47. пан̣д̣акаваттху

109. тена кхо пана самайена ан̃н̃атаро пан̣д̣ако бхиккхӯсу паббаджито хоти. со дахаре дахаре бхиккхӯ упасан̇камитва̄ евам̣ вадети – ‘‘етха, мам̣ а̄йасманто дӯсетха̄’’ти. бхиккхӯ апаса̄денти – ‘‘насса, пан̣д̣ака, винасса, пан̣д̣ака, ко тайа̄ аттхо’’ти. со бхиккхӯхи апаса̄дито маханте маханте мол̣игалле са̄ман̣ере упасан̇камитва̄ евам̣ вадети – ‘‘етха, мам̣ а̄вусо дӯсетха̄’’ти. са̄ман̣ера̄ апаса̄денти – ‘‘насса, пан̣д̣ака, винасса, пан̣д̣ака, ко тайа̄ аттхо’’ти. со са̄ман̣ерехи апаса̄дито хаттхибхан̣д̣е ассабхан̣д̣е упасан̇камитва̄ евам̣ вадети – ‘‘етха, мам̣, а̄вусо, дӯсетха̄’’ти. хаттхибхан̣д̣а̄ ассабхан̣д̣а̄ дӯсесум̣. те уджджха̄йанти кхиййанти випа̄ченти – ‘‘пан̣д̣ака̄ име саман̣а̄ сакйапуттийа̄. йепи имесам̣ на пан̣д̣ака̄, тепи име пан̣д̣аке дӯсенти. евам̣ име саббева абрахмача̄рино’’ти. ассосум̣ кхо бхиккхӯ тесам̣ хаттхибхан̣д̣а̄нам̣ ассабхан̣д̣а̄нам̣ уджджха̄йанта̄нам̣ кхиййанта̄нам̣ випа̄чента̄нам̣. атха кхо те бхиккхӯ бхагавато етаматтхам̣ а̄рочесум̣. пан̣д̣ако, бхиккхаве, анупасампанно на упасампа̄детаббо, упасампанно на̄сетабботи.