208. сивеййакадуссайугакатха̄

335. тена кхо пана самайена ран̃н̃о паджджотасса сивеййакам̣ дуссайугам̣ уппаннам̣ хоти – бахӯнам̣ [бахуннам̣ (сӣ. сйа̄.)] дусса̄нам̣ бахӯнам̣ дуссайуга̄нам̣ бахӯнам̣ дуссайугасата̄нам̣ бахӯнам̣ дуссайугасахасса̄нам̣ бахӯнам̣ дуссайугасатасахасса̄нам̣ агган̃ча сет̣т̣хан̃ча моккхан̃ча уттаман̃ча паваран̃ча. атха кхо ра̄джа̄ паджджото там̣ сивеййакам̣ дуссайугам̣ джӣвакасса кома̄рабхаччасса па̄хеси. атха кхо джӣвакасса кома̄рабхаччасса етадахоси – ‘‘идам̣ кхо ме сивеййакам̣ дуссайугам̣ ран̃н̃а̄ паджджотена пахитам̣ – бахӯнам̣ дусса̄нам̣ бахӯнам̣ дуссайуга̄нам̣ бахӯнам̣ дуссайугасата̄нам̣ бахӯнам̣ дуссайугасахасса̄нам̣ бахӯнам̣ дуссайугасатасахасса̄нам̣ агган̃ча сет̣т̣хан̃ча моккхан̃ча уттаман̃ча паваран̃ча. найидам̣ ан̃н̃о кочи пачча̄рахати ан̃н̃атра тена бхагавата̄ арахата̄ самма̄самбуддхена, ран̃н̃а̄ ва̄ ма̄гадхена сенийена бимбиса̄рена̄’’ти.

сивеййакадуссайугакатха̄ нит̣т̣хита̄.