3. гамикаваттакатха̄

360. тена кхо пана самайена гамика̄ бхиккхӯ да̄рубхан̣д̣ам̣ маттика̄бхан̣д̣ам̣ аппат̣иса̄метва̄ два̄рава̄тапа̄нам̣ виваритва̄ сена̄санам̣ ана̄пуччха̄ паккаманти. да̄рубхан̣д̣ам̣ маттика̄бхан̣д̣ам̣ нассати. сена̄санам̣ агуттам̣ хоти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма гамика̄ бхиккхӯ да̄рубхан̣д̣ам̣ маттика̄бхан̣д̣ам̣ аппат̣иса̄метва̄ два̄рава̄тапа̄нам̣ виваритва̄ сена̄санам̣ ана̄пуччха̄ паккамиссанти! да̄рубхан̣д̣ам̣ маттика̄бхан̣д̣ам̣ нассати. сена̄санам̣ агуттам̣ хотӣ’’ти. атха кхо те бхиккхӯ бхагавато етаматтхам̣ а̄рочесум̣…пе… саччам̣ кира, бхиккхаве…пе… саччам̣ бхагава̄ти…пе… вигарахитва̄…пе… дхаммим̣ катхам̣ катва̄ бхиккхӯ а̄мантеси –

361. ‘‘тена хи, бхиккхаве, гамика̄нам̣ бхиккхӯнам̣ ваттам̣ пан̃н̃апесса̄ми йатха̄ гамикехи бхиккхӯхи самма̄ ваттитаббам̣. гамикена, бхиккхаве, бхиккхуна̄ да̄рубхан̣д̣ам̣ маттика̄бхан̣д̣ам̣ пат̣иса̄метва̄ два̄рава̄тапа̄нам̣ тхакетва̄ сена̄санам̣ а̄пуччха̄ паккамитаббам̣ [а̄пуччхитаббам̣ (сйа̄.)]. саче бхиккху на хоти, са̄ман̣еро а̄пуччхитаббо. саче са̄ман̣еро на хоти, а̄ра̄мико а̄пуччхитаббо. саче а̄ра̄мико на хоти, упа̄сако а̄пуччхитаббо. саче на хоти бхиккху ва̄ са̄ман̣еро ва̄ а̄ра̄мико ва̄ упа̄сако ва̄, чатӯсу па̄са̄н̣есу ман̃чам̣ пан̃н̃апетва̄ ман̃че ман̃чам̣ а̄ропетва̄ пӣт̣хе пӣт̣хам̣ а̄ропетва̄ сена̄санам̣ упари пун̃джам̣ каритва̄ да̄рубхан̣д̣ам̣ маттика̄бхан̣д̣ам̣ пат̣иса̄метва̄ два̄рава̄тапа̄нам̣ тхакетва̄ паккамитаббам̣. саче виха̄ро овассати, саче уссахати, чха̄детаббо, уссукам̣ ва̄ ка̄таббам̣ – ‘кинти ну кхо виха̄ро чха̄дийетха̄’ти. еван̃четам̣ лабхетха, иччетам̣ кусалам̣. но че лабхетха, йо десо ановассако хоти, таттха чатӯсу па̄са̄н̣есу ман̃чам̣ пан̃н̃апетва̄ ман̃че ман̃чам̣ а̄ропетва̄ пӣт̣хе пӣт̣хам̣ а̄ропетва̄ сена̄санам̣ упари пун̃джам̣ каритва̄ да̄рубхан̣д̣ам̣ маттика̄бхан̣д̣ам̣ пат̣иса̄метва̄ два̄рава̄тапа̄нам̣ тхакетва̄ паккамитаббам̣. саче саббо виха̄ро овассати, саче уссахати, сена̄санам̣ га̄мам̣ атихаритаббам̣, уссукам̣ ва̄ ка̄таббам̣ – ‘кинти ну кхо сена̄санам̣ га̄мам̣ атихарийетха̄’ти. еван̃четам̣ лабхетха, иччетам̣ кусалам̣. но че лабхетха, аджджхока̄се чатӯсу па̄са̄н̣есу ман̃чам̣ пан̃н̃апетва̄ ман̃че ман̃чам̣ а̄ропетва̄ пӣт̣хе пӣт̣хам̣ а̄ропетва̄ сена̄санам̣ упари пун̃джам̣ каритва̄ да̄рубхан̣д̣ам̣ маттика̄бхан̣д̣ам̣ пат̣иса̄метва̄ тин̣ена ва̄ пан̣н̣ена ва̄ пат̣иччха̄детва̄ паккамитаббам̣ – аппева на̄ма ан̇га̄нипи сесеййунти. идам̣ кхо, бхиккхаве, гамика̄нам̣ бхиккхӯнам̣ ваттам̣ йатха̄ гамикехи бхиккхӯхи самма̄ ваттитабба’’нти.