267. адассане уккхепанӣйакаммапат̣иппассаддхикатха̄

448. идха пана, бхиккхаве, бхиккху сан̇гхена а̄паттийа̄ адассане уккхепанӣйакаммакато самма̄ ваттати, ломам̣ па̄тети, неттха̄рам̣ ваттати, а̄паттийа̄ адассане уккхепанӣйасса каммасса пат̣иппассаддхим̣ йа̄чати. татра че бхиккхӯнам̣ евам̣ хоти – ‘‘айам̣ кхо, а̄вусо, бхиккху сан̇гхена а̄паттийа̄ адассане уккхепанӣйакаммакато самма̄ ваттати, ломам̣ па̄тети, неттха̄рам̣ ваттати, а̄паттийа̄ адассане уккхепанӣйасса каммасса пат̣иппассаддхим̣ йа̄чати. хандасса майам̣ а̄паттийа̄ адассане уккхепанӣйакаммам̣ пат̣иппассамбхема̄’’ти. те тасса а̄паттийа̄ адассане уккхепанӣйакаммам̣ пат̣иппассамбхенти – адхаммена вагга̄…пе… адхаммена самагга̄… дхаммена вагга̄… дхаммапатирӯпакена вагга̄… дхаммапатирӯпакена самагга̄. татрат̣т̣хо сан̇гхо вивадати – ‘‘адхаммена ваггакаммам̣, адхаммена самаггакаммам̣, дхаммена ваггакаммам̣, дхаммапатирӯпакена ваггакаммам̣, дхаммапатирӯпакена самаггакаммам̣, акатам̣ каммам̣ дуккат̣ам̣ каммам̣ пуна ка̄таббам̣ камма’’нти. татра, бхиккхаве, йе те бхиккхӯ евама̄хам̣су – ‘‘дхаммапатирӯпакена самаггакамма’’нти, йе ча те бхиккхӯ евама̄хам̣су – ‘‘акатам̣ каммам̣ дуккат̣ам̣ каммам̣ пуна ка̄таббам̣ камма’’нти, име таттха бхиккхӯ дхаммава̄дино. имепи пан̃ча ва̄ра̄ сам̣кхитта̄.

адассане уккхепанӣйакаммапат̣иппассаддхикатха̄ нит̣т̣хита̄.