185. чатумаха̄падесакатха̄

305. тена кхо пана самайена бхиккхӯнам̣ кисмин̃чи кисмин̃чи т̣ха̄не куккуччам̣ уппаджджати – ‘‘ким̣ ну кхо бхагавата̄ анун̃н̃а̄там̣, ким̣ ананун̃н̃а̄та’’нти? бхагавато етаматтхам̣ а̄рочесум̣. ‘‘йам̣, бхиккхаве, майа̄ ‘идам̣ на каппатӣ’ти аппат̣иккхиттам̣ тан̃че акаппийам̣ ануломети, каппийам̣ пат̣иба̄хати, там̣ во на каппати. йам̣, бхиккхаве, майа̄ ‘идам̣ на каппатӣ’ти аппат̣иккхиттам̣ тан̃че каппийам̣ ануломети, акаппийам̣ пат̣иба̄хати, там̣ во каппати. йам̣, бхиккхаве, майа̄ ‘идам̣ каппатӣ’ти ананун̃н̃а̄там̣ тан̃че акаппийам̣ ануломети, каппийам̣ пат̣иба̄хати, там̣ во на каппати. йам̣, бхиккхаве, майа̄ ‘идам̣ каппатӣ’ти ананун̃н̃а̄там̣, тан̃че каппийам̣ ануломети, акаппийам̣ пат̣иба̄хати, там̣ во каппатӣ’’ти.

атха кхо бхиккхӯнам̣ етадахоси – ‘‘каппати ну кхо йа̄вака̄ликена йа̄мака̄ликам̣, на ну кхо каппати? каппати ну кхо йа̄вака̄ликена сатта̄хака̄ликам̣, на ну кхо каппати? каппати ну кхо йа̄вака̄ликена йа̄ваджӣвикам̣, на ну кхо каппати? каппати ну кхо йа̄мака̄ликена сатта̄хака̄ликам̣, на ну кхо каппати? каппати ну кхо йа̄мака̄ликена йа̄ваджӣвикам̣, на ну кхо каппати? каппати ну кхо сатта̄хака̄ликена йа̄ваджӣвикам̣, на ну кхо каппатӣ’’ти? бхагавато етаматтхам̣ а̄рочесум̣. ‘‘йа̄вака̄ликена, бхиккхаве, йа̄мака̄ликам̣, тадаху пат̣иггахитам̣ ка̄ле каппати, вика̄ле на каппати. йа̄вака̄ликена, бхиккхаве, сатта̄хака̄ликам̣, тадаху пат̣иггахитам̣ ка̄ле каппати, вика̄ле на каппати. йа̄вака̄ликена, бхиккхаве, йа̄ваджӣвикам̣, тадаху пат̣иггахитам̣ ка̄ле каппати, вика̄ле на каппати. йа̄мака̄ликена, бхиккхаве, сатта̄хака̄ликам̣, тадаху пат̣иггахитам̣ йа̄ме каппати, йа̄ма̄тикканте на каппати. йа̄мака̄ликена, бхиккхаве, йа̄ваджӣвикам̣, тадаху пат̣иггахитам̣ йа̄ме каппати, йа̄ма̄тикканте на каппати. сатта̄хака̄ликена, бхиккхаве, йа̄ваджӣвикам̣ пат̣иггахитам̣, сатта̄хам̣ каппати, сатта̄ха̄тикканте на каппатӣ’’ти.

чатумаха̄падесакатха̄ нит̣т̣хита̄.

бхесаджджаккхандхако чхат̣т̣хо.