3. парампарабходжанасиккха̄падам̣

221. тена самайена буддхо бхагава̄ веса̄лийам̣ вихарати маха̄ване кӯт̣а̄га̄раса̄ла̄йам̣. тена кхо пана самайена веса̄лийам̣ пан̣ӣта̄нам̣ бхатта̄нам̣ бхаттапат̣ипа̄т̣и адхит̣т̣хита̄ хоти. атха кхо ан̃н̃атарасса далиддасса каммака̄расса [каммакарасса (сӣ.)] етадахоси – ‘‘на кхо идам̣ оракам̣ бхависсати йатхайиме манусса̄ саккаччам̣ бхаттам̣ каронти; йам̣нӯна̄хампи бхаттам̣ кареййа’’нти. атха кхо со далиддо каммака̄ро йена кирапатико тенупасан̇ками; упасан̇камитва̄ там̣ кирапатикам̣ етадавоча – ‘‘иччха̄махам̣, аййапутта, буддхаппамукхасса бхиккхусан̇гхасса бхаттам̣ ка̄тум̣. дехи ме ветана’’нти. сопи кхо кирапатико саддхо хоти пасанно. атха кхо со кирапатико тасса далиддасса каммака̄расса аббха̄тирекам̣ [атирекам̣ (сйа̄.)] ветанам̣ ада̄си. атха кхо со далиддо каммака̄ро йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо со далиддо каммака̄ро бхагавантам̣ етадавоча – ‘‘адхива̄сету ме, бханте, бхагава̄ сва̄тана̄йа бхаттам̣ саддхим̣ бхиккхусан̇гхена̄’’ти. ‘‘маха̄ кхо, а̄вусо, бхиккхусан̇гхо. джа̄на̄хӣ’’ти. ‘‘хоту [хоту ме (ка.)] бханте, маха̄ бхиккхусан̇гхо. бахӯ ме бадара̄ пат̣ийатта̄ бадарамиссена пеййа̄ парипӯриссантӣ’’ти. адхива̄сеси бхагава̄ тун̣хӣбха̄вена.

атха кхо со далиддо каммака̄ро бхагавато адхива̄санам̣ видитва̄ ут̣т̣ха̄йа̄сана̄ бхагавантам̣ абхива̄детва̄ падаккхин̣ам̣ катва̄ пакка̄ми. ассосум̣ кхо бхиккхӯ – ‘‘далиддена кира каммака̄рена сва̄тана̄йа буддхаппамукхо бхиккхусан̇гхо нимантито, бадарамиссена пеййа̄ парипӯриссантӣ’’ти. те ка̄лассева пин̣д̣а̄йа чаритва̄ бхун̃джим̣су. ассосум̣ кхо манусса̄ – ‘‘далиддена кира каммака̄рена буддхаппамукхо бхиккхусан̇гхо нимантито’’ти. те далиддасса каммака̄расса пахӯтам̣ кха̄данӣйам̣ бходжанӣйам̣ абхихарим̣су. атха кхо со далиддо каммака̄ро тасса̄ раттийа̄ аччайена пан̣ӣтам̣ кха̄данӣйам̣ бходжанӣйам̣ пат̣ийа̄да̄петва̄ бхагавато ка̄лам̣ а̄роча̄песи – ‘‘ка̄ло, бханте, нит̣т̣хитам̣ бхатта’’нти.

атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа йена тасса далиддасса каммака̄расса нивесанам̣ тенупасан̇ками; упасан̇камитва̄ пан̃н̃атте а̄сане нисӣди саддхим̣ бхиккхусан̇гхена. атха кхо со далиддо каммака̄ро бхаттагге бхиккхӯ паривисати. бхиккхӯ евама̄хам̣су – ‘‘тхокам̣, а̄вусо, дехи. тхокам̣, а̄вусо, дехӣ’’ти. ‘‘ма̄ кхо тумхе, бханте, ‘айам̣ далиддо каммака̄ро’ти тхокам̣ тхокам̣ пат̣игган̣хиттха. пахӯтам̣ ме кха̄данӣйам̣ бходжанӣйам̣ пат̣ийаттам̣.

