200. палибодха̄палибодхакатха̄

325. двеме, бхиккхаве, катхинасса палибодха̄, две апалибодха̄. катаме ча, бхиккхаве, две катхинасса палибодха̄? а̄ва̄сапалибодхо ча чӣварапалибодхо ча. катхан̃ча, бхиккхаве, а̄ва̄сапалибодхо хоти? идха, бхиккхаве, бхиккху васати ва̄ тасмим̣ а̄ва̄се, са̄пеккхо ва̄ паккамати ‘‘паччесса’’нти. евам̣ кхо, бхиккхаве, а̄ва̄сапалибодхо хоти. катхан̃ча, бхиккхаве, чӣварапалибодхо хоти? идха, бхиккхаве, бхиккхуно чӣварам̣ акатам̣ ва̄ хоти виппакатам̣ ва̄, чӣвара̄са̄ ва̄ анупаччхинна̄. евам̣ кхо, бхиккхаве, чӣварапалибодхо хоти. име кхо, бхиккхаве, две катхинасса палибодха̄.

катаме ча, бхиккхаве, две катхинасса апалибодха̄? а̄ва̄саапалибодхо ча чӣвараапалибодхо ча. катхан̃ча, бхиккхаве, а̄ва̄саапалибодхо хоти? идха, бхиккхаве, бхиккху паккамати тамха̄ а̄ва̄са̄ чаттена вантена муттена анапеккхо [анапеккхена (ка.)] ‘‘на паччесса’’нти. евам̣ кхо, бхиккхаве, а̄ва̄саапалибодхо хоти. катхан̃ча, бхиккхаве, чӣвараапалибодхо хоти? идха, бхиккхаве, бхиккхуно чӣварам̣ катам̣ ва̄ хоти, нат̣т̣хам̣ ва̄ винат̣т̣хам̣ ва̄ дад̣д̣хам̣ ва̄, чӣвара̄са̄ ва̄ упаччхинна̄. евам̣ кхо, бхиккхаве, чӣвараапалибодхо хоти. име кхо, бхиккхаве, две катхинасса апалибодха̄ти.

палибодха̄палибодхакатха̄ нит̣т̣хита̄.

катхинаккхандхако нит̣т̣хито саттамо.