113. антара̄йе ана̄паттивассаччхедава̄ро

200. тена кхо пана самайена косалесу джанападе ан̃н̃атарасмим̣ а̄ва̄се вассӯпагата̄ бхиккхӯ ва̄л̣ехи убба̄л̣ха̄ хонти. ган̣хим̣супи парипа̄тим̣супи. бхагавато етаматтхам̣ а̄рочесум̣.

идха пана, бхиккхаве, вассӯпагата̄ бхиккхӯ ва̄л̣ехи убба̄л̣ха̄ хонти. ган̣хантипи парипа̄тентипи. есева антара̄йоти паккамитаббам̣. ана̄патти вассаччхедасса.

идха пана, бхиккхаве, вассӯпагата̄ бхиккхӯ сарӣсапехи убба̄л̣ха̄ хонти. д̣ам̣сантипи парипа̄тентипи. есева антара̄йоти паккамитаббам̣. ана̄патти вассаччхедасса.

идха пана, бхиккхаве, вассӯпагата̄ бхиккхӯ чорехи убба̄л̣ха̄ хонти. вилумпантипи а̄кот̣ентипи. есева антара̄йоти паккамитаббам̣. ана̄патти вассаччхедасса.

идха пана, бхиккхаве, вассӯпагата̄ бхиккхӯ писа̄чехи убба̄л̣ха̄ хонти. а̄висантипи ханантипи [оджампи харанти (сӣ.), харантипи (сйа̄.)]. есева антара̄йоти паккамитаббам̣. ана̄патти вассаччхедасса.

идха пана, бхиккхаве, вассӯпагата̄нам̣ бхиккхӯнам̣ га̄мо аггина̄ дад̣д̣хо хоти. бхиккхӯ пин̣д̣акена киламанти. есева антара̄йоти паккамитаббам̣. ана̄патти вассаччхедасса.

идха пана, бхиккхаве, вассӯпагата̄нам̣ бхиккхӯнам̣ сена̄санам̣ аггина̄ дад̣д̣хам̣ хоти. бхиккхӯ сена̄санена киламанти. есева антара̄йоти паккамитаббам̣. ана̄патти вассаччхедасса.

идха пана, бхиккхаве, вассӯпагата̄нам̣ бхиккхӯнам̣ га̄мо удакена вӯл̣хо хоти. бхиккхӯ пин̣д̣акена киламанти. есева антара̄йоти паккамитаббам̣. ана̄патти вассаччхедасса.

идха пана, бхиккхаве, вассӯпагата̄нам̣ бхиккхӯнам̣ сена̄санам̣ удакена вӯл̣хам̣ хоти. бхиккхӯ сена̄санена киламанти. есева антара̄йоти паккамитаббам̣. ана̄патти вассаччхедасса̄ти.

201. тена кхо пана самайена ан̃н̃атарасмим̣ а̄ва̄се вассӯпагата̄нам̣ бхиккхӯнам̣ га̄мо чорехи вут̣т̣ха̄си. бхагавато етаматтхам̣ а̄рочесум̣. ануджа̄на̄ми, бхиккхаве, йена га̄мо тена гантунти.

га̄мо дведха̄ бхиджджиттха. бхагавато етаматтхам̣ а̄рочесум̣. ануджа̄на̄ми, бхиккхаве, йена бахутара̄ тена гантунти.

бахутара̄ ассаддха̄ хонти аппасанна̄. бхагавато етаматтхам̣ а̄рочесум̣. ануджа̄на̄ми, бхиккхаве, йена саддха̄ пасанна̄ тена гантунти.

тена кхо пана самайена косалесу джанападе ан̃н̃атарасмим̣ а̄ва̄се вассӯпагата̄ бхиккхӯ на лабхим̣су лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣. бхагавато етаматтхам̣ а̄рочесум̣.

