258. пабба̄джанӣйакаммавива̄дакатха̄

435. идха пана, бхиккхаве, бхиккху куладӯсако хоти па̄пасама̄ча̄ро. татра че бхиккхӯнам̣ евам̣ хоти – ‘‘айам̣ кхо, а̄вусо, бхиккху куладӯсако па̄пасама̄ча̄ро. хандасса майам̣ пабба̄джанӣйакаммам̣ карома̄’’ти. те тасса пабба̄джанӣйакаммам̣ каронти – адхаммена вагга̄…пе… адхаммена самагга̄… дхаммена вагга̄… дхаммапатирӯпакена вагга̄… дхаммапатирӯпакена самагга̄. татрат̣т̣хо сан̇гхо вивадати – ‘‘адхаммена ваггакаммам̣, адхаммена самаггакаммам̣, дхаммена ваггакаммам̣, дхаммапатирӯпакена ваггакаммам̣, дхаммапатирӯпакена самаггакаммам̣, акатам̣ каммам̣ дуккат̣ам̣ каммам̣ пуна ка̄таббам̣ камма’’нти. татра, бхиккхаве, йе те бхиккхӯ евама̄хам̣су – ‘‘дхаммапатирӯпакена самаггакамма’’нти йе ча те бхиккхӯ евама̄хам̣су – ‘‘акатам̣ каммам̣ дуккат̣ам̣ каммам̣ пуна ка̄таббам̣ камма’’нти, име таттха бхиккхӯ дхаммава̄дино. име пан̃ча ва̄ра̄ сам̣кхитта̄.

пабба̄джанӣйакаммавива̄дакатха̄ нит̣т̣хита̄.