пат̣игган̣хатха, бханте, йа̄вадаттха’’нти. ‘‘на кхо майам̣, а̄вусо, етам̣ка̄ран̣а̄ тхокам̣ тхокам̣ пат̣игган̣ха̄ма. апича, майам̣ ка̄лассева пин̣д̣а̄йа чаритва̄ бхун̃джимха̄; тена майам̣ тхокам̣ тхокам̣ пат̣игган̣ха̄ма̄’’ти.

атха кхо со далиддо каммака̄ро уджджха̄йати кхиййати випа̄чети – ‘‘катхан̃хи на̄ма бхаданта̄ майа̄ нимантита̄ ан̃н̃атра бхун̃джиссанти! на ча̄хам̣ пат̣ибало йа̄вадаттхам̣ да̄ту’’нти? ассосум̣ кхо бхиккхӯ тасса далиддасса каммака̄расса уджджха̄йантасса кхиййантасса випа̄чентасса. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма бхиккхӯ ан̃н̃атра нимантита̄ ан̃н̃атра бхун̃джиссантӣ’’ти…пе… саччам̣ кира, бхиккхаве, бхиккхӯ ан̃н̃атра нимантита̄ ан̃н̃атра бхун̃джантӣти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма те, бхиккхаве, могхапуриса̄ ан̃н̃атра нимантита̄ ан̃н̃атра бхун̃джиссанти! нетам̣, бхиккхаве, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

‘‘парампарабходжане па̄читтийа’’нти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

222. тена кхо пана самайена ан̃н̃атаро бхиккху гила̄но хоти. ан̃н̃атаро бхиккху пин̣д̣апа̄там̣ а̄да̄йа йена со бхиккху тенупасан̇ками; упасан̇камитва̄ там̣ бхиккхум̣ етадавоча – ‘‘бхун̃джа̄хи, а̄вусо’’ти. ‘‘алам̣, а̄вусо, аттхи ме бхаттапачча̄са̄’’ти. тасса бхиккхуно пин̣д̣апа̄то уссӯре [уссӯрена (ка.)] а̄харӣйиттха. со бхиккху на читтарӯпам̣ бхун̃джи. бхагавато етаматтхам̣ а̄рочесум̣. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, гила̄нена бхиккхуна̄ парампарабходжанам̣ бхун̃джитум̣. еван̃ча пана, бхиккхаве, имам̣ сиккха̄падам̣ уддисеййа̄тха –

‘‘парампарабходжане, ан̃н̃атра самайа̄, па̄читтийам̣. таттха̄йам̣ самайо. гила̄насамайо – айам̣ таттха самайо’’ти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

223. тена кхо пана самайена манусса̄ чӣварада̄насамайе сачӣварабхаттам̣ пат̣ийа̄детва̄ [пат̣ийа̄да̄петва̄ (итипи)] бхиккхӯ нимантенти – ‘‘бходжетва̄ чӣварена аччха̄десса̄ма̄’’ти. бхиккхӯ куккучча̄йанта̄ на̄дхива̄сенти – ‘‘пат̣иккхиттам̣ бхагавата̄ парампарабходжана’’нти. чӣварам̣ париттам̣ уппаджджати. бхагавато етаматтхам̣ а̄рочесум̣…пе… ануджа̄на̄ми, бхиккхаве, чӣварада̄насамайе парампарабходжанам̣ бхун̃джитум̣. еван̃ча пана, бхиккхаве, имам̣ сиккха̄падам̣ уддисеййа̄тха –

‘‘парампарабходжане, ан̃н̃атра самайа̄, па̄читтийам̣. таттха̄йам̣ самайо. гила̄насамайо, чӣварада̄насамайо – айам̣ таттха самайо’’ти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

224. тена кхо пана самайена манусса̄ чӣварака̄раке бхиккхӯ бхаттена нимантенти. бхиккхӯ куккучча̄йанта̄ на̄дхива̄сенти – ‘‘пат̣иккхиттам̣ бхагавата̄ парампарабходжана’’нти. бхагавато етаматтхам̣ а̄рочесум̣…пе… ануджа̄на̄ми, бхиккхаве, чӣварака̄расамайе парампарабходжанам̣ бхун̃джитум̣. еван̃ча пана, бхиккхаве, имам̣ сиккха̄падам̣ уддисеййа̄тха –