идха пана, бхиккхаве, вассӯпагата̄ бхиккхӯ на лабханти лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣. есева антара̄йоти паккамитаббам̣. ана̄патти вассаччхедасса.

идха пана, бхиккхаве, вассӯпагата̄ бхиккхӯ лабханти лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣, на лабханти саппа̄йа̄ни бходжана̄ни. есева антара̄йоти паккамитаббам̣. ана̄патти вассаччхедасса.

идха пана, бхиккхаве, вассӯпагата̄ бхиккхӯ лабханти лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣, лабханти саппа̄йа̄ни бходжана̄ни, на лабханти саппа̄йа̄ни бхесаджджа̄ни. есева антара̄йоти паккамитаббам̣. ана̄патти вассаччхедасса.

идха пана, бхиккхаве, вассӯпагата̄ бхиккхӯ лабханти лӯкхасса ва̄ пан̣ӣтасса ва̄ бходжанасса йа̄вадаттхам̣ па̄рипӯрим̣, лабханти саппа̄йа̄ни бходжана̄ни, лабханти саппа̄йа̄ни бхесаджджа̄ни, на лабханти патирӯпам̣ упат̣т̣ха̄кам̣. есева антара̄йоти паккамитаббам̣. ана̄патти вассаччхедасса.

идха пана, бхиккхаве, вассӯпагатам̣ бхиккхум̣ иттхӣ нимантети – ‘‘ехи, бханте, хиран̃н̃ам̣ ва̄ те деми, суван̣н̣ам̣ ва̄ те деми, кхеттам̣ ва̄ те деми, ваттхум̣ ва̄ те деми, га̄вум̣ ва̄ те деми, га̄вим̣ ва̄ те деми, да̄сам̣ ва̄ те деми, да̄сим̣ ва̄ те деми, дхӣтарам̣ ва̄ те деми бхарийаттха̄йа, ахам̣ ва̄ те бхарийа̄ хоми, ан̃н̃ам̣ ва̄ те бхарийам̣ а̄немӣ’’ти. татра че бхиккхуно евам̣ хоти, ‘лахупариваттам̣ кхо читтам̣ вуттам̣ бхагавата̄, сийа̄пи ме брахмачарийасса антара̄йо’ти, паккамитаббам̣. ана̄патти вассаччхедасса.

идха пана, бхиккхаве, вассӯпагатам̣ бхиккхум̣ весӣ нимантети…пе… тхуллакума̄рӣ нимантети… пан̣д̣ако нимантети… н̃а̄така̄ нимантенти… ра̄джа̄но нимантенти… чора̄ нимантенти… дхутта̄ нимантенти – ‘‘ехи, бханте, хиран̃н̃ам̣ ва̄ те дема, суван̣н̣ам̣ ва̄ те дема, кхеттам̣ ва̄ те дема, ваттхум̣ ва̄ те дема, га̄вум̣ ва̄ те дема, га̄вим̣ ва̄ те дема, да̄сам̣ ва̄ те дема, да̄сим̣ ва̄ те дема, дхӣтарам̣ ва̄ те дема бхарийаттха̄йа, ан̃н̃ам̣ ва̄ те бхарийам̣ а̄нема̄’’ти. татра че бхиккхуно евам̣ хоти, ‘лахупариваттам̣ кхо читтам̣ вуттам̣ бхагавата̄, сийа̄пи ме брахмачарийасса антара̄йо’ти, паккамитаббам̣. ана̄патти вассаччхедасса.

идха пана, бхиккхаве, вассӯпагато бхиккху асса̄микам̣ нидхим̣ пассати. татра че бхиккхуно евам̣ хоти, ‘лахупариваттам̣ кхо читтам̣ вуттам̣ бхагавата̄, сийа̄пи ме брахмачарийасса антара̄йо’ти, паккамитаббам̣. ана̄патти вассаччхедасса.

антара̄йе ана̄паттивассаччхедава̄ро нит̣т̣хито.