205. ра̄джагахасет̣т̣хиваттху

332. тена кхо пана самайена ра̄джагахакасса сет̣т̣хисса саттавассико сӣса̄ба̄дхо хоти. бахӯ маханта̄ маханта̄ диса̄па̄моккха̄ веджджа̄ а̄гантва̄ на̄саккхим̣су арогам̣ ка̄тум̣. бахум̣ хиран̃н̃ам̣ а̄да̄йа агамам̣су. апи ча, веджджехи паччаккха̄то хоти. екачче веджджа̄ евама̄хам̣су – ‘‘пан̃чамам̣ дивасам̣ сет̣т̣хи гахапати ка̄лам̣ кариссатӣ’’ти. екачче веджджа̄ евама̄хам̣су – ‘‘саттамам̣ дивасам̣ сет̣т̣хи гахапати ка̄лам̣ кариссатӣ’’ти. атха кхо ра̄джагахакасса негамасса етадахоси – ‘‘айам̣ кхо сет̣т̣хи гахапати бахӯпака̄ро ран̃н̃о чева негамасса ча. апи ча, веджджехи паччаккха̄то. екачче веджджа̄ евама̄хам̣су – ‘пан̃чамам̣ дивасам̣ сет̣т̣хи гахапати ка̄лам̣ кариссатӣ’ти. екачче веджджа̄ евама̄хам̣су – ‘саттамам̣ дивасам̣ сет̣т̣хи гахапати ка̄лам̣ кариссатӣ’ти. айан̃ча ран̃н̃о джӣвако веджджо тарун̣о бхадрако. йам̣нӯна майам̣ ра̄джа̄нам̣ джӣвакам̣ веджджам̣ йа̄чеййа̄ма сет̣т̣хим̣ гахапатим̣ тикиччхиту’’нти. атха кхо ра̄джагахако негамо йена ра̄джа̄ ма̄гадхо сенийо бимбиса̄ро тенупасан̇ками; упасан̇камитва̄ ра̄джа̄нам̣ ма̄гадхам̣ сенийам̣ бимбиса̄рам̣ етадавоча – ‘‘айам̣, дева, сет̣т̣хи гахапати бахӯпака̄ро девасса чева негамасса ча; апи ча, веджджехи паччаккха̄то. екачче веджджа̄ евама̄хам̣су – пан̃чамам̣ дивасам̣ сет̣т̣хи гахапати ка̄лам̣ кариссатӣти. екачче веджджа̄ евама̄хам̣су – саттамам̣ дивасам̣ сет̣т̣хи гахапати ка̄лам̣ кариссатӣти. са̄дху дево джӣвакам̣ веджджам̣ а̄н̣а̄пету сет̣т̣хим̣ гахапатим̣ тикиччхиту’’нти.

атха кхо ра̄джа̄ ма̄гадхо сенийо бимбиса̄ро джӣвакам̣ кома̄рабхаччам̣ а̄н̣а̄песи – ‘‘гаччха, бхан̣е джӣвака, сет̣т̣хим̣ гахапатим̣ тикиччха̄хӣ’’ти. ‘‘евам̣, дева̄’’ти кхо джӣвако кома̄рабхаччо ран̃н̃о ма̄гадхасса сенийасса бимбиса̄расса пат̣иссутва̄ йена сет̣т̣хи гахапати тенупасан̇ками; упасан̇камитва̄ сет̣т̣хисса гахапатисса вика̄рам̣ саллаккхетва̄ сет̣т̣хим̣ гахапатим̣ етадавоча – ‘‘саче твам̣, гахапати, арого бхавеййа̄си [сача̄хам̣ там̣ гахапати арога̄пеййам̣ (сӣ.), сача̄хам̣ там̣ гахапати арогам̣ кареййам̣ (сйа̄.)] ким̣ ме асса деййадхаммо’’ти? ‘‘саббам̣ са̄патеййан̃ча те, а̄чарийа, хоту, ахан̃ча те да̄со’’ти. ‘‘саккхиссаси пана твам̣, гахапати, екена пассена саттама̄се нипаджджиту’’нти? ‘‘саккомахам̣, а̄чарийа, екена пассена саттама̄се нипаджджиту’’нти. ‘‘саккхиссаси пана твам̣, гахапати, дутийена пассена саттама̄се нипаджджиту’’нти? ‘‘саккомахам̣, а̄чарийа, дутийена пассена саттама̄се нипаджджиту’’нти. ‘‘саккхиссаси пана твам̣, гахапати, утта̄но саттама̄се нипаджджиту’’нти? ‘‘саккомахам̣, а̄чарийа, утта̄но саттама̄се нипаджджиту’’нти.

