2. вилекханасиккха̄падам̣

438. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. [идам̣ ваттху чӯл̣ава. 320] тена кхо пана самайена бхагава̄ бхиккхӯнам̣ анекапарийа̄йена винайакатхам̣ катхети, винайасса ван̣н̣ам̣ бха̄сати, винайапарийаттийа̄ ван̣н̣ам̣ бха̄сати, а̄дисса а̄дисса а̄йасмато упа̄лисса ван̣н̣ам̣ бха̄сати. бхиккхӯнам̣ етадахоси [бхиккхӯ бхагава̄ (сйа̄. ка.)] – ‘‘бхагава̄ кхо анекапарийа̄йена винайакатхам̣ катхети, винайасса ван̣н̣ам̣ бха̄сати, винайапарийаттийа̄ ван̣н̣ам̣ бха̄сати, а̄дисса а̄дисса а̄йасмато упа̄лисса ван̣н̣ам̣ бха̄сати. ханда майам̣, а̄вусо, а̄йасмато упа̄лисса сантике винайам̣ парийа̄пун̣а̄ма̄’’ти, те ча бахӯ бхиккхӯ тхера̄ ча нава̄ ча маджджхима̄ ча а̄йасмато упа̄лисса сантике винайам̣ парийа̄пун̣анти.

атха кхо чхаббаггийа̄нам̣ бхиккхӯнам̣ етадахоси – ‘‘етарахи кхо, а̄вусо, бахӯ бхиккхӯ тхера̄ ча нава̄ ча маджджхима̄ ча а̄йасмато упа̄лисса сантике винайам̣ парийа̄пун̣анти. саче име винайе пакатан̃н̃уно бхависсанти амхе йениччхакам̣ йадиччхакам̣ йа̄вадиччхакам̣ а̄кад̣д̣хиссанти парикад̣д̣хиссанти. ханда майам̣, а̄вусо, винайам̣ виван̣н̣ема̄’’ти. атха кхо чхаббаггийа̄ бхиккхӯ бхиккхӯ упасан̇камитва̄ евам̣ ваданти – ‘‘ким̣ панимехи кхудда̄нукхуддакехи сиккха̄падехи уддит̣т̣хехи, йа̄вадева куккучча̄йа вихеса̄йа вилекха̄йа сам̣ваттантӣ’’ти! йе те бхиккхӯ аппиччха̄…пе… те уджджха̄йанти кхиййанти випа̄ченти – катхан̃хи на̄ма чхаббаггийа̄ бхиккхӯ винайам̣ виван̣н̣ессантӣти…пе… саччам̣ кира тумхе, бхиккхаве, винайам̣ виван̣н̣етха̄ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма тумхе, могхапуриса̄, винайам̣ виван̣н̣ессатха! нетам̣, могхапуриса̄, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

439. ‘‘йо пана бхиккху па̄тимоккхе уддиссама̄не евам̣ вадеййа – ‘ким̣ панимехи кхудда̄нукхуддакехи сиккха̄падехи уддит̣т̣хехи, йа̄вадева куккучча̄йа вихеса̄йа вилекха̄йа сам̣ваттантӣ’ти, сиккха̄падавиван̣н̣аке па̄читтийа’’нти.

440. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

па̄тимоккхе уддиссама̄нети уддисанте ва̄ уддиса̄пенте ва̄ саджджха̄йам̣ ва̄ каронте.

евам̣ вадеййа̄ти – ‘‘ким̣ панимехи кхудда̄нукхуддакехи сиккха̄падехи уддит̣т̣хехи, йа̄вадева куккучча̄йа вихеса̄йа вилекха̄йа сам̣ваттантӣти. ‘‘йе имам̣ парийа̄пун̣анти тесам̣ куккуччам̣ хоти, вихеса̄ хоти, вилекха̄ хоти, йе имам̣ на парийа̄пун̣анти тесам̣ куккуччам̣ на хоти вихеса̄ на хоти вилекха̄ на хоти. ануддит̣т̣хам̣ идам̣ варам̣, ануггахитам̣ идам̣ варам̣, апарийа̄пут̣ам̣ идам̣ варам̣, адха̄ритам̣ идам̣ варам̣, винайо ва̄ антарадха̄йату, име ва̄ бхиккхӯ апакатан̃н̃уно хонтӯ’’ти упасампаннасса винайам̣ виван̣н̣ети, а̄патти па̄читтийасса.

441. упасампанне упасампаннасан̃н̃ӣ винайам̣ виван̣н̣ети, а̄патти па̄читтийасса. упасампанне вематико винайам̣ виван̣н̣ети, а̄патти па̄читтийасса. упасампанне анупасампаннасан̃н̃ӣ винайам̣ виван̣н̣ети, а̄патти па̄читтийасса.

ан̃н̃ам̣ дхаммам̣ виван̣н̣ети, а̄патти дуккат̣асса. анупасампаннасса винайам̣ ва̄ ан̃н̃ам̣ ва̄ дхаммам̣ виван̣н̣ети, а̄патти дуккат̣асса. анупасампанне упасампаннасан̃н̃ӣ, а̄патти дуккат̣асса. анупасампанне вематико, а̄патти дуккат̣асса. анупасампанне анупасампаннасан̃н̃ӣ, а̄патти дуккат̣асса.

442. ана̄патти на виван̣н̣етука̄мо, ‘‘ин̇гха твам̣ суттанте ва̄ га̄тха̄йо ва̄ абхидхаммам̣ ва̄ парийа̄пун̣ассу, паччха̄ винайам̣ парийа̄пун̣иссасӣ’’ти бхан̣ати, умматтакасса, а̄дикаммикасса̄ти.

вилекханасиккха̄падам̣ нит̣т̣хитам̣ дутийам̣.