156. гихивиката̄нун̃н̃а̄та̄ди

256. тена кхо пана самайена манусса̄нам̣ ман̃чампи пӣт̣хампи чаммонаддха̄ни хонти, чаммавинаддха̄ни. бхиккхӯ куккучча̄йанта̄ на̄бхинисӣданти. бхагавато етаматтхам̣ а̄рочесум̣. ануджа̄на̄ми, бхиккхаве, гихивикатам̣ абхинисӣдитум̣, на твева абхинипаджджитунти.

тена кхо пана самайена виха̄ра̄ чаммаваддхехи огумпхийанти [огумбхийанти (ка.)]. бхиккхӯ куккучча̄йанта̄ на̄бхинисӣданти. бхагавато етаматтхам̣ а̄рочесум̣. ануджа̄на̄ми, бхиккхаве, бандханаматтам̣ абхинисӣдитунти.

тена кхо пана самайена чхаббаггийа̄ бхиккхӯ саупа̄хана̄ га̄мам̣ пависанти. манусса̄ уджджха̄йанти кхиййанти випа̄ченти – ‘‘сеййатха̄пи гихӣ ка̄мабхогино’’ти. бхагавато етаматтхам̣ а̄рочесум̣. на, бхиккхаве, саупа̄ханена га̄мо пависитаббо. йо пависеййа, а̄патти дуккат̣асса̄ти.

тена кхо пана самайена ан̃н̃атаро бхиккху гила̄но хоти, на саккоти вина̄ упа̄ханена га̄мам̣ пависитум̣. бхагавато етаматтхам̣ а̄рочесум̣. ануджа̄на̄ми, бхиккхаве, гила̄нена бхиккхуна̄ саупа̄ханена га̄мам̣ пависитунти.

гихивиката̄нун̃н̃а̄та̄ди нит̣т̣хита̄.