239. двенисса̄ран̣а̄дикатха̄

395. двема̄, бхиккхаве, нисса̄ран̣а̄. аттхи, бхиккхаве, пуггало аппатто нисса̄ран̣ам̣. тан̃че сан̇гхо нисса̄рети, екаччо сунисса̄рито, екаччо дуннисса̄рито. катамо ча, бхиккхаве, пуггало аппатто нисса̄ран̣ам̣, тан̃че сан̇гхо нисса̄рети – дуннисса̄рито? идха пана, бхиккхаве, бхиккху суддхо хоти ана̄паттико. тан̃че сан̇гхо нисса̄рети – дуннисса̄рито. айам̣ вуччати, бхиккхаве, пуггало аппатто нисса̄ран̣ам̣, тан̃че сан̇гхо нисса̄рети – дуннисса̄рито.

катамо ча, бхиккхаве, пуггало аппатто нисса̄ран̣ам̣, тан̃че сан̇гхо нисса̄рети – сунисса̄рито? идха пана, бхиккхаве, бхиккху ба̄ло хоти абйатто а̄паттибахуло анапада̄но, гихисам̣сат̣т̣хо вихарати анануломикехи гихисам̣саггехи, тан̃че сан̇гхо нисса̄рети – сунисса̄рито. айам̣ вуччати, бхиккхаве, пуггало аппатто нисса̄ран̣ам̣, тан̃че сан̇гхо нисса̄рети – сунисса̄рито.

396. двема̄, бхиккхаве, оса̄ран̣а̄. аттхи, бхиккхаве, пуггало аппатто оса̄ран̣ам̣ тан̃че сан̇гхо оса̄рети, екаччо соса̄рито, екаччо доса̄рито. катамо ча, бхиккхаве, пуггало аппатто оса̄ран̣ам̣, тан̃че сан̇гхо оса̄рети – доса̄рито? пан̣д̣ако, бхиккхаве, аппатто оса̄ран̣ам̣, тан̃че сан̇гхо оса̄рети – доса̄рито. тхеййасам̣ва̄сако, бхиккхаве, аппатто оса̄ран̣ам̣, тан̃че сан̇гхо оса̄рети – доса̄рито. титтхийапаккантако, бхиккхаве…пе… тираччха̄нагато, бхиккхаве… ма̄тугха̄тако, бхиккхаве… питугха̄тако, бхиккхаве… арахантагха̄тако, бхиккхаве… бхиккхунидӯсако, бхиккхаве… сан̇гхабхедако, бхиккхаве… лохитуппа̄дако, бхиккхаве… убхатобйан̃джанако, бхиккхаве, аппатто, оса̄ран̣ам̣, тан̃че сан̇гхо оса̄рети – доса̄рито. айам̣ вуччати, бхиккхаве, пуггало аппатто оса̄ран̣ам̣, тан̃че сан̇гхо оса̄рети – доса̄рито. име вуччанти, бхиккхаве, пуггала̄ аппатта̄ оса̄ран̣ам̣, те че сан̇гхо оса̄рети – доса̄рита̄.

катамо ча, бхиккхаве, пуггало аппатто оса̄ран̣ам̣, тан̃че сан̇гхо оса̄рети – соса̄рито? хаттхаччхинно, бхиккхаве, аппатто оса̄ран̣ам̣, тан̃че сан̇гхо оса̄рети, соса̄рито. па̄даччхинно, бхиккхаве…пе… хаттхапа̄даччхинно, бхиккхаве… кан̣н̣аччхинно, бхиккхаве… на̄саччхинно, бхиккхаве… кан̣н̣ана̄саччхинно, бхиккхаве… ан̇гуличчхинно, бхиккхаве… ал̣аччхинно, бхиккхаве… кан̣д̣араччхинно, бхиккхаве… пхан̣ахаттхако, бхиккхаве… кхуджджо, бхиккхаве… ва̄мано, бхиккхаве… галаган̣д̣ӣ, бхиккхаве… лаккхан̣а̄хато, бхиккхаве… каса̄хато, бхиккхаве… ликхитако, бхиккхаве… сӣпадико, бхиккхаве… па̄парогӣ, бхиккхаве… парисадӯсако, бхиккхаве… ка̄н̣о, бхиккхаве… кун̣ӣ, бхиккхаве… кхан̃джо, бхиккхаве… паккхахато, бхиккхаве… чхиннирийа̄патхо, бхиккхаве… джара̄дуббало, бхиккхаве… андхо, бхиккхаве… мӯго, бхиккхаве… бадхиро, бхиккхаве… андхамӯго, бхиккхаве… андхабадхиро, бхиккхаве… мӯгабадхиро, бхиккхаве… андхамӯгабадхиро, бхиккхаве, аппатто оса̄ран̣ам̣, тан̃че сан̇гхо оса̄рети – соса̄рито. айам̣ вуччати, бхиккхаве, пуггало аппатто оса̄ран̣ам̣, тан̃че сан̇гхо оса̄рети – соса̄рито. име вуччанти, бхиккхаве, пуггала̄ аппатта̄ оса̄ран̣ам̣, те че сан̇гхо оса̄рети – соса̄рита̄.

двенисса̄ран̣а̄дикатха̄ нит̣т̣хита̄.

ва̄сабхага̄мабха̄н̣ава̄ро нит̣т̣хито пат̣хамо.