85. пуббакаран̣а̄нуджа̄нана̄

159. тена кхо пана самайена ан̃н̃атарасмим̣ а̄ва̄се упосатха̄га̄рам̣ укла̄пам̣ хоти. а̄гантука̄ бхиккхӯ уджджха̄йанти кхиййанти випа̄ченти – ‘‘катхан̃хи на̄ма а̄ва̄сика̄ бхиккхӯ упосатха̄га̄рам̣ на саммаджджиссантӣ’’ти. бхагавато етаматтхам̣ а̄рочесум̣. ануджа̄на̄ми, бхиккхаве, упосатха̄га̄рам̣ саммаджджитунти.

атха кхо бхиккхӯнам̣ етадахоси – ‘‘кена ну кхо упосатха̄га̄рам̣ саммаджджитабба’’нти? бхагавато етаматтхам̣ а̄рочесум̣. ануджа̄на̄ми, бхиккхаве, тхерена бхиккхуна̄ навам̣ бхиккхум̣ а̄н̣а̄петунти.

тхерена а̄н̣атта̄ нава̄ бхиккхӯ на саммаджджанти. бхагавато етаматтхам̣ а̄рочесум̣. на, бхиккхаве, тхерена а̄н̣аттена агила̄нена на саммаджджитаббам̣. йо на саммаджджеййа, а̄патти дуккат̣асса̄ти.

160. тена кхо пана самайена упосатха̄га̄ре а̄санам̣ апан̃н̃аттам̣ хоти. бхиккхӯ чхама̄йам̣ нисӣданти, гатта̄нипи чӣвара̄нипи пам̣сукита̄ни хонти. бхагавато етаматтхам̣ а̄рочесум̣. ануджа̄на̄ми, бхиккхаве, упосатха̄га̄ре а̄санам̣ пан̃н̃апетунти.

атха кхо бхиккхӯнам̣ етадахоси – ‘‘кена ну кхо упосатха̄га̄ре а̄санам̣ пан̃н̃апетабба’’нти? бхагавато етаматтхам̣ а̄рочесум̣. ануджа̄на̄ми, бхиккхаве, тхерена бхиккхуна̄ навам̣ бхиккхум̣ а̄н̣а̄петунти.

тхерена а̄н̣атта̄ нава̄ бхиккхӯ на пан̃н̃апенти. бхагавато етаматтхам̣ а̄рочесум̣. на, бхиккхаве, тхерена а̄н̣аттена агила̄нена на пан̃н̃апетаббам̣. йо на пан̃н̃апеййа, а̄патти дуккат̣асса̄ти.

161. тена кхо пана самайена упосатха̄га̄ре падӣпо на хоти. бхиккхӯ андхака̄ре ка̄йампи чӣварампи аккаманти. бхагавато етаматтхам̣ а̄рочесум̣. ануджа̄на̄ми, бхиккхаве, упосатха̄га̄ре падӣпам̣ ка̄тунти.

атха кхо бхиккхӯнам̣ етадахоси – ‘‘кена ну кхо упосатха̄га̄ре падӣпо ка̄таббо’’ти? бхагавато етаматтхам̣ а̄рочесум̣. ануджа̄на̄ми, бхиккхаве, тхерена бхиккхуна̄ навам̣ бхиккхум̣ а̄н̣а̄петунти.

тхерена а̄н̣атта̄ нава̄ бхиккхӯ на падӣпенти. бхагавато етаматтхам̣ а̄рочесум̣. на, бхиккхаве, тхерена а̄н̣аттена агила̄нена на падӣпетаббо. йо на падӣпеййа, а̄патти дуккат̣асса̄ти.

162. тена кхо пана самайена ан̃н̃атарасмим̣ а̄ва̄се а̄ва̄сика̄ бхиккхӯ нева па̄нӣйам̣ упат̣т̣ха̄пенти, на парибходжанӣйам̣ упат̣т̣ха̄пенти. а̄гантука̄ бхиккхӯ уджджха̄йанти кхиййанти випа̄ченти – ‘‘катхан̃хи на̄ма а̄ва̄сика̄ бхиккхӯ нева па̄нӣйам̣ упат̣т̣ха̄пессанти, на парибходжанӣйам̣ упат̣т̣ха̄пессантӣ’’ти. бхагавато етаматтхам̣ а̄рочесум̣. ануджа̄на̄ми, бхиккхаве, па̄нӣйам̣ парибходжанӣйам̣ упат̣т̣ха̄петунти.

атха кхо бхиккхӯнам̣ етадахоси – ‘‘кена ну кхо па̄нӣйам̣ парибходжанӣйам̣ упат̣т̣ха̄петабба’’нти? бхагавато етаматтхам̣ а̄рочесум̣. ануджа̄на̄ми, бхиккхаве, тхерена бхиккхуна̄ навам̣ бхиккхум̣ а̄н̣а̄петунти.

тхерена а̄н̣атта̄ нава̄ бхиккхӯ на упат̣т̣ха̄пенти. бхагавато етаматтхам̣ а̄рочесум̣. на, бхиккхаве, тхерена а̄н̣аттена агила̄нена на упат̣т̣ха̄петаббам̣. йо на упат̣т̣ха̄пеййа, а̄патти дуккат̣асса̄ти.