226. наггийапат̣иккхепакатха̄

370. тена кхо пана самайена ан̃н̃атаро бхиккху нагго хутва̄ йена бхагава̄ тенупасан̇ками, упасан̇камитва̄ бхагавантам̣ етадавоча – ‘‘бхагава̄, бханте, анекапарийа̄йена аппиччхасса сантут̣т̣хасса саллекхасса дхутасса па̄са̄дикасса апачайасса вӣрийа̄рамбхасса ван̣н̣ава̄дӣ. идам̣, бханте, наггийам̣ анекапарийа̄йена аппиччхата̄йа сантут̣т̣хита̄йа саллекха̄йа дхутата̄йа [дхутатта̄йа (ка.)] па̄са̄диката̄йа апачайа̄йа вӣрийа̄рамбха̄йа сам̣ваттати. са̄дху, бханте, бхагава̄ бхиккхӯнам̣ наггийам̣ ануджа̄на̄тӯ’’ти. вигарахи буддхо бхагава̄ – ‘‘анануччхавикам̣, могхапуриса, анануломикам̣ аппатирӯпам̣ асса̄ман̣акам̣ акаппийам̣ акаран̣ӣйам̣. катхан̃хи на̄ма твам̣, могхапуриса, наггийам̣ титтхийасама̄да̄нам̣ сама̄дийиссаси. нетам̣, могхапуриса, аппасанна̄нам̣ ва̄ паса̄да̄йа…пе…’’ вигарахитва̄ дхаммим̣ катхам̣ катва̄ бхиккхӯ а̄мантеси – ‘‘на, бхиккхаве, наггийам̣ титтхийасама̄да̄нам̣ сама̄дийитаббам̣. йо сама̄дийеййа, а̄патти тхуллаччайасса̄’’ти.

наггийапат̣иккхепакатха̄ нит̣т̣хита̄.