70. маха̄каппинаваттху

137. тена кхо пана самайена а̄йасма̄ маха̄каппино ра̄джагахе вихарати маддакуччхимхи мигада̄йе. атха кхо а̄йасмато маха̄каппинасса рахогатасса пат̣исаллӣнасса евам̣ четасо паривитакко удапа̄ди – ‘‘гаччхеййам̣ ва̄хам̣ упосатхам̣ на ва̄ гаччхеййам̣, гаччхеййам̣ ва̄хам̣ сан̇гхакаммам̣ на ва̄ гаччхеййам̣, атха кхва̄хам̣ висуддхо парама̄йа висуддхийа̄’’ти? атха кхо бхагава̄ а̄йасмато маха̄каппинасса четаса̄ четопаривитаккаман̃н̃а̄йа – сеййатха̄пи на̄ма балава̄ пурисо самин̃джитам̣ ва̄ ба̄хам̣ паса̄реййа, паса̄ритам̣ ва̄ ба̄хам̣ самин̃джеййа, евамева – гиджджхакӯт̣е паббате антарахито маддакуччхимхи мигада̄йе а̄йасмато маха̄каппинасса саммукхе па̄турахоси. нисӣди бхагава̄ пан̃н̃атте а̄сане. а̄йасма̄пи кхо маха̄каппино бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо а̄йасмантам̣ маха̄каппинам̣ бхагава̄ етадавоча – ‘‘нану те, каппина, рахогатасса пат̣исаллӣнасса евам̣ четасо паривитакко удапа̄ди – гаччхеййам̣ ва̄хам̣ упосатхам̣ на ва̄ гаччхеййам̣, гаччхеййам̣ ва̄хам̣ сан̇гхакаммам̣ на ва̄ гаччхеййам̣, атха кхва̄хам̣ висуддхо парама̄йа висуддхийа̄’’ти? ‘‘евам̣, бханте’’. ‘‘тумхе че бра̄хман̣а̄ упосатхам̣ на саккариссатха на гарукариссатха [на гарум̣ кариссатха (ка.)] на ма̄нессатха на пӯджессатха, атха ко чарахи упосатхам̣ саккариссати гарукариссати ма̄нессати пӯджессати? гаччха твам̣, бра̄хман̣а, упосатхам̣, ма̄ но агама̄си. гаччха твам̣ сан̇гхакаммам̣, ма̄ но агама̄сӣ’’ти. ‘‘евам̣, бханте’’ти кхо а̄йасма̄ маха̄каппино бхагавато паччассоси. атха кхо бхагава̄ а̄йасмантам̣ маха̄каппинам̣ дхаммийа̄ катха̄йа сандассетва̄ сама̄дапетва̄ самуттеджетва̄ сампахам̣сетва̄ – сеййатха̄пи на̄ма балава̄ пурисо самин̃джитам̣ ва̄ ба̄хам̣ паса̄реййа, паса̄ритам̣ ва̄ ба̄хам̣ самин̃джеййа, евамева – маддакуччхимхи мигада̄йе а̄йасмато маха̄каппинасса саммукхе антарахито гиджджхакӯт̣е паббате па̄турахоси.