46. кан̣т̣акаса̄ман̣ераваттху

тена кхо пана самайена а̄йасмато упанандасса сакйапуттасса кан̣т̣ако на̄ма са̄ман̣еро кан̣т̣аким̣ на̄ма бхиккхуним̣ дӯсеси. бхиккхӯ уджджха̄йанти кхиййанти випа̄ченти – ‘‘катхан̃хи на̄ма са̄ман̣еро еварӯпам̣ ана̄ча̄рам̣ а̄чариссатӣ’’ти. бхагавато етаматтхам̣ а̄рочесум̣. ануджа̄на̄ми, бхиккхаве, дасахан̇гехи саманна̄гатам̣ са̄ман̣ерам̣ на̄сетум̣. па̄н̣а̄типа̄тӣ хоти, адинна̄да̄йӣ хоти, абрахмача̄рӣ хоти, муса̄ва̄дӣ хоти, маджджапа̄йӣ хоти, буддхасса аван̣н̣ам̣ бха̄сати, дхаммасса аван̣н̣ам̣ бха̄сати, сан̇гхасса аван̣н̣ам̣ бха̄сати, миччха̄дит̣т̣хико хоти, бхиккхунидӯсако хоти – ануджа̄на̄ми, бхиккхаве, имехи дасахан̇гехи саманна̄гатам̣ са̄ман̣ерам̣ на̄сетунти.