59. гамика̄диниссайаваттхӯни

121. тена кхо пана самайена ан̃н̃атаро бхиккху косалесу джанападе аддха̄намаггаппат̣ипанно хоти. атха кхо тасса бхиккхуно етадахоси – ‘‘бхагавата̄ пан̃н̃аттам̣ ‘на анисситена ваттхабба’нти. ахан̃чамхи ниссайакаран̣ӣйо аддха̄намаггаппат̣ипанно, катхам̣ ну кхо майа̄ пат̣ипаджджитабба’’нти? бхагавато етаматтхам̣ а̄рочесум̣. ануджа̄на̄ми, бхиккхаве, аддха̄намаггаппат̣ипаннена бхиккхуна̄ ниссайам̣ алабхама̄нена анисситена ваттхунти.

тена кхо пана самайена две бхиккхӯ косалесу джанападе аддха̄намаггаппат̣ипанна̄ хонти. те ан̃н̃атарам̣ а̄ва̄сам̣ упагаччхим̣су. таттха еко бхиккху гила̄но хоти. атха кхо тасса гила̄насса бхиккхуно етадахоси – ‘‘бхагавата̄ пан̃н̃аттам̣ ‘на анисситена ваттхабба’нти. ахан̃чамхи ниссайакаран̣ӣйо гила̄но, катхам̣ ну кхо майа̄ пат̣ипаджджитабба’’нти? бхагавато етаматтхам̣ а̄рочесум̣. ануджа̄на̄ми, бхиккхаве, гила̄нена бхиккхуна̄ ниссайам̣ алабхама̄нена анисситена ваттхунти.

атха кхо тасса гила̄нупат̣т̣ха̄касса бхиккхуно етадахоси – ‘‘бхагавата̄ пан̃н̃аттам̣ ‘на анисситена ваттхабба’нти. ахан̃чамхи ниссайакаран̣ӣйо, айан̃ча бхиккху гила̄но, катхам̣ ну кхо майа̄ пат̣ипаджджитабба’’нти? бхагавато етаматтхам̣ а̄рочесум̣. ануджа̄на̄ми, бхиккхаве, гила̄нупат̣т̣ха̄кена бхиккхуна̄ ниссайам̣ алабхама̄нена йа̄чийама̄нена анисситена ваттхунти.

тена кхо пана самайена ан̃н̃атаро бхиккху аран̃н̃е вихарати. тасса ча тасмим̣ сена̄сане пха̄су хоти. атха кхо тасса бхиккхуно етадахоси – ‘‘бхагавата̄ пан̃н̃аттам̣ ‘на анисситена ваттхабба’нти. ахан̃чамхи ниссайакаран̣ӣйо аран̃н̃е вихара̄ми, майхан̃ча имасмим̣ сена̄сане пха̄су хоти, катхам̣ ну кхо майа̄ пат̣ипаджджитабба’’нти? бхагавато етаматтхам̣ а̄рочесум̣. ануджа̄на̄ми, бхиккхаве, а̄ран̃н̃икена бхиккхуна̄ пха̄сувиха̄рам̣ саллаккхентена ниссайам̣ алабхама̄нена анисситена ваттхум̣ – йада̄ патирӯпо ниссайада̄йако а̄гаччхиссати, тада̄ тасса нисса̄йа васисса̄мӣти.