12. парин̣а̄манасиккха̄падам̣

489. [идам̣ ваттху па̄ра̄. 657] тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена са̄ваттхийам̣ ан̃н̃атарасса пӯгасса сан̇гхасса сачӣварабхаттам̣ пат̣ийаттам̣ хоти – ‘‘бходжетва̄ чӣварена аччха̄десса̄ма̄’’ти. атха кхо чхаббаггийа̄ бхиккхӯ йена со пӯго тенупасан̇камим̣су; упасан̇камитва̄ там̣ пӯгам̣ етадавочум̣ – ‘‘детха̄вусо, има̄ни чӣвара̄ни имесам̣ бхиккхӯна’’нти. ‘‘на майам̣, бханте, дасса̄ма. амха̄кам̣ сан̇гхасса анувассам̣ сачӣварабхиккха̄ пан̃н̃атта̄’’ти. ‘‘бахӯ, а̄вусо, сан̇гхасса да̄йака̄, бахӯ сан̇гхасса бхатта̄ [бхадда̄ (ка.)]. име тумхе нисса̄йа тумхе сампассанта̄ идха вихаранти. тумхе че имесам̣ на дассатха, атха ко чарахи имесам̣ дассати? детха̄вусо, има̄ни чӣвара̄ни имесам̣ бхиккхӯна’’нти. атха кхо со пӯго чхаббаггийехи бхиккхӯхи ниппӣл̣ийама̄но йатха̄пат̣ийаттам̣ чӣварам̣ чхаббаггийа̄нам̣ бхиккхӯнам̣ датва̄ сан̇гхам̣ бхаттена паривиси. йе те бхиккхӯ джа̄нанти сан̇гхасса сачӣварабхаттам̣ пат̣ийаттам̣ ‘‘на ча джа̄нанти чхаббаггийа̄нам̣ бхиккхӯнам̣ динна’’нти те евама̄хам̣су – ‘‘он̣оджетха̄вусо, сан̇гхасса чӣвара’’нти. ‘‘наттхи, бханте. йатха̄пат̣ийаттам̣ чӣварам̣ аййа̄ чхаббаггийа̄ аййа̄нам̣ чхаббаггийа̄нам̣ парин̣а̄месу’’нти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ джа̄нам̣ сан̇гхикам̣ ла̄бхам̣ парин̣атам̣ пуггаласса парин̣а̄мессантӣ’’ти…пе… саччам̣ кира тумхе, бхиккхаве, джа̄нам̣ сан̇гхикам̣ ла̄бхам̣ парин̣атам̣ пуггаласса парин̣а̄метха̄ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма тумхе, могхапуриса̄, джа̄нам̣ сан̇гхикам̣ ла̄бхам̣ парин̣атам̣ пуггаласса парин̣а̄мессатха! нетам̣, могхапуриса̄, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

490. ‘‘йо пана бхиккху джа̄нам̣ сан̇гхикам̣ ла̄бхам̣ парин̣атам̣ пуггаласса парин̣а̄меййа, па̄читтийа’’нти.

491. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

джа̄на̄ти на̄ма са̄мам̣ ва̄ джа̄на̄ти, ан̃н̃е ва̄ тасса а̄роченти, со ва̄ а̄рочети.

сан̇гхикам̣ на̄ма сан̇гхасса диннам̣ хоти париччаттам̣.

ла̄бхо на̄ма чӣварапин̣д̣апа̄тасена̄санагила̄наппаччайабхесаджджапариккха̄ра̄, антамасо чун̣н̣апин̣д̣опи, дантакат̣т̣хампи, дасикасуттампи.

парин̣атам̣ на̄ма ‘‘дасса̄ма карисса̄ма̄’’ти ва̄ча̄ бхинна̄ хоти, там̣ пуггаласса парин̣а̄мети, а̄патти па̄читтийасса.

492. парин̣ате парин̣атасан̃н̃ӣ пуггаласса парин̣а̄мети, а̄патти па̄читтийасса. парин̣ате вематико пуггаласса парин̣а̄мети, а̄патти дуккат̣асса. парин̣ате апарин̣атасан̃н̃ӣ пуггаласса парин̣а̄мети, ана̄патти. сан̇гхасса парин̣атам̣ ан̃н̃асан̇гхасса ва̄ четийасса ва̄ парин̣а̄мети, а̄патти дуккат̣асса. четийасса парин̣атам̣ ан̃н̃ачетийасса ва̄ сан̇гхасса ва̄ пуггаласса ва̄ парин̣а̄мети, а̄патти дуккат̣асса. пуггаласса парин̣атам̣ ан̃н̃апуггаласса ва̄ сан̇гхасса ва̄ четийасса ва̄ парин̣а̄мети, а̄патти дуккат̣асса. апарин̣ате парин̣атасан̃н̃ӣ, а̄патти дуккат̣асса. апарин̣ате вематико, а̄патти дуккат̣асса. апарин̣ате апарин̣атасан̃н̃ӣ, ана̄патти.

493. ана̄патти – ‘‘каттха дема̄’’ти пуччхӣйама̄но – ‘‘йаттха тумха̄кам̣ деййадхаммо парибхогам̣ ва̄ лабхеййа пат̣исан̇кха̄рам̣ ва̄ лабхеййа чират̣т̣хитико ва̄ асса йаттха ва̄ пана тумха̄кам̣ читтам̣ пасӣдати таттха детха̄’’ти бхан̣ати, умматтакасса, а̄дикаммикасса̄ти.

парин̣а̄манасиккха̄падам̣ нит̣т̣хитам̣ два̄дасамам̣.

сахадхаммикавагго ат̣т̣хамо.

тассудда̄нам̣ –

сахадхамма-виван̣н̣ан̃ча, моха̄панам̣ паха̄ракам̣;

таласатти амӯлан̃ча, сан̃чичча ча упассути;

пат̣иба̄ханачхандан̃ча, даббан̃ча парин̣а̄мананти.