35. камма̄рабхан̣д̣уваттху

98. тена кхо пана самайена ан̃н̃атаро камма̄рабхан̣д̣у ма̄та̄питӯхи саддхим̣ бхан̣д̣итва̄ а̄ра̄мам̣ гантва̄ бхиккхӯсу паббаджито хоти. атха кхо тасса камма̄рабхан̣д̣усса ма̄та̄питаро там̣ камма̄рабхан̣д̣ум̣ вичинанта̄ а̄ра̄мам̣ гантва̄ бхиккхӯ пуччхим̣су – ‘‘апи, бханте, еварӯпам̣ да̄ракам̣ пассеййа̄тха̄’’ти? бхиккхӯ аджа̄нам̣йева а̄хам̣су – ‘‘на джа̄на̄ма̄’’ти, апассам̣йева а̄хам̣су – ‘‘на пасса̄ма̄’’ти. атха кхо тасса камма̄рабхан̣д̣усса ма̄та̄питаро там̣ камма̄рабхан̣д̣ум̣ вичинанта̄ бхиккхӯсу паббаджитам̣ дисва̄ уджджха̄йанти кхиййанти випа̄ченти – ‘‘аладжджино име саман̣а̄ сакйапуттийа̄, дуссӣла̄ муса̄ва̄дино. джа̄нам̣йева а̄хам̣су – ‘на джа̄на̄ма̄’ти, пассам̣йева а̄хам̣су – ‘на пасса̄ма̄’ти. айам̣ да̄рако бхиккхӯсу паббаджито’’ти. ассосум̣ кхо бхиккхӯ тасса камма̄рабхан̣д̣усса ма̄та̄питӯнам̣ уджджха̄йанта̄нам̣ кхиййанта̄нам̣ випа̄чента̄нам̣. атха кхо те бхиккхӯ бхагавато етаматтхам̣ а̄рочесум̣. ануджа̄на̄ми, бхиккхаве, сан̇гхам̣ апалокетум̣ бхан̣д̣укамма̄йа̄ти.

камма̄рабхан̣д̣уваттху нит̣т̣хитам̣.