79. винайапуччханакатха̄

151. тена кхо пана самайена чхаббаггийа̄ бхиккхӯ сан̇гхамаджджхе асаммата̄ винайам̣ пуччханти. бхагавато етаматтхам̣ а̄рочесум̣. на, бхиккхаве, сан̇гхамаджджхе асамматена винайо пуччхитаббо. йо пуччхеййа, а̄патти дуккат̣асса. ануджа̄на̄ми, бхиккхаве, сан̇гхамаджджхе самматена винайам̣ пуччхитум̣. еван̃ча пана, бхиккхаве, самманнитаббо – аттана̄ ва̄ [аттана̄ва (сйа̄.)] атта̄нам̣ самманнитаббам̣, парена ва̄ паро самманнитаббо. катхан̃ча аттана̄ва атта̄нам̣ самманнитаббам̣? бйаттена бхиккхуна̄ пат̣ибалена сан̇гхо н̃а̄петаббо –

‘‘сун̣а̄ту ме, бханте, сан̇гхо. йади сан̇гхасса паттакаллам̣, ахам̣ иттханна̄мам̣ винайам̣ пуччхеййа’’нти. евам̣ аттана̄ва атта̄нам̣ самманнитаббам̣.

катхан̃ча парена паро самманнитаббо? бйаттена бхиккхуна̄ пат̣ибалена сан̇гхо н̃а̄петаббо –

‘‘сун̣а̄ту ме, бханте, сан̇гхо. йади сан̇гхасса паттакаллам̣, иттханна̄мо иттханна̄мам̣ винайам̣ пуччхеййа̄’’ти. евам̣ парена паро самманнитабботи.

тена кхо пана самайена песала̄ бхиккхӯ сан̇гхамаджджхе саммата̄ винайам̣ пуччханти. чхаббаггийа̄ бхиккхӯ лабханти а̄гха̄там̣, лабханти аппаччайам̣, вадхена тадждженти. бхагавато етаматтхам̣ а̄рочесум̣. ануджа̄на̄ми, бхиккхаве, сан̇гхамаджджхе самматенапи парисам̣ олокетва̄ пуггалам̣ тулайитва̄ винайам̣ пуччхитунти.