атха кхо джӣвако кома̄рабхаччо сет̣т̣хим̣ гахапатим̣ ман̃чаке нипа̄тетва̄ [нипаджджа̄петва̄ (сӣ. сйа̄.)] ман̃чаке [ман̃чакена (сӣ.)] самбандхитва̄ сӣсаччхавим̣ уппа̄т̣етва̄ [пха̄летва̄ (сӣ.)] сиббиним̣ вина̄метва̄ две па̄н̣аке нӣхаритва̄ маха̄джанасса дассеси – ‘‘пассатхаййе [пассесйа̄тха (сӣ.), пассатха (сйа̄.), пассатхаййо (ка.)], име две па̄н̣аке, екам̣ кхуддакам̣ екам̣ махаллакам̣. йе те а̄чарийа̄ евама̄хам̣су – пан̃чамам̣ дивасам̣ сет̣т̣хи гахапати ка̄лам̣ кариссатӣти – теха̄йам̣ махаллако па̄н̣ако дит̣т̣хо. пан̃чамам̣ дивасам̣ сет̣т̣хисса гахапатисса маттхалун̇гам̣ парийа̄дийиссати. маттхалун̇гасса парийа̄да̄на̄ сет̣т̣хи гахапати ка̄лам̣ кариссати. судит̣т̣хо техи а̄чарийехи. йе те а̄чарийа̄ евама̄хам̣су – саттамам̣ дивасам̣ сет̣т̣хи гахапати ка̄лам̣ кариссатӣти – теха̄йам̣ кхуддако па̄н̣ако дит̣т̣хо. саттамам̣ дивасам̣ сет̣т̣хисса гахапатисса маттхалун̇гам̣ парийа̄дийиссати. маттхалун̇гасса парийа̄да̄на̄ сет̣т̣хи гахапати ка̄лам̣ кариссати. судит̣т̣хо техи а̄чарийехӣ’’ти. сиббиним̣ сампат̣ипа̄т̣етва̄ сӣсаччхавим̣ сиббитва̄ а̄лепам̣ ада̄си. атха кхо сет̣т̣хи гахапати сатта̄хасса аччайена джӣвакам̣ кома̄рабхаччам̣ етадавоча – ‘‘на̄хам̣, а̄чарийа, саккоми екена пассена саттама̄се нипаджджиту’’нти. ‘‘нану ме твам̣, гахапати, пат̣иссун̣и – саккомахам̣, а̄чарийа, екена пассена саттама̄се нипаджджиту’’нти? ‘‘сачча̄хам̣, а̄чарийа, пат̣иссун̣им̣, апа̄хам̣ марисса̄ми, на̄хам̣ саккоми екена пассена саттама̄се нипаджджиту’’нти. ‘‘тена хи твам̣, гахапати, дутийена пассена саттама̄се нипаджджа̄хӣ’’ти. атха кхо сет̣т̣хи гахапати сатта̄хасса аччайена джӣвакам̣ кома̄рабхаччам̣ етадавоча – ‘‘на̄хам̣, а̄чарийа, саккоми дутийена пассена саттама̄се нипаджджиту’’нти. ‘‘нану ме твам̣, гахапати, пат̣иссун̣и – саккомахам̣, а̄чарийа, дутийена пассена саттама̄се нипаджджиту’’нти? ‘‘сачча̄хам̣, а̄чарийа, пат̣иссун̣им̣, апа̄хам̣ марисса̄ми, на̄хам̣, а̄чарийа, саккоми дутийена пассена саттама̄се нипаджджиту’’нти. ‘‘тена хи твам̣, гахапати, утта̄но саттама̄се нипаджджа̄хӣ’’ти. атха кхо сет̣т̣хи гахапати сатта̄хасса аччайена джӣвакам̣ кома̄рабхаччам̣ етадавоча – ‘‘на̄хам̣, а̄чарийа, саккоми утта̄но саттама̄се нипаджджиту’’нти. ‘‘нану ме твам̣, гахапати, пат̣иссун̣и – саккомахам̣, а̄чарийа, утта̄но саттама̄се нипаджджиту’’нти? ‘‘сачча̄хам̣, а̄чарийа, пат̣иссун̣им̣, апа̄хам̣ марисса̄ми, на̄хам̣ саккоми утта̄но саттама̄се нипаджджиту’’нти. ‘‘ахам̣ че там̣, гахапати, на вадеййам̣, еттакампи твам̣ на нипаджджеййа̄си, апи ча пат̣икаччева майа̄ н̃а̄то – тӣхи сатта̄хехи сет̣т̣хи гахапати арого бхависсатӣти. ут̣т̣хехи, гахапати, арогоси. джа̄на̄си ким̣ ме деййадхаммо’’ти? ‘‘саббам̣ са̄патеййан̃ча те, а̄чарийа, хоту, ахан̃ча те да̄со’’ти. ‘‘алам̣, гахапати, ма̄ ме твам̣ саббам̣ са̄патеййам̣ ада̄си, ма̄ ча ме да̄со. ран̃н̃о сатасахассам̣ дехи, майхам̣ сатасахасса’’нти. атха кхо сет̣т̣хи гахапати арого сама̄но ран̃н̃о сатасахассам̣ ада̄си, джӣвакасса кома̄рабхаччасса сатасахассам̣.

ра̄джагахасет̣т̣хиваттху нит̣т̣хитам̣.