225. ‘‘парампарабходжане, ан̃н̃атра самайа̄, па̄читтийам̣. таттха̄йам̣ самайо. гила̄насамайо, чӣварада̄насамайо, чӣварака̄расамайо – айам̣ таттха самайо’’ти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

226. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа а̄йасмата̄ а̄нандена паччха̄саман̣ена йена ан̃н̃атарам̣ кулам̣ тенупасан̇ками; упасан̇камитва̄ пан̃н̃атте а̄сане нисӣди. атха кхо те манусса̄ бхагавато ча а̄йасмато ча а̄нандасса бходжанам̣ адам̣су. а̄йасма̄ а̄нандо куккучча̄йанто на пат̣игган̣ха̄ти. ‘‘ган̣ха̄хи [патиган̣ха̄хи (сӣ.)], а̄нанда̄’’ти. ‘‘алам̣, бхагава̄, аттхи ме бхаттапачча̄са̄’’ти. ‘‘тенаха̄нанда, викаппетва̄ ган̣ха̄хӣ’’ти. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, викаппетва̄ [бхаттапачча̄сам̣ викаппетва̄ (сйа̄.)] парампарабходжанам̣ бхун̃джитум̣. еван̃ча пана, бхиккхаве, викаппетаббам̣ – ‘майхам̣ бхаттапачча̄сам̣ иттханна̄масса даммӣ’’’ти.

227. парампарабходжанам̣ на̄ма пан̃чаннам̣ бходжана̄нам̣ ан̃н̃атарена бходжанена нимантито, там̣ т̣хапетва̄ ан̃н̃ам̣ пан̃чаннам̣ бходжана̄нам̣ ан̃н̃атарам̣ бходжанам̣ бхун̃джати, етам̣ парампарабходжанам̣ на̄ма.

ан̃н̃атра самайа̄ти т̣хапетва̄ самайам̣.

гила̄насамайо на̄ма на саккоти ека̄сане нисинно йа̄вадаттхам̣ бхун̃джитум̣. ‘‘гила̄насамайо’’ти бхун̃джитаббам̣.

чӣварада̄насамайо на̄ма анаттхате катхине васса̄насса паччхимо ма̄со, аттхате катхине пан̃ча ма̄са̄. ‘‘чӣварада̄насамайо’’ти бхун̃джитаббам̣.

чӣварака̄расамайо на̄ма чӣваре кайирама̄не. ‘‘чӣварака̄расамайо’’ти бхун̃джитаббам̣.

‘‘ан̃н̃атра самайа̄ бхун̃джисса̄мӣ’’ти пат̣игган̣ха̄ти, а̄патти дуккат̣асса. аджджхоха̄ре аджджхоха̄ре а̄патти па̄читтийасса.

228. парампарабходжане парампарабходжанасан̃н̃ӣ, ан̃н̃атра самайа̄, бхун̃джати, а̄патти па̄читтийасса. парампарабходжане вематико, ан̃н̃атра самайа̄, бхун̃джати, а̄патти па̄читтийасса. парампарабходжане напарампарабходжанасан̃н̃ӣ, ан̃н̃атра самайа̄, бхун̃джати, а̄патти па̄читтийасса.

напарампарабходжане парампарабходжанасан̃н̃ӣ, а̄патти дуккат̣асса. напарампарабходжане вематико, а̄патти дуккат̣асса. напарампарабходжане напарампарабходжанасан̃н̃ӣ, ана̄патти.

229. ана̄патти самайе, викаппетва̄ бхун̃джати, две тайо нимантане екато бхун̃джати, нимантанапат̣ипа̄т̣ийа̄ бхун̃джати, сакалена га̄мена нимантито тасмим̣ га̄ме йаттха каттхачи бхун̃джати, сакалена пӯгена нимантито тасмим̣ пӯге йаттха каттхачи бхун̃джати, нимантийама̄но бхиккхам̣ гахесса̄мӣти бхан̣ати, ниччабхатте, сала̄кабхатте, паккхике, упосатхике, па̄т̣ипадике, пан̃ча бходжана̄ни т̣хапетва̄ саббаттха ана̄патти, умматтакасса, а̄дикаммикасса̄ти.

парампарабходжанасиккха̄падам̣ нит̣т̣хитам̣ татийам̣.