72. упосатха̄га̄ракатха̄

141. тена кхо пана самайена бхиккхӯ анупаривен̣ийам̣ па̄тимоккхам̣ уддисанти асан̇кетена. а̄гантука̄ бхиккхӯ на джа̄нанти – ‘‘каттха ва̄ аджджупосатхо карӣйиссатӣ’’ти. бхагавато етаматтхам̣ а̄рочесум̣. на, бхиккхаве, анупаривен̣ийам̣ па̄тимоккхам̣ уддиситаббам̣ асан̇кетена. йо уддисеййа, а̄патти дуккат̣асса. ануджа̄на̄ми, бхиккхаве, упосатха̄га̄рам̣ самманнитва̄ упосатхам̣ ка̄тум̣, йам̣ сан̇гхо а̄кан̇кхати виха̄рам̣ ва̄ ад̣д̣хайогам̣ ва̄ па̄са̄дам̣ ва̄ хаммийам̣ ва̄ гухам̣ ва̄. еван̃ча пана, бхиккхаве, самманнитаббам̣. бйаттена бхиккхуна̄ пат̣ибалена сан̇гхо н̃а̄петаббо –

‘‘сун̣а̄ту ме, бханте, сан̇гхо. йади сан̇гхасса паттакаллам̣, сан̇гхо иттханна̄мам̣ виха̄рам̣ упосатха̄га̄рам̣ самманнеййа. еса̄ н̃атти.

‘‘сун̣а̄ту ме, бханте, сан̇гхо. сан̇гхо иттханна̄мам̣ виха̄рам̣ упосатха̄га̄рам̣ самманнати. йасса̄йасмато кхамати иттханна̄масса виха̄расса упосатха̄га̄расса саммути, со тун̣хасса; йасса наккхамати, со бха̄сеййа. саммато сан̇гхена иттханна̄мо виха̄ро упосатха̄га̄рам̣. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

тена кхо пана самайена ан̃н̃атарасмим̣ а̄ва̄се две упосатха̄га̄ра̄ни саммата̄ни хонти. бхиккхӯ убхайаттха саннипатанти – ‘‘идха упосатхо карӣйиссати, идха упосатхо карӣйиссатӣ’’ти. бхагавато етаматтхам̣ а̄рочесум̣. на, бхиккхаве, екасмим̣ а̄ва̄се две упосатха̄га̄ра̄ни самманнитабба̄ни. йо самманнеййа, а̄патти дуккат̣асса. ануджа̄на̄ми, бхиккхаве, екам̣ самӯханитва̄ [самуханитва̄ (ка.)] екаттха упосатхам̣ ка̄тум̣. еван̃ча пана, бхиккхаве, самӯхантаббам̣. бйаттена бхиккхуна̄ пат̣ибалена сан̇гхо н̃а̄петаббо –

‘‘сун̣а̄ту ме, бханте, сан̇гхо. йади сан̇гхасса паттакаллам̣, сан̇гхо иттханна̄мам̣ упосатха̄га̄рам̣ самӯханеййа [самуханеййа (ка.)]. еса̄ н̃атти.

‘‘сун̣а̄ту ме, бханте, сан̇гхо. сан̇гхо иттханна̄мам̣ упосатха̄га̄рам̣ самӯханати. йасса̄йасмато кхамати иттханна̄масса упосатха̄га̄расса самуггха̄то, со тун̣хасса; йасса наккхамати, со бха̄сеййа. самӯхатам̣ сан̇гхена иттханна̄мам̣ упосатха̄га̄рам̣. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.