам̣ упадахитука̄мо ‘‘ӯнавӣсативассо ман̃н̃е твам̣ упасампанно, вика̄ле ман̃н̃е тайа̄ бхуттам̣, маджджам̣ ман̃н̃е тайа̄ пӣтам̣, ма̄туга̄мена саддхим̣ рахо ман̃н̃е тайа̄ нисиннам̣, ин̇гха джа̄на̄хи, ма̄ те паччха̄ куккуччам̣ ахосӣ’’ти бхан̣ати, умматтакасса, а̄дикаммикасса̄ти.

сан̃чиччасиккха̄падам̣ нит̣т̣хитам̣ саттамам̣.