116. вассам̣ анупагантаббат̣т̣ха̄на̄ни

204. тена кхо пана самайена бхиккхӯ руккхасусире вассам̣ упагаччханти. манусса̄ уджджха̄йанти кхиййанти випа̄ченти – ‘‘сеййатха̄пи писа̄чиллика̄’’ти. бхагавато етаматтхам̣ а̄рочесум̣. на, бхиккхаве, руккхасусире вассам̣ упагантаббам̣. йо упагаччхеййа, а̄патти дуккат̣асса̄ти.

тена кхо пана самайена бхиккхӯ руккхавит̣абхийа̄ вассам̣ упагаччханти. манусса̄ уджджха̄йанти кхиййанти випа̄ченти – ‘‘сеййатха̄пи мигалуддака̄’’ти. бхагавато етаматтхам̣ а̄рочесум̣. на, бхиккхаве, руккхавит̣абхийа̄ вассам̣ упагантаббам̣. йо упагаччхеййа, а̄патти дуккат̣асса̄ти.

тена кхо пана самайена бхиккхӯ аджджхока̄се вассам̣ упагаччханти. деве вассанте руккхамӯлампи ниббакосампи упадха̄ванти. бхагавато етаматтхам̣ а̄рочесум̣. на, бхиккхаве, аджджхока̄се вассам̣ упагантаббам̣. йо упагаччхеййа, а̄патти дуккат̣асса̄ти.

тена кхо пана самайена бхиккхӯ асена̄саника̄ вассам̣ упагаччханти. сӣтенапи киламанти, ун̣хенапи киламанти. бхагавато етаматтхам̣ а̄рочесум̣. на, бхиккхаве, асена̄саникена вассам̣ упагантаббам̣. йо упагаччхеййа, а̄патти дуккат̣асса̄ти.

тена кхо пана самайена бхиккхӯ чхавакут̣ика̄йа вассам̣ упагаччханти. манусса̄ уджджха̄йанти кхиййанти випа̄ченти – ‘‘сеййатха̄пи чхавад̣а̄хака̄’’ти. бхагавато етаматтхам̣ а̄рочесум̣. на, бхиккхаве, чхавакут̣ика̄йа вассам̣ упагантаббам̣. йо упагаччхеййа, а̄патти дуккат̣асса̄ти.

тена кхо пана самайена бхиккхӯ чхатте вассам̣ упагаччханти. манусса̄ уджджха̄йанти кхиййанти випа̄ченти – ‘‘сеййатха̄пи гопа̄лака̄’’ти. бхагавато етаматтхам̣ а̄рочесум̣. на, бхиккхаве, чхатте вассам̣ упагантаббам̣. йо упагаччхеййа, а̄патти дуккат̣асса̄ти.

тена кхо пана самайена бхиккхӯ ча̄т̣ийа̄ вассам̣ упагаччханти. манусса̄ уджджха̄йанти кхиййанти випа̄ченти – ‘‘сеййатха̄пи титтхийа̄’’ти. бхагавато етаматтхам̣ а̄рочесум̣. на, бхиккхаве, ча̄т̣ийа̄ вассам̣ упагантаббам̣. йо упагаччхеййа, а̄патти дуккат̣асса̄ти.

вассам̣ анупагантаббат̣т̣ха̄на̄ни нит̣т̣хита̄.