5. бхаттаггаваттакатха̄
363. тена кхо пана самайена чхаббаггийа̄ бхиккхӯ дунниваттха̄ дуппа̄рута̄ ана̄каппасампанна̄ бхаттаггам̣ гаччханти, воккаммапи тхера̄нам̣ бхиккхӯнам̣ пурато пурато гаччханти, тхерепи бхиккхӯ анупакхаджджа нисӣданти, навепи бхиккхӯ а̄санена пат̣иба̄ханти, сан̇гха̄т̣импи оттхаритва̄ антарагхаре нисӣданти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ дунниваттха̄ дуппа̄рута̄ ана̄каппасампанна̄ бхаттаггам̣ гаччхиссанти, воккаммапи тхера̄нам̣ бхиккхӯнам̣ пурато пурато гаччхиссанти, тхерепи бхиккхӯ анупакхаджджа нисӣдиссанти, навепи бхиккхӯ а̄саненапи пат̣иба̄хиссанти, сан̇гха̄т̣импи оттхаритва̄ антарагхаре нисӣдиссантӣ’’ти! атха кхо те бхиккхӯ бхагавато етаматтхам̣ а̄рочесум̣…пе… ‘‘саччам̣ кира, бхиккхаве, чхаббаггийа̄ бхиккхӯ дунниваттха̄ дуппа̄рута̄ ана̄каппасампанна̄ бхаттаггам̣ гаччханти, воккаммапи тхера̄нам̣ бхиккхӯнам̣ пурато пурато гаччханти, тхерепи бхиккхӯ анупакхаджджа нисӣданти, навепи бхиккхӯ а̄санена пат̣иба̄ханти, сан̇гха̄т̣импи оттхаритва̄ антарагхаре нисӣдантӣ’’ти? ‘‘саччам̣ бхагава̄’’ти…пе… вигарахитва̄…пе… дхаммим̣ катхам̣ катва̄ бхиккхӯ а̄мантеси –
364. ‘‘тена хи, бхиккхаве, бхиккхӯнам̣ бхаттаггаваттам̣ пан̃н̃апесса̄ми йатха̄ бхиккхӯхи бхаттагге самма̄ ваттитаббам̣. саче а̄ра̄ме ка̄ло а̄рочито хоти, тиман̣д̣алам̣ пат̣иччха̄дентена париман̣д̣алам̣ нива̄сетва̄ ка̄йабандханам̣ бандхитва̄ сагун̣ам̣ катва̄ сан̇гха̄т̣ийо па̄рупитва̄ ган̣т̣хикам̣ пат̣имун̃читва̄ дховитва̄ паттам̣ гахетва̄ са̄дхукам̣ атарама̄нена га̄мо пависитаббо.
‘‘на воккамма тхера̄нам̣ бхиккхӯнам̣ пурато пурато гантаббам̣. суппат̣иччханнена антарагхаре гантаббам̣. сусам̣вутена антарагхаре гантаббам̣. оккхиттачаккхуна̄ антарагхаре гантаббам̣. на уккхиттака̄йа антарагхаре гантаббам̣. на уджджаггхика̄йа антарагхаре гантаббам̣. аппасаддена антарагхаре гантаббам̣. на ка̄йаппача̄лакам̣ антарагхаре гантаббам̣. на ба̄хуппача̄лакам̣ антарагхаре гантаббам̣. на сӣсаппача̄лакам̣ антарагхаре гантаббам̣. на кхамбхакатена антарагхаре гантаббам̣. на огун̣т̣хитена антарагхаре гантаббам̣. на уккут̣ика̄йа антарагхаре гантаббам̣.
‘‘суппат̣иччханнена антарагхаре нисӣдитаббам̣. сусам̣вутена антарагхаре нисӣдитаббам̣. оккхиттачаккхуна̄ антарагхаре нисӣдитаббам̣. на уккхиттака̄йа антарагхаре нисӣдитаббам̣ на уджджаггхика̄йа антарагхаре нисӣдитаббам̣, аппасаддена антарагхаре нисӣдитабба. на ка̄йаппача̄лакам̣ антарагхаре нисӣдитаббам̣. на ба̄хуппача̄лакам̣ антарагхаре нисӣдитаббам̣. на сӣсаппача̄лакам̣ антарагхаре нисӣдитаббам̣. на кхамбхакатена антарагхаре нисӣдитаббам̣. на огун̣т̣хитена антарагхаре нисӣдитаббам̣. на паллаттхика̄йа антарагхаре нисӣдитаббам̣. на тхере бхиккхӯ анупакхаджджа нисӣдитаббам̣. на нава̄ бхиккхӯ а̄санена пат̣иба̄хитабба̄. на сан̇гха̄т̣им̣ оттхаритва̄ антарагхаре нисӣдитаббам̣.
‘‘удаке диййама̄не убхохи хаттхехи паттам̣ пат̣иггахетва̄ удакам̣ пат̣иггахетаббам̣. нӣчам̣ катва̄ са̄дхукам̣ аппат̣игхам̣сантена патто дховитаббо. саче удакаппат̣игга̄хако хоти, нӣчам̣ катва̄ удакаппат̣иггахе удакам̣ а̄син̃читаббам̣ – ма̄ удакаппат̣игга̄хако удакена осин̃чи [осин̃чиййӣ (ка.)], ма̄ са̄манта̄ бхиккхӯ удакена осин̃чим̣су [осин̃чиййим̣су (ка.)], ма̄ сан̇гха̄т̣и удакена осин̃чӣти. саче удакаппат̣игга̄хако на хоти, нӣчам̣ катва̄ чхама̄йа удакам̣ а̄син̃читаббам̣ – ма̄ са̄манта̄ бхиккхӯ удакена осин̃чим̣су, ма̄ сан̇гха̄т̣и удакена осин̃чӣти.
‘‘одане диййама̄не убхохи хаттхехи паттам̣ пат̣иггахетва̄ одано пат̣иггахетаббо, сӯпасса ока̄со ка̄таббо. саче хоти саппи ва̄ телам̣ ва̄ уттарибхан̇гам̣ ва̄, тхерена ваттаббо – ‘саббесам̣ самакам̣ сампа̄дехӣ’ти. саккаччам̣ пин̣д̣апа̄то пат̣иггахетаббо. паттасан̃н̃ина̄ пин̣д̣апа̄то пат̣иггахетаббо. самасӯпако пин̣д̣апа̄то пат̣иггахетаббо. саматиттико пин̣д̣апа̄то пат̣иггахетаббо.
‘‘на та̄ва тхерена бхун̃джитаббам̣ йа̄ва на саббесам̣ одано сампатто хоти. саккаччам̣ пин̣д̣апа̄то бхун̃джитаббо. паттасан̃н̃ина̄ пин̣д̣апа̄то бхун̃джитаббо. сапада̄нам̣ пин̣д̣апа̄то бхун̃джитаббо. самасӯпако пин̣д̣апа̄то бхун̃джитаббо. на тхӯпакато омаддитва̄ пин̣д̣ипа̄то бхун̃джитаббо. на сӯпам̣ ва̄ бйан̃джанам̣ ва̄ оданена пат̣иччха̄детаббам̣ бхиййокамйатам̣ упа̄да̄йа. на сӯпам̣ ва̄ оданам̣ ва̄ агила̄нена аттано аттха̄йа вин̃н̃а̄петва̄ бхун̃джитаббам̣. на уджджха̄насан̃н̃ина̄ паресам̣ патто олокетаббо. на̄тимаханто кабал̣о ка̄таббо. париман̣д̣ало а̄лопо ка̄таббо. на ана̄хат̣е кабал̣е мукхадва̄рам̣ виваритаббам̣. на бхун̃джама̄нена саббо хаттхо мукхе паккхипитаббо. на сакабал̣ена мукхена бйа̄харитаббам̣. на пин̣д̣уккхепакам̣ бхун̃джитаббам̣. на кабал̣а̄ваччхедакам̣ бхун̃джитаббам̣. на аваган̣д̣ака̄ракам̣ бхун̃джитаббам̣. на хаттханиддхунакам̣ бхун̃джитаббам̣. на ситтха̄вака̄ракам̣ бхун̃джитаббам̣. на дживха̄ниччха̄ракам̣ бхун̃джитаббам̣. на чапучапука̄ракам̣ бхун̃джитаббам̣. на сурусурука̄ракам̣ бхун̃джитаббам̣. на хаттханиллехакам̣ бхун̃джитаббам̣. на паттаниллехакам̣ бхун̃джитаббам̣. на от̣т̣ханиллехакам̣ бхун̃джитаббам̣.
‘‘на са̄мисена хаттхена па̄нӣйатха̄лако пат̣иггахетаббо. на та̄ва тхерена удакам̣ пат̣иггахетаббам̣ йа̄ва на саббева бхутта̄вино хонти. удаке диййама̄не убхохи хаттхехи паттам̣ пат̣иггахетва̄ удакам̣ пат̣иггахетаббам̣. нӣчам̣ катва̄ са̄дхукам̣ аппат̣игхам̣сантена патто дховитаббо. саче удакаппат̣игга̄хако хоти, нӣчам̣ катва̄ удакаппат̣иггахе удакам̣ а̄син̃читаббам̣ – ма̄ удакаппат̣игга̄хако удакена осин̃чи, ма̄ са̄манта̄ бхиккхӯ удакена осин̃чим̣су, ма̄ сан̇гха̄т̣и удакена осин̃чӣти. саче удакаппат̣игга̄хако на хоти, нӣчам̣ катва̄ чхама̄йа удакам̣ а̄син̃читаббам̣ – ма̄ са̄манта̄ бхиккхӯ удакена осин̃чим̣су, ма̄ сан̇гха̄т̣и удакена осин̃чӣти. на саситтхакам̣ паттадхованам̣ антарагхаре чхад̣д̣етаббам̣.
‘‘ниваттантена навакехи бхиккхӯхи пат̣хаматарам̣ ниваттитаббам̣. паччха̄ тхерехи суппат̣иччханнена антарагхаре гантаббам̣. сусам̣вутена антарагхаре гантаббам̣. оккхиттачаккхуна̄ антарагхаре гантаббам̣. на уккхиттака̄йа антарагхаре гантаббам̣. на уджджаггхика̄йа антарагхаре гантаббам̣. аппасаддена антарагхаре гантаббам̣. на ка̄йаппача̄лакам̣ антарагхаре гантаббам̣. на ба̄хуппача̄лакам̣ антарагхаре гантаббам̣. на сӣсаппача̄лакам̣ антарагхаре гантаббам̣. на кхамбхакатена антарагхаре гантаббам̣. на огун̣т̣хитена антарагхаре гантаббам̣. на уккут̣ика̄йа антарагхаре гантаббам̣. идам̣ кхо, бхиккхаве, бхиккхӯнам̣ бхаттаггаваттам̣ йатха̄ бхиккхӯхи бхаттагге самма̄ ваттитабба’’нти.
пат̣хамабха̄н̣ава̄ро нит̣т̣хито.