58. аладжджӣниссайаваттхӯни

120. тена кхо пана самайена чхаббаггийа̄ бхиккхӯ аладжджӣнам̣ ниссайам̣ денти. бхагавато етаматтхам̣ а̄рочесум̣. на, бхиккхаве, аладжджӣнам̣ ниссайо да̄таббо. йо дадеййа, а̄патти дуккат̣асса̄ти.

тена кхо пана самайена бхиккхӯ аладжджӣнам̣ нисса̄йа васанти. тепи начирассева аладжджино хонти па̄пака̄бхиккхӯ. бхагавато етаматтхам̣ а̄рочесум̣. на, бхиккхаве, аладжджӣнам̣ нисса̄йа ваттхаббам̣. йо васеййа, а̄патти дуккат̣асса̄ти.

атха кхо бхиккхӯнам̣ етадахоси – ‘‘бхагавата̄ пан̃н̃аттам̣ ‘на аладжджӣнам̣ ниссайо да̄таббо, на аладжджӣнам̣ нисса̄йа ваттхабба’нти. катхам̣ ну кхо майам̣ джа̄неййа̄ма ладжджим̣ ва̄ аладжджим̣ ва̄’’ти? бхагавато етаматтхам̣ а̄рочесум̣. ануджа̄на̄ми, бхиккхаве, чатӯхапан̃ча̄хам̣ а̄гаметум̣ йа̄ва бхиккхусабха̄гатам̣ джа̄на̄мӣти.