82. адхаммакаммапат̣иккосана̄ди

154. тена кхо пана самайена чхаббаггийа̄ бхиккхӯ сан̇гхамаджджхе адхаммакаммам̣ каронти. бхагавато етаматтхам̣ а̄рочесум̣. на, бхиккхаве, адхаммакаммам̣ ка̄таббам̣. йо кареййа, а̄патти дуккат̣асса̄ти. каронтийева адхаммакаммам̣. бхагавато етаматтхам̣ а̄рочесум̣. ануджа̄на̄ми, бхиккхаве, адхаммакамме кайирама̄не пат̣иккоситунти.

тена кхо пана самайена песала̄ бхиккхӯ чхаббаггийехи бхиккхӯхи адхаммакамме кайирама̄не пат̣иккосанти. чхаббаггийа̄ бхиккхӯ лабханти а̄гха̄там̣, лабханти аппаччайам̣, вадхена тадждженти. бхагавато етаматтхам̣ а̄рочесум̣. ануджа̄на̄ми, бхиккхаве, дит̣т̣химпи а̄вика̄тунти. тесам̣йева сантике дит̣т̣хим̣ а̄викаронти. чхаббаггийа̄ бхиккхӯ лабханти а̄гха̄там̣, лабханти аппаччайам̣, вадхена тадждженти. бхагавато етаматтхам̣ а̄рочесум̣. ануджа̄на̄ми, бхиккхаве, чатӯхи пан̃чахи пат̣иккоситум̣, двӣхи тӣхи дит̣т̣хим̣ а̄вика̄тум̣, екена адхит̣т̣ха̄тум̣ – ‘на метам̣ кхаматӣ’ти.

тена кхо пана самайена чхаббаггийа̄ бхиккхӯ сан̇гхамаджджхе па̄тимоккхам̣ уддисама̄на̄ сан̃чичча на са̄венти. бхагавато етаматтхам̣ а̄рочесум̣. на, бхиккхаве, па̄тимоккхуддесакена сан̃чичча на са̄ветаббам̣. йо на са̄веййа, а̄патти дуккат̣асса̄ти.

тена кхо пана самайена а̄йасма̄ уда̄йӣ сан̇гхасса па̄тимоккхуддесако хоти ка̄кассарако. атха кхо а̄йасмато уда̄йисса етадахоси – ‘‘бхагавата̄ пан̃н̃аттам̣ ‘па̄тимоккхуддесакена са̄ветабба’нти, ахан̃чамхи ка̄кассарако, катхам̣ ну кхо майа̄ пат̣ипаджджитабба’’нти? бхагавато етаматтхам̣ а̄рочесум̣. ануджа̄на̄ми, бхиккхаве, па̄тимоккхуддесакена ва̄йамитум̣ – ‘катхам̣ са̄веййа’нти. ва̄йамантасса ана̄паттӣти.

тена кхо пана самайена девадатто сагахат̣т̣ха̄йа париса̄йа па̄тимоккхам̣ уддисати. бхагавато етаматтхам̣ а̄рочесум̣. на, бхиккхаве, сагахат̣т̣ха̄йа париса̄йа па̄тимоккхам̣ уддиситаббам̣. йо уддисеййа, а̄патти дуккат̣асса̄ти.

тена кхо пана самайена чхаббаггийа̄ бхиккхӯ сан̇гхамаджджхе анаджджхит̣т̣ха̄ па̄тимоккхам̣ уддисанти. бхагавато етаматтхам̣ а̄рочесум̣. на, бхиккхаве, сан̇гхамаджджхе анаджджхит̣т̣хена па̄тимоккхам̣ уддиситаббам̣. йо уддисеййа, а̄патти дуккат̣асса. ануджа̄на̄ми, бхиккхаве, тхера̄дхикам̣ [тхера̄дхеййам̣ (ат̣т̣хакатха̄йам̣ па̄т̣хантарам̣)] па̄тимоккханти.

ан̃н̃атиттхийабха̄н̣ава̄ро нит̣т̣хито пат̣хамо [ека̄дасамо (ка.)].