48. тхеййасам̣ва̄сакаваттху

110. тена кхо пана самайена ан̃н̃атаро пура̄н̣акулапутто кхӣн̣аколан̃н̃о сукхума̄ло хоти. атха кхо тасса пура̄н̣акулапуттасса кхӣн̣аколан̃н̃асса етадахоси – ‘‘ахам̣ кхо сукхума̄ло, на пат̣ибало анадхигатам̣ ва̄ бхогам̣ адхигантум̣, адхигатам̣ ва̄ бхогам̣ пха̄тим̣ ка̄тум̣. кена ну кхо ахам̣ упа̄йена сукхан̃ча джӣвеййам̣, на ча киламеййа’’нти? атха кхо тасса пура̄н̣акулапуттасса кхӣн̣аколан̃н̃асса етадахоси – ‘‘име кхо саман̣а̄ сакйапуттийа̄ сукхасӣла̄ сукхасама̄ча̄ра̄, субходжана̄ни бхун̃джитва̄ нива̄тесу сайанесу сайанти. йам̣нӯна̄хам̣ са̄мам̣ паттачӣварам̣ пат̣ийа̄детва̄ кесамассум̣ оха̄ретва̄ ка̄са̄йа̄ни ваттха̄ни аччха̄детва̄ а̄ра̄мам̣ гантва̄ бхиккхӯхи саддхим̣ сам̣васеййа’’нти. атха кхо со пура̄н̣акулапутто кхӣн̣аколан̃н̃о са̄мам̣ паттачӣварам̣ пат̣ийа̄детва̄ кесамассум̣ оха̄ретва̄ ка̄са̄йа̄ни ваттха̄ни аччха̄детва̄ а̄ра̄мам̣ гантва̄ бхиккхӯ абхива̄дети. бхиккхӯ евама̄хам̣су – ‘‘кативассоси твам̣, а̄вусо’’ти? ким̣ етам̣, а̄вусо, кативассо на̄ма̄ти? ко пана те, а̄вусо, упаджджха̄йоти? ким̣ етам̣, а̄вусо, упаджджха̄йо на̄ма̄ти? бхиккхӯ а̄йасмантам̣ упа̄лим̣ етадавочум̣ – ‘‘ин̇гха̄вусо упа̄ли, имам̣ паббаджитам̣ ануйун̃джа̄хӣ’’ти. атха кхо со пура̄н̣акулапутто кхӣн̣аколан̃н̃о а̄йасмата̄ упа̄лина̄ ануйун̃джийама̄но етаматтхам̣ а̄рочеси. а̄йасма̄ упа̄ли бхиккхӯнам̣ етаматтхам̣ а̄рочеси. бхиккхӯ бхагавато етаматтхам̣ а̄рочесум̣. тхеййасам̣ва̄сако, бхиккхаве, анупасампанно на упасампа̄детаббо, упасампанно на̄сетабботи. титтхийапаккантако, бхиккхаве, анупасампанно на упасампа̄детаббо, упасампанно на̄сетабботи.