1. сахадхаммикасиккха̄падам̣

433. тена самайена буддхо бхагава̄ косамбийам̣ вихарати гхосита̄ра̄ме. тена кхо пана самайена а̄йасма̄ чханно ана̄ча̄рам̣ а̄чарати. бхиккхӯ евама̄хам̣су – ‘‘ма̄вусо чханна, еварӯпам̣ ака̄си. нетам̣ каппатӣ’’ти. со евам̣ вадети – ‘‘на та̄ва̄хам̣, а̄вусо, етасмим̣ сиккха̄паде сиккхисса̄ми йа̄ва на ан̃н̃ам̣ бхиккхум̣ бйаттам̣ винайадхарам̣ парипуччха̄мӣ’’ти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма а̄йасма̄ чханно бхиккхӯхи сахадхаммикам̣ вуччама̄но евам̣ ваккхати – на та̄ва̄хам̣, а̄вусо, етасмим̣ сиккха̄паде сиккхисса̄ми йа̄ва на ан̃н̃ам̣ бхиккхум̣ бйаттам̣ винайадхарам̣ парипуччха̄мӣ’’ти…пе… саччам̣ кира твам̣, чханна, бхиккхӯхи сахадхаммикам̣ вуччама̄но евам̣ вадеси – ‘‘на та̄ва̄хам̣, а̄вусо, етасмим̣ сиккха̄паде сиккхисса̄ми йа̄ва на ан̃н̃ам̣ бхиккхум̣ бйаттам̣ винайадхарам̣ парипуччха̄мӣ’’ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма твам̣, могхапуриса, бхиккхӯхи сахадхаммикам̣ вуччама̄но евам̣ ваккхаси – ‘‘на та̄ва̄хам̣, а̄вусо, етасмим̣ сиккха̄паде сиккхисса̄ми йа̄ва на ан̃н̃ам̣ бхиккхум̣ бйаттам̣ винайадхарам̣ парипуччха̄мӣ’’ти. нетам̣, могхапуриса, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

434. ‘‘йо пана бхиккху бхиккхӯхи сахадхаммикам̣ вуччама̄но евам̣ вадеййа – ‘на та̄ва̄хам̣, а̄вусо, етасмим̣ сиккха̄паде сиккхисса̄ми йа̄ва на ан̃н̃ам̣ бхиккхум̣ бйаттам̣ винайадхарам̣ парипуччха̄мӣ’ти, па̄читтийам̣. сиккхама̄нена, бхиккхаве, бхиккхуна̄ ан̃н̃а̄таббам̣ парипуччхитаббам̣ парипан̃хитаббам̣. айам̣ таттха са̄мӣчӣ’’ти.

435. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

бхиккхӯхӣти ан̃н̃ехи бхиккхӯхи.

сахадхаммикам̣ на̄ма йам̣ бхагавата̄ пан̃н̃аттам̣ сиккха̄падам̣ етам̣ сахадхаммикам̣ на̄ма. тена вуччама̄но евам̣ вадети [вадеййа (ка.)] – ‘‘на та̄ва̄хам̣, а̄вусо, етасмим̣ сиккха̄паде сиккхисса̄ми йа̄ва на ан̃н̃ам̣ бхиккхум̣ бйаттам̣ винайадхарам̣ парипуччха̄мӣ’’ти [има̄ни пада̄ни сйа̄. поттхаке на диссанти]. пан̣д̣итам̣ бйаттам̣ [има̄ни пада̄ни сйа̄. поттхаке на диссанти] медха̄вим̣ бахуссутам̣ дхаммакатхикам̣ парипуччха̄мӣти бхан̣ати, а̄патти па̄читтийасса.

436. упасампанне упасампаннасан̃н̃ӣ евам̣ вадети, а̄патти па̄читтийасса. упасампанне вематико евам̣ вадети, а̄патти па̄читтийасса. упасампанне анупасампаннасан̃н̃ӣ евам̣ вадети, а̄патти па̄читтийасса.

апан̃н̃аттена вуччама̄но – ‘‘идам̣ на саллекха̄йа на дхутаттха̄йа на па̄са̄диката̄йа на апачайа̄йа на вӣрийа̄рамбха̄йа сам̣ваттатӣ’’ти евам̣ вадети, ‘‘на та̄ва̄хам̣, а̄вусо, етасмим̣ сиккха̄паде сиккхисса̄ми йа̄ва на ан̃н̃ам̣ бхиккхум̣ бйаттам̣ винайадхарам̣ пан̣д̣итам̣ медха̄вим̣ бахуссутам̣ дхаммакатхикам̣ парипуччха̄мӣ’’ти бхан̣ати, а̄патти дуккат̣асса.

анупасампаннена пан̃н̃аттена ва̄ апан̃н̃аттена ва̄ вуччама̄но – ‘‘идам̣ на саллекха̄йа на дхутаттха̄йа на па̄са̄диката̄йа на апачайа̄йа на вӣрийа̄рамбха̄йа сам̣ваттатӣ’’ти евам̣ вадети, ‘‘на та̄ва̄хам̣, а̄вусо, етасмим̣ сиккха̄паде сиккхисса̄ми йа̄ва на ан̃н̃ам̣ бхиккхум̣ бйаттам̣ винайадхарам̣ пан̣д̣итам̣ медха̄вим̣ бахуссутам̣ дхаммакатхикам̣ парипуччха̄мӣ’’ти бхан̣ати, а̄патти дуккат̣асса. анупасампанне упасампаннасан̃н̃ӣ, а̄патти дуккат̣асса. анупасампанне вематико, а̄патти дуккат̣асса. анупасампанне анупасампаннасан̃н̃ӣ, а̄патти дуккат̣асса.

сиккхама̄нена̄ти сиккхитука̄мена.

ан̃н̃а̄таббанти джа̄нитаббам̣.

парипуччхитаббанти ‘‘идам̣, бханте, катхам̣; имасса ва̄ кваттхо’’ти?

парипан̃хитаббанти чинтетаббам̣ тулайитаббам̣.

айам̣ таттха са̄мӣчӣти айам̣ таттха анудхаммата̄.

437. ана̄патти ‘‘джа̄нисса̄ми сиккхисса̄мӣ’’ти бхан̣ати, умматтакасса, а̄дикаммикасса̄ти.

сахадхаммикасиккха̄падам̣ нит̣т̣хитам̣ пат̣хамам̣.