190. а̄да̄йачхаккам̣

313. бхиккху аттхатакатхино виппакатачӣварам̣ а̄да̄йа паккамати. тасса бахисӣмагатасса евам̣ хоти – ‘‘идхевимам̣ чӣварам̣ ка̄рессам̣, на паччесса’’нти. со там̣ чӣварам̣ ка̄рети. тасса бхиккхуно нит̣т̣ха̄нантико катхинуддха̄ро.

бхиккху аттхатакатхино виппакатачӣварам̣ а̄да̄йа паккамати. тасса бахисӣмагатасса евам̣ хоти – ‘‘невимам̣ чӣварам̣ ка̄рессам̣, на паччесса’’нти. тасса бхиккхуно саннит̣т̣ха̄нантико катхинуддха̄ро.

бхиккху аттхатакатхино виппакатачӣварам̣ а̄да̄йа паккамати. тасса бахисӣмагатасса евам̣ хоти – ‘‘идхевимам̣ чӣварам̣ ка̄рессам̣ на паччесса’’нти. со там̣ чӣварам̣ ка̄рети. тассам̣ там̣ чӣварам̣ кайирама̄нам̣ нассати. тасса бхиккхуно на̄санантико катхинуддха̄ро.

бхиккху аттхатакатхино виппакатачӣварам̣ а̄да̄йа паккамати ‘‘паччесса’’нти. со бахисӣмагато там̣ чӣварам̣ ка̄рети. со катачӣваро сун̣а̄ти – ‘‘уббхатам̣ кира тасмим̣ а̄ва̄се катхина’’нти. тасса бхиккхуно саванантико катхинуддха̄ро.

бхиккху аттхатакатхино виппакатачӣварам̣ а̄да̄йа паккамати ‘‘паччесса’’нти. со бахисӣмагато там̣ чӣварам̣ ка̄рети. со катачӣваро ‘‘паччессам̣ паччесса’’нти бахиддха̄ катхинуддха̄рам̣ вӣтина̄мети. тасса бхиккхуно сӣма̄тиккантико катхинуддха̄ро.

бхиккху аттхатакатхино виппакатачӣварам̣ а̄да̄йа паккамати ‘‘паччесса’’нти. со бахисӣмагато там̣ чӣварам̣ ка̄рети. со катачӣваро ‘‘паччессам̣ паччесса’’нти самбхун̣а̄ти катхинуддха̄рам̣. тасса бхиккхуно саха бхиккхӯхи катхинуддха̄ро.

а̄да̄йачхаккам̣ нит̣т̣хитам̣.