4. анумоданаваттакатха̄

362. тена кхо пана самайена бхиккхӯ бхаттагге на анумоданти. манусса̄ уджджха̄йанти кхиййанти випа̄ченти – ‘‘катхан̃хи на̄ма саман̣а̄ сакйапуттийа̄ бхаттагге на анумодиссантӣ’’ти! ассосум̣ кхо бхиккхӯ тесам̣ манусса̄нам̣ уджджха̄йанта̄нам̣ кхиййанта̄нам̣ випа̄чента̄нам̣. атха кхо те бхиккхӯ бхагавато етаматтхам̣ а̄рочесум̣. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, бхаттагге анумодиту’’нти. атха кхо тесам̣ бхиккхӯнам̣ етадахоси – ‘‘кена ну кхо бхаттагге анумодитабба’’нти? бхагавато етаматтхам̣ а̄рочесум̣. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, тхерена бхиккхуна̄ бхаттагге анумодиту’’нти.

тена кхо пана самайена ан̃н̃атарасса пӯгасса сан̇гхабхаттам̣ хоти. а̄йасма̄ са̄рипутто сан̇гхаттхеро хоти. бхиккхӯ – ‘бхагавата̄ анун̃н̃а̄там̣ тхерена бхиккхуна̄ бхаттагге анумодиту’нти – а̄йасмантам̣ са̄рипуттам̣ екакам̣ оха̄йа паккамим̣су. атха кхо а̄йасма̄ са̄рипутто те мануссе пат̣исаммодитва̄ паччха̄ екако агама̄си. аддаса̄ кхо бхагава̄ а̄йасмантам̣ са̄рипуттам̣ дӯратова екакам̣ а̄гаччхантам̣. дисва̄на а̄йасмантам̣ са̄рипуттам̣ етадавоча – ‘‘каччи, са̄рипутта, бхаттам̣ иддхам̣ ахосӣ’’ти? ‘‘иддхам̣ кхо, бханте, бхаттам̣ ахоси; апича мам̣ бхиккхӯ екакам̣ оха̄йа пакканта̄’’ти. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, бхаттагге чатӯхи пан̃чахи тхера̄нутхерехи бхиккхӯхи а̄гамету’’нти.

тена кхо пана самайена ан̃н̃атаро тхеро бхаттагге ваччито а̄гамеси. со ваччам̣ сандха̄ретум̣ асакконто муччхито папати. бхагавато етаматтхам̣ а̄рочесум̣. ‘‘ануджа̄на̄ми, бхиккхаве, сати каран̣ӣйе а̄нантарикам̣ бхиккхум̣ а̄пуччхитва̄ ганту’’нти.