2. ган̣абходжанасиккха̄падам̣

209. тена самайена буддхо бхагава̄ ра̄джагахе вихарати вел̣уване каландаканива̄пе. тена кхо пана самайена девадатто парихӣнала̄бхасакка̄ро сапарисо кулесу вин̃н̃а̄петва̄ вин̃н̃а̄петва̄ бхун̃джати. манусса̄ уджджха̄йанти кхиййанти випа̄ченти – ‘‘катхан̃хи на̄ма саман̣а̄ сакйапуттийа̄ кулесу вин̃н̃а̄петва̄ вин̃н̃а̄петва̄ бхун̃джиссанти! касса сампаннам̣ на мана̄пам̣, касса са̄дум̣ на руччатӣ’’ти! ассосум̣ кхо бхиккхӯ тесам̣ манусса̄нам̣ уджджха̄йанта̄нам̣ кхиййанта̄нам̣ випа̄чента̄нам̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма девадатто сапарисо кулесу вин̃н̃а̄петва̄ вин̃н̃а̄петва̄ бхун̃джиссатӣ’’ти…пе… саччам̣ кира твам̣, девадатта, сапарисо кулесу вин̃н̃а̄петва̄ вин̃н̃а̄петва̄ бхун̃джасӣти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма твам̣, могхапуриса, сапарисо кулесу вин̃н̃а̄петва̄ вин̃н̃а̄петва̄ бхун̃джиссаси! нетам̣, могхапуриса, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

‘‘ган̣абходжане па̄читтийа’’нти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

210. тена кхо пана самайена манусса̄ гила̄не бхиккхӯ бхаттена нимантенти. бхиккхӯ куккучча̄йанта̄ на̄дхива̄сенти – ‘‘пат̣иккхиттам̣ бхагавата̄ ган̣абходжана’’нти. бхагавато етаматтхам̣ а̄рочесум̣. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, гила̄нена бхиккхуна̄ ган̣абходжанам̣ бхун̃джитум̣. еван̃ча пана, бхиккхаве, имам̣ сиккха̄падам̣ уддисеййа̄тха –

‘‘ган̣абходжане, ан̃н̃атра самайа̄, па̄читтийам̣. таттха̄йам̣ самайо. гила̄насамайо – айам̣ таттха самайо’’ти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

211. тена кхо пана самайена манусса̄ чӣварада̄насамайе сачӣварабхаттам̣ пат̣ийа̄детва̄ бхиккхӯ нимантенти – ‘‘бходжетва̄ чӣварена аччха̄десса̄ма̄’’ти. бхиккхӯ куккучча̄йанта̄ на̄дхива̄сенти – ‘‘пат̣иккхиттам̣ бхагавата̄ ган̣абходжана’’нти. чӣварам̣ париттам̣ уппаджджати. бхиккхӯ бхагавато етаматтхам̣ а̄рочесум̣…пе… ануджа̄на̄ми, бхиккхаве, чӣварада̄насамайе ган̣абходжанам̣ бхун̃джитум̣. еван̃ча пана, бхиккхаве, имам̣ сиккха̄падам̣ уддисеййа̄тха –

‘‘ган̣абходжане, ан̃н̃атра самайа̄, па̄читтийам̣. таттха̄йам̣ самайо. гила̄насамайо, чӣварада̄насамайо – айам̣ таттха самайо’’ти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

212. тена кхо пана самайена манусса̄ чӣварака̄раке бхиккхӯ бхаттена нимантенти. бхиккхӯ куккучча̄йанта̄ на̄дхива̄сенти – ‘‘пат̣иккхиттам̣ бхагавата̄ ган̣абходжана’’нти. бхагавато етаматтхам̣ а̄рочесум̣…пе… ануджа̄на̄ми, бхиккхаве, чӣварака̄расамайе ган̣абходжанам̣ бхун̃джитум̣. еван̃ча пана, бхиккхаве, имам̣ сиккха̄падам̣ уддисеййа̄тха –

‘‘ган̣абходжане, ан̃н̃атра самайа̄, па̄читтийам̣. таттха̄йам̣ самайо. гила̄насамайо, чӣварада̄насамайо, чӣварака̄расамайо – айам̣ таттха самайо’’ти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

213. тена кхо пана самайена бхиккхӯ мануссехи саддхим̣ аддха̄нам̣ гаччханти. атха кхо те бхиккхӯ те мануссе етадавочум̣ – ‘‘мухуттам̣, а̄вусо, а̄гаметха; пин̣д̣а̄йа чарисса̄ма̄’’ти. те евама̄хам̣су – ‘‘идхева, бханте, бхун̃джатха̄’’ти. бхиккхӯ куккучча̄йанта̄ на пат̣игган̣ханти – ‘‘пат̣иккхиттам̣ бхагавата̄ ган̣абходжана’’нти. бхагавато етаматтхам̣ а̄рочесум̣…пе… ануджа̄на̄ми, бхиккхаве, аддха̄нагаманасамайе ган̣абходжанам̣ бхун̃джитум̣. еван̃ча пана, бхиккхаве, имам̣ сиккха̄падам̣ уддисеййа̄тха –

‘‘ган̣абходжане, ан̃н̃атра самайа̄, па̄читтийам̣. таттха̄йам̣ самайо. гила̄насамайо, чӣварада̄насамайо, чӣварака̄расамайо, аддха̄нагаманасамайо – айам̣ таттха самайо’’ти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

214. тена кхо пана самайена бхиккхӯ мануссехи саддхим̣ на̄ва̄йа гаччханти. атха кхо те бхиккхӯ те мануссе етадавочум̣ – ‘‘мухуттам̣, а̄вусо, тӣрам̣ упанетха; пин̣д̣а̄йа чарисса̄ма̄’’ти. те евама̄хам̣су – ‘‘идхева, бханте, бхун̃джатха̄’’ти. бхиккхӯ куккучча̄йанта̄ на пат̣игган̣ханти – ‘‘пат̣иккхиттам̣ бхагавата̄ ган̣абходжана’’нти. бхагавато етаматтхам̣ а̄рочесум̣…пе… ануджа̄на̄ми, бхиккхаве, на̄ва̄бхируханасамайе ган̣абходжанам̣ бхун̃джитум̣. еван̃ча пана, бхиккхаве, имам̣ сиккха̄падам̣ уддисеййа̄тха –

‘‘ган̣абходжане, ан̃н̃атра самайа̄, па̄читтийам̣. таттха̄йам̣ самайо. гила̄насамайо, чӣварада̄насамайо, чӣварака̄расамайо, аддха̄нагаманасамайо, на̄ва̄бхируханасамайо – айам̣ таттха самайо’’ти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

215. тена 0 кхо пана самайена диса̄су вассам̣вут̣т̣ха̄ бхиккхӯ ра̄джагахам̣ а̄гаччханти бхагавантам̣ дассана̄йа. манусса̄ на̄на̄вераджджаке бхиккхӯ пасситва̄ бхаттена нимантенти. бхиккхӯ куккучча̄йанта̄ на̄дхива̄сенти – ‘‘пат̣иккхиттам̣ бхагавата̄ ган̣абходжана’’нти. бхагавато етаматтхам̣ а̄рочесум̣…пе… ануджа̄на̄ми, бхиккхаве, маха̄самайе ган̣абходжанам̣ бхун̃джитум̣. еван̃ча пана, бхиккхаве, имам̣ сиккха̄падам̣ уддисеййа̄тха –

‘‘ган̣абходжане, ан̃н̃атра самайа̄, па̄читтийам̣. таттха̄йам̣ самайо. гила̄насамайо, чӣварада̄насамайо, чӣварака̄расамайо, аддха̄нагаманасамайо, на̄ва̄бхируханасамайо, маха̄самайо – айам̣ таттха самайо’’ти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

216. тена кхо пана самайена ран̃н̃о ма̄гадхасса сенийасса бимбиса̄расса н̃а̄тиса̄лохито а̄джӣвакесу паббаджито хоти. атха кхо со а̄джӣвако йена ра̄джа̄ ма̄гадхо сенийо бимбиса̄ро тенупасан̇ками; упасан̇камитва̄ ра̄джа̄нам̣ ма̄гадхам̣ сенийам̣ бимбиса̄рам̣ етадавоча – ‘‘иччха̄махам̣, маха̄ра̄джа, саббапа̄сан̣д̣икабхаттам̣ ка̄ту’’нти. ‘‘саче твам̣, бханте, буддхаппамукхам̣ бхиккхусан̇гхам̣ пат̣хамам̣ бходжеййа̄си’’. ‘‘евам̣ кареййа̄мӣ’’ти. атха кхо со а̄джӣвако бхиккхӯнам̣ сантике дӯтам̣ па̄хеси – ‘‘адхива̄сенту ме бхиккхӯ сва̄тана̄йа бхатта’’нти. бхиккхӯ куккучча̄йанта̄ на̄дхива̄сенти – ‘‘пат̣иккхиттам̣ бхагавата̄ ган̣абходжана’’нти. атха кхо со а̄джӣвако йена бхагава̄ тенупасан̇ками; упасан̇камитва̄ бхагавата̄ саддхим̣ саммоди, саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ ат̣т̣ха̄си. екамантам̣ т̣хито кхо со а̄джӣвако бхагавантам̣ етадавоча – ‘‘бхавампи готамо паббаджито, ахампи паббаджито; арахати паббаджито паббаджитасса пин̣д̣ам̣ пат̣иггахетум̣. адхива̄сету ме бхавам̣ готамо сва̄тана̄йа бхаттам̣ саддхим̣ бхиккхусан̇гхена̄’’ти. адхива̄сеси бхагава̄ тун̣хӣбха̄вена. атха кхо со а̄джӣвако бхагавато адхива̄санам̣ видитва̄ пакка̄ми. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, саман̣абхаттасамайе ган̣абходжанам̣ бхун̃джитум̣. еван̃ча пана, бхиккхаве, имам̣ сиккха̄падам̣ уддисеййа̄тха –

217. ган̣абходжане , ан̃н̃атра самайа̄, па̄читтийам̣. таттха̄йам̣ самайо. гила̄насамайо, чӣварада̄насамайо, чӣварака̄расамайо, аддха̄нагаманасамайо, на̄ва̄бхируханасамайо, маха̄самайо, саман̣абхаттасамайо – айам̣ таттха самайо’’ти.

218. ган̣абходжанам̣ на̄ма йаттха чатта̄ро бхиккхӯ пан̃чаннам̣ бходжана̄нам̣ ан̃н̃атарена бходжанена нимантита̄ бхун̃джанти. етам̣ ган̣абходжанам̣ на̄ма.

ан̃н̃атра самайа̄ти т̣хапетва̄ самайам̣.

гила̄насамайо на̄ма антамасо па̄да̄пи пхалита̄ [пха̄лита̄ (сйа̄. ка.)] хонти. ‘‘гила̄насамайо’’ти бхун̃джитаббам̣.

чӣварада̄насамайо на̄ма анаттхате катхине васса̄насса паччхимо ма̄со, аттхате катхине пан̃чама̄са̄. ‘‘чӣварада̄насамайо’’ти бхун̃джитаббам̣.

чӣварака̄расамайо на̄ма чӣваре кайирама̄не. ‘‘чӣварака̄расамайо’’ти бхун̃джитаббам̣.

аддха̄нагаманасамайо на̄ма ‘‘аддхайоджанам̣ гаччхисса̄мӣ’’ти бхун̃джитаббам̣, гаччхантена бхун̃джитаббам̣, гатена бхун̃джитаббам̣.

на̄ва̄бхируханасамайо на̄ма ‘‘на̄вам̣ абхирухисса̄мӣ’’ти бхун̃джитаббам̣, а̄рул̣хена бхун̃джитаббам̣, орул̣хена бхун̃джитаббам̣.

маха̄самайо на̄ма йаттха две тайо бхиккхӯ пин̣д̣а̄йа чаритва̄ йа̄пенти, чатуттхе а̄гате на йа̄пенти. ‘‘маха̄самайо’’ти бхун̃джитаббам̣.

саман̣абхаттасамайо на̄ма йо кочи парибба̄джакасама̄панно бхаттам̣ кароти. ‘‘саман̣абхаттасамайо’’ти бхун̃джитаббам̣.

‘‘ан̃н̃атра самайа̄ бхун̃джисса̄мӣ’’ти пат̣игган̣ха̄ти, а̄патти дуккат̣асса. аджджхоха̄ре аджджхоха̄ре а̄патти па̄читтийасса.

219. ган̣абходжане ган̣абходжанасан̃н̃ӣ, ан̃н̃атра самайа̄, бхун̃джати, а̄патти па̄читтийасса. ган̣абходжане вематико, ан̃н̃атра самайа̄, бхун̃джати, а̄патти па̄читтийасса. ган̣абходжане наган̣абходжанасан̃н̃ӣ, ан̃н̃атра самайа̄, бхун̃джати, а̄патти па̄читтийасса.

наган̣абходжане ган̣абходжанасан̃н̃ӣ, а̄патти дуккат̣асса. наган̣абходжане вематико, а̄патти дуккат̣асса. наган̣абходжане наган̣абходжанасан̃н̃ӣ, ана̄патти.

220. ана̄патти самайе, две тайо екато бхун̃джанти, пин̣д̣а̄йа чаритва̄ екато саннипатитва̄ бхун̃джанти, ниччабхаттам̣, сала̄кабхаттам̣, паккхикам̣, упосатхикам̣, па̄т̣ипадикам̣, пан̃ча бходжана̄ни т̣хапетва̄ саббаттха ана̄патти, умматтакасса, а̄дикаммикасса̄ти.

ган̣абходжанасиккха̄падам̣ нит̣т̣хитам̣ дутийам